Ke Koo o Hawaii, Volume I, Number 3, 12 September 1883 — Page 5

o ka hanohano a me ka maluhia, a maluna o keia kahua ke Duke o Welinetona i ku ai i na wa a pau iloko o keia mau helu iho.
                I ka makaukau ana o na mea a pau, haalele iho ka Haku Moria me na koa ehiku tausani ia Enelani, me Ata Welesele, he Lutanela-Kenela ukali no ka Alihikaua Moria. He mau la elua keia holoholo ana o na aumoku ma ke kowa malalo o Adimarala Haku Huda, ma ke kakahiaka o ke kolu o ka la, hiki aku la lakou ma na aekai o Europa, a ma ka auina la o ua la nei, lele aku la na puali kaua Beritania ma na kahakai o Osedena, me ke kali ana no na lono hou a me na kauoha e pili ana i na puali kaua o ke Duke o Ioka.
                Ma ke kakahiaka o kekahi la, loaa mai la i ka Haku Moria na kauoha mai ke Keiki Alii mai, e olelo ana, e ukali aku me ka hikiwawe i ke ala a na koa Farani e maki la iloko o ka mokuaina o Keneda. No keia kauoha, ua haalele koke iho la ka Haku Moria i keia mau kahakai no kela mokuaina, e pale aku i na enemi i ke komo loa ana mai i ka aina o Osedena, kahi a ke Keiki Alii e hoolulu nei me kona mau puali kaua.
                Ua maki aku la ka Alihikaua Moria me na koa he elima tausani, a koe aku la o Ata Welesele me na koa he elua tausani, maki aku la oia iloko o Osedena, me ka lawe ana i kona kulana, he puali kaua kokua kuikawa malalo o na kauoha a ke Duke o Ioka.
                O ka ikaika o ua puali kaua Beritania i keia manawa, ua hiki aku ka heluna o na koa i ka 17,000; oia hoi ma ka hoonohonoho ana o ko lakou papakuhikuhi he 8,000 koa malalo o ke Duke o Ioka ma Osedena, he 7,000 malalo o ka Haku Moria ma Alosa, he puali kaua kokua mua no ke Duke o Ioka; a he 2,000 malalo o Kenela Duke o Welinetona, he puali kaua kokua hope no ke Duke o Ioka ma Osedena hema. O keia wahi ikaika uuku i hoike ia ae la, kue aku nei o Enelani ia Farani nona hoi na puali kaua e hele nei iloko o ka lanakila nui ma na wahi a pau a lakou e hoouka ai i ke kaua, a i kumu hoi e moakaka lea ai kahi i ku mua loa ai keia kanaka koa a ike oia i keia hana wela he kaua, a me ka lele hoi a na poka pukuniahi a pahu ae i ka lewa, me ka make o na kanaka he mau haneri iloko o kela a me keia sekona, ke hoike nei keia papakuhikuhi malalo nei i ke kulana a lakou i ku ai iloko o kela la hookahe koko, penei:

[E nana ma kekahi kolamu ae.]

                Ma ke ahiahi o ka la 5 o Iulai, hoouna aku la ke Duke o Ioka i kana leta malu i ka Haku Moria a me Ata Welese, e hai aku ana oia ia laua, ma ke ahiahi o ka la 7 e hoouka aku ai na puali kaua Beritania i na koa Farani he 25,000, me ka

Puali kaua kokua mua, Haku Moria.
Puali kaua holookoa, malalo o ke Duke o Ioka
Muliwai
Puali kaua kokua hope, Duke o Welinetona

hele ana aku imua o ka okana aina o Kenede. O ke Keiki Alii, ua kuhihewa loa ia oia e lohi ana la na pualikoa kaua Farani i ka hoouka kaua ana mai ia lakou a hiki i ka la 7 o Iulai. Ma ke kakahiaka nui o kekahi la ae, oia hoi ka la 6, ua hoopuiwa koke ia ae la ke Keiki Alii ma ka loaa ana mai o kekahi leta mai ka Haku Moria mai, a e hai mai ana oia i keia mau olelo pokole malalo, penei:
"Wahi Hoomoana,
"Iulai 6, 1794.
                "E kuu Haku—Hora 5 me 45, ike ia ka enemi ma ka akau o Alosa, he 15 mile ke kaawale. O ka hora 9 a me 11 paha na manawa e hoouka ai ke kaua. O ka hora 2 o keia la, o kou wa ia e nee mai ai me ka puali kaua holookoa ma ke ala e hiki mai ianei.
"MORIA, Makuisa Hesetina."
                O keia lono no na enemi, ua pahola koke ae la ia me ka hikiwawe e like me ka makani e puhi ana, a kau mai la hoi ka lia i na  puali koa o ke Duke o Ioka no ka hui hou aku me na poino e kau mai la mamua. Ma kekahi o ua wahi leta nei a Kenela Haku Moria i ke Keiki Alii, e olelo ana oia i keia mau olelo hoolana penei:
                "He wahi koa kahiko au a elemakule iloko o ke kaua," wahi ana, "aka, o keia puuwai nei,—e hele ana oia imua a hiki i ka haulehia ana. E hoonaauao iho oe e ku'u Haku, aole au e emi hou mai ana i hookahi kapuai ihope, a hiki i ko'u wa e nele ai i na lako kaua ole no ka'u poka hope loa, pela hoi e kokua mai ai ke Akua i ko Enelani mau puali kaua.  MORIA."

He Ninau.

                I ka wa e kau pu ana ka manamana kuhikuhi hora a me ka manamana kuhikuhi minute i ka hora 12 o ke awakea paha, a nee aenei ka manamana kuhi minute a kau pono i ka hora 1. Eia ka ninau, nowai kela mau minute 5 i hala ae la? No ka hora 12 paha; a i ole no ka hora 1?
                Aole no ka akahi a lohe ia keia ninau, aka, ua lohe mua ia no, i mea nae e maemae loa ai.
C. G. NAOPE.
Hookena, S. Kona, Aug. 23, 1883.