Ka Hoku o ka Pakipika, Volume I, Number 1, 26 September 1861 — He Kanikau Aloha no S. Luka. [ARTICLE]

He Kanikau Aloha no S. Luka.

Kuu kaikaina aloha e, Ka nani o Maemae, Ka oi o Nuuanu, Nana i apo mai ka la, Paa ka luna i Waolani, Na mea nani o Nuuanu, Kamakahala me ka lehua, Ka maile me kapalai, Ka ahihi me ka ieie, Ke kawelu o Lanihuli, E nawali ana i ka pali, Ka hala ala o Kekele, Awili puia me ka maile, Moani mai la kona ala, Ma ke kowa mai o Nuuanu, Na ka makani i lawe mai, Hauna huluhulu i ke Kaona, Ua lai no oe, ua lolii, Ua pale kana, ua hiolani, I Wahinekapu i Helani, Pau ko luhi, pau ko eha, Na kaumaha o ka Honua, Ua lewa lakou mahope ou, Kuu kaikaina aloha e, Owau no kou hikimua, O oe no kaukali hope, Mai kalua hookahi mai, Aole kaua i noho kue, Mai Kauai a Oahu nei, Me oe ke aloha a nui loa, Ko Maemae pua rose, Ko Kapena Wailele, Nome hala ole i Alekoki, Niolopua i Alewa, Ko Niupaipai Waiohinu, Na wilou e pipio ana, Ka oliva i mohala pono, I ulu mau i ke kakahiaka, I nohonoho i ke ahiahi, Pela ʻoe i hala e aku, I ke ala hoi ole mai, Aloha na keiki a kaua, A me ka wahine kanemake, Ua oluolu ia ma ka manao, He ehaeha ma ka naau, No ka moku e o kou kaula gula, Paa ole oe ia makou, Kuu kaikaina aloha e, Aloha ka la wela o Honolulu, Kahi au e hele mau ai, Ka piina, a me ka ihona, I ka ua, me ka makani, I ka la a me ka malu, I ka po a me ke ao, Pau kou ike ana i ka lehulehu, Na huikau i-o-i-a nei, Na kanaka a me na haole, Na kaa lio holo lealea, Na lio holopeki kauaheahe, Na hale pu me na moku, Na bila, na ohe, na pahu kani, Ka ulewehiwehi o ke kaona, Na la hanohano o ke aupuni, Lele kahauli i ka punawai. Na mea inu hoowela kino, I ko mea puni kauoha, Mai na makua o kaua, Ua hala ia, ua nalo oe, I ka palaho, i ka palahuki Kuu kaikaina aloha e! Aloha e!! A. B. W. KEALAKAA. Maemae, Oahu, Augate 27, 1861.