Ka Lahui Hawaii, Volume III, Number 4, 25 January 1877 — Page 1
KA LAHUI HAWAII.
"Ua mau ke Ea o ka Aina i ka Pono."
BUKE III.} HONOLULU, POAHA, IANUARI 25, 1877. {HELU 4.
KA NUPEPA KA LAHUI HAWAII.
Paiia ma kela Poaha me keia Poaha.
H. H. PALEKA, Luna Hooponopono.
He pepa i hoopukaia i kela me keia hebedoma no na Ohana a me na Ekalesia o Hawaii; he mea kokua i ka noho pono ana o na ohana, ka maluhia o kanaka, a me na pomaikai kino a uhane o ka Lahui Hawaii. "Aole paonioni; aole haanui; aole hikiwawe ka huhu; aole noonoo ino."
O na Kumumanao a pau, na Nu Hou o kela me keia ano, na Mare, Hanau, Make, e kakau mai i ka Luna Hooponopono, a e paiia no ke kupono.
Aole e aeia ka pilikino, ke kuamuamu, ka hoino, a me ka huhu, a ua makemakeia ka hoohoihoi, hoolana manao, hoonaauao, a me ka hoopono.
He $1.75 ka auhau o keia pepa no ka makahiki, a he $1.00 no ka hapa makahiki.
E hookaa mua ia ka auhau o ka pepa mamua o ka loaa ana i kekahi mea makemake e lawe.
NO NA OLELO HOOLAHA.
E lawe ana keia pepa i na Olelo Hoolaha a na makamaka, e like me ke kupono, a e lawa pono ai hoi me ka hoohaiki ole i ka huina o na kolamu kukulu manao, no ka uku haahaa.
O kela a me keia makamaka e makemake ana e hoolaha, e hele mai ma ke keena a e hui pu me ka Luna Hooponopono.
Aole e paiia kekahi Olelo Hoolaha ke ole e hookaa mua ia ka auhau.
Eia kekahi, ke noiia aku nei na makamaka e hoouna mau mai i na mea hou; mai hooloihi loa i na palapala; e hai pololei mai i na manao me ke kuawili ole, a e kakau mai me na hua moakaka.
H. H. PALEKA,
Luna Hooponopono.
E. STREHZ,
[AILUENE]
MALAILA E LOAA AI NA ANO LAAU A pau; a me na wai hoomaemae o kela a me keia ano. E hamama mau ana ka ipuka ma na po Poaono a pau. Ma ke kihi o Alanui Papu a me Hotele, ma Monikahaae. 1 1y
S. B. DOLE.
LOIO a he Alakai ma na mea pili Kanawai. Ua makaukau oia e pale i na hihia imua o na Aha Hookolokolo a pau o keia Aupuni, me ke kakau ana i na Palapala Pili Kanawai, ma ka olelo Hawaii a ma ka olelo Beritania. 1 1y
Eia ke ola! E kipa!
OWAU o ka mea nona ka inoa malalo iho, ke kahea aku nei au i na mea a pau, kanaka, haole, pukiki a me ka pake i loaa ka lakou mau keiki liilii i ka mai, e hele mai ma ko'u wahi noho, ma ke alanui Kamika, e holo ala makai o Kaumakapili, a me na kanaka makua, i loaa i ka mai Pake, e haawi no au i na laau e ola'i na kamalii liilii a me kanaka makua. Ua ike ia ke ola e ka'u mai e ko Lahaina, e Nahoke, Aholo o Maui a me Kuihelani o Wailuku. 2-4t* LOHEA (Pake.)
Wai Hui o ka Hau!
