Ke Kumu Hawaii, Volume III, Number 3, 5 July 1837 — Page 11

1837.) KUMU HAWAII. 11

Hilo, ma Waimea i Hawaii; ma Wailuku a me Lahainaluna i Maui;—ma Honolulu, ma Ewa, ma Waialua a me Kaneohe Oahu; - ma Waimea i Kauai.

                NA HALE PULE. Ua hanaia a paa ka hale pule ma Kailua, ma Ewa no hoi kekahi, ma Kaanapali kekahi, ma Olowalu kekahi, ma Lanai kekahi.

                NA KULA. Aole akaka ka nui o na haumana a pau ma Hawaii nei. Ua lilo kekahi kanaha paha haumana no ke Kula nui, i poe kumu a hiki mai eiwa kumuao hou mai Amerika mai. Ua hooikaika kekahi mau kamalii i ke kula. Pela no kekahi mau kanaka ui.
                O na haumana no ke Kulanui 79 O na haumana no Mi. Kemita 200.

                MARE. Ua mareia hookahi tausani kane a keu me ka lakou wahine ma Hawaii nei i ka makahiki i hala aku nei.
                MAKE. Aole i ike makou i ka helu ana o ka poe i make i kela makahiki keia makahiki. Eha tausani paha; elima tausani paha.
                Ua make elua kumu wahine o Dibele kekahi a me Laiana kekahi. Ua make no hoi ekolu keiki a na misionari.

                HANAU. Ua hanauia na keiki a makou he umikumamaha mai ka malama o Iune 1836, a hiki mai i ka malama o Iune 1837.

                KA POE HOLO. Holo aku la i Amerika  kekahi o makou, he umikumamalima, a holo mai na kumu hou he kanakolu kumamalua.
                Ka helu ana o na misionari a pau, Iune 1, 1837.
                                O na kane, 41
                                O na wahine, 43
                                O na keikikane, 33
                                O na kaikamahine, 27
                                149
                Iulai 1. Hoi aku Tatina ma a me kekahi hoahanau e ae i Hawaii ma ka moku, Harieta, Kapihi ke kapena.
                Iulai 2. Holo lio o Kauka Iuda ma i Waialua e noho malaila i keia mau la.
                Iulai 5. E noho ana mauka ma Nuuanu ka mea paipalapala, a me ka mea nana e hooponopono i ke K. Hawaii me ko laua ohua. He aina oluolu, a nui ka ua malaila i keia manawa.

                MAI KINA MAI. Holo mai, Iune 30, ka moku kia alua Griffon kona inoa, Little ke alii. Ua lawe mai ia na palapala lima a me na pepa hoolahaike.
                UA MAKE MI. SETEVENA; oia ke kahuna pule no ka poe holo moku ma Kanetona. Holo aku la ia mai Kanetona aku i Sinegapore, a loohia oia i ka mai a make Ian. 5, 1837. He kanakolukumamaha makahiki ona. He kanaka loko maikai ia, a he naauao no hoi.
                BATAVIA. Ua paiia e na misionari no Beritania na palapala i keia olelo kela olelo; o Kina, o Malae, o Beretania, Ferani, a me Holani. O ka nui o na aoao i paiia (1,330,656,) hookahi miliona ewalu haneri me kanakolu, tausani eono haneri me kanalimakumamaono. Ua holo aku Mr. Medhurst i Enelani.
                BANEKOKA. Ua palapala mai Mi. Ioane, he kumu no ka poe Kina, ma Siama, "Ua noho maua maanei i ka pilikia, i ka mai a me ka make. Ua make ka maua keiki elua, a hele maua i keia wahi kela wahi i noho ai he nui no, he iwakalua paha. Ua kukulu au i ka hale noho, aka e pono ka wawahi ana, no ka mea, ua kauoha ke alii ia'u e hele i kahi e. Nui na kanaka ma keia kulanakauhale 600,000) eono haneri tausani paha. Ua haawiia e au ia lakou i na palapala (14,000) he umikumamaha tausani."
                O KE KAHUNA LAPAAU, O BERADELE. Hele aku la ia ia ka poe mai he nui, hookahi haneri a keu i kela la i keia la. Ua loaa ia ia ka hale lana, a noho makaukau e holo i ka manawa a ke alii e kauoha hou ia ia, "E holo." Alaila e holo pu ia me ka poe mai iloko o ka hale lana i kahi e ae, aole haalele i ka poe mai e like me ka wa mamua.
                BUREMA. Ua hoohalikeia o ka Baibala a pau i ka olelo a ko Burema. Ua bapetizoia malaila (791,) ehiku haneri me kanaiwa kumamakahi kanaka.

