Ke Kumu Hawaii, Volume III, Number 19, 14 February 1838 — Page 76
76 KUMU HAWAII. (FEBERUARI,
mea kupanaha kela mea kupanaha, a me ka manao o ka poe kanaka, no keia mau mea kupanaha?
Auhea la na Lunakanawai a pau? aole he manao ko lakou i kekahi kanawai hou paha a i hoakaka, a e hoopono no hoi i ka ka poe i noho ana malalo iho o lakou.
Auhea la ka poe Kumu maoli e ao ana? pehea ko lakou kula; ua hoonui paha; ua emi paha, ua huli paha kekahi poe haumana i ka Haku, ua akamai paha na haumana? Ka! Nui wale na mea e pono ai ke kakau lakou, aole ike au i ka helu ana i na mea a pau, na mea nui kekahi, na mea liilii kekahi, manomano, kinikini na mea e pono ke kakau ana.
Ea! o kakou, ka poe e heluhelu ana i ke Kumu Hawaii. E ala kakou a e imi ana i kahi mea pono e hanai i ko makou Kumu Hawaii. No ka mea, ua loihi ka manawa o ko makou kahuna pule imi ana i na mea e naauao ai, i na mea hooakamai ai: a e noho lakou, ma ka molowa ole, ma ka ikaika, ma ke aloha, ma ka hoomanawanui i ka wa mai, a paiia na palapala na mea e naauao ai kakou. Ea! pehea la kakou? Aole anei kakou e kokua ia lakou? Ina e aloha io kakou i ko makou kumu e kokua no, e kakau no, a e hanai no i ke Kumu Hawaii. Ea e ala! e ala e kakou, mai molowa hou kakou, aka e hoomanao i ka olelo a Paulo. 1 Tes. 5: 11-13 a me Hebera 3:13.
Pau ko'u mau hunahuna.
IOANE PELHAM.
KAHI MELE.
HALELU 16. (Arlington.)
1 Pomaikai mau na kanaka,
Aole launa pu.
Me lakou la ka poe aia,
A me ka poe huhu.
2 Aka, ke Kanawai maikai,
O ke Akua mau,
E hoomanao, a oli nei,
Ka po, a ma ke ao.
3 E like me na kauwowo
Ma kapa muliwai
E ulu wawe kona lau,
A hua pono mai.
4 A kona lau ua omaomao,
Aole ia mae;
Ua pono loa na mea a pau,
I kana hana ai.
5 E like ma ka opala hoi,
Ua puehu ia mai,
Ka poe hoomaloka hoi,
I nalowale nei.
6 Ka poe aia, aole ku
Ka Aha olelo,
Aole hoi e noho pu
Me lakou pono no.
7 Ua ike mai la Iehova,
Ka poe hana maikai,
Ke ano o ka poe hewa
Ua make io nei.
IOANE PELHAM.
NO KE KAI MIMIKI.
KAPAA, Kauai, Ianuari 31, 1838.
Auhea oe e Tineka, ke hoakaka aku nei au ia oe no ke kai a mimiki, i ko'u nana ana i na pepa umikumamaha o ka buke ekolu o ke Kumu Hawaii. Ua ike au i na mea nui i olelo ia no ke kai Mimiki. Ua pau na hale ma Hilo, a ma Wailuku i ke kai mimiki. Nolaila, ea, ke hoakaka aku nei au ia oe: ua ike no hoi makou o Kauai nei i kela kai mimiki. I ka malama o Novemaba, i ka la eiwa, a po iho, i ka hora ewalu a me ka hapalua paha o ka hora ka maloo ana o ke kai. I ko'u lohe ana i ka leo o na kanaka a me na kamalii e walaau ana ia po. Ua kokoke au e hiamoe: a lohe au i ka hea ana o kekahi, "Ke kai mimiki e, ke kai mimiki e," Alaila ala au, a holo aku e nana; ua emi aku ke kai; ewalu anana mai uka aku a hiki i kahi e ku ai ka moku: he wahi hohonu ia, o na wahi papau ua maloo loa. Ku wale na pukoakoa, a moe wale na ia ma ke kaheka, o ka puhi a me ka papai. Ehiku maloo ana, ehiku hoi piha ana. Aole nae i wawahi i na hale e like me ko Hilo a me ko Wailuku; aka, ua like ke ano o keia kai mimiki mai Hawaii a Kauai. Na'u na AMARA.
