Ke Kumu Hawaii, Volume I, Number 21, 14 October 1835 — Page 166

168 KUMU HAWAII. (OKATOBA,

NO KEKAHI HELE ANA MA KA LA SABATI.

                Ua pono ka hele ana i ka halawai, Ina kokoke ka halawai, aole loihi loa, alua paha hora a hiki malaila, e pono ke hele. E pono ke hele wawae, e pono hoi ke holo ma ka lio.
                A e noho ma ka hale o na kamaaina i ka manawa kaawale, aole halawai e noho malie no. A pau ka halawai ahiahi, alaila hoi aku. Ina paha loihi loa ko oukou wahi, me ka loihi mai Kawaihae a hiki i Waikoloa ma Waimea, aole pono ke hele, aole hoi pono ke hoi aku ma ia la. Ina pela ka loihi, ina pono ke hele ma ka poaono, a noho ma kahi halawai a noa ke kapu, alaila hoi. Ina hele oukou ma ke la Sabati mai kahi loihi e hoino mai paha ka poe hewa ia oukou - a manao lakou no ka lealea paha ka oukou hele ana - a lilo paha  auanei lakou ma ka lealea ma ia la no ka lakou kuhi ana, ua lilo oukou malaila. L.L.

NO KEKAHI HANA MA KA LA SABATI

                Ua pono ka hele ana e ike aku i ka poe mai a me ka nawaliwali, e hooluolu aku ia lakou, e haawi aku ia lakou i wahi ai paha, i wahi kapa paha, i wahi laau paha. Ua pono no ia. E pono hoi i ka poe kahuna lapaau a me ka poe kahuna pule, a me kekahi haipule, e hele ma ia la, e hoike aku i ka ke Akua olelo i ka poe mai, a e pule pu me lakou i ola ka lakou mai, a i makaukau hoi ko lakou mau uhane no ka lani. Ina noho kokoke mai ka poe mai, ua pono ia hele ana. Aole pono ke hele nui aku, kela hoahanau, keia hoahanau kela makamaka, keia makamaka, a kela hoalauna, keia hoalauna. — O ka hele kakaikahi ana, oia ka pono. - O ka hele wale ana e ike wale no, aole paha pono. —Ina mai loa ka mea mai, a kokoke make, alaila hiki ke hele nui aku — na hoahanau, e ike aku — i ka mea e make ana — e hele no me ke aloha, a me ka noonoo ana i ka naau, a me ka hoomanao ana, mamuli pau lakou i ka make. Nolaila e pono ia lakou ke wikiwiki i ka hoomakaukau ana no ka la e make ai.
                Ina paha e noho ana ka poe mai ma kahi loihi e aku, a he poe makamaka no malaila, he poe hanai, he poe malama i ka mai, aole pono ke hele aku malaila ma ka la Sabati. E hiki i ke kahuna lapaau, e hiki no hoi i kekahi hoahanau ke hele aku, ke nele ka mea mai i ka makamaka ole a me ka hoahanau ole.
                A ina ua lohe ae oukou e make ana ka hoahanau mai, e noho ana ma kahi loihi e aku, e hiki paha ke hele malaila e ike aku.
                A o ka hoohainu ana a me ka hanai ana i na holoholona, a me ke kokua ana, i ka poe popilikia - ka poe eha, i ke kanaka paha e eha ana i ka holoholona paha, ua pono no ia hana ana ma ka la kapu. Ke kauoha mai la o Iesu ia kakou, e hana lokomaikai aku i kela mea, i keia mea.
                Eia hoi kekahi hana hiki ma ka la Sabati - Ina e wela ana ka hale i ke ahi e pono no ke kinai i ke ahi.
                Ina he mai ko kekahi poe — a he nawaliwali paha e pono no ke kahu i ke ahi a e hana i wahi mea ai paha i wahi mea inu paha i mea e oluolu ai lakou -ua pono no ia hana ana a me na hana like me ka la Sabati. L.L.

AI O KA LA.
HELU 25.
KA EPISETOLE A PAULO I KO ROMA.
MOKUNA 13. 8 - 14, 14: 1 - 7.

