Ka Lahui Hawaii, Volume I, Number 14, 1 April 1875 — Page 4
Na Ekalesia o Kawaiahao a me Kaumakapili.
Halawai kakahiaka, la Sabati .... hora 10½
Halawai po ..... hora 7½
Halawai Apana auina la ..... hora 3½
Kula Sabati ..... hora 9½
NA KULA SABATI.
NA HAAWINA.
Aper. 25.—Na Koa o Gideona.—Lunakanawai VII: 1—8.
1 Alaila, o Ierubaala, oia hoi o Gideona, a me nakanaka a pau me ia, ala ae la lakou i kakahiaka nui, a hoomakaukau iho la ma ka luawai o Haroda. Aia hoi ka puali o ko Midiana ma ka aoao kukulu akau o lakou ma ka papu e kokoke ana i ka puu o More.
2 I mai la o Iehova ia Gideona, Ua nui loa ka poe kanaka me oe, nolaila, aole pono ia'u ke haawi i ko Midiana i ko lakou lima, o hookiekie auanei ka Iseraela imua o'u me ka olelo iho, Na kuu lima iho wau i hoola mai nei.
3 No ia mea la ea, e hea aku oe ma na pepeiao o kanaka, e i aku, O ka mea hopohopo a makau hoi, e hoi ia, a e haalele i ka mauna o Gileada. A hoi aku la, he iwakaluakumamalua tausani kanaka, a koe iho he umi tausani.
4 I mai la o Iehova ia Gideona, Ua nui loa na kanaka i koe. E kai mai oe ia lakou ilalo i ka wai, a na'u no e hoao ia lakou nou malaila; a o ka mea a'u e olelo aku ai ia oe, Eia ka mea hele me oe; oia ke hele, a o ka mea a'u e olelo aku ai ia oe, aole hele keia me oe, aole ia e hele.
5 Kai mai la ia i kanaka ilalo i ka wai, i iho la o Iehova ia Gideona, O kela mea keia mea, e palu ana i ka wai, me kona alelo, e like me ko ka ilio palu ana, oia kau e hoonoho ai ma o lakou la; a pela hoi kela mea keia mea e kukuli iho ma kona mau kuli e inu.
6 A o ka helu ana i ka poe i palu, e kapi ana ka lima, a i ko lakou waha, ekolu haneri kanaka. Aka, o na kanaka e a pau loa, kukuli iho la lakou a pau ma ko lakou mau kuli e inu wai.
7 I mai la o Iehova ia Gideona, Ma keia poe kanaka, ekolu haneri; ka poe i palu e hoola aku ai au ia oukou, a e haawi iho no i ko Midiana i kou lima, e kuu aku hoi i na kanaka e a pau, e hoi i ko lakou wahi.
8 Lawe na kanaka i wahi o, ma ko lakou lima, a me ko lakou mau pu; a hoouna aku la ia i ka Iseraela a pau, i kela kanaka keia kanaka i kona halelewa iho, a hookoe iho i kela poe kanaka, ekolu haneri. A aia hoi ka puali o ko Midiana malalo iho ona, ma ka papu.
——:o:——
Iloko o keia mokuna, ua hoike ia mai o Gideona maluna o ke kahua kaua e hoauhee ana i ka puali koa o ko Midiana. I. Aoao mai ke Akua iaia no ka hooponopono hou ana i kona puali koa, a hoemi ia lakou a hiki i ka ekolu haneri wale no, p. 1—8—oia ka haawina no keia la. II. Hooikaika ke Akua ia Gideona e hoouka aku i ka enemi, p. 9—15. III. Hoomakaukau o Gideona me kona poe e hoouka aku i ka enemi, aole me ka manao e kaua aku, aka, e hooweliweli aku, p. 16—20. IV. Ka lanakila o ia hoouka ana a me ka auhee loa ana o ka enemi, p. 21—25.
Ike ia o Gideona he generala makaala i ka enemi. p. 1. Ierubaala, oia kekahi inoa o Gideona, loaa keia inoa mamuli o kona hoohiolo ana i ke kuahu o Baala, mokuna 6:32. Haroda, oia ka punawai o na manao pioo, no ka weliweli a haalulu paha o ko Midiana ma ia wahi, a i ole ia, no ka makau paha o ko Iseraela ma ia wahi, nana p. 3. Puu o More, ka puu o na mea pana; aia ia puu ma na kuahiwi o Gileboa. Ua manao ia ilaila kahi a ka poe pana i pana aku ai ia Saula. I Samuela 31:3. Hoemi ke Akua i ka helu'na o na koa ma ko Gideona aoao, no ka mea, ua nui loa lakou. p. 2. He 32,000 ka nui o na koa o ko Iseraela, a he 135,000 ko ka enemi. No ke aha keia hoemi ana?