E IKE IA ka Hale ma ka inoa o "BONANZA" Ke haawi ia aku nei ka poloai i na makamaka keonimana a me na lede o ke kaona Alii, e kipa ae ma ka hale hookipa inu wai momona o ko oukou makamaka nona ka inoa malalo iho, a e loaa no ka hau i hoomomonaia (ICE CREAM) na wai momona o na ano a pau! hoohuihui ia e ka hau iniki o Nuuanu. O keia hale, he hale i hoomakaukauia no na keonimana a he keena nani i hoomakaukau ia no na lede. E kipa mai, a o ka makepono me ka oluolu ke haawi ia'ku, oiai, he makamaka, a he kamaaina no Hawaii nei o JOHN W. CROWELL.
2-1 y (Keoni Koloela.)
Ma ka Hale "BONANZA" ma alanui Moi, mawaena o ka hale kahi umiumi a me ka halekuai o Dillingham ma.
C. H. DICKEY, (Kale Kika,)
LOIO!
A he Luna Kepa i apono ia e ke
Aupuni no ka Apana o Makawao, Maui Hikina.
E HELE NUI mai ka poe a pau i loohia ia me na pilikia pili Kanawai o ka "Ua-ukiu" nei, a na ko oukou makamaka oiaio no e kokua a e hooikaika e hoopau i na pilikia ma na ano a pau o ke Kanawai. 17-1y.
E. O. HALL & SON
[E. O. HOLO MA.]
NA MEA KUAI I NA MEA MAHIAI
NA LOLE, PENA, AILA,
—A ME—
NA ANO LAKO E AE A PAU.
Kihi o Alanui Papu me Moi. 1-1y
Hoolaha Hoopau Hui.
O KA HUI I IKE IA MAMUA AKU NEI MAloko o keia kulanakauhale, mawaena o E. B. FRIEL a me R. W. LAINE, a i hoomaopopo ia hoi ma ka inoa hui o Friel & Laine, kuai mea ai, ua hoopau ia ma ka ae like ana. O na bila a pau i aie ia aku, a i aie ia mai, e hookaa ia, a e uku ia e E. B. Friel, ka mea e hoomau aku ana ma ke kahua kahiko, alanui Papu, Helu 52, ma ka Hale Mu, kahi hoi ana e makaukau mau ai a halawai me ka oluolu me na makamaka e makemake ana i na ono o kela a me keia ano. E. B. FRIEL.
Dekemaba 30, 1876. 1 —1m
PAPA, PAPA.
AIA MA KAHI O
LEWE RS & DICKSON
(O LUI MA.)
KE KAHUA KAHIKO MA
Alanui Papu a me Alanui Moi
E LOAA AI NA
PAPA NOUAIKI o kela a me keia ano.
NA PAPA NANI
A PAA NO KE KUKULU ANA I NA HALE.
Na Pani Puka,
Na Puka Aniani,
Na Olepelepe,
Na Pou, na O-a,
Na Papa hele,
Na Papa Ku,
Na Papa Moe.
Na Pili o na ano a pau!
NA PEPA HOONANI,
Na PENA o na wai a pau
Na Kui mai ka nui a ka makalii,
Na Ami-puka,
Na Ami-puka Aniani,
Na Ami o na ano a pau,
NA AILA PENA,
NA AILA HOOMALOO,
NA AILA o na ano a pau.
NA VANIKI
Na mea HOOHINUHINU o na ano a pau.
Na Balaki o kela a me keia ano.
A KE HAI IA AKU NEI KA LONO i na makamaka a pau, ua makaukau keia mau hoa o oukou e hoolawa aku ma na mea a pau e pili ana ma ka laua oihana
—NO KA—
UKU HAAHAA LOA!
like me ka mea e holo ana mawaena o LAUA a me ka MEA KUAI.
E hele mai! E na makamaka!
A e lawa no hoi ko oukou makemake me ka oluolu
1] a me ka maikai.
S u ffer Little Children.
Gospel Singer p 28.
1
Ua kai na makua i na keiki i o Iesu la,
Kipaku na haumana nae a ae ole ae.
Ua ike e no nae Iesu,
A pane me ka olu no,
E ae i na kamaiki e hele i o'u nei.
