Ke Kumu Hawaii, Volume I, Number 12, 15 April 1835 — Page 92

92 KUMU HAWAII. (APERILA,

nei, i ka mea a laua e noi aku ai, e haawiia mai na laua e ko'u Makua i ka lani."
                Ina e oiaio ka pule a kakou, ina aole e nele kakou. E ike auanei kakou i ka mana o ke Akua, e like me ko lakou la ike ana'ku malaila. Oia ka manao o ka poe haipule, ma na aina naauao. Ina pela ka mana o ka pule a na mea elua, pehea ka mana o ka ka poe pono a pau ma ka honua, ke huipuia i pule hookahi? E mana loa no; a e kuikeia'ku na mea keakea mai i ke aupuni pono, a pau koke no i ka mana o ke Akua. Nolaila lakou i hookaawale ai i keia la, i ka Monede akahi o ka malama, i la e noi pu ai i ke Akua. Eia ka lakou e noi aku ai, i piha ka honua i ka pono; i hiki wawe mai kona aupuni.
                He nui na makahiki i pule ai ka poe haipule a pau o ka honua i keia la hookahi; ua nui hoi kanaka hewa i huli i kanaka pono. Ua mahuahua ka pono, ma na aina naauao, i ka lakou pule; a ua uiuiki ae la hoi ka malamalama ma kekahi mau aina hoomanakii. Aka, o ka nui o kanaka, ma ka honua, aia no lakou ma ka hewa. Aole paha i makemake like ka poe a pau i heaia ma ko Iesu inoa, i ke noi aku ia ia. Ua lilo ka manao o kahi poe ma na mea e - ma na mea lapuwale o keia ao. Ua nawaliwali ka pule a kahi poe. He hapa loa ka poe noi ikaika, me ka makemake oiaio; a nolaila ke loiele aku nei ke aupuni o ke Akua. Nolaila ka nui o ka poe lohe i ka olelo ma ka hookuli. Nolaila ka wiwo ole o kanaka malama i ka Diabolo. Nolaila ka nui o kanaka koe aku i ka hoomana kii a me na hewa a pau a hiki i keia manawa e noho nei. Ina paha ua kuikahi ko Iesu poe kanaka a pau i ka pule aku ia ia, i keia la, ina ua haalulu ko keia ao a pau, i ka manao i ko lakou hewa.
                E na hoahanau Hawaii, ua huiia mai oukou ma ka ekalesia o ke Akua, ma ka poe i hoohanau hou ia e ke Akua, i aupuni nona, ma ka honua; a he pono hoi ke huipu ia ka oukou pule me ka ka poe pono a pau. Mai hoopoina oukou i ka pule malama hou. Aole nae e pono ke hele kino wale oukou i ka halawai. E hele me ka manao, me ka minamina ma ke aupuni o ka lani, me ke kaumaha i ka nui o ka poe noho ma ka malu o ka make.   E paalalo kakou malalo ae o Iehova, i ko mai ka kakou pule. Ina ku pono ka kakou hana i kona makemake, aole ia e aua aku i kona Uhane. E loaa mai no. E ike auanei kakou i kona mana, i   keia aina. E wiwo kanaka hewa. E haiia mai na hewa huna. E   haalulu hoi ka poe palaka. E auhee ka pouli. E lanakila ka malamalama, a e hauoli pu kakou.
D.B.

NO KA HOOKOLOKOLO ANA A ME KA HOOPAI ANA I KA POE HEWA.