1. I i ke lakou aohe ma ka ikaika o na kanaka ka lanakila. 2. I hoohaahaa ia lakou. Haalele ka poe makau 22,000, p. 3. Wae hou mai la ke Akua i na kanaka, a koe 300 wale no koa i hele e kaua, p. 4, 5, 6, 7. No ke aha i lawe ai ke Akua i ka poe kapi me ka lima, a hookuu hoi i ka poe kukuli? Hoomakaukau ka 300 e hoouka, eia lakou maluna aku, aia hoi na koa o Midiana malalo mai ma ke awawa, p. 8.
1. Ke wae nei no ke Akua i kona poe koa e like me kana hana ana i ka wa o Gideona. E na kumu Kula Sabati, o oukou kekahi hapa o ka puali koa o ka Haku. Aohe oia makemake i ka mea kanalua, a hopo wale. Aohe oia makemake i ka mea hoololohi. 2. Ma ka mana o ke Akua, aole ma ke akamai o kanaka, e lanakila ai ka hana a ka Haku. Aka, o ka poe akamai, a koa ma ka naau, ko ke Akua makemake. He alihikaua akamai o Gideona. 3. Hoolohe pono loa o Gideena i ka leo o ke Akua, a ua hana aku oia e like me ko ke Akua aoao ana iaia. Pela e pono ai na alakai o na lahui kanaka i keia wa; pela wale no lakou e lanakila ai. 4. E like me ka hoolohe pono o keia alihikaua i ka olelo a ka Haku, pela i hoolohe ai na koa i kana. Aole holo pono na hana maikai ke hoolohe ole ia na olelo ao o ka poe alakai.
Moolelo o ka Ahahui Euanelio o Hawaii Hikina.
Halawai ka Ahahui Euanelio o Hawaii Hikina, ma ka luakini o Haili, ma ka Poaha Maraki 18, 1875, hora 9 A. M.—Eia na lala i hiki mai:
Ekale sia. Kahu. Elele.
Kaplaiiuka Rev. J. Kauhane J. Kaonohi
Kalapana " S. Kamelamela S. Kaikuahine
Opihikao " ——— J. Kalaokahaku
Puula " ——— D. Kapahee
Haili " T. Coan J. L. Kekuahau
Onomea " J. H. Pahio ———
Hakalau " S. Kukahekahe J. Lanikele
Laupahoehoe " J. Hanaloa G. W. Moo
Lala Mau. Keiki o ka Aha.
Rev. D. B. Lvman P. W. Keahuawa
" P. Barenaba Jos. Nawahi
" D. Makuakane G. H. Kiniakua
Dr. C. H. Wetemore B. Manoa.
Ma ka balota ana, ua koho ia o Rev. J. Kauhane i Lunahoomalu, a o G. W. Keahuawa i Kakauolelo.
Ua apo ka hale ia Rev. S. Kamelamela i lala ma keia Aha, e like me ka hookuu ana mai o ka Ahahui Euanelio o Hawaii Akau: a ia Rev. A. O. Forbes i hoa kuka.
Koho ia ke Komite Imihana:—Na Rev. T. Coan, J. H. Pahio, a me P. Barenaba; a liuliu iki, hoike mai ke komite i keia mau Kumuhana.
I. E lilo ka Aha ma ka haipule i hapaha hora i kela la keia la.
II. Ka hoike kihapai.
Hoike mai o Rev. J. Hanaloa no ka Ekalesia o Laupahoehoe, ua ala iki mai i keia wa.
Hoike mai o Rev. S. Kukahekahe no Hakalau, ua holo na hana, a ua uku pono ia ke kahu.
Hoike mai o Rev. J. S. Pahio no Onomea, aole mea kanalua—a ua mahuahua ka poe lawe i ke Kuokoa a me KA LAHUI HAWAII.
Hoike mai o Rev. T. Coan no ka Ekalesia makua o Haili, ua mau no na hana, nui na kokua kuloko a kuwaho, a me ka lawe nupepa ana—ua hoike pu mai i kona hele ana i Puna i ka malama o Okatoba o ka makahiki i hala—a ua hoike pu mai i ka hoonoho ana ia Rev. A. O. Forbes i kahu no ka Ekalesia haole o Hilo.
Hoike waha mai o Rev. D. B. Lyman no ke Kula Hanai; he 25 poe lawe Kuokoa, a he 42 poe lawe i KA LAHUI HAWAII.
Hoike waha mai o D. Kapahee, he elele no ka Ekalesia o Puula. Ua mau no na hana a ka Haku—nui na hanau, hapa ka make—2 mea lawe nupepa.
