Ke Au Okoa, Volume VII, Number 11, 29 June 1871 — Ka hiamoe ana o ka mea i alohaia, S. Napahuelua. [ARTICLE]

Ka hiamoe ana o ka mea i alohaia, S. Napahuelua.

Ua kuu ka luhi a hiamoe aku la ka mea i alohaia S. Napahuelua, iloko o ka ilina ku hohonu manaonao, i kauo ia e na lima menemene ole o ka make, e moe mau ma ka opu o ka honua, ka mea ana ole. Ua kii mai la ka Ona nui o luna, ua lawe aku la i kana ukana nui o ka uhane, a waiho iho la ia'u me ke keiki, a me na makua, a me ka ohana.

o kaa kumakena, hele ana i ka hana a nei mea la he aloha. Ua noho oluolu au malalo o ka'u kane i hana ae la maluna. Ua maleia maua ma ka makahiki 1863, ma ka la 13 o Iune, a o ka nui o ko maua mau la o ka noho pu ana 8 makahiki, a wehe mai nei kela i ka pili a maua. A penei ka moolelo o kona make ana: I ka la 13 o Malaki o keia makahiki, pii aku la maua a me kekahi poe e ae i ka mauna, i ke kalai waa, me ka mai ole, a hiki ae la i ka la 16, a ma ke kakahiaka oia la, hora 9, o ka hoomaka mai la no ia o ka eha ma ka iwi hoehoe, a make koke aku la, me ka hakalia ole. Nolaila, ua haku iho au i kanikau nona malalo iho penei: He kanikau aloha keia nou e S. Napahuelua. Kuu kane i ke anu o ka mauna A ua iho la ka ua pulu elo kaua, Hoopu mehana aku i ka lau koa, He ahi ke kapa o kaua e mehana ai, E lala ai au me kuu kane aloha. Aloha ke kane ka hoa pili. I ka pili no kaua a hele e-, Haalele oe ia'u me ka luhi o kaua, Au wale iho nei au o kahi e pono ai, Auwe kuu kane eAohe kane ke hoa pili no ke anu. Kuu kane i ka ua lihau anu, Anu au a maeele i ko aloha, Aloha ko kupuna kane i ke kahea mai, Ko punalua hoi ka hoa olelo, Aloha ko makuakane i ka uwe ana iho, Aohe makua he hoa hele no ke ala, Haele ai olua i ka uka wao nahele, Ua hele kuu kane, ua haalele ia'u, Ua hoaikane aku la me hiku i ka uka, He keiki kupa oe he kamaaina no ia uka, Auwe kuu kane eAohe kane he hoapili no ke anu. Kuu kane i ka luna e kau mai ka ohia, Wehiwehi iho la kaua i ka lau akolea, Aloha ka ieie noho anu E pue ana i ke anu o ke kehau, A ka makani hoala hiamoe, Moe ole au a hia a i ko aloha, Na ka leo o ka manu kaua i hoala mai, I ka iku-a hele mai iluna o ka laau, Auwe kuu kane eAohe kane he hoapili no ke anu. Kuu kane i ka luna o ohia welo, I walea kaua i ke ala o ke kupukupu, Kuu kane i ka ua hehi mai i ka lau ki Pukukui iho la kaua i ke anu a ka amau. Hopuepue i ka ua kakahiaka, Hoopumehana aku i ka poli o ke kane, O ka luli ehu a ka lau kalo, me ka lau ko, Aloha wale na mea a kaua i luhi ai Luhi apa iho la kou kino i ko aloha, Auwe kuu kane eAohe kane he hoa pili no ke anu Kuu kane i ka wai o ka luuloa, Hoomaha aku i kai o poho kinikini, He kini he mano ke aloha o kuu kane, Aloha umi hale me ke ana wai Aloha ka hope i ka wai o Waieli, Aloha makalii i ka malu hale o kaua, E hiolani ai i na po anu o ka hooilo, Aloha ka pilina a ke kane me ka wahine, I ke kuka ana i na mea e pono ai, Auwe kuu kane eAohe kane he hoa pili no ke anu Kuu kane i ka malu hale o Haukipila, Oia malu hale a kaua e noho ai, I noho no i ka malu alani o Imamu, Aloha ka hale laau i ka wai o Kaha, Aloha uluhina i ka ua nihi pali Kawewe hau akula i kai o Nahuihu, Hoomaha aku i kai o ka puka uwai, Auwe kuu kane eAohe kane he hoapili no ke anu. Kuu kane i ka wai o Kikapena, Oia waianuhea a kaua e noho ai. Noho hoolohe i ka leo o ke kahuli, Huli hewa ana au o ke pili a kaua, I pili ia e kaua ka uka o Waiowewe, Wehe iho no i ka pili a kaua kaawale, Aloha ia nahele a kaua e hele ai, Aloha ka awapuhi luhe i ka palai, Lai mai la ka hana a ke keiki noho anu, I poe no au i ke anu me ke koekoe, Haha hewa na lima aole ke kane, Auwe kuu kane eAohe kane he hoapili no ke anu. Kuu kane i ka wai helu i ke ao uli, Uli hewa ka ili o ke kane i moe ia, Moe no a aloha i ka uka e makua, He makua ke kane he hoa hele no kahi mehameha, Ke ua maila ka ua iluna e ka muo, Ke hehi ae la i ka wai o ka puaa, Aloha ia wahi a kaua e noho ai, Noho no nana i ka uka e Kealaehu, Ehuehu mai nei ka luna e Kapahukapu, Kapukapu ke kino o kuu kane ike ole ia, Hoole ia mai au e honopu wai, O ka waimaka ia e haloi e kalu nei, Auwe kuu kane eAohe kane he hoapili no ke anu. Kuu kane mai ka ai kau iluna o ka laau, Lauahi wale aku no a kahi e pono ai, Pono ole loko i ke aloha o kuu kane, He kane he hoahele i ka uka o Iuai, Nai a kaua o ka pahoehoe wale i ka la, Lai iho la ke kula maalo kanaka ole, Aia ke kanaka i ka luna e ka aikao, Ua kaao kuu lei hala ua haule iho nei. Kuu kane i ka ihona e Pipiloa, Oia pahoehoe ana i ka la, Auwe kuu kane eAohe kane he hoa pili no ke anu