2
Na'u no e hookipa a apo ma kuu poli;
Owau ko lakou kahu e, mai kipaku ae;
A i lilo io lakou no'u,
E hui pu me a'u ma o.
E ae i na kamaiki e hele i o'u nei.
3
Aloha Iesu la i kela mau kamaiki,
A pela oia ia oukou, koonei mau pokii;
O kona makemake nei,
E lohe i kona paipai e,
E ae i na kamaiki e hele i o'u nei.
4
E wiki ka wa la e lohe ai na kini
I ka Iesu olelo e, a huli pu mai.
Hoomakaukau, e Iesu e,
I na pokii e ae maikai.
E hele i o Iesu la i ola lakou.
HAWAII.
ELINA KE KOA
HE KANAKA OPIO
PUUWAI WAIPAHE!
KA PALEKAUA LIONA HOI O KONA MAU LA
KE PUKONAKONA O KONA LAHUI, A O
KA OI WELINA HOPO O KONA
MAU ENEMI.
Mokuna XII—Helu 45.
O KE KOA Elina i keia la, he koolua kona ; he mea hoi nana i kau nui no na la lehulehu wale i aui hope aku, a ana hoi e hauoli nei. Ua hooikaika oia me ka wiwo ele e hoopakele ae ia Emeline mai ka lima ae o na powa, a iloko o ka aneane wale no e lawe ia kona ola i pakele mai ai. A owai no la ke hauoli ole ana. O Emeline hoi, ua palua a pakolu ia hoi kona hauoli, no ka mea, me he la no ke ano nawaliwali a hopepe o kona puuwai, ua komo loa'ku ke puanuanu o ka maeele aloha no kana mea i aloha'i a hiki i ke aakoni, a ua punia kona kino mahope o Elina. A oiai ua hiki ia oe e ka mea heluhelu a me ka peni e kakau nei ke hoomaopopo iho i ke kulana o ke koa hiwahiwa nona keia moolelo, ma o ka hoomaopopo ana iho mai ka hoomaka mua ana mai o keia nanea walohia a hiki i keia manawa, he mea hiki ole paha ia kaua ke lili aku ia Emeline no kona haawi ana i kona aloha a pau malalo o na kapuai o ke kanaka ui "pali ke kua mahina ke alo" o Elina.
Mahope iho o ka pau ana o ka mare, aole he mau la wale no ka hoomauia ana o ka hauoli mawaena o na makaainana, aka, he mau pule okoa. Ma ia hope mai, ua hohola iho la ka maluhia maluna o na papalina o ka aina, kuni paa ia ke aloha maloko o ka puuwai o na makaainana no na alii, a pau ke kau ana o ka weli maluna o na kanaka no na powa. O ke aloha, ua nui no Elina, oiai, oia ke kumu nui nana i pulumi aku i keia ino mai ka aina a me ka moana'ku.
Aole no i huhu iho mahope o ko Elina mare ana me Emeline, aia hoi, ua hoohuiia'e la o Egemona me Lerina, ke kaikamahine opio loa a kekahi o na'lii paa o ka aina, a ua like ka nani a me ka hanohano me ka mare ia ana o Elina ma. O na luina o Elina, ua lilo ae la lakou he mau hoa no ke aloalii o Elina, a o ke kuna Zelina, he moku holo lealea no ka ohana alii. Me ka oluolu a me ka maikai i noho ai lakou ma ia hope mai.
MOKUNA XIII.
