Ke Koo o Hawaii, Volume I, Number 3, 12 September 1883 — Page 12
Poaono, Sept. 24, hora 1 P. M., latitu 29° 23'; lonitu 126° 32'. Aia o Kapalakiko ma ke kukulu hema huli komohana, he 540 mile ke kaawale.
Ma ia mau la mai, ua maikai wale no ka moana, a e pa ana ka makani maikai mai ke kukulu hema a hoea i ka hema akau.
Poaha, Sept. 7, hora 5 P. M., ke ike nei au he moku ma ko'u akau, he 9 mile ke kaawale. Aole o lakou ike mai ia'u, no ka mea, he okaikai a ua pii ikaika na ale. O ka moku mua keia o ka'u ike ana i ka waena moana. He 873 mile ke kaawale mai Kapalakiko mai.
Poalua, Sept. 12. Iwaena po, ua hoopuoho ia au i ka hookui ana o ka waapa me kekahi mea. Puoho au a nana, eia ka he honu nui, a ua hoao au e hopu, aole nae i paa a nalowale aku la.
Poaono, Sept. 16, hora 4:30 A. M., malie ka moana a pohu ka makani. He mau tausani Naia e hoopuni nei ia'u. Ke lelele nei lakou ma o a maanei. He hiamoe ka'u hana nui i keia la.
Poaha, Sept. 21; ua lou i kuu makau he Aku nui. Akahi no a ai wahi i-a hou. He keu keia o ka i-a ono i ke kupa.
Poaono, Sept. 23, hora 4 A. M., ua lele ae la he Hee nui mailoko ae o ke kai a halawai pu maua he alo a he alo iluna o ka oneki o kuu wahi ipo "Pakipika," ai wahi i-a hou, aohe nae hoi i like ko ia nei unahi me ko ke Aku.
Sabati, Sept. 24, hora 3 P. M. He Malolo kai kipa mai nei e ike ia'u, a ua ana au he 12 1/2 iniha kona loa.
Poakahi, Sept. 25, hora 9 A. M. make kuu wahi uwati pakeke. Ki hou a hoohele, a ke hele maikai nei. Hora 12, hoomaka ke okaikai, ikaika ka makani, a nui ka ua i haule mai.
Sabati, Okatoba 1. Malie ka ino, aheahe ka makani a malino ka moana. Holo maikai kuu wahi ipo au moana.
[E HOOMAUIA AKU NO.]
Ke Kalaiaina Naauao.
Ina holo kekahi kanaka e imi aina a loaa, aohe kanaka e noho ana, aole i ike mua ia, alaila, ua lilo pono mai ia aina no ka mea i ike mua, no ka mea, ua lilo aku kana ma ka imi aina ana. A ina e holo wale ana ke kanaka, a loaa iaia ka aina me ka imi ole, a he aina ike ole ia mamua, a pae kela kanaka iuka, me ka manao e lawe i kela aina nona, alaila, ua pili pono kela aina iaia. A ina holo aku kela kanaka, a hai, "ua loaa ia'u ka aina," a lohe na kanaka, a holo mai me ka manao e noho ma ia aina, pono ia lakou e uku aku i ua kanaka la, nana i ike mua i ka aina, a hai ia lakou. No ka mea, ua pomaikai lakou iaia. He wahi hana uuku kana i hana ai. Ua like nae me ka wai. I ka wa aole i ukuhiia, na ke Akua. I ka wa i ukuhiia, ua lilo mai na ke kanaka, no ka mea, ua hana oia.
I ka wa kahiko loa, i ka wa a kakou i ike ole ai, holo mai ke kanaka i Hawaii nei a noho, a lilo ka aina nona. Nana no i hooponpono i ka aina, a hana no hoi me ka hoomalu. Mai ia manawa mai, ua hoomalu ia ka aina e na'lii a me na kanaka o Hawaii nei, a ua malama ia no hoi. O ka poe nana i malama, a hooponopono, no lakou no ka aina, a no ko lakou poe hooilina, no ka mea, ua lilo ka lakou ma ka malama ana. Oia ka mea e maopopo ai ka hewa, ke manao na'lii o kekahi aina e, e kii mai i keia aina e lawe no lakou. He mea kuai liilii nae ka aina. Ina hookahi pahu kui, ua nui loa ke dala iloko o ia pahu. Ina hookahi pahu lepo, aole ia e manao ia. Ina he umi pahu, aole no ia e manao ia. Ina paha he anana, ua manao uuku ia no. Ina he nui loa aku, alaila, na manao ia he waiwai.