Hoike waha mai o Io sia Kalaokahaku, he elele no ka Ekalesia o Opihikao. Ua mau no na hana, ua lawa ka hapa nui o na hale i ka Baibala, 7 mea lawe i ke Kuokoa, a 6 i KA LAHUI HAWAII.
Hoike waha mai o Rev. S. Kamelamela no Kalapana, ua makaala pono na hoahanau—he mau halawai hoomau ma kela a me keia wahi; ua mahuahua na Baibala, a ua lawe ia he 18 Kuokoa, 8 o KA LAHUI HAWAII. Ua hoi mai iloko o ka Ekalesia 7 moremena, 7 pope, a me 5 poe i komo i ka hoahanau; no ke kokua kuloko a kuwaho, ua loaa mai keia puu dala mahuahua he haneri me kanaha, ($140.00) ana i lawelawe malihini ai ma kela Ekalesia iloko o na malama elua, a ua ike ia ka holo o na hana a ka Haku.
Hoike waha mai o Rev. J. Kauhane no Kapaliiuka, ua mau no na hana, ua mahuahua na kokua kuloko a kuwaho, he 30 Kuokoa, he 10 o KA LAHUI HAWAII; nui ka wi, aneane $2,000 paha i lilo aku i ka ai mai kona Ekalesia wale aku no; he 40 Baibala, he 40 Himeni, he 20 Kauoha Hou i kuai ia mai iaia aku.
III. Komite Imi Haawina.
Na ka Lunahoomalu e koho i Komite Imi Haawina—Na Rev. T. Coan, P. Barenaba, a me S. Kamelamela.
I V. Heluhelu Haawina.
1. Heluhelu mai o S. Kukahekahe i kona haawina—E hoike mai i na mea e maopopo ai ka oiaio a me ka hemolele o ka Baibala.
2. Heluhelu mai o P. Barenaba i kona haawina ma 1 Tim. 6:10—Hooholo ia e hoouna i ka nupepa.
3. E wehewehe ia Dan. 2: 31—35. G. W. Keahuawa. Hooholo ia e hoouna i ka nupepa.
Hoopanee ia na hana a ka la apopo, me ka pule a Makuakane.
POALIMA, Mar. 10—Hora 9 A. M.
Koho ia o Rev. J. H. Pahio i Lunahoomalu kuikawa.
Hoomaka ia na hana me ka pule a ka Lunahoomalu.
Kahea ia na inoa. Heluhelu ia ka moolelo o ka halawai i hala. Aponoia.
Hapai hou ia ke Kumuhana v—No ka heluhelu haawina.
4. Heluhelu mai o T. Coan i kona haawina ma Hoik. 21:19.
5. Heluhelu mai o J. H. Pahio i kona haawina. Heaha na hana e holo ai na Kula Sabati? Nui ke kamailio ana o ka hale no keia.
6. Heluhelu mai o D. Makuakane i kona haawina. Heaha ka hana a Iesu i haawi ai i kona Ekalesia i oi aku i na hana a pau?
7. Heluhelu mai o S. Kamelamela i kona haawina. Heaha la na hoailona e maopopo ai ka hanau hou ia o ke kanaka?
8. Heluhelu mai o G. H. Kiniakua i ka moolelo o Ioba.
9. Heluhelu mai o Maraki i kona haawina. He oiaio anei, o ka Baibala ka mea i emi ai keia lahui? Hooholo ia e hoouna i ka nupepa.
V . Na Palapala Hoopii mai ka Ekalesia mai o Hakalau.
1. Waiho ia mai he 2 mau palapala hoopii?—E noi mai ana e hookuu ia o Rev. J. B. Hanaike, a e hoonoho ia hoi o Rev. S. Kukahekahe i kahu no lakou. Nui ke kuka ana o ka Aha ma keia, a hoihoi hou ia aku no e hooponopono hou ka ekalesia no ko lakou aie i ke kahu mua, a ua hoohalahala pu ia no ka haawina uku o ke kahu hou.
2. Waiho hou ia mai he palapala hoopii no ka Ekalesia o Puula, e noi ana ia J. Nalaau, (kekahi haumana o ke kula kahuna) i kahu no lakou, ua kamailio ka Aha ma keia, me ka hoihoi hou aku na lakou e palapala ia Kalaau.
3. Waiho ia mai la he Palapala Hoopii no ka Ekalesia o Kalapana, e noi mai ana e hoonoho ia o Rev. S. Kamelamela i kahu no lakou. Ua apono ia ke noi. Hoopanee ia ka noonoo ana i ka manawa e hookahu ai, apopo.
Waiho ia ka hapai koke ana i na Kumuhana VI, VII, a ka la apopo.