He mau makahiki elima kai kaalo hope aku la mahope iho o ka mare ana o na'lii opio, a iloko o ia manawa, ua noho ka ohana alii me ke ola maikai. Ua hoohuaia mai la he elua keikikane a hookahi kaikamahine na Elina a me Emeline. O ka mua ua kapaia mahope o ka inoa o ka Moi, o Rikeke, o ka lua o Kalosa, a o ke kaikamahine hoi o Roseli. He mau keiki ui a ku i ke kulana kilakila o na makua. Ua malama mikiala loa ia lakou e na makua, a ua makahehi ia me ka lili o na makaainana no lakou. Ua hauoli nui ka aina no ka loaa ana o keia mau kama alii opio hou no ka aina, a ua nonoi mau i ka lokomaikai o na lani e hoopomaikaiia ka aina a me ka lahui ma o lakou, a e loihi ko lakou ola.
Iloko o keia mau la maikai, oiai hoi ka lahui e hauoli ana no keia pomaikai, aia hoi, ua hahau iho la ke ano ulia onawaliwali maluna o ke kino o ke alii ka Moi Rikeke. Ua ane aoo kona kino, a ua hoike mai la na hiona o ka aneane ana'ku o kona mau la i ka pahu hopu o ke ola, a ua hui pu ia'e la hoi e ka ulia omaimai. He kanaka manao paa o Rikeke ma na hana pono, ua lilo kona mau ano a pau he kauwa hoolohe no ka makemake o na lani, a i ka aneane io ana mai o kona mau la hope, aia hoi, e like me ke ano mau o ka poe maikai a pau, ua maopopo e no iaia ia mea, a ua makaukau oia no ka manawa e kaheaia mai ai e ka Moi nona ka noho alii maluna lilo ae o kona.
Ua kauoha paa'ku la ia i kona ohana ponoi a me ke aloalii e noho paa mai maloko o na paia o ka pa alii, "no ka mea," wahi ana imua o Elina a me ka ohana'lii i kekahi la, "ke ike nei au i ke ane nalo malie ana'ku o ka pumehana mai ko'u puuwai aku, a e kuu keiki, ka mea a'u e hilinai nui nei no ka pomaikai o ko'u aina a me na makaainana aloha mahope iho o ko'u waiho ana'ku malalo o ka ilihonua, ua makaukau au, a ua hooholoia he mau hora kakaikahi wale no koe no kou makua nei ; a e ake ana ke aho uuku i koe iho iloko o'u, e kau mau aku ko'u mau maka maluna o kou makuahine, ka'u wahine aloha, maluna hoi ou a me kau wahine, ka'u mau keiki, maluna o ka'u mau moopuna, a maluna hoi o na'lii a me na makaainana. Ua hauoli nui au a ua loaa hoi ka hanohano kiekie o ka honua nei ia'u mai a oukou mai mai ko'u mau la kamaiki a hiki mai ano; ua waiwai nui au, a he waiwai makamae hoi, oia ka mau o ke aloha laulaha o ka oiaio mawaena o ka lahui holookoa no'u, a ano, ua hooia ia mai ia'u o ka aneane ana'ku keia i ko'u hopena; me he la, aohe a'u makana nui e ae, o ka haawi wale ana'ku no i na hoomaikai ana o ke aloha ia oukou a pau, mai na'lii a me na makaainana, ma ke ano he mau keiki na'u, a noi hope loa'e i ka lokomaikai nui o ka mana lani e uhi mai i na pomaikai a pau a'u e ake nui nei e loaa ia oukou."
Aohe mea i nele ka hoopuluia o na papalina e ka waimaka mamuli o keia mau huaolelo ku io i ke aloha. "E ko'u makua aloha'' wahi a Elina me ka uwe haalipo ana, me ka hiki pono ole iaia ke pane ae, "o ka make, nona na manawa a pau, aka ke manao paa nei au, he moeuhane hihia kau ; a ke noi aku nei au i kou aloha no makou, e hookahua iho i kou mau noonoo ana a pau maluna o kou ano mau he manaolana."
"Ua hoikeia mai ia'u, a ua makaukau au. E hele ana au, e haalele ana ia oukou, ka'u mau mea i aloha'i, ke hiki mai ke kauoha, me ka hala ole," wahi a ka Moi.
