Ka Elele, Volume 1, Number 2, 25 April 1845 — MAKE. [ARTICLE]

MAKE.

0 Lota Mailou kekahi puukuEkalesia ma Molokai. Ika la 29 Feberuari iho nei kona make ana. He mai loihi kona; he hui, he opili a mahope he lolo a lilo kona ike, a me kona lohe a me kona ekemu ana. Hookahi la wale no nae o kona ike ole. Mahope loaa ia ia kekauwahi ike iho a me ka lohe a hai mai la oia i kona poe makamaka i ka lana nui o kona manao i ka Haku. A pela i moe ai a anahulu paha a o kona hiamoe ana no ia iloko o na lima o kona Mea Hoola.

Umi mau makahiki a keu paha o ko Loka noho ekalesia ana. A ma ia mau makahiki a pau, aole i ikea kona kapae ana i ka hewa; aka hoike maka mai la oia i na kanaka i kona manaoio ma kana hana ana. No kona aloha i ke Akua, a no kona ikaika i ka hooponopono ana, ua kohoia oia i puuku ekalesia. Ua malama pono ia kela oihana e ia ahiki ka wa i loaa mai ai ia ia kona mai i make ai.

Ua malu loa kona make ana. E like me ka ke Akua olelo pomaikai ka poe make ka i make iloko o ka Haku oiaio wahi oka Uhane. I ka pilikia o kona kino, aia pu o lesu me ia e hoomaha ana i kona eha. I ko’u wa i ninau aku ia ia, pehea kou manao, i mai kela he lana nui ko’u manao ia Iesu. Ake manao nei au ua loaa ia ia kahi hoomaha me Iesu i ka hale o kona makua.