                "Ua ike no hoi kakou i ka mea nana i olelo iho, no'u no ka hoopai ana na'u no ia e uku, wahi a ka Haku, eia hou hoi, Na ka Haku no e hoopai i kona poe kanaka. He mea weliweli ka haule ana iloko o na lima o ke Akua ola." Hebera 10, 30, 31. "E hele mai auanei ke Keiki a ke kanaka me ka hanohano o kona Makua a me kana poe anela; alaila e hoouku ia i kanaka a pau e like me ka lakou hana ana." Mataio   16. 27. "Aia hiki mai ke Keiki a ke kanaka i kona hanohano, me na anela hemolele pu me ia, alaila e noho iho oia maluna o kona nohoalii hanohano. A e hoakoakoaia na kanaka a pau loa imua o kona alo, a e hookaawale oia ia lakou e like me ke kahuhipa e hookaawale ai i ka hipa ame ke kao. A e hoonoho aku ia i ka poe hipa ma kona lima akau, a i ka poe kao ma kona lima hema. Alaila e olelo mai ke alii ia lakou ma kona lima akau; E   hele mai oukou, e ka poe i hoomaikaiia'i   e ko'u Makua, i loaa ia oukou ke aupuni i hoomakaukauia no oukou mai ka hookumu ana mai o ka honua. Alaila e olelo aku la oia i ka poe ma ka lima hema; E ka poe i hoohewaia, e   hele oukou pela mai o'u aku nei iloko o ke ahi aa mau, i hoomakaukauia'i no Diabolo a me kana poe anela. "Mataio 23: 31 - 34, 41.
                Na Iesu no e hookolokolo mai i na kanaka a pau, a e hoopai aku i ka poe hewa. No ia mea, aole e pakele kekahi i ka hookolokolo ana. Aole hoi e huna kekahi i kona hewa i hoopai ole ia. Ina paha na ke kanaka e hookolokolo, ina pakele paha kekahi i ka hookolokolo pono ana, nalowale paha ia iwaena o ka lehulehu o kanaka, a hunapaha ia i kona hewa i nalowale paha ia iwaena o ka lehulehu o kanaka, a huna paha ia i kona hewa i nalowale i ka   lunakanawai. Aka, aole loa pela. Na Iesu no e hookolokolo. A hiki mai ka la hookolokolo e nana pono mai auanei kona mau maka i kela kanaka, i keia kanaka, me na wahine a me na kamalii, a e hookolokolo auanei ia ia lakou a pau pakahi. Aole nalowale kekahi mea ia ia. A noho kekahi me ka mihi ole a pau keia ola ana, a hiki mai ka la hookolokolo, aole loa e hiki ia ia e pale aku i ko Iesu mau maka i ole kela e hookolokolo ia ia. Aole hiki i ka mea mihi ole e komo aku i ka lani i ka hele pu ana me ka poe manaoia. Aole hiki ia ia e hoopunipuni i ka mea nana kakou e hookolokolo. Ua ike no kela i na manao a pau o ko kakou naau.
                A lilo ke Akua i mea makemake ole ma ka pono, a lilo kona mau maka i ka makapo, a lilo hoi kona lima i mea nawaliwali, alaila aole paha hoopaiia ka hewa o ka poe mihi ole a pau. Aka, ina he mea mau ko ke Akua makemake ma ka pono, a he mea mau kona makaala,   a he mea mau hoi ka ikaika o kona lima, ina e hoopai auanei ia i ka   poe mihi ole a pau.
                "Ike aku la au i ka nohoalii keokeo nui, a me ka mea e noho ana iluna iho, holo aku la ka honua a me ka lani mai kona alo aku, aole loaa hou kahi no laua. A ike aku la au i ka poe make, i ka poe uuku a me ka poe nui, e ku ana imua o ka nohoalii; a weheia iho la na buke: a weheia no hoi kekahi buke hou, oia hoi ka buke o ke ola. Ua hoopaiia ka poe make ma na mea i palapalaia iloko o na buke, mamuli o ka lakou hana ana. Haawi mai la ke kai i ka poe make maloko ona, a haawi mai ka make a me ka po i ka poe make iloko o laua; a hoopaiia kela mea keia mea o lakou, e like me ka lakou hana ana. A i ole i palapalaia kekahi iloko o ka buke o ke ola, kiolaia'ku la oia i ka loko ahi. "Hoikeana 20: 11-13, 15.
D.B.L.

                "Heaha la auanei ko ke kanaka pomaikai   ke loaa mai ia ia ke ao nei a pau a lilo aku kona uhane?"
                "E olioli, e ke kanaka ui, i kou opiopio   ana, e hoohauoli hoi kou naau ia oe iho, i na la o kou ui ana; a e hele hoi oe ma ka aoao o kou naau iho, a ma na mea hoi o kou mau maka e ike nei. Aka, e hoomanao oe, na Iehova oe e hookolokolo mai ai no keia mau mea."