Ka Lahui Hawaii, Volume II, Number 18, 27 April 1876 — Page 1

KA LAHUI HAWAII.
"Ua mau ke Ea o ka Aina i ka Pono."
BUKE II.}  HONOLULU, POAHA, APERILA 27, 1876.  {HELU 18.

KA NUPEPA KA LAHUI HAWAII.

Paiia ma kela Poaha me keia Poaha.
H. H. PALEKA,  Luna Hooponopono.
He pepa i hoopukaia i kela me keia hebedoma no na Ohana a me na Ekalesia o Hawaii; he mea kokua i ka noho pono ana o na ohana, ka maluhia o kanaka, a me na pomaikai kino a uhane o ka Lahui Hawaii. "Aole paonioni; aole haanui; aole hikiwawe ka huhu; aole noonoo ino."
O na Kumumanao a pau, na Nu Hou o kela me keia ano, na Mare, Hanau, Make, e kakau mai i ka Luna Hooponopono, a e paiia no ke kupono.
Aole e aeia ka pilikino, ke kuamuamu, ka hoino, a me ka huhu, a ua makemakeia ka hoohoihoi, hoolana manao, hoonaauao, a me ka hoopono.
He $1.75 ka auhau o keia pepa no ka makahiki, a he $1.00 no ka hapa makahiki.
E hookaa mua ia ka auhau o ka pepa mamua o ka loaa ana i kekahi mea makemake e lawe.

NO NA OLELO HOOLAHA.

E lawe ana keia pepa i na Olelo Hoolaha a na makamaka, e like me ke kupono, a e lawa pono ai hoi me ka hoohaiki ole i ka huina o na kolamu kukulu manao, no ka uku haahaa.
O kela a me keia makamaka e makemake ana e hoolaha, e hele mai ma ke keena a e hui pu me ka Luna Hooponopono.
Aole e paiia kekahi Olelo Hoolaha ke ole e hookaa mua ia ka auhau.
Eia kekahi, ke noiia aku nei na makamaka e hoouna mau mai i na mea hou; mai hooloihi loa i na palapala; e hai pololei mai i na manao me ke kuawili ole, a e kakau mai me na hua moakaka.
H. H. PALEKA,
Luna Hooponopono.

OLELO HOOLAHA.

UA KAPU LOA KE kula o Mokauea, ahupuaa Kalihi, Kona, Oahu, e waiho la ma Kaiwiula i na holoholona komo hewa a pau, mai ka la mua aku o Aperila, 1876. A ua koho pono ia o D. PUEKE i luna nana e hoomalu i ua kula la, i keia la 29 o Maraki 1876.
14 tf  WILLIAM L. MOEHONUA.

Ama ra! Holokahana!!

UA MAKAUKAU KA MEA NOna ka noa malalo iho e hoolawa i ka makemake ma ka hana nowelo ana i na KAA o kela a me keia ano, me ka nani a me ka paa. Malaila e kiliopu ai ka holo a ka lio, me na kamaa hao i kaupaona likeia, a i hana ia hoi noloko mai o ka hao paa loa me ke kumukuai haahaa loa. Me ka eleu a me ka mikiala, ua hopo ole i ka puana ae "aohe lua e like ai. Ma Ainahou ka lua o ka Hale Amara mai ka Hale Dute mai.  C. B. WILSON,
1 1y  Kale Wilesona.

G. W. WEST!

HALE HANA KAA HOLO LEALEA ME na kaa hali ukana. E hana ia no ho na kaa nahaha no ka uku oluolu. E kapiliia no kapuai lio, no ka uku kupono. Ma ka hale hana mua o Mr. Benfield, ma ke Alanui Alii  1-1y

OLELO HOOLAHA.