V III. Ke ola o na kahu—Na T. Coan i kamailio mai.
I X. No na nupepa.
Ua hapai ia ka noonoo no kela Kumuhana, a ua kuka ka hale.
Hoopanee na hana a ka la apopo, me ka pule a Coan.
POAONO, Mar. 20—Hora 9 A. M.
Hoomaka ia na hana me ka pule a S. Kaikuahine—Lilo ka hapa hora i ka haipule. Heluhelu ia ka moolelo o ka halawai i hala. Apono ia.
Hapai ia ke Kumuhana VI.—No ke Kula Kaikamahine o Kohala.
Ua kamailio ka hale ma keia, me ka lohe i ka hoike a S. Kamelamela ka elele o kela Aha ma Kohala a me ka leta ia T. Coan. Nolaila, ua hooholo ia.
1. Ua oluolu keia Aha me ka mahalo ia Cornelius Bond, no na dala elima haneri ($500) ana i haawi ai no ke Kula Kaikamahine ma Kohala, me ka uku panee pu malalo o na rula i hooholo ia ma kela A. E. H. A; a e hoopaa ia maloko o ka buke moolelo o keia Aha.
2. Ke makemake nei keia Aha e ola a e ikaika hoi ke Kula Kaikamahine ma Kohala; nolaila, e kuka makou na kahu me na elele, me na hoahanau o kela me keia Ekalesia, i loaa ke dala e kokua pono ai i kela kula.
Hoopanee ia ka hapai koke ana i na Kumuhana X, XI, XII, XIII, XIV.
XV . No na elele o na Aha. Hapai koke ia ka noonoo no kela Kumuhana. Koho ia o S. W. Kaikuahine a me G. W. Moo he mau elele no keia Aha; a o Rev. T. Coan hoi i komite hoike aku i ke ano o ka noho ana o na kihapai a pau malalo o keia Aha i ka Aha Nui ma Honolulu.
Hapai ia ke Kumuhana XI. No ka hoomaemae Ekalesia. Nui ke kuka ana o ka hale. Na T. Coan i heluhelu mai i na pauku Baibala ma Hoik. 2: E hoahewa ana i ka Ekalesia maemae ole, &c.
Heluhelu ia ke Kumuhana XII. No ke kula kahuna. Na T. Coan i hoakaka mai.
Hapai ia ke Kumuhana XIII. No na keiki a ka Aha. Na T. Coan i hoikeike mai i na rula i hooholo mua ia.
Heluhelu ia mai ke Kumuhana XIV. Ke kinai hewa. Na T. Coan no i hoakaka mai.
Kamailio hou ia ke Kumuhana XV. Na Elele o na Aha Mokupuni. Kamailio kuikawa ia na mea e pili ana i ke alakai a T. Coan no na mea e pili ana i ke Kula Sabati a pau malalo o keia Aha.
XVIII . Ka hui hou ana o keia Aha.
Hooholo ia.—E hui hou keia Aha ma ka luakini o Maunakea ma Kalapana, Puna, ma ka hora 1½ P. M., o ka Poakolu ekolu o Sept. 15, 1875. A ma ia hui hou ana e haomaopopo ia ai ke koho ana i komite, nana e hoonoho ia Rev. S. Kamelamela i kahu no ka Ekalesia o Kalapana, ma ke Sabati o Sept. 19, ae e hookohu ia ai.
Hooholo ia.—E hoouna ia ka moolelo i na nupepa.
Hookuu ia ka Aha me ka haipule.
E hui hou ana keia Aha ma Kalapana, Puna, ma ka hora 1½ P. M., o ka Poakolu, Sept. 15, 1875.
P. S. Ua noho mai na lala a pau o ka Aha i ka la Sabati, ua piha ka luakini i na kanaka, ua haawi ia ka hana i na kahuna eono, a o ka lakou Kumumanao, aia ma 1 Korineto 10: 5. "Aka, aole i lealea mai ke Akua i ka nui o lakou; no ka mea, ua luku ia lakou ma ka waonahele.
Ma ka pule awakea, hui na malihini a me na elele i ka lakou Kumumanao ma Ezekiela 37: 4, 5. "No na Iwi maloo." Ua ikaika no na hana, a ua lana ka manao.
Ma ke ahiahi, ua hoouna liilii ia na kahuna, na elele a me na malihini i na apana eono, mai Waiakea a hiki i Pahoehoe. A i ke kakahiaka Poakahi ae, ua pau i ka hoi ko Hilo, Puna a me Kau.
Me ka mahalo i na kamaaina no ko lakou hoolawa pono ana mai i ka ai, ka ia, a me na mea e ae e pono ai na malihini.
G. W. KEAHUAWA,
Kakauolelo.