                MOKUNA xiii. 8. E hookaa aku i ka oukou aie a pau, o ke aloha o kekahi i kekahi ke kaa ole; no ka mea, o ka mea i aloha ia hai, oia ke malama i ke kanawai.
                9 No ka mea, eia, Mai moe kolohe oe; Mai pepehi kanaka oe; Mai aihue oe, Mai hoike wahahee oe; Mai kuko oe: a ina he kanawai e ae, ua komo poko ia iloko o keia olelo, o nei, E aloha oe i kou hoalauna e like me oe iho.
                10 Aole hana hewa aku ke aloha i kona hoalauna; nolaila o ke aloha ka hooko ana i ke kanawai.
                11 Malaila hoi oukou, e hoomanao ana i ka manawa, eia ka hora e ala, i kakou mai ka hiamoe ana, no ka mea, ano ua kokoke mai ko kakou ola, aole i ko kakou wa i manaoio ai.
                12 Kokoke pau ka po, kokoke mai hoi ke ao, nolaila e haalele aku kakou i na hana o ka pouli, a e aahu i na mea kaua no ka malamalama.
                13 E hele pono kakou me ka hele ana i ka la, aole me ka uhauha ana a me ka ona ana, aole me ka moekolohe ana a me ka makaleho ana, aole me ka hakaka ana a me ka ukiuki ana.
                14 Aka e hookomo oukou i ka Haku ia Iesu Kristo, aole e hoomakaukau no ke kino mamuli o kona mau kuko.
                MOKUNA xiv:1. E launa aku oukou i ka mea nawaliwali i ka manaoio ana, aole hoi e hoomahuahua i ke kanalua ana o kona manao.
                2 Ua manao kekahi e pono ke ai ia i na mea a pau, aka o ka mea nawaliwali, ua ai no ia o na laauikiai.
                3 Mai hoowahawaha aku ka mea e ai ana, i ka mea i ai ole, aole hoi ka mea e ai ole ana, e hoahewa i ka mea i ai; no ka mea ua launa mai ke Akua ia ia.
                4 Owai oe ka mea e hoahewa ana i ka hai kauwa? Aia no i kona haku ponoi kona ku paa ana, a o kona haule ana; a e hooku paa ia no ia, no ka mea, e hiki no i ke Akua ke hooku paa ia ia.
                5 Ua manao kekahi, ua oi aku kekahi la mamua o kekahi la, manao no hoi kekahi ua like na la a pau: he pono ke hoomaopopo lea ia keia mea kela mea kona manao iho.
                6 O ka mea e malama i ka la, e malama no ia no ka Haku; a o ka mea i malama ole i ka la, no ka Haku no kona malama ole ana. A o ka mea i ai, ua ai no ia no ka Haku, no ka mea, ua hoomaikai aku oia i ke Akua; a o ka mea i ai ole, no ka Haku kona ai ole ana, a hoomaikai aku no ia i ke Akua;
                7 No ka mea, aohe mea o kakou e ola ana nona iho; aohe hoi mea e make nona iho.

KA HOOMOAKAKA ANA.

                MOKUNA xiii; 8. Mai hoole i ka aie, mai hoopanee aku i ka hookaa ana; e hookaa koke i ka aie a pau a oukou i aie ai, i ke kuai ana a i ka hoolimalima, i kaawale oukou, he pono hoi ke noho kaawale aole kaumaha i ka aie. Aka he mea mau ke aloha, aole kaa ia aie. E aloha mau kekahi i kekahi, aole e oki. O ka mea i aloha ia hai oia ke malama i ke kanawai. He mea mau ke kanawai o ke Akua, a o ke aloha ka io o kona mau kauoha.
                9 No ka mea eia ke kanawai o ka Haku, mamuli o ke aloha, Mai moekolohe, aole ku ia i ke aloha maoli; mai pepehi kanaka, aole ku ia i ke aloha; mai aihue, aole ku ia i ke aloha, mai hoikewahahee, aole ku ia i ke aloha; mai kuko i ka hai, a o na kauoha e ua komo pu no hoi iloko o keia kanawai, E aloha oe i kou hoalauna e like me oe i aloha ai ia oe iho. E manao hoi oe, o kona pomaikai ana, he waiwai makamae ia e like me ka pomaikai ana ou iho.
                10 O ka mea i aloha io ia hai aole ia e hana hewa aku ia ia; no laila o ke aloha oia ke hooko i ke kanawai.
                11 Malaila mau oukou e hana'i, ma keia mau kauoha a pau, me ka noonoo pono ana, eia ka manawa e haalele ai i ka palaka a me ka nanea, a e ala io ai kakou e hana, no ka mea, ke kokoke mai nei ka pomaikai ana o kakou i ka lani ano. Ua loihi aku i ka wa i manao ai kakou i kinohou. Pokole ke koena o ko kakou wa ma ka honua.
                12 Eia ka pili o ke ao, kokoke hala ka wa naaupo o ko kakou noho ana,