E IKE AUANEI NA MEA A PAU MA KEIA Olelo Hoolaha, ke hoole a ke papa aku nei au i na kanaka a pau o kela a me keia ano, mai puni a mai haawi aku i kekahi Dala a waiwai e ae paha, ke hele aku o W. S. Pahukula imua o oukou me kekahi Palapala Aie Dala m ko'u no, e like me kekahi Palapala Aie Dala epiha ana na makahiki elua i ka la 10 ae nei o keia mahina, oiai, aole au i kakau inoa aku ma ia palapala. Nolaila, mai ae aku, o poho oukou.
C. KANAINA.
Honolulu, Apr. 3, 1876.  (15 tf)

J. PORTER GREEN,
"KEIKI O KAUAUKIUKIU."

HE LOIO! A HE KOKUA OIAIO!
E HELE MAI NA MAKAMAKA A PAU I o'u nei, a na'u no e kokua ia oukou imua o ka Aha Hoomalu a me ka Aha Kiekie me ka uku haahaa makepono loa. Me na oki mare, a me ka hooponopono ana i ka waiwai o ka poe make, he eleu loa ka hana. Aia ko'u keena hana ma Alanui Kalepa kokoke i ke keena o ka Lunakanawai Aeko. E hamama mau ana ka puka, e hele nui mai i pau ka pilikia.  1-1y

E. STREHZ,
[AILUENE]

MALAILA E LOAA AI NA ANO LAAU A pau; a me na wai hoomaemae o kela a me keia ano. E hamama mau ana ka ipuka ma na po Poaono a pau. Ma ke kihi o Alanui Papu a me Hotele, ma Monikahaae.  1 1y

Hoolaha Komohewa.

KE HAI IA AKU NEI KA LONO I NA kanaka a pau, aole e hele wale ma ka aina i kapaia o Waimanalo, maloko o ke Ahupuaa o Honouliuli, Apana o Ewa, Mokupuni o Oahu, aole e hookuu wale i na holoholona, aole hoi ma ke oki ana i na laau, ka lawe ana i na wahie, a pepehi, a uhai wale paha i na bipi hihiu. Pen e na palena o ua aina nei: "O na aina hoolimalima mua ia ia JOHN MEEK, o ke kula o Lihue, e me ke kula o Honouliuli ma ka aoao ma uka a ma na aoao ma kai o Nanakuli ma kahi aoao, a no Koilina ma kahi aoao."  J. H. CONEY.
Honolulu, Feb 9, 1876.  [14 tf]  Luna Hooko.

CECIL BROWN,

Loio a he Kokua ma ke Kanawai
A HE AGENA NO KA HOOIAIO ANA I NA palapala no ka mokupuni o Oahu.
Helu 8 Alanui Kaahumanu, Honolulu, H. P. A.
741   1yr  792

WIL DER & Co.,
(WAILA MA.)

AIA MA KE KIHI O
ALANUI PAPU me MOIWAHINE!
Ua hoolako mau ia me ke kuai ana aku i na
Papa me na lako Kukulu hale
O NA ANO A PAU.
NA PANI PUKA!
PUKAANIANI,
OLEPELEPE,
LAKA,
AMI-LIILII,
AMI-LOLOA
PENA o na ano a pau,
AILA PENA,
VANIKI, &c.
Na Balak Pena me Puna,
Na Pepa Hale me na Lipine Pepa.
Aniani, Paakai, &c.
O na mea a pau maluna ae e kuai makepono loa ia aku no ke DALA KUIKE  1-1y

Leo—O ver Jordan:
Crown of Life, p 37.

1 Na Iesu la no e kaikai kakou
I ka aina lai ma ka lani;
A e ku kakou a e maha pu
Ma ke awa lai ma ka lani.
Cho. Ma ka lani, ma ka lani,
Maha maikai'e ma ka lani,
Aia kii ke Lii, ku a naue e
I ka home lai ma ka lani.
2 Mele ae kakou no ka malu hou,
No ka maha paa ma ka lani;
Mele oli ae, a e hoomaikai
No ka Waiwai mau ma ka lani.
Cho. Ma ka lani, ma ka lani; &c.
3 Ku na pokii nei, a e naue ae
I ka aina lai ma ka lani;
Naue halelu me ke oli pu
I ke ao mao ma ka lani.
Cho. Ma ka lani; ma ka lani, &c.
4 Naue pu a mau i ka home ao,
Kahi o Iesu ma ka lani;
Nana no e kau i ka lei lai mau
Ma ka aina ao ma ka lani.
Cho. Ma ka lani, ma ka lani, &c.
HAWAII.

