Ke Kumu Hawaii, Volume I, Number 17, 19 August 1835 — Page 129

KE KUMU HAWAII.
HE PEPA HOIKEIKE I NA MEA E PONO AI KO HAWAII NEI.
"O ka pono ka mea e pomaikai ai ka lahuikanaka; aka, o ka hewa ka mea e hoinoia'i na aina."
Buke 1. HONOLULU, OAHU, AUGATE 19, 1835. Pepa 17.

NO KA MAKE O KEKAHI WAHINE.
"E hoomanao i ka wahine Lota."

                I ko oukou heluhelu ana i ka moo-olelo a Lota wahine, aia no ia, Kino xix, e hoomanao oukou i elua mea, O kana hana ana, a me kona make ana.
                O ka hana a ka wahine Lota i hana'i, pehea ia? I ka nana aku, ua pololei ia, ua maikai. E noonoo oukou. I ke kakahiaka o ka la a Iehova i luku mai i ko Sodoma poe, "hele aku la o Lota iwaho i kana mau hunonakane i mare i na kaikamahine ana, i aku la, "E ala ae e holo iwaho o keia wahi, no ka mea, e luku mai ana o Iehova i neia kulanakauhale. A manao iho la kana mau hunonakane, he hoopunipuni kana." Hoole lakou - aole haalele i ko lakou wahi e noho ai, a make pu lakou me ko laila poe. Aole pela ka wahine a Lota. Palele ia i ke Akua. Makau aku la i ka huhu o Iehova. Haalele aku la ia i ua kulanakauhale la me kana kane e like me ke kanawai o Iehova.I ka nana aku, ua maikai no kana hana ana.
                Pele paha ka oukou hana ana, e na hoahanau. Mamua, lohe oukou i ka ke Akua olelo weliweli, "E auhulihia ka poe hewa ilalo i ka po." "I mihi ole oukou, e pau pu oukou i ka make." I hanau hou ole ia ke kanaka, aole loa oia e ike i ka aupuni o ke Akua." "O ke mea paulele ole aku i ke Keiki, aole oia e ike i ke ola; ke kau mai nei ka huhu o ke Akua maluna iho ona."
                A lohe oukou, i keia mau olelo, walania iho la ko oukou mau naau, makau iho la, a ninau mai la oukou, "Heaha ka makou e hana'i i ola makou?" A mahope iho, huli oukou i ka ke Akua olelo i ke ao a me ka po. Pule pinepine oukou i ke Akua. Komo oukou iloko o ka hale pule i kela Sabati, keia Sabati me ka makemake i ka Iesu olelo maikai. Hele pinepine oukou i ka oukou kumu, me ka manao e haawi aku, i ko oukou kino, a me ka naau, a me ka uhane a pau loa, i ka Haku, i lilo ai oukou i poe ohua mau loa nona.
                Pela oukou i hana'i a pau oukou i ke komo iloko o ko Iesu ekalesia. Ano la, manao paha oukou, ua maikai loa ko oukou noho ana, ua ola oukou. Ke hai aku nei au ia oukou, mai manao kiekie oukou. olioli oukou me ka haalulu. Nui a poe ma kahi kokoke i ke aupuni ka lani, aole nae lakou i komo. I ai o Iesu, "Nui ka poe e olelo mai ana ia'u ia la, E ka Haku, e ka Haku, aole anei makou i ao aku ma kou inoa; a i hana aku i na hana mana he nui ma kou inoa? Alaila, e hai aku au ia lakou, aole au i ike ia oukou, e haele oukou pela mai o'u aku nei, e ka poe hana ino." He mea e pono ai anei ka lani, aole nae e komo? Aneane e puka ka wahine a Lota, iloko o Zoara, iloko e ka puuhonua a Iehova i hoomakaukau ai no Lota, aole nae e puka.
                2. E hoomanao oukou i ka make ana o ka wahine a Lota.
                He mea weliweli kona make ana. He mea kupanaha. Aole make ua wahine la i ke ahi me ko Sodoma poe; aole make i ka pahi kaua; aole make i ka mai e like me ka nui o kanaka. Lilo iho la ia i kukulu paakai. No ke aha la i make oia pela? He wahine hana ino paha? He wahine pepehi ia hai, he aihue paha, he moe kolohe paha? Aole loa. He wahine puni waiwai ia. Eia kona hewa. "Alawa ae la na maka o kana wahine mahope ona." Minamina kona naau i ka waiwai a laua i waiho ai malaila; i ka poe holoholona, i na kala, a me ko laua aahu. Ua poina ia ia ka loko maikai mai o Iehova, i kona hoopakele ana mai ia ia, a me kana kane, a me ka laua mau kaikamahine elua. Alawa ae la na maka o ua wahine nei mahope ona me ke kuko hewa aku, no ia mea, huhu mai la o Iehova ia ia, a hoolilo mai ia ia ia i kukulu paakai.
                Mai manao oukou, e na hoahanau, e lilo i ka make mau loa, ka poe wale no i hihia i ke kanawai o ka aina, ka poe hana hewa me ko lakou mau lima. No ka hewa o ka naau, no ka hewa i ike ole ia e kanaka, e haule ilalo i ka po ka nui o kanaka. E hoomanao oukou i ka wahine a Lota. Ua make ia i ka puniwaiwai: a nui no ka poe i make pela. No ia mea, hooikaika o Iesu i na haumana ana, e malama o make lakou malaila. Eia kana, - "E manao, e malama ia oukou iho i ka puni waiwai. Mai hoahu oukou i ka waiwai no oukou ma ka honua. No ka mea, ma kahi e waiho ai ko oukou waiwai, malaila pu no hoi ko oukou naau." Ua akaka lea ia, o ka mea hoahu i kela mea, keia mea ma ka honua nei, o ka mea e hahai mau aku mamuli o ka waiwai me ka manao ole i ko ke Akua. Aneane like loa ia me ka mea malama kii. Ua pili kona manao i keia ao, a e make pu oia me keia ao.
                E na kanaka a me na wahine ma ka ekalesia, e noonoo oukou i ka moo-olelo no ka wahine a Lota. E hoomanao oukou ia ia. E hoomanao i kana hana ana, a me kona make ana; a e malama oukou ia oukou iho. Mamua, hele ae la ua wahine la, ma ke ala ola me ka olioli