Aka, o kekahi waiwai a ke Akua i haawi liilii mai ai, ua nui no ke dala oloko, a pono no ke kuai nui, me ka hana liilii a ke kanaka. Ina hele kekahi kanaka ma kana wahi e hele ai ma kahakai a loaa iaia he kohola, ua pae wale iuka, ua nui loa ke dala e loaa ma ia kohola, a pono no ke kuai nui, no ka mea, aole hoopae pinepine mai ke Akua ia mea, kakaikahi no. Ina e hoopae ia mai i kela la i keia la, ina ua lilo ke kohola i mea waiwai ole. O na mea a pau loa a ke Akua i haawi nui loa mai ai me ka hana ole o ke kanaka, aole hiki ke kuai.
Ina he nui ka hana a ke kanaka e hana ai i kekahi mea, alaila, lilo kela mea i mea kuai nui. Ina he uuku ka hana a ke kanaka, alaila, he mea kuai liilii; aia no e like me ka nui o ka ke kanaka hana ana, a me kona akamai no hoi kekahi. No ka mea, ina e hana ana kekahi kanaka akamai i kekahi la, a hana ke kanaka hawawa i kekahi la, ua oi ka ka mea akamai, ke kuaiia ka laua. He waiwai maoli ke akamai. Ina he mau kanaka i like ke akamai a me ka ikaika, a hooikaika kekahi e hana i pahi koli peni, a paa i na la elua, a hooikaika kekahi e hana i ka pahi kumu laau, a paa kana i ka la hookahi; alaila, ua oi aku ke kumukuai o ka pahi koli peni, no ka mea, ua nui ka hana malaila, ua like hoi na pahi kumu laau elua me ka pahi koli peni hookahi. Nolaila, eia ka helu pono, e helu aku i ka nui o na dala iloko o kekahi waiwai. Ina i nui ka ke kanaka hana i loaa ai iaia kela waiwai, alaila, ua uuku ke dala oloko. O ka hana a ke kanaka i hana ai, a me ka mea ana i haawi aku ai, i loaa iaia kekahi waiwai, ua kapaia ia mea, he "kumulilo."
O ke kuai nui ana o na makahiki he nui, oia ke kuai i ike nui ia, a me ke kumukuai kupono ma na waiwai a pau; ua like ka loaa mai me ke kumulilo aku. Aka, i kekahi kuai liilii ana, aole kuai pela.
Eia na mea e akaka ai.
1. Ina e hele ke kanaka i ka lawaia i kekahi la, a nui loa ka i-a i loaa iaia, ua piha koke kona waa. Aole hiki i ua kanaka la ke hoemi nui i ke kumukuai. Ua uuku no kana i lilo, a ua nui loa kana i loaa mai. Ua pono nae, no ka mea, aole e haawi pinepine mai ana ke Akua i ka ia pela, a i kekahi la, a i kekahi la, nui loa kona hooikaika ana aole loaa ka i-a. Ina e haawi nui mai ke Akua i ka i-a peia, i kela la i keia la, alaila, emi no ke kumukuai.
2. I keia manawa, he hana nui ke kii aku i ka wahie a amo mai, mai ke kuahiwi mai; nolaila, ua nui loa ke dala iloko o ka wahie. Ina i imi akamai kekahi kanaka a loaa iaia ke kaa e hikiwawe ai ka wahie a nui loa, alaila, e uuku ana ka hana, a nui no ka wahie. Aole no e hiki iaia ke hoemi i ke kumukuai, no ka mea, ma ka imi ana i loaa ai; aka, ina e hana na kanaka a pau pela, alaila, emi no ke kumukuai.
[E HOOMAUIA AKU NO.]