ELINA KE KOA
HE KANAKA OPIO
PUUWAI WAIPAHE!
KA PALEKAUA LIONA HOI O KONA MAU LA
KE PUKONAKONA O KONA LAHUI, A O
KA OI WELINA HOPO O KONA
MAU ENEMI.
Mokuna V—Helu 17.

          A HOLO pioo ae la na kanaka o luna o ka moku nui, ua ane lia aku la lakou a pau no ke ano koa o keia kanaka opio a ui no hoi, no ka hoea ana aku o kona leo a pahola aku la mao a maanei o ka oneki o ka moku nui i na huaolelo o ke ano kulana koa i hanau oiaio ia e ka puuwai o ke kanaka Beritania. E haka pono ana no ko Elina mau maka i ke kanaka nona ka leo i pane mua mai ai, a ua hoomaopopo iho la no hoi keia o ke kapena no ia. Ua pii ae la kona inaina i ka lohe ana mai i keia mau huaolelo a ko kakou koa, a huli ae la ia a haawi aku la i ke kauoha i kona mau luina me ka leo nui.
          "Hoomakaukau, a e hoopololei kela a me keia pu ma kahi e make ai."
          Me ka imo ana o ka maka, pela ka hikiwawe loa o ko Elina huli ana ae, a aole me ka leo ka haawi ana aku i kana kauoha, aka, me kekahi hoailona i maa i kona mau luina, a he manawa emoole loa, ua haule iho la na palekai o ka Zelina, a waiho palahalaha wale iho la no maluna o ka ilikai. O keia maalea nui o Elina ma, aole i ikeia mai e na powa, oiai ua lilo loa lakou i ka hoomakaukau ana i ko lakou mau pono kaua, a i ka haawi ia ana mai o ka huaolelo e "ki," aia hoi, ua haalulu iho la na papahele o ka oneki o ua Zelina nei, a kuku ae la na lihilihi o na luina, a ano paiakuli ko lakou mau pepeiao i ka nui launa ole mai o na leo o na pukuniahi a ua powa. No ka haahaa loa o ua Zelina nei, ua lele ae la na poka weliweli maluna he mau kapuai uuku wale no mai kona oneki ae, a hele pakika aku la maluna o ka ilikai moana he mau mile a poha ae la a lele liilii ae la na apana oioi mao a maanei. Ku iho la na luina me ke ano eehia, me ka makaukau no nae e hooko i na kauoha a ko lakou haku alii opio. "Ina io no i halawai mai nei kela mau poka me ke kino o ke Zelina, ina no ua koe ahailono ole, aole hoi e hihi, ua hooilina ia ka lanakila maluna o kona inoa, a ua hala wale ae la no na pilikia poino a me na kumu make, "wahi a Elina, me ke ano pihoihoi ole a me ka leo nahenahe.
          Pii ae la ka punohu uwahi nui a iho hou iho la maluna o ua Zelina nei, a pouli haalele iho la lakou me ka ike ole 'ku i kahi me kahi, a oiai iloko oia pouli, ua haawi aku la o Elina i ke kauoha e hookaalo ae i ko lakou moku a pili mahope aku o ka hope o ka powa, a he manawa ole, ua hooko ia iho la keia kauoha. I ka mao ana ae o ka uwahi, kau koke mai la na maka o na powa ma kahi a lakou nei e ku mua ana, a i ko lakou ike ana mai aole, ua nalo ko lakou hoa paio, ua manao iho la lakou ua piholo, a haawi ae la lakou i na leo huro hauoli me ke ano kaena. Aka, he mau minute pokole mahope iho, ua lohe ia aku la ka leo o ka ohe a me ka pahu, a ike ia aku la ka pii malie ana ae o kekahi hae a kau ana iluna o ke kia o kekahi moku e pili ana mahope mai, a akahi no a hoomaopopo ae na powa, aole ka i make ke Zelina. I ka pa ana mai o ka makani a welo pono aku la ua hae nei i ka welelau o ka makani, hoomaopopo aku la na powa i na huaolelo moakaka e kau ana penei:
          "HE MAKE KO NA POWA."