IANUARI 14, 1838.
Auhea oukou e na kanaka a pau mai Hawaii a Niihau, eia ke kumu o ko'u manao ana e like me ka pauku olelo ma Pilipi - 3: 13, 14 —penei. "E na hoahanau, ma kuu manao iho, aole au i lalau aku; aka, o keia hookahi ka'u e hana nei, e hoopoina ana au i na mea i hala mahope, a e kikoo aku ana au i na mea mamua;'' pela mai o Paulo, aole ia e hoi hou aku i hope. Auhea oukou, e na kanaka mai Hawaii a Niihau, mai kii hou aku, i na hewa a kakou i mihi ai, a i haalele ai, o ka pepehi kanaka, o ka moekolohe, o ka aihue, o ka hoopunipuni, o ka epa, o ke aki, o ka huahua, o ka alunu, o ka puniwaiwai, o ka makee, a me ka minamina i kana mea i haawai ai i kona hoalauna, i ka makua paha, i ke kaikaina paha, i ke keiki paha me ka olelo aku. Aole au i haawi lilo aku ia oe. Pela no ke kanaka i hoi hou ai e inu waina a me na mea awaawa a pau, a huhu halaole aku ia hai e like me ka ilio i hoi hou ai e ai i kona luai, pela no ka puaa, i hoi hou ai e moe i ka lepo, pela no ka mea i lalau i ka oopalau, a nana hou aku i hope, aole oia e pono i ke aupuni o ka lani. Pela no o Lota wahine, i nana hou ai i hope, no ka minamina i kona waiwai, i ke kala, a me ke kula, i ka aina, a me ka hanohano o ke kino. O ka manao ana ma ke kino, he make ia, aka, o ka manao ana ma ka uhane, he ola a a me ka malu, nolaila, mai kuhihewa kakou. E ka poe e ono ana i ka hewa, he ono ka hewa, i ka poe hewa, a komo i ka opu, awaawa koke iho la. Pela ma ka Hoikeana 10: 9, 10. Pela ko'u ia kakou, e ko'u mau kaikuaana a pau ma ka pono, mai Hawaii, a Niihau, e puhi ana i ka baka. Olelo mai la Iesu, O ka mea malama i kona ola, e lilo kona ola; aka, o ka mea haalele i kona ola no'u nei; e loaa ia ia ke ola. Mataio 10: 39. No ka mea, eia ka makahiki hou, e hoole kela mea keia mea i kona kino iho. I hou mai la Iesu, Mai hahao oukou i kula, aole i kala, aole hoi i keleawe iloko o ko oukou mau hipuu. Mat. 10: 9. Pela no i ko'u manao ana, he mau hipuu baka no paha, iloko o ka wawae o kekahi hoahanau, a me kekahi hooikaika. E haalele loa i na mea ona a pau, i keia makahiki, e luai aku i ka mea awaawa a pau: no ka mea, he kumu pono na ekalesia na ko ke ao nei. E ko'u mau hoahanau mai Hawaii, a Niihau, pehea la kakou e haalele ole ai i kekahi mau hunahuna iki o ka ona, e like me ka pulaiki hoolawehala a aai loa; pela kekahi hunaiki o ka ona, e eha ana ke kino i kela makahiki keia makahiki, pela ke kiaha hookahi, hoao a ona iki: a ninau aku la, he waina; ho hou mai a ona loa. Heaha ka pono, ke malama iki? E na hoahanau o'u, mai Hawaii a Niihau. Kauoha mai la Iesu. O oukou ka malamalama o ke ao nei. Pehea kakou nei, e na makamaka iloko o Iesu, e haalele loa i na mea ano ino a pau, a e mihi io kakou a pau i ka hewa, a e holokiki e apo i ka pahuola o Kristo Iesu, i ola kakou a pau ia ia i ke ao pau ole. Amene. Na KAHAUOLONO.
Ua paiia KE KUMU HAWAII ma ka mea Paipalapala a na Misionari, Honolulu, elua hebedoma hookahi pepa, o Wenede ka ia e pai iho ai.
Eia ke kuai ana, hookahi makahiki, $0,50, a na mea e lawe i ka pepa a pau.