O keia mau kamailio ana, aia no ia maloko o keena moe o ka Moi, oiai, ua nui loa mai la kona nawaliwali, a e waiho ana hoi maluna o kahi moe, a he mea mau, e anapuni mau ana ka ohana iaia, me ke kiai aloha ana'ku, me ke ano hopo no, no ke ano nawaliwali loa o ke kulana o ka Moi. Nolaila, mamuli o keia manao ona, ua kauohaia lakou a pau e noho paa mai.
Ua hoolahaia'ku la ka mai o ka Moi imua o na makaainana, a e haawi mau ia ana no ka lono i kela a me keia la no ke ano o kona ola. Ma kahi o ka hauoli nui o ka aina i ka mare ana'e o na'lii opio, ua hookahuli ia'e la a he u me ke kaumaha. O ke ano o na makaainana, he luuluu a me ka pilihua i ka lohe ana 'ku i keia lono, a ua ane noho iho la ka aina iloko o ka nune o ke aloha walohia.
I kekahi po, o ka aneane ana'ku ia e wehe ka pili o na hora loloa o ke aumoe a komo aku i na hora liilii o ka wehe kaiao, aia hoi, ua hoomaka mai la ka iho malie ana'ku o ke alii i ka nawaliwali loa. Kauoha'ku la ia i na mea a pau e hele mai, a ua hookoia. I ka ike ana mai o Elina i na helehelena o kona makua, ua puiwa'e la kona hauli, a kulu malu iho la kona mau waimaka, no ka mea, ua ike aku la no ia, ua kau io na hiona o ka make maluna ona, a i kamau wale no i kona wahi aho a pau ae. Kuku mai la ka ohana a me na'lii o ka aina a puni ka moe, kahi noi a ke alii aloha e moe ana me ka nawe malie ae o kona hanu. E pili ana kona mau maka a i ka wa i pau pono mai ai na mea a pau, kaakaa malie ae la na maka, kulu mai la he mau waimaka, a kikoo mai la kona mau lima, me ka umii aloha ana iho i kela a me keia, a o na mea hope loa oia no ka Moiwahine a me Elina. E paa ana kona lima akau i ko Elina lima akau, a o kona lima hema hoi i ka lima hema o kana wahine Moiwahine. O ke kahuna lapaau e ku ana ia ma ka aoao akau o kona poo, me ke kulu makawalu o kona mau waimaka, a wahi ana i pane ae ai mahope iho o ka hala loa ana o ke alii, "ano, ina i oluolu i na lani e lawe aku i ko'u ola i koolua no kona uhane, ua makaukau au, no ka mea, aohe hopena o ko'u aloha nona. Ua hooikaika walu elike me ka hiki e hookaawale aku i na lima o ka make, aka, me he la, na ka lani io no ke kauoha, a aole he mana ma ka honua nei e pale aku."
I ka wa i kikoo mai ai na lima nawaliali o ka Moi ia Elina a me ka Moiwahine, ua pane mai la ke Alii me ka leo hawanawana. "E na 'lii, aia maluna o oukou ka hilinai ana a na makaainana. Eia o Elina, a e hilinai oukou iaia, a pela pu me ka lahui. E aloha i ka'u Moiwahine elike me kona aloha ia oukou. E malama i ka hae maemae o ko kakou aupuni, a e malama i ka maluhia o ke aupuni. A ano, o ko'u hopena paha keia, ke ike nei au i ka aneane ana mai, a me he la ke lohe nei i ke kauoha e hele, ke haawi aku nei au i ke aloha ia oukou a pau. Aloha!" Haule aku la kona poo maluna o ka uluna, pili malie iho la kona mau maka, a he sekona i hala ae, ua hala aku la oia.