MANAO NO NA MAKUA A ME NA KEIKI.

                E alakai oe i kau keiki ma ka aoao pono. Eia kahi palapala a kekahi makuwahine ma Amerika e hoike ana i ka oiaio o ka ke Akua olelo.
                "O ka maua mau keiki hope, opiopio no laua, makemake nui laua i ka pono. I kekahi mau la aku nei, i aku la ka hope i kekahi wahine haipule, "Ana, loihi kuu manawa a'u i pule aku ai i ke Akua e hoohanau hou mai i ko'u naau, aka makau wau; aole paha i loaa ia'u ka naau hou. Aole paha pono ka'u pule ana; Pehea wau e pule ai?"
                Alaila hoakaka aku o Ana i ke ano o ka naau hou, a hooikaika aku ia ia.
                I kekahi mau hebedoma ae, i mai la kela keiki ia'u, "E Ma, e nonoi aku oe i ke Akua, i maliu mai oia ia'u a hoolohe mai i ka'u pule, ua hopohopo au o hoolohe ole mai ia ia'u."
                Alaila kukuli iho la au a pule pu me ke keiki: nui kona aloha: Ao aku au ia ia; aole ke Akua e hoole i ka pule oiaio me ka paulele ia Iesu. I kekahi manawa, ike aku i kona pauaho, no ka nui o na mea ino i loaa ia ia maloko o kona naau, alakai aku la au ia ia iwaho a kuhikuhi i na hua a me na anoano e ulu ana, a kona mau lima iho i kanu i kela mau la. Ike no ia, e ulu ana ia mau mea kanu a mamuli pua a hua mai no hoi kekahi.
                I mai la ia, "Manao anei oe, ua like ko'u aloha i ke Akua, me ka anoano?" Ae aku au, "Ae pela ko'u manao: a ulu nui no ia."
                "Ina ua kanuia, Ma," wahi ana, "aka, manao anei oe ua noho kona aloha ma kuu naau?"
                I kekahi poe aole oluolu kona manao i ka wa moe; hookuli; huhu, a pauaho ke kahu. I aku la kona kahu ia ia: "ka! aloha ino! akahi no ka hookuli; aole manao wau i kuu hanai ana ia oe i ka wa uuku oe, e hana ino mai oe ia'u pela'!- Mihi koke oia a i aku i ke kahu, "Oiaio, ua hewa loa wau, aka e pule au i ke Akua no kela hewa."
                Alaila kukuli iho la ia a pule aku penei;"E Iehova ke Akua, he keiki hewa loa wau, aka e hiki no ia oe ke hoomaikai mai i kuu naau. E kala mai oe ia'u, i ole au e hana ino hou aku i kuu kahu. E kokua mai oe ia'u, i hana lokomaikai aku au i na kanaka a pua. Aole makemake au e hana i ka hewa, aka ua ino loa ko'u naau - e lawe aku anei OE i ko'u naau ino, no ke aloa no Iesu Kristo. Amene."
                Ua maa no wau i ka heluhelu i ka ke Akua olelo i aia i kona wa moe, a ua akaka loa ka pono, manao au, e pono na makuwahine a pau ke hana pela." Ea, o na makua a pua, ua alakai pela anei oukou a pau i ka oukou mau keiki?
 ALOHAKANAKA.

KA HIHIA ANA O KA NALOPAKA.
E noonoo oukou o hihia hoi.

                "Me kekahi kihi o ka puka aniani kau aku hekahi lanalana i kona punawelewele. Ike aku la au i kekahi nalopaka e lele ana malaila me ka maku ole. Aole liuliu a hihia kona mau wawae a me na eheu i ka punawelewele. Pakaawili iho la ia; emo ole, lele mai la ka lanalana a hakaka laua, aka ua hihia ka nalopaka. Ikaika loa ko laua hakaka ana, a eha ka lanalana a holo iki. Aole nae i pakele ka nalo; ua hihia oia.
                No ka ikaika loa o kona kaawili ana,mai hemo no ia, a lele hou mai ka lanalana