Ka Elele Hawaii, Volume IV, Number 23, 25 July 1849 — Na Palapala Maoli. NO KA MAHI AI. [ARTICLE]

Na Palapala Maoli.

NO KA MAHI AI.

"Ma na aina naauao, he nui na hana maikai, aka, o ka mahi ai ka mea oi, He hana ia e ikaika ai ke kino, a e pono ai ka noho ana, a e lako ai hoi ka poe makaainana; a o kona hua hoi ka mea e ola ai na kanaka a pau. Nolaila mai ka waiwai e pono ai kela paahana keia paahana, ame ka waiwai e kalepa ai. Oia ke kumu nui e pono ai na hana e ae a pau. Nolaila, aohe aina waiwai ma ka honua nei, ke ole e hooikaika nui na kanaka ma ka mahi ai ana." Kl. Makawao, Iulai 11, 1849. I ka wanaao nei, ua hoohaluluia makou ma Makawao nei i ke olai. He wahi olai nui, aole nae i nui loa e like me ko Hawaii olai. He mea weliweli ka haalulu ana o ka honua. Ua oi aku ko laila weliweli mamua o ka weliweli i ka hekili, no ka mea, aole makaukau kanaka no ka olai. I ka wa malu loa, alaila haalulu iho la ka aina paa, a me ka mauna, a me ke kai, a me na mea a pau. Pono kakou e noho makaukau no ka hiki ana mai o na mea weliweli e poino ai, a e make ai Auhea oukou, e ka poe hoomaloka? Ma ka olai, e hiki ia oukou ke noonoo pono i ko oukou hope weliweli ke mihi koke ole oukou. I ka wa a oukou e manao ole ai, e hiki mai ke keiki a ke kanaka, alaila pehea oukou ? E hele no oukou, aole hiki ke hoole. E hele me ka makau, ame ka haalulu, a me ka poino. E poho ilalo i ka lua ahi, malaila e noho mau loa me ka uwe a me ke ui o na niho. No ia mea, e huli koke e hele io lesu la, e hoolohe, e malama i kona mau kanawai i ola oukou ma o Iesu la. Na'u na GELINA.