Ke Koo o Hawaii, Volume I, Number 2, 29 August 1883 — Ke Alo Alii. [ARTICLE]

Ke Alo Alii.

Ke Alii ka Moi—eia no oia ma kona Hale Alii Iolani kahi i luakaha ai, he maikai, he oluolu, a he ohohia mau kona ola kino, e walea ana i ka pa kolonahe a ke kiu, me hooipo i ka malanai. A pela no hoi me kana Moiwahine "Onaona Puna i ke ala o ka hala me ka lehua." Ka Moiwahine Kanemake Ema Kaleleonalani he nani, he oluolu, a he mohala maikai ke ola o "Maikai Waipio" Ho alo-lua na pali! Eia no oia ma kona home alii Luka Hale kahi i luakaha ai. A pela pu no hoi me kona pokii kaikunane. Ka Mea Kiekie ka Hooilina Moi—eia no oia ma kona home Uluwehi kahi i kapaia o Wakinekona Uluwehiwehi, ka paredaiso o ka Moana Pakipika, me kona ola kino maikai, kilakila, keia iluna, nanahe i lalo ka olu oka wai. A ua hala aku nei kana alii kane i Maui, lee "Kia o na Hono." A keia pule ae hoi mai. Ke Kama Aliiwahine Kapili Likelike—aia no oia ma kona home Aulii, ka nani o Ainahau, kahi i luaiai ai, e walea ana i ka olu a ka makani uwehe lau niu o Waikiki, mo ka pehia e ka inuwai, ka makani kupa o ka aina. A pela pu hoi me kana alii kane, a me ka Mea Kiekie ke Kama Aliiwahine Keahinuiahilapalapa.

Ka Leialii ka haku Pauahi—ua hoi mai nei ka wahine hele la o Kaiona, a ke hooipo nei ma kona home eehia Aigubita, ka mea i oleloia, u 'ka puuwai o ke kaona,' me ke ola kino mohaha maikai. A pela pu no hoi me kana alii kane. Ke Aliiwahine Kekaulike—he omaimai ke kiaaina o Hawaii i keia mau la, aia no oia ma kona home hou mauka o Ululani Hale, a ua lohe ia mai, ua maha iki ae, a ua hauoli makou i ka hoike aku, ua palekana loa oia. He maikai no hoi ke ola o ke Kama Aliiwahine Kapooloku. Me ka hauoli makou e panee aku nei imua o ko makou lahui aloha, i ke kulana a me na ola kino o ko kakou mau alii hanau o ka aina, mai ka mea e noho ana ma ke kalaunu a hiki mai i lalo. A ke puana ae nei makou i ko ke Akua me Kona lokomaikai—he nui, a he palena ole.