          A ma kekahi aoao e kau ana na huaolelo elua i penaia me ka wai gula penei:
          "ELINA KE KOA,"
          " ZELINA KA MANU!"
          A pahola ae la na leo ohe i ke mele "E ola ka Moi i ke Akua," maluna o ka ilikai a loaa aku la ka lohe i na pepeiao o na kipi, a piha loa iho la lakou i ka inaina.
          "Pakele oe i ka mua, a make i ka lua," wahi a ke kapena powa i pane mai ai me ka leo nui okalakala," a ano, e make oe a me kou mau ukali i pono ai." a helelei aku la na powa iloko o ka opu o ka moana.
          Iloko o keia pioo nui o na powa, ua ike aku la o Elina i kekahi mea maluna o kekahi o na waapa o ka poe powa me he ano wahine la, a i ke kau pono ana aku o kona mau maka ilaila, hoomaopopo lea loa aku la ia he wahine io no ka. E hoe ino ana na powa i ka waapa me ka manao paha e lawe loa i keia kaikamahine, aka, ua kani aku la he pu, a lele aku la ka poka mai ka Zelina aku a ku ae la mamua pono o ka ihu o ua waapa nei. He elele keia e kauoha mai ana ia lakou e hoolana, aka, aole lakou i hooko, no ia mea, kauoha aku la ia i waapa hou, a e holo aku kekahi mau luina me ia, e ukali aku i ka waapa, oiai, ua paa iho la kona manao he wahine kela i lawe pio ia. Ua hooko ia ke kauoha a holo aku la lakou. Na ka hoomanao ana ae i ke kulana pilikia o kela kaikamahine i hooi ae i ka ikaika o na a-akoko o na luina o Elina, a me ka eleu lakou i hoe aku ai, a pakika aku la ko lakou waapa me ka mama loa maluna o ka ilikai.
          Ke ike mai la no ua poe powa nei, a ke hooikaika loa 'la lakou, aka, he mea makehewa wale no ia, no ka mea, ke nee aku la ko Elina waapa me ka hikiwawe a pili aku la ma ka aoao. I ka ike ana o na powa i ko lakou pilikia, aia hoi ua hoao mai la lakou e paio mai, aka, me he la he mea paani ia i ka pahikaua a ke keiki Elina. Ua lele mai la kekahi powa a ku iho la mamua pono o ke alo o ka wahine, he kaikamahine ano opiopio, nona na papalina mohala maikai, ua hapai ae i kana pahi a o ka haule wale iho no koe a kapoo pu iloko o ka umauma o ke kaikamahine, aka, mamua o ke ko ana o kona makemake, ua halawai aku la ka oi winiwini o ka pahi a Elina me kona puuwai, a haule iho la ua powa nei aohe hanu, aohe oni ua make, ua hala ka hanu, a waiho iho la ma na wawae o Elina.
          Ua piha ke kaikamahine opio i ka makau, ua haawi oia i kona leo pule hope loa i ka makua mana, a ua makaukau no ka hui pu ana me ka make a ka powa i manao ai e kau mai maluna ona, aka, i kona hoomaopopo ana ae i ka hana a keia kanaka opio ui, nona na hiohiona koa o na koa, ua hapai ae la ia i ka leo hoomaikai hauoli, me ka honi ana mai i kona lima.
          "Aohe manawa no neia mau hana e ke kaikamahine, aka, ua lawa no nae ko'u hai aku ia oe, aole au he alii, aka, he kauwa. Ano e kau mai iluna o keia waapa a e hoi aku kakou maluna o ko'u moku, a ilaila au e lohe ai i ko oukou moolelo," wahi a Elina.