Kuu kane mai kuu aina hanau, Aloha hanaloa i ke one o ka hula ana, Aloha ka puamau i ka pali o Alaihi, E nana ana i ka nani o Puhau, I ke kai hawanawana mai i ka pue one, Aloha wai Olomao i ke kai o Kahuanui, A nui mai ko aloha e uwe no au e - Auwe hoi kuu kane eAohe kane he hoa pili no ke anu Kuu kane i ka wai o Kapuai, E nanea ana i ka olu o Kalahiki hale, E aha nui ana la ia e nonoho nei, E nana ana i ka huikau o na huelopoki, E halihali ana i ka ukana hoolei mai, O ka nunua a na kanaka i ka hale kuai, Aia ka ilina i ka luna o Haleola, Ola kuu kane i ka ai uwahi ole, I ka ai makana wale mai a ka ili keokeo, Auwe kuu kane eAohe kane he hoapili no ke anu. Kuu kane i ka la hoano o ka Haku, Na ka leo o ka hele kaua i hoala mai, He leo kahea i kana poe kauwa, E hele e imi e hana i kona makemake, E komo e ike i na koa o Pukaana, Ua puka kuu kane ua hala kele, Ua haalele i na hana iaea o keia ao, Ke noho la ma ka Paredaiso kahi maikai loa, Ke ike la i na anela pau ole i ka heluia, Malaila ka hosana me ka manaolana, Ke lana nei ka manao o kana poe kauwa, He mau Kula Sabati aia ma o, Auwe kuu kane eAohe kane he hoapili no ke anu MRS. KAULEI NAPAHUELUA Hookena, Kona, Hawaii, Iune 12, 1871