He mokuahana nui ko loko oia rumi ia manawa. Maule aku la ka Moiwahine a me Emeline no kekahi mau hora, a pohala hou mai la me ka nawaliwali. O Elina, ua nui kona kaumaha, aka, ua mau no nae kona hoomanawanui. O na 'lii ua ano e ko lakou noonoo ana. Mahope iho o ka pau ana o na mea a pau no ka hoomaemae ana i ke kino kupapau a waiho ia aku la maluna o ke kahua dala, i uhi ia me na uhi Satina wai gula, ua kahaha ka maka ke nana aku i ke kino o ka Moi. E moe ana ia me ka eehia, i aahu ia me ke kapa roiala o Enelani, me na hoailona a pau o ka hanohano, a me he la, e moe ana oia i ka hihio o ke kanaka ola. Ia manawa i hoomalamalama ia ai ka hale Alii a me ka pa Alii a hoomaka aku la ke kani ana o na pu kuniahi kanikau mai na wahi a pau, a pela hoi ka leo walohia o na bele, e lawe ana i ka lono kaumaha ma na pea o ka aina, "o ke Alii ka Moi aloha, ka makua o Beritania, ua hoi aku la me kona Makua." Mai ia manawa aku, ua wehe hamamaia na ipuka pa o ka hale Alii, a me na kanikau ana, ua huliamahi mai la na makaainana e haawi aku i ke aloha hope loa ana i ko lakou Makua Alii. He ku i ke aloha a me ka eehia ke ano o ka manawa. I ka auina la o ka lua o ka la, ua nalo iho la ke kino alii iloko o ka holowaa kupapau, a i ke kanaha o na la mahope mai, ua waiho ia aku la maloko o ka ilina nani i hoomakaukauia nona, malalo o ka hoolewa hanohano i ike ole ia mamua aku.
A e ka mea heluhelu, hookahi wale no hopena i koe, a oia keia. Elike me ka ka Moi kauoha hope loa, pela no i hooko ia ai, no ka mea, ua aloha ia oia mamuli o kona ano a me kana mau hana; a o kana noi i ko na lani, ua haawi ia mai. No ka mea, ua noho iho la o Elina ma ka noho Moi me ka maluhia, a elike me ke aloha ia ana o kona makua pela no i aloha ia ai o Elina, a mai kona au mai, ua hookupaa ia ka maluhia a me ka pomaikai helemua o Beritania Nui a hoea mai i keia la. Ua noho o Elina me ke aloha ia, a hoea loa aku i na la kolopupua o ke kanaka, ua ulu nui kana mau keiki a ua lehulehu na moopuna, a ua make iho la oia me ka lawa o ka makemake, a me ka waiho ana iho mahope nei, he aupuni a he lahui kristiano malalo o ka maluhia.
Ano e na makamaka, ke haawi ia aku nei ke aloha ia oukou a pau, a ke lana nei ka manao o ka mea kakau, ua lawa ko oukou makemake ma keia kaao, a ua heluhelu ia me ka manao maemae. He oiaio, o ka hoomanao ana no ka Moi Rikeke, aole e pau ; no ka pua Rose o Enelani o Emeline, aole no e pau ; no Egemona, na luina a me kahi kuna Zelina , aole no e pau ana ; a no ke koa hiwahiwa wiwo ole o Elina, ua kulumaia, a aohe hopena. Me ke aloha ia oukou a pau, ke hoomaha nei ka makakila no keia moolelo ku i ke aloha, me ka manaolana, e hoomau ia na iini ana mawaena o kakou, ma na moolelo kaao hou aku a ko oukou makamaka nei. Ua pau, me ka welina.
KAHIKINA KELEKONA.
Kou, Ian. 25, 1877.
HAIOLELO A KA HON. G. W. PILIPO
ma ka La Kuokoa, ma Holualoa, Kona Akau, Novemaba 28, 1876.
[Koena mai kela pule mai.]
