Ke Kumu Hawaii, Volume IV, Number 24, 24 April 1839 — Page 96
96 KUMU HAWAII. (APERILA,
hoike maoli aku i ke ano o na olelo i hoikeia maluna; e hoike ana i ke ano o ka mihi io a me ka ole, mamuli o Akana, a me Iuda, o Anania, a o Sapeire a me na mea e.
Wenede. 23. Ua like ka halawai o keia la me Tusede; eia na olelo i haiia mai, ma ka halawai a na kanaka a pau, eha no ia mau halawai. Ioan. 1: 29. Luk. 23. 34. Heb. 4. 7. Luk. 15: 18.
Tarede. 24. Ua like no ia me Wenede eha no halawai, a o na olelo aia ma Sol. 29: 1: Rom. 6: 23: Hal. 62: 5. Mat. 11: 28.
Faraide. 25. Ua like no ka halawai i keia la me na la mamua. Eia na olelo, Hosea 13: 9. Hoik. 22: 17. Luk. 61: 25. Kin. 22: 17.
Satude. 26. O na halawai o na la mua, ua like no ia me keia. Eia na olelo. Gal. 6: 7. Amosa. 3: 3. Tes 2: 19. Gal. 6: 5.
Sabati. 27. Ua haiia i ka la Sabati ma ka halawai huina o nakanaka a pau. Eia na olelo i haiia Hal. 66: 18. 1 Kor. 2: 9. Mar. 8. 36. Ier. 17: 5 — 11.
A pau keia halawai, hoi mai la au a i Honolulu, mai laila mai, a i Lahainaluna nei i ka la 6, o Febe. Pau aku la.
Na'u na KUNUI.
KAHI MELE.
SABATI.
1. He la makamae
Ka la e pau ai
Na paani a pau;
Ka la i ala'i
Iesu ka mohai,
I ola ke ao.
2. Ke wehe mai nei
Ke alaula maikai
E ala kakou
He sabati nei,
He la nani e,
He la no Iesu.
3. He la halawai,
He la e kula'i,
E noho noonoo.
Ke kani mai nei
Ka bele maikai,
E hele kakou.
4. E hoopaa naau
'Na olelo a pau,
A malama pu.
Pela e hana'i
Ke iini ae
E ola kakou. L.L.
LAHAINALUNA, Mar. 14, 1839.
NO KA PII ANA I KE KAO.
I ka la 27 o Feberuari, i ka hora 7 o ke kakahiaka, ai iho la makou a maona. Pii aku la makou i ke kao, a hiki iuka, ike aku la makou i ke kao e pii ana iluna e Paupau, me kekahi poe haumana o makou. Kahea aku la makou, Pehea hoi ke kao e pii la? aka, aole i lohe mai. Pii aku la no makou, a halawai pu iho la makou.
Noho iho la makou malaila i kekahi mau minute, me ke kukakuka o makou kekahi i kekahi, me ka olelo iho penei, E hoa loaa no ke kao iuka. Ae like ae la no makou a pau e hoa loa iuka; alaila, hoa loa aku la no makou i ke kao. Holo aku la no ke kao mamua o makou a me ko makou hahai aku mahope. A kokoke aku la ke kao e pii iluna o ka puu o Kahili, alaila, hahai mama aku la kekahi mau haumana o makou. A hiki pono aku la ke kao i ka puu o Kahili, holo iho la ke kao ilalo o ka pali me kekahi mau haumana o makou. A hiki aku la makou mahope, nana aku la makou mauka a malalo, e iho ana kekahi mau haumana o makou. Kahea aku la makou, Auhea ke kao? I mai la laua, Ua hala aku la ilalo me Kamakau. Alaila, noho ihola kekahi mau haumana o makou maluna o ka puu. Iho aku la makou e imi i ke kao maloko o ka ululaau a me ke pali, a kokoke e loaa o Kamaka a me ke kao ia makou, alaila, kaa aku la kekahi haumana i ka pali, a ili aku la ia i kekahi opu laau Alaila, kahea mai la ia, Homai i kaula no'u. Alaila kuu aku la kekahi i ke kaula nona a pakele ae la oia. A o Kamakau a me Kamiki e ku pu ana laua me ke kao; kahea aku la makou, Mahea aku makou e hiki ai? I mai la o Kamakau, Ma kahi o Holopololei i kaa mai la la makai