Ke Kumu Hawaii, Volume I, Number 12, 15 April 1835 — Page 93
1835.) KUMU HAWAII. 93
HELU 18.
KA EPISETOLE A PAULO I KO
ROMA.
MOKUNA 7. - PAUKU 1 - 14.
Mei 4 - 17.
Aole anei i ike oukou e na hoahanau (no ka mea ke olelo aku nei au i ka poe i ike i ke kanawai) ua kau ke kanawai maluna o ke kanaka i kona wa e pau e ola nei.
2 No ka mea, o ka wahine mea kane, ua paa ia i kana kane ma ke kanawai, i kona wa a pau e ola ana kana kane, a make ke kane, ua kuuia ia mai ke kanawai aku o kana kane.
3 No ia hoi, e kapaia ia he wahine moe kolohe ke mare ia i ke kane hou i ka wa e ola ana kana kane, aka, ina i make ke kane, ua kuuia ia mai ke kanawai aku aole ia e kapaia he wahine moe kolohe ke mare ia i ke kane e.
4 Pela hoi oukou, e na hoahanau, ua make oukou i ke kanawai, ma ke kino o Kristo, i mareia'i oukou i ka mare hou, i ka mea i hoala hou ia mai waena mai o ka poe make, i hoohua kakou i ka hua no ke Akua.
5 No ka mea, i ka wa i noho ai kakou ma ke kino, o ko kakou mau kuko hewa no ke kanawai, ua hooikaika maloko o ko kakou mau lala e hoohua mai i ka hua no ka make.
6 Ano hoi ua kuuia kakou mai ke kanawai, ka me ai paa pio ai kakou, no ka mea, ua make kakou ia mea, i malama ai hoi kakou i ke Akua me ka hou ana o ka uhane, aole ma ke kino o ka palapala kahiko.
7. Heaha hoi ka kakou e olelo nei? O ka hewa anei ke kanawai? Aole loa; aka, ma ke kanawai wale no i ike ai au i ka hewa. No ka mea, ina aole i papa mai ke kanawai Mai kuko wale aku oe, ina aole au i ike i ke kuko ana.
8 Aka, ma ke kauoha i loaa'i ka hewa ka wa maopopo, hoala ae la ia i keia kuko wale i kela kuko wale iloko o'u; no ka mea, me ke kanawai ole, ua make ka hewa.
9 No ia hoi, ola no au mamua me ke kanawai ole, a hiki mai ke kauoha, ola ae la ka hewa,
10 A make iho la au. Oia, ua loaa ia'u o ke kauoha e ola'i, he mea ia e make ai.
11 No ka mea, loa aua la i ka hewa ka wa maopopo ma ke kauoha, ua puni au ia ia, a ua make au ia ia ma ia mea,
12 Nolaila, ua hemolele ke kanawai, a ua hemolele hoi, ua pono, ua maikai ke kauoha.
13 Ua lilo anei ka mea maikai i make no'u? Aole loa ia, aka o ka hewa, i ike ia hoi ia he hewa io, e hana ana i ka make iloko o'u ma ka mea maikai, i akaka ae la ma ke kauoha he ema lawehala loa ka hewa.
14 No ka mea, ua ike no kakou, ma ko ka uhane ke kakawai, aka, ma ko ke kino wau, ua kuaiia na ka hewa.
KA HOOMOAKAKA ANA.
1 Ua olelo aku o Paulo i ka poe Iudaio ma Roma a me na mea e ae i ike i ke kanawai ia Mose, a ua manao no ia he maopopo ia lakou ke kau ana o ke kanawai maluna o ke kanaka i ka wa e ola ana ia kanaka.
2 O ke kanawai mare, he mea ia e paa ai ka wahine i kana kane, i wahine nana wale no i kona wa e ola ana, a make ia kane alaila kaawale ka wahine. Me he mea nalo la ia ia, ia kanawai mare.
3 Ina e mare aku ia, a i hoao aku, a i moe aku paha i ka mea e, he wahine moe kolohe no ia, ua pili ke kanawai mare ia ia ke make ole kana kane. Aka i make ke kane, he pono no, aole hewa i ke kanawai ke mare hou aku.
4 Ina ua pau ka oukou manao ana i ke kanawai me he mea la e maikai ai ko oukou naau, aole hilinai hou ilaila, i mea e maikai hou ai oukou a i mea e hoaponoia'i, alaila, he pono ke mare hou ia no hoi oukou me Iesu. I ko oukou paulele ana ma ka make ana o Iesu, ua oki ai ko oukou manao lana ana ma ke kanawai; a ua lilo oukou no Iesu, ka mea i hoolaia i mea e hoohua ai oukou i ka hua pono no ke Akua. I ke kokua ana mai o Iesu, e hiki ai ia oukou ke malama i na kauoha a ke Akua e hoonaniia'i kona inoa. Make ko Iesu kino i pili ole ai ke kanawai ia oukou. Heb. x 5 - 10 Kol. i. 22. ii. 24. 1 Pet. ii. 24. Ep. ii. 15.