Ke Kuikahi Panailike, me ka Panai hou aku i ke awa o Puuloa, e lilo i awa no Amerika Huipuia. Ua kahaha nui ka lehulehu no ua Kuikahi la ; ua hooikaika nui ka Lunakanawai Kiekie, a me ¾ o ka Aha Kuhina i ka Moi Lunalilo e ae i ua Kuikahi la. O ko kakou Moi, ua lawe ae la oia i ke koikoi oia hana maluna o kona poo iho, a hoole aku la i ua Kuikahi la; a pela oia i lilo ai i mea hoinoia e kona mau Luna Aupuni haole, a me na haole e ae i hoomomoa aku iaia. A owai la iwaena o ka Lahui Hawaii e mahalo ole aku iaia no kana hana aloha aina.
Ke hoomanao nei au, he lala au o kekahi komite, a kekahi halawai makaainana nui o ka apana o Honolulu i halawai ai ma Kaumakapili. E kauoha ana ia halawai e nonoi aku i ka Moi, aole e ae aku i kekahi nonoi, e noi ia aku ana, e holo oia i Amerika no ua Kuikahi la. A eia kana pane mai, "Na'u ia e noonoo, a ina e ike ana au he mea e pomaikai nui ai ko'u lahui ma o a o ke holo au, e ae ana no au e holo; a ina e make ana au ma ia holo ana no ko ka Lahui mea e pomaikai, ua pono no ia make ana; eia no hoi kekahi, ina e manao ana au e holo, e ninau aku ana no au i ka manao o kuu Aha Kuhina, a i kuu Aha Kukamalu, a imua hoi o ka Ahaolelo, a imua no hoi o ka Lahui, a ina e ae like mai keia mau mea a pau i ko'u holo ana, alaila, e holo no au; a i ole mai hoi lakou, aole no au e holo ana." Nani ka nui o kona aloha a me ka paulele ana maluna o kona Lahui.
Ke hoomanao nei no hoi au, o ke 'Lii D. Kalakaua, a me a'u nei, ma ko'u inoa kapakapa a'u i kapa ai, o Kaumakapili ; o maua na kanaka Hawaii makamua loa i hoike ma ka nupepa Kuokoa , i ko maua kue ana i ua Kuikahi Panailike la me ka lilo o ke awa o Puuloa, aka, ma ka lawe ana o ka Moi Lunalilo ma ona iho ia kaumaha, a hoole aku la i ua Kuikahi la, ua meha iho la na leo o ka lehulehu, a ua haawi ae la i na hoomaikai ana aku i ka Lani, a i ka Moi hoi.
Iloko no oia la ona, ua hoala ia ae la kekahi haunaele i okomoia iloko o kona mau koa kiai kino; no ka mea, o ua poe koa nei, ua lawe ae la lakou i na lako kaua o ke aupuni ma ko lakou mau lima; a ua hooia na hoomalielie, aole no i pau, a ua hoao hoi na Kuhina ona e hoomalielie, aole no i pau. Aka, o ka Moi Lunalilo, mai kona moe mai, ua kakau aku la i kekahi palapala i ua poe koa la, a i ko lakou hoomaopopo ana ia leo ahonui o ko lakou Makua, ua waiho iho la lakou i na mea kaua a hoi nui aku la i ko lakou wahi ponoi, a haule iho la ua hana kipi la. Nani ka palekana oia pau ana.
He 3 la kuokoa ia Kalakaua I. He mau mea ano nui i ike ia i ka makamua o kona mau la, a o ka mua. O ke koho ia ana o Kalakaua i Moi. Ua komoia a halawai me ka lokahi ole ke koho Moi ana o ka Ahaolelo ku i ka wa o Feb. 12, 1874 me ka lehulehu, a ua hoeha aku la ka poe hoohaunaele, he 13 a 14 paha o na L. M., a ua hoopoino ia aku la ka Hale Hookolokolo, a me na lako Buke, na lako kakau o na keena oihana me ka poino nui.
