Ko Hawaii Ponoi, Volume I, Number 1, 18 June 1873 — No Geremania. [ARTICLE]

No Geremania.

Ke hoomauia la ka papaia ana o na kanaka o ia aina, mai ko lakou holo ana i na aina e e noho ai. Mamua aku nei, ua hopuia he elua mau Agena o Canada, ma Geremania, a ua hoopaaia iloko o ka hale paahao, no ka paipai ana i na kanaka e haalele ia Geremania, a e holo i Canada e noho ai. O na la hope o Aperila i hala aku nei, oia ka wa e hookolokolo ia ai ua mau kanaka la, aole i ikeia ka hope o ia hookolokolo. Ua pau maoli ke aho o na kanaka o Geremania i na oihana koa a ka Emepera Uilama, nolaila, ua makemake na kanaka e holo i kahi e e noho ai. O ka holo ana o na kanaka i kahi e, he mea ia e emi mai ai na koa o ka Emepera, a no keia mea ke kumu i papaia ai ka holo ana ma na wahi e.