          O na powa oluna o ua waapa nei, e lana ana mao a maanei o ke kai, ua pau aku i ka make, oiai, ua like me he ilio la na luina o Elina, a ua hiki ole ke paa ia mai. Hoe aku la lakou nei a pili hou i ke Zelina, a i ko Elina nana'ku, aia hoi e waiho mai ana kekahi mau powa iluna o ka oneki ua paa i ke kupeeia, a e ku ana o Egemona ma ko lakou aoao. Hoomaopopo iho la o Elina ua huli hoi mai o Egemona, a ua holo pono kana mau hana. O ke kapena o ua moku powa nei i paa i ke kupeeia. O na puka kahi a na poka i ku aku ai i ka moku powa, ua paa aku la i ke paniia e Egemona ma, a ua paa ka wai aole komo hou aku. I ke kau ana aku o Elina iluna o kona moku me ke kaikamahine opio ui, a ua piha ae la na kanaka no ka hauoli, a i ka hui puia ana'ku me ko lakou hauoli mua no ko lakou lanakila, ua oi pakela loa aku, a o ka hura ana me na leo nui ka lakou hana. O ka hooponopono ana i ke kulana o kona moku a me ka moku i lawe pio ia ka Elina hana ia manawa pokole. Mamuli o ka hookokonoia o na powa, ua hai mai lakou, e haalele ana na aumoku powa i ko lakou kahua hoomoana i ke kakahiaka nui o kekahi la ae, a holo aku no ka hikina. No keia mea, ua wikiwiki o elina e hoomakaukau iaia iho. O na poe pio, ke kaikamahine opio, a me kekahi mau luina, ua kau ia aku lakou maluna o ka moku pio, malalo o ka Lutanela Egemona, a kauoha aku o Elina ia lakou e holo aku a kali maloko o ka muliwai, kahi hoi a lakou i haalele aku ai mahope.
          Ua makemake ole na luina a me Egemona i keia mea, oiai, ua paa ko lakou manao e ukali a hiki i ka hopena, mahope o Elina, aka, i ka Elina mau hoakaka ana aku, ua ae mai la lakou, a hooko iho la i na kauoha a ko lakou haku. Holo aku la o Egemona ma no kahi a lakou i manao ai, a o Elina hoi me kona mau koena luina, hoopii aku la no ke kaalo ana ae i ua wahi mokupuni nei. E pulelo ana na hae, a e waiho aoao ana hoi ua Zelina nei me ka holo launa ole, a ke nana aku kekahi i kona kulana ia manawa, me he la e hai okoa mai ana no, oia ke aliiwahine o ia moana a iaia ka lanakila i na wa a pau.
          Ano, e ka mea heluhelu, e hoomaha iki kakou no ke kamailio ana no Elina ma, a e ukali ae kakou no Egemona, no ka mea, o ka Elina huakai keia i komo aku ai iloko o ka ehaeha a aneane kupilikii maoli no hoi, a no kekahi mau mea ua makemake ka mea hoopuka moolelo o ka kakou pepa, e kamailio no Egemona ma, a i ka hoomaka e kamailio no Elina, alaila, o ka hele pololei ana ia, aole e loloiahili a hoi hope.
          Na ka makani aheahe maikai i lawe aku ia Egemona ma a ku i kahi a lakou i ku mua ai. O ka mea mua iaia, oia no ka hana hou ana, ke kapili ana i na wahi poino o ka moku, a me ka hoomakaukau no ka hiki mai o kekahi pilikia, alaila ua makaukau lakou. He mau la wale no, ua paa ae la ua moku nei, a ua makaukau hoi na mea a pau. Kau ia 'e la ka hae o Beritania, a kau ia aku la kona inoa o Emeline, ka inoa hoi o ke kaikamahine opio i haalele ia ai i ka hale kakela e ku ana ma ka ae-kai, kahi a Elina ma i pae mua loa ai a hui ai me na powa. O ka Egemona hana, o ke kakau ana i ka moolelo o na huakai a ko lakou kuna, a me na kaua ana. Ua nieniele aku oia i ke ano a me na kumu o ka aihue ia ana o ke kaikamahine opio, a ua hai mai no hoi kela. O ka hana mau a ua kaikamahine nei, oia no ka pule e hoopakele ia Elina ma mai na hoopopilikia a pau, a e lanakila lakou ma na hoouka kaua ana me na enemi powa.
(Aole i pau.)