O ka lua. O ka hooulu lahui o ke aupuni. Mai ka wa mua i kuahaua ai oia i keia mea nui, ua noho oni ole ka lahui mai o a o, e ala ae no kona ola iho, a e alakai ai hoi ma na alanui e kaohi ai i ka haule ana o ka Lahui iloko o na lima weliweli o ka hooneoneoia. Ke kauo ia nei me ka hoowikiwiki i hooemi ia ka lalani o na poe Alii. O ka lalani o na Kamehameha, ua paniia aku la e ka Moi Kamehameha V. O ka lalani o Kaleimamahu, ke kaikaina o Kamehahameha I, ua paniia aku la ia e Lunalilo. Ke ola nei ka lalani o Keliimaikai, o ke kaikaina ponoi o Kamehameha I ; a he manaolana anei ko kakou ma o ia lalani la? Ke ola nei ka ohana a Keaweaheulu; a he manaolana anei ko kakou ma o lakou la, e ulu ae ana ia lalani, i mea hoolaupai i ka aina? Eia ke alii o Kalakaua, aohe ana a me kana aliiwahine ; a o kona kaikaina hoi, pehea la ia? He wahi manaolana i ikeia ma o kekahi kaikuahine la ; a e lawa anei ko kakou hemahema alii ? He mea akaka i ka ike aku, ke ulu nei ka hooemi alii, a me ka hooemi lahui, mamua o ka hooulu lahui ana. O ka Ahaolelo hope iho nei, aole lakou i makaukau iki e kokua i keia kumuhana no ka hooulu lahui ana ; a pehea la e hiki ai ia kakou ke holomua no keia kumuhana ? Malia paha, o loaa mai ia kakou ka hoonaauao ia ana e na haiolelo no ka hooulu lahui i keia la.
Ke kolu. Ka imi kuikahi panailike ana. Na ka Ahaolelo o 1874 i hoomana iaia e hana i ua kuikahi la; a ua hele kino oia e hana, a e hooholo maoli ma ona iho, a ma o kona mau Komisina la hoi. Na ka hapa nui o keia Ahaolelo mai nei i hoomana aku la i ua kuikahi la, ma na kanawai hookuu dute, a me na kanawai auhau hou.
Ke kulanalana o ko kakou kuokoa ana i keia wa.—Ma ka hoomaopopo ana i ko kakou noho ana, ua loaa ia'u kekahi mau mea a'u e hopohopo nei no ko kakou noho kuokoa ana, ma na mea a'u e hoike aku nei.
1 No ke emi o ka lahui—Ke olelo nei kekahi mau luna kiekie o na aupuni e iwaena o kakou, "ina e emi aku ka heluna o ka lahui a hiki i ke 30,000, o ka hoihoiia no ia o ua mau luna la i ko lakou mau aupuni ponoi, no ka mea, aole i kupono ia heluna i kekahi aupuni kuokoa.'' Nolaila, ke hoao nei ka aoao aupuni i ka hana e hooulu i ka lahui, a e mau ai ke kuokoa ana ma na kumuhana penei : O ke kii ana i na kanaka o waho, a me ka imi ana e hooulu ia loko nei. Ina i kanalua ia ko kakou kuokoa ana ma keia mea, aole anei ia he mea e kulanalana ai ko kakou kuokoa ana ? Owai ka mea mana nui ma ka hooulu lahui ana ? Owai ka mea mana i hooulu ai ia Adamu me Ewa, a piha wale ka honua, a pau aku la ia hanauna i ke kaiakahinalii ? Owai ka mea mana i hooulu i na keiki a Noa, a lilo i mau lahui nui? Owai ka mea nana i hooulu ia Aberahama a lilo oia i lahui nui ? O ka mana nana i hooulu ia mau kumu hooulu lahui, oia mana hookahi no ka mea nana e hooulu ia Hawaii a lilo ia i mea nui. O ka Moi iluna o kona Noho Alii, o ka mea Hanohano mai Kona kulana mai, