Ke Kumu Hawaii, Volume I, Number 3, 10 December 1834 — Page 18

18 KUMU HAWAII. (DEK.

haawi mai ai i ka maha no kona mea aloha.
                Hookahi no ana palapala i heluhelu ai o ka ke Akua olelo no ia. Ina paha i heluhelu oia i kekahi palapala e ae, ua maikai no ia palapala, a ua hiki no ia ia e hoike mai i ko lakou ano, a me ka waiwai oloko.
                Ua nanea loa iho la au i ke kamailio ana me keia ohua aloha, a mahope ae o ka olelo nui ana, ua paina au i ka lakou ai maikai, manao iho la au e pono ia'u e hoi i ko'u wahi. Ua ike iki ia ke ano o keia mau mea iloko o ka lakou olelo i olelo mai ia'u i kuu kaawale ana aku.
                I mai la ka makuwahine kahiko. "E lawe pomaikai aku ke Akua ia oe i kou wahi. E hoomaikaiia mai ka la au i hiki mai ia nei, e ike ia maua na mea kahiko palupalu, ua ike hoi oe ia maua i ka manawa poino, naau ehaeha. E ke kumu, i ko manawa e pono ai, e hele nou mai, e hele hou mai. Owau ka wahine naaupo wale, aole e pono ia'u ke olelo pu me oe; aka, o ka'u kaikamahine nana no e olelo aku ia oe i ka'u Oia no ka'u mea aloha nui ia ka i koe ia'u, a o ko'u makemake i ke Akua e malama mai ia ia i mea paipai i kuu mau lala haalulu, a me kuu naau palupalu, a moe iho au, me kela kaikamahine a'u, ka i nalo aku nei iloko o ka lua.''
                I aku la au, "E hilinai oe maluna o ka Haku, a e hoomanao i kana olelo maikai. 'Owau no ia a hiki aku oe i kou wa kahiko loa, na'u no oe e lawe a hiki aku oe i ke poohina.'"
                I mai la ke kaikamahine, "E ke kumu, he aloha au ia oe i ko lokomaikai ia'u, a me na makua o'u. Ke manao nei au ua hoopomaikai mai ka Haku i keia halawai ana o kakou. Pela no ko'u ike maloko o'u iho. Aole no e poina i ko'u mau makua keia halawai ana o kakou; a he hauoli no ko'u, no ka mea, akahi wale no o ko makou ike ana i ke kumu malama io iloko o keia hale. Ua lokomaikai loa kuu Ola ia'u i kona kaili ana ia'u, 'me he momoku la noloko mai o ke ahi;' a ua hoike mai ia'u i ke alanui o ke ola, a me ka malu. O ka makemake nui o ko'u naau e hoonani aku ia ia, i kuu ola ana: a he makemake loa au e ike i na hoahanau o'u a pau e hauoli pu ana iloko o ka pono.''
                I aku la au, "Ke manao nei au ua akaka keia, ua hookoia mai ka olelo a ka Haku. "Eia kekahi, aia i ka wa ahiahi e malamalama io ana no ia manawa."
                I mai la kela, "Ae, ke manao nei au pela, a ke aloha nei au i ke Akua ilaila.''
                "E aloha aku oe ia ia no ka hoolilo ana ia oe i mea alakai no laua i keia malamalama.''
                "E ke kumu, oia no ka'u e hana nei, aka, i kuu manao ana i ko'u nawaliwali, a me ko'u pono ole, he hauoli au me ka haalulu.''
                I mai la ka elemakule maikai. ''E ke kumu, ua ike pono au na Haku no oe e uku mai no keia lokomaikai mai. E pule oe no maua na mea kahiko, na mea i lawehala'i, i ahonui mai oia ia maua i keia hora umikumamakahi. Ua hooikaika  nui o Elisabeta no maua ma ke kino no a me ka uhane, ke hana nui nei oia a po ka la, i luhi ole maua, ua makau-wau ia ia o nawaliwali auanei. Ua kamailio ia maua, a heluhelu no i ka olelo, a pule aku no maua, i ola maua a pakele i ka inaina e kau mai ana. Auhea oe, aohe lua o ua kaikamahine la i ka malama mai ia maua!''
                "E! aloha oukou a pau loa, a me na hoahanau o oukou a pau."
                Pane like mai la lakou, "E ke kumu, oiaio, aloha oe.''
                Pela makou i hookaawale ai ia manawa. I kuu hoi ana aku ma ko'u wahi, oluolu loa ko'u naau, manao iho la au, he mea pono keia no'u.
                Ma ia hope mai, hele pinepine au i keia hale oluolu, a mau no kuu ike ana i na mea e hoomaikai aku ai i ka Haku iloko o ua hana la.
                O ka nawaliwali kekahi, ua kauia mai la maluna o ua kaikamahine la, a i ka hookokoke ana aku i ka manawa e make ai, ua akaka loa iloko o kana hana, a me kona manao, a me kona ano a pau, ka mahuahua ana o ko ka Haku lokomaikai ia ia. He hauoli ko'u i ka hooakaka hou ana i kekahi palapala ana i kakau mai ia'u. He umikumamalua malama, mai ka manawa a'u i hele mua ai i ko lakou wahi, a loaa ia'u keia palapala. He manawa pilikia ia no'u, aole au hiki aku ilaila. O kana palapala no ka mea e hoomaopopo mai i kuu naau i ke ano o ka mea nana i kakau, a me na olelo hooikaika a'u i olelo pu me ia, a me kona mau makua. Oia hoi, ka mea i aloha hou mai nei ko'u naau i ko ka noho hune malama ana i ka pono, a ua kokua mai ia ia'u, e hoomanao aku i ka hauoli o kela la, i ka manawa e pili hou ai na kino, me na uhane o ka poe e hoonaniia, a noho mau aku ai me ka Haku.
 

                E hiki no i ke kanaka ke pii aku i ka lani, me ka ikaika ole, me ka waiwai ole, me ka hanohano ole, me ke akamai ole, me na makamaka ole. Aka, aole e hiki ke pii i ka lani, ke loaa ole ia ia ka naau hou.
 

NO KA ELEPANI.

                O ka Elepani ka mea nui o na mea wawae eha a pau. Ina e ku kekahi kanaka maluna o ke poo o kekahi, alaila, like ko laua kiekie me ko ka Elepani. Ewalu kapuai ke kiekie o kekahi, a he umikumamalima ko kekahi.
                Aole i like ke ano o ka Elepani me ko kekahi ilio e. Ua kiekie kona kua, a ua kuapuu: aole hoi i like me ke Kamelo. Ua nui loa kona kino; ua pokole kona ai, a ua nui hoi, ua palahalaha kona mau pepeiao aole nae i ku iluna, ua pili no i ke poo; ua uuku loa kona mau maka, e like paha me ko ke kao: ua nui loa kona mau wawae, a ua loihi, a ua manamana hoi, elima no maua, ua pokole nae. He ano e wale no kona ihu, ua loihi loa me he laau la, a hiki loa ka nuku ilalo i ka lepo; a ma kela aoao, keia aoao o ka ihu, he niho nui loa, oia ka mea i oleloia he niho Elepani.
                Ua keokeo loa kekahi Elepani, aole nae i nui na Elepani keokeo, he ahinahina wale no ka nui. Ua manoanoa kona ili, a ua puupuu, a ua huluhulu iki.
                Aia ma ua ululaau o Inia kahi e holoholo ai, a ma Aferika no hoi kekahi.
                O na lau laau a me na lala laau, a me na aa kana ai mea nui. E ai no hoi ia i ka mauua me ka raiki, a me ka huapalaoa ia hua aku ia hua aku.
                E hiki wawe loa ke hoolaka i ka Elepani. Ina e manao kakou e hoolaka i na holoholona e, a laka loa, e pono no ke hana i ka wa uuku: aka, e hiki no ke hoolaka i ka Elepani i na manawa a pau i ka wa uuku, a i ka wa nui, a i ka wa elemakule no: a e hiki no ke ao koke aku ia ia, a hoolohe mai no ia i ka leo o ke kahu.
                Aole makemake ka Elepani i ka mehameha. Ina i nui lakou, ka poe i noho pu, a hele pu, o ko lakou mea oluolu ia. Nolaila, ina i ikeia kekahi Elepani ma ka ululaau, ua maopopo i ka poe imi, ua nui no na Elepani kokoke mai, no ka mea, e hele pu wale no