          —He mau kuikahi e ae kekahi e hapaiia nei e kahi poe ma Amerika. He kuikahi me Canada, a he kuikahi me Mesiko. Ke hooikaika nui ia nei keia mau kuikahi elua e kekahi mau mea. E holo ana paha, aole paha. Aole nae ia he mea nui ia kakou, o ko kakou kuikahi ka mea i ake nui ia e ko Hawaii nei.

HE MOOLELO
—NO—
KALINO!
—KE KEIKI A—
KAILUA ME HOLUALOA.
Ka Hiwahiwa Hoi Iloko o Kona Mau
La Opiopio.
MOKUNA I.

          I KE ao ana ae o kahi la, hookupu o Kohala i ka waiwai ia Mailelaulii, a ku ka puu, aole i kana mai ; o keia hookupu ana, he mea mau no ia no na mea hoao o keia pae aina. A kamaaina wale iho la ko laua nei noho ana, aia hoi, ma kekahi ahiahi o kahi la, oiai laua e hialaai ana i ka nani o na pae opua, hiki ana o Mailehaiwale, e noho ana no laua nei kamailio me ka nanea, hikilele ana i ke kaikaina ; hookipa aku la laua nei, e like me ka mea mau, noho iho la luana olelo a moe iho la keia me ke kaikuaana ia po, a i ke ao ana ae, hookupu hou o Kohala i ka waiwai mai o a o no Mailehaiwale, a ku no hoi ka puu o ka waiwai.
          Ma ke ahiahi o ka po elua, hiki ana no keia kaikaina o Mailekaluhea, kahea mai la no ke kaikuaana, uwe nui iho la a pau, nanea nui iho la kamailio a hiki i ka lawe ana a Lehua i ka la, moe iho la ia po a ao, hookupu hou no o Kohala i ka waiwai, o ka hele no ia a ku ka puu no Mailekaluhea.
          Ma ka po ekolu mai, hiki ana no keia kaikaina o Mailepakaha, e noho ana no lakou nei e kamailio ana, komo ana keia ; o oe mai la ka ia? ae aku la keia me ka maikai, pane mai la kona hanau mua, e paina hoi ha, hoole aku la keia, aia a kuu iho ka nae alaila no ka ai aku ka nui o ka manawa; a.i ka pau ana o ka laua kukai olelo ana, luana iho la lakou nei kamailio a hiki i ka po ana, moe iho la keia a ao, hele mai la ko Kohala e hookupu iaia nei, o ka hele ia a kupai ke ko i Makena i ka ua mea he waiwai no Mailepakaha.
          Oi hookupu aku o Kohala i ka waiwai a ilihune, a imi i ka waiwai ia wahi aku ia wahi aku. E ka mea e heluhelu ana i keia kaao, e haalele kaua i ke kamailio ana no lakou la, e kamailio kakou no na wahi kanaka aipuupuu a Hikapoloa.
          Ma kekahi la, liuliu a hoomakaukau iho la ka hele o Homaikawaa me Kuluaikapo, hiki ana laua nei i kahi o na makua o laua i noho ai i Kona, moe laua nei ilaila a ao ia po, a ma ia ao ana ae, kukui aku la ka lono ia Kalino, ma ia manawa no, haohao iho la keia no kona lohe ana i kekahi mau olelo mamua ae o ka manawa, e olelo ia ana e na kamaaina oia wahi, he mau kanaka malihini ua hiki mai, he aipuupuu nae ke ano i ka nana ana, lele ae la ko Kalino hauli, me ka manao ole he malihini kahi e hiki mai ana i ona la.
          Aia hoi, lohe maopopo loa iho la keia he hoouna na kona kaikoeke, ka makaukau iho la no ia o ka hele o Kalino i ka Pa, aole i upu aku, hoi mai ana me ka Pa a hiki i ka hale, i wehe ae ka hana o ia nei a nana iho, he mea e ka Pa maikai, a ua lilo no ia he mea olioli no ko Kalino manao, a o ka hoi aku la no ia oia nei a hiki ana i kahi o na kaikuaana, aia no hoi lakou la e noho ana, kamailio aku la no keia ia lakou la.
          "E o'u mau kaikuaana, he manao ko'u e hoakaka aku ia oukou ano, ke ae ia mai nae e oukou a pau loa." "Heaha la hoi auanei, ua ae makou." "Eia ka haina ia oukou ano, i keia po auanei ea, ala mai oukou i ka manawa kakahiaka nui, paina kakou a maona, alaila, makaukau ka panee o na waa i ke kai, a akoakoa hoi na ukana lawaia i ka waa."
          I ka hiki ana i ka manawa i olelo ia, ala ae la lakou nei, paina a pau, kauo na waa, a i ka makaukau ana, ko lakou nei kau iho la no ia a holo aku la, i ka hiki ana i kuanalu, hu ae la ka ia malaila he Aku, nana aku he weliweli ua mea o ka ia, ke olioli wale la no lakou nei, ia Kalino no a hoolei i ua Pa ai nei, o ka manawa no ia a ke Aku i pii mai ai, o ka hele ia a komo na waa o lakou nei, ke kaele no ia a hiki i ka waha o na waa, mai ka pikao mua a hiki i ka pikao hope ka piha i ka ia.
          Ma keia manawa, olelo hoomakeaka ae la o Kalino i na kaikuaana, "I ke kakahiaka wahine maikai paha o kakou, nana iho ua mea o ka laki i ka ia, ola no hoi ka noho uka ;" ma keia manawa no, kupu mai la ka manao huhu i na kaikuaana no Kalino, no na olelo hoomakeaka i hoopuka ia, pane aku la keia "ae, ke huhu mai nei oukou ia'u, a eia ka'u ia oukou, aole na oukou keia ia a kakou e ike nei, na'u keia ia, eia kuu Pa oi o ka maikai, ina au e hoike ae ana, na ka ia no e pii mai, aole no hoi he luhi ana, e piha ana kela me keia waa e like me ka makemake he ia nunui wale no nae."
          Ninau koke aku la no na kaikuaana ia Kalino, "oia ana kau Pa?" E hoike ae ana o Kalino i ka Pa, ka manawa no ia a ka ia i pii mai ai mao a maanei, komo na waa o lakou nei i ka ia, ko lakou nei paa aku la no ia hoi ana a pae lakou nei iuka, ke paapu mai nei ka aha kanaka o uka, e nana ana ia lakou nei, E! ua hoopiha wale mai nei paha oukou i ke kai a piha ka waa o oukou.
          Ia lakou nei e pae aku ana i ka nalu, ike mua e mai la na kanaka o uka, ua loaa ka ka ia a ua poe o lawaia nei, noh  iho la lakou e kali, a i ka pae nui ana mai, hoolale koke ae la o Kalino e haawi ka ia, ka haawi aku la no ia, hookahi waa ia i na makua, hookahi waa ia ia lakou nei, a o ke koena o na waa ia, haawi ia aku la na na 'lii a me na kanaka. E waiho kaua i ke kamailio ana no lakou nei, a e kamailio kakou no na wahi aipuupuu a Hikapoloa, no Homaikawaa a me Kuluaikapo.
