Ke Kumu Hawaii, Volume IV, Number 7, 29 August 1838 — Page 28

28 KUMU HAWAII. (AUGATE,

ka huhu mai o Aneru a kipaku mai e hele mai ke kula aku. A eia kahi mea i makau ai au; no ke kokoke loa o ka manawa e hoike aku ai: He hookahi hapalua (1/2) wale no o ka hora ka manawa i koe mai ia'u; no ia mea nui loa iho la ko'u makau; a manao iho la wau, aole pono ia'u ke hoole aku i ko na kumu manao. No ka mea, ua haawiia mai ia'u ka noonoo e imi i ka manao, a me ka lima e palapala'i; a me ka waha e heluhelu ai i ka manao, a me ka pepa maikai nakolo ole no ka manao, a me ka inika, a me ka hulu maikai e palapala'i i ka manao. Nolaila, maopopo iho la ia'u, aohe o'u wahi pono iki ilaila ke hoole aku au i ka na kumu mea i kauoha mai ai e imi; aohe no hoi he pono ia'u ke noho wale iho me ka manao ole e like me na holoholona o ke kula. Ina wau i nele i ka manao ole, alaila ua oi aku ko na holoholona pono imua o ko'u. No ka mea, ua haawiia na mea a pau e pono ai ke hana ia'u, aole hoi i ka holoholona. No ia mea; a i nele au i ka manao ole, ua oi aku kuu naaupo a me kuu lapuwale imua o ka naaupo a me ka lapuwale o na holoholona.
                No keia mea, komo mai la ia'u ka hilahila maoli imua o ka maka o na kumu a me na haumana. No ia mea imi hou iho la no wau, aka aole nae i loaa. A pau kuu kakau ana i kekahi aoao a huli ma kekahi aoao, a hapalua (1/2) o ka pepa i paa, o ke kani koke ae nei no ka ia o ka hele kula. A i kuu nana ana'ku maluna o keia pepa a huli ma kela aoao, ike aku la wau ua nui loa na huaolelo a me na hopunaolelo a'u i kakau ai. Nolaila manao iho la wau penei, Aole no ka hoi i nele loa i kou la i ko ke kumu.
                No ia mea, paa iho la ko'u manao o ko'u manao keia e hoike aku ai ia olua na kumu a me na haumana. Na'u na KALAMA.

KAHI MELE.
KULA KAMALII.

1 Hoolohe e, ke kani nei
Ka bele makalii,
Ke wehe nei ke ao maikai;
E ala na pokii.
2 Hoomakaukau e hele ae,
I ke kula kamalii,
He kula nani, a maikai,
E hele kakou nei.
3 E wikiwiki, mai lalau;
E hele pololei;
E hele pu kakou a pau,
Owau ke alakai.
4 Mai hakaka a pakike,
E kuikahi nae;
E naue me ka himeni.
I kahi e kula'i. L. L.

NO KE SADUKAIO, A ME KA PARISAIO.

                He nane wale no keia inoa he Sadukaio i loaa'i ia'u. I ka makahiki o ka Haku 1835, i kuu iho ana aku i Lahainalalo mai Lahainaluna aku, loaa 'ku la ia'u kekahi poe wahine e pii mai ana mai kai mai. Ninau mai lakou, "Mai uka mai nei nae paha oe? Ae aku la no hoi au. I mai lakou, "Ike loa aku nei paha oe? O ko unuhi e ia'ku nei no ka ia iuka." Hoka wale iho la no au, mea akaaka iki iho la au; aka, aole nae i akaaka loa. I hou mai la kekahi wahine. "U!! e ola no hoi auanei kou uhane?" I ae la kekahi me ka olelo akaaka. "Aole no paha e ole ke ola o ko lakou nei uhane? o ko kakou uhane no ke make i ke ahi." I hou mai la kekahi wahine, "o kou uhane no paha ke make? a o ko'u uhane ke pii pu me Kalama i ka lani.'' I mai la ka wahine hoomaloka. "E!! e hiki pauakaaka 'uanei ko oukou i ka lani." O aole lakou i hana me ka huhu, aka me ka akaaka ka lakou hana ana. E pii ana lakou, e iho ana au me ka hoolohe no i ka lakou mau olelo a hiki i ka wa i pau ai ka lohe ana a kuu mau nalolo lohe, o ka pau no ia o ko'u lohe ana i keia olelo.
                Iho mai la au me ka noonoo pono i ke ano o ka lakou mau olelo. I kuu noonoo ana, ua maopopo ia'u, he poe Parisaio kekahi a he poe Sakudaio kekahi poe o lakou.
                O ka poe e hoole ana i ka ke Akua haawi ana i ke ola o ka uhane iloko o ko ke kanaka ola ma ka lani, o lakou no ka poe a'u i kapa aku ai he poe Sadukaio: no ka mea, pela no ka manao o ka poe uhane, aohe Akua aohe ola ana o ka uhane ma ka lani, aohe make ma ka lua'hi, aohe la hookolokolo, hoole lakou i na mea a pau e hiki mai ana mahope, e like ma ka ka palapala hemolele i olelo mai ai, Mat. 22:23, penei. - "ia la hoi, hele mai la io na la ka poe Sadukaio, ka poe i olelo, Aohe alahou ana." - Oihana 23: 6 - 8. "A ike aku la o Paulo, he poe Sadukaio kekahi o lakou, a he poe Parisaio kekahi, alaila hea aku la ia ma ka ahalunakanawai, E na kanaka na hoahanau, he Parisaio no au, he keiki na kekahi Parisaio, a no ka manao i ke alahou ana o ka poe make, ua hookolokoloia mai nei au. A i kana olelo ana pela, kue iho la ka poe Parisaio me ka poe Sadukaio, a mokuahana iho la ua ahakanaka la. No ka mea, ua olelo mai ka poe Sadukaio, aole alahou ana, aole anela, aole uhane, aka o ka poe Parisaio, hooiaio no lakou i keia mau mea."
                He nui no na wahi i hoakakaia mai ai ke ano o keia mau mea elua, o ke ano o ka Parisaio a me ke Sadukaio.
                Ma kuu lohe ana i ka olelo a kela poe wahine, ua maopopo ia'u he poe Sadukaio kekahi, he poe Parisaio kekahi.
                O kekahi poe o na poe wahine la, he poe Parisaio, no ka mea, ua olelo ae lakou e like me ka hana a ka poe Parisaio.
                O ka poe Parisaio hooiaio no lakou i na mea a pau i kakauia ma ka palapala hemolele, i mea e mahaloia lakou, Pololei wale ka lakou hana ana ma na pule a me na manawalea, aka, ua pau ia lakou na hale o ka poe wahinekanemake, a ua oki aku i kekahi hewa uuku me ka hana malu i ka hewa nui.
                Pela no kekahi poe haalele baka; kuhi lakou o ke kanawai nui iho la ia o Iehova, o ka haalele baka, haalele aku la me ka i ana'ku, "Ua pau na hewa nui i ka hookiia, ua haalele au i ka baka, a ua kaawale ia mea ino." Aka, o ka hookano, a me ke kuko hewa, a me ka hooluhi, a me na hewa a ka naau, oia ka lakou mea mau e hana ai.
                Ke hookupu nei lakou i ka hapaumi o ka mineta a me ka aneto a me ke kumino, a ke haalele nei i na mea nui o ke kanawai, i ka hoopono, i ke aloha a me ka hooiaio. E nana ma ka Mataio, mokuna 23 a heluhelu oukou e ka poe kanana nei i ka naonao ke ale wale aku i ke kamelo! No ka mea, ke holoi nei oukou ia waho o ke kiaha a me ke pa, aka, ua piha oloko i ka mea i kaili wale ia a me ka pono ole.
                Ua lohe au i ka olelo ana a kekahi poe puhi baka, penei kuu lohe ana i ka lakou olelo ana, ua hai mai nae hoi au i olelo mai. E puhi ana he poe kanaka kauwai mai Lahainalalo mai, ma ka awai ma o iho o kahi o Anaru, kahi e kahe ana ko luna nei wai a me ko lalo wai. Ike aku la kekahi mau keiki o ke kulanui i ua poe kakaka nei e puhi baka ana, i aku lakou. Heaha la ka ono o ka baka? I mai lakou la, he ono no paha ka baka; e ole nae ka baka ea, ahu na pooolelo iloko o ke kumu Hawaii! Pela no ka lakou olelo ana. Olelo lakou, e ole ka baka, ina ua nele loa ke Kumu Hawaii i kahi manao ole. Nolaila manao lakou, he mea maikai ka baka no ke puhi ana, he mea ia e kokua i ko ke Kumu Hawaii hemahema. KALAMA.