5 I ko kakou noho ana mamuli o ke kino, aole hoi i hoolilo ia i mea hou, ilaila ua mahuahua ke kuka hewa no ka ikaika o ke kanawai; hooikaika ua manao hewa la iloko o ko kakou kino e hana kakou i na mea e make ai ko kakau uhane.
6 Aka ua pau ia noho ana, aole e pili hou ia kanawai, aole hoi e hooikaika hou ma ia aoao kahiko, mawaho wale no ma ke kino, aka e malama kakou i ke Akua ma ka Uhane, me ka naau oiaio.
7 Me he ninau la a kekahi. Ua lilo anei ke kanawai i hewa, i mea hoi e hana aku ia ma ka hewa? Hoole o Paulo, Aole loa, He mea no nae ia e ikeia i ka hewa. A ua hoolilo no hoi ka naau hewa i ke kanawai i mea e mahuahua ai kona kuko hewa. I mai la e Paulo, ina aole kanawai, aole au i ike i ka hewa e like me ko'u ike, ana, ano. He hewa no ko'u aole he nui e like me kuu hewa me ka ike i ke kanawai. Ioane xv 22-26.
8 O ka naau hewa, me he hoahakaka la me ke kanawai, a ike i ke kauoha, a me ke kapu, a me ka papa ana mai o ke kanawai, lele aku no ia me kona ikaika nui, e pale aku, e kaua aku, a e kinai aku i ke kanawai, hoomaau no hoi e ake e lanakila maluna o ke kanawai pela iloko o ka naau. [Me ke holoholona hihiu la, ina i hooheiia i ke kaula e hoolakaia, oni ikaika no ia, kupaka, huhu, inaina loa, e ake no e hemo. Ina aole kaula, aole mea nana e hoohei, ua moe malu paha ia, ua walea i kona wahi e hele ai.] Ina aole kanawai, moe malie ka naau, nanea no i kona aoao kahiko, noho hihiu aku, aole launa i ke Akua, aole hoi ona hoahakaka.
9 I ka wa i kaawale ai ke kanawai, aole i komo i ka naau o Paulo, me he mea pono la ia, aole i pili i ka make; a maopopo mai ke kauoha, alaila, hooikaika ka hewa a nui ia,
10 Alaila pili no ia i ka maka, me he mea hewa pono la. O kona make no ia. Ike iho la ia, O ka uku no ka hewa he make no ia." O ke kanawai a ke Akua i haawi mai i mea e pololei ai na kanaka, a e ola'i hoi, ua maopopo no ia ia Paulo he mea e make ai, i kona ku e ana.
11 No ka mahuahua ana o ka hewa ma ke kanawai ua puni ke kanaka i kona kuko iho. Manao ka naau, o kona kuko, oia ka pono, aole hoi i pono ka papa ana o ke kanawai, ua puni no ia malaila, a ua make, na mea ua alakai hewa ka naau hoopunipuni, ma kahi e make ai.
12 No ia mau mea ua akaka no ka hemolele o ke kanawai. He hemolele io, he pono io, he maikai io ko ke kauoha a ke Akua, aole loa i like me ka naau, hewa, a me ke kuko hewa.
13 Me he ninau la keia a kekahi, "Ina he mea maikai ke kanawai e like me kau i olelo mai nei, ua lilo anei ia i mea e make ai nou?" Hoole aku la o Paulo, aole lilo ke kanawai i mea e make ai nou, aka o ka hewa kou mea e make ai. O ka hana ino ana o ka naau i ke kanawai maikai, e make ai, pela i akaka ai ke ano o ka hewa, he hewa io, he ino loa, he lawehala nui wale, he mea e hoowahawaha loa ia'ku.
14 Ua maopopo i ka Iesu mau haumana, o ke kanawai o ke Akua, he mea ia mamuli o ke ke Akua Uhane, aka o ke kanaka, mamuli o ke kino kanaka no ia, mamuli o ka hewa, ua kuai ia e hana hewa, ua lilo ia i kauwa na ka hewa, he kauwa hooluhi na kona kuko iho. Pela no paulo i kekahi manawa.
HE MAU NINAU.
vii 1 Olelo Paulo ia wai?
Pehea ka loihi o ke kau ana o ke kanawai maluna o ke kanaka?