          I kela kanaka keia kanaka e hao ana i ka ia, e hao pu iho ana ua mau wahi ai-puupuu nei a Hikapoloa, he umi ia i kekahi a pela kekahi; ia laua nei e hoi ana a hiki i ka hale, kopi iho la laua i kekahi ia, a na na makua kekahi mau ia, ko laua nei hoi aku la no ia io Hikapoloa la me ke kaumaha i ka ia, ka puaa  ilio, a kahi i moe ai laua nei, a ao ae la, Poalua a i ka Poakolu laua nei hiki ana io Hikapoloa la, haawi aku la laua nei i ka ia, puaa, ilio, ninau mai la o Hikapoloa, "nawai ka olua ia i loaa mai nei?" "Na Kalino ma ka maua Aku."
          "O ke kumu nae o ka loaa ana o ka maua Aku, na na kanaka i hao i ka ia, e hao pu iho ana maua ; oia ke kumu i loaa ai ka maua ia, nana aku ua mea o ka ia, aole i kana mai, piha no hoi ka waa mai ka pikao mua, a ka pikao hope ka piha i ka ia, a eia no hoi ka mea hilu loa i ka Pa a Kalino, he Pa hoikeike pii ke aku; na Mumu i haawi ka ia i na lii a me na kanaka, oi haawi a molowa, e hao iho ana na kanaka mai o a o, a oia ka mea i loaa ai ka maua ia;" a o ka pau no ia o ka laua nei kamailio ana ia Hikapoloa, a hoi aku la no hoi o Hikapoloa me kana lede, ia laua nei e nanea ana no na ea oluolu maikai, aia hoi, kamailio aku la o Hikapoloa i kana wahine, imua ou e ka'u lede hiwahiwa, he wahi huaolelo ka'u e hai aku ia oe i keia wa, owai o oukou ke kaikamahine punahele i ko oukou kaikunane? He poe punahele wale no makou na ko makou poe kaikunane a pau loa, aole no hoi o makou mea i manaoino ia e lakou, nolaila, ke pono ole nei ko'u manao no kau mau olelo e ninau mai nei ia'u no kuu mau kaikunane, a heaha la kau e ninau nei.
          Ke ninau ka paha ia oe e kuu wahine, he manao nui no ia, ae, oia 'na ua manao nui ia, eia no ia: ua lohe mai nei au i kuu mau wahi kanaka ai-puupuu, ia Homaikawaa a me Kuluaeikapo he Pa ka ka Kalino, he Pa hoikeike, pii ke aku, ea! ae! hoole paakiki loa mai la no hoi o Mailelaulii, e like hoi me kona ike ole he Pa ka Kalino.
          Pau ae la no na olelo ana a laua nei, aia hoi, ma kekahi la ae, kukakuka olelo hou iho la laua nei no ka manao piha hauoli o Hikapoloa, a kamailio aku la i kana wahine; e kuu hoa e! ke hauoli nei au no ka manao hele imi Pa, a me he mea la e kono ia mai ana ko'u mau manao no ka hele, he oiaio paha ka ka manao e koi nei ia'u e hele ; e holo paha au i ka imi Pa na'u i kuu mau kaikoeke la, akahi ka hoi ua kukui mai nei o ka pihe ia. Heaha la hoi auanei, o holo no hoi paha, wahi a kana Ewa.
          Ka makaukau iho la no ia o Hikapoloa i ka holo maluna o na waa kaulua a hiki ana no hoi keia i Kona, helo aku la no hoi a kipa ana io Kalino la, kahea mai la ke kaikoeke, he ma—i! aloha hoi paha oe? Aloha! mama ka huakai hele e koeke, ae, mama, ke hiki ka paha iou nei he manao, heaha la hoi auanei kana? Ka hua i ka umauma haina. I holo mai nei au iou nei i ka imi Pa na'u, no kuu lohe ana ae nei i kuu mau wahi kanaka, he Pa ai ka kau.
(Aole i pau.)