ae. Alaila iho aku la makou malaila, no ka mea he wahi pono iki ia wahi. A hiki aku la makou ma kahi a Kamakau a me Kamiki i ku ai, loaa iho la o Kamiki a me na kao elua ma kona lima. Iho aku la makou mahope o Kamakau ma, kahea hou aku la makou. Auhea ke kao? i mai la o Kamakau, Ua lele aku la i ka pali ke kao. Alaila iho aku la no makou a kokoke i ka welau o ka pali, alaila lohe aku la makou i ka uwo o ka wai, alaila hoihoi iho la makou a hiki i kahawai Nana aku la makou ilalo i kahawai aole nae i ikea, no ka mea, ua hala mai ke kahawai iloko o ka pali. Alaila kumano iha la makou i wahi e hiki ai, nana aku la mauka, malalo, makai, aole wahi e hiki ai, no ka mea, he pali wale no: alaila pau ae la keia nana ana a makou, iho pono ole wale aku la no kekahi poe haumana o makou, malalo o na wahi pali nui, me ke kahea aku o kekahi i kekahi, E malama pono. No ka mea ua pilikia ka hele ana. A o makou hoi, pii hou aku la makou iluna me ka pilikia a me ka manao aku, ua lele kekahi o lakou la i ka pali. Alaila i mai la kekahi o makou, aole kakou e hiki iluna, a po. I aku la au, Aole e po. Alaila pii mai la no makou me na kao elua, a lohe aku la makou i ka leo o kekahi poe haumana o makou e iho mai ana, alaila kakali iho la makou a hiki mai. A i ko lakou hiki ana mai ninau mai la lakou, Auhea lakou? I aku la makou, Ua iho loa no ilalo i ka wai. I mai la kekahi o lakou, E iho hoi ha ka wau. I aku la makou. Mai iho oe, he pali. Alaila hana iho la makou i ke kao a paa i ke kaula, alaila hoi mai la makou a hiki e aku kekahi mau mea iluna me ke kao ola, a ma hope mai no hoi makou a hiki iluna. Iho mai la makou me ka pololi o ka opu i ka ai e hina wale ana no. Alaila halawai iho la makou me kekahi poe haumana i imi ae ia makou, i mai la lakou, Pololi ea? Ae aku la makou. Ae, pololi. Noho iho la makou hoomanao aku la i ka mea nana ka ai (o ke Akua no ia, o Iehova) a pau ka hooalohaloha ana, ai iho la makou a maona, alaila i aku la makou, Oukou wale no nae paha ka i imi mai nei? I mai la lakou, O ka nui o na haumana ua hala ae ma kahawai e imi ia Kamakau ma, a o makou hoi imi mai nei maluna nei. Alaila hoi mai la makou a hiki i Lahainaluna nei, a halawai iho la makou me ka poe i iho ma kahawai, ninau aku la makou, mahea oukuu i hiki ai i kahawai? I mai la lakou, O na kaula no a makou, oia ko makou mea i hiki ai i kahawai.
Alaila, olelo hou aku la makou imi aku no hoi makou ia Kamiki a loaa, no ka mea he wahi e no kona i iho ae ai, Alaila, kii aku la lakou i ke kao a hoi mai la lakou maloko o ka wai, no ka mea, he pali wale no; aole wahi akea iki a hiki i Lahainaluna nei. A pela no hoi ka poe i pii ma Kulilole ua olelo mai lakou, elua o lakou mea i lele i ka pali, aole nae i make. No ka mea aole i haalele mai ko kakou Haku o Iesu Kristo ia makou. No ka mea, minamina mai oia i ua uhane o na haumana ana o ke Kulanui nei,
Na KAUMAEA.
Ua paiia KE KUMU HAWAII me ka mea Paipalapala a na Misionari, Honolulu, elua hebedoma hookahi pepa, o Wenede ka la e pai iho ai.
Eia ke kuai ana, hookahi makahiki, $0,50, a na mea e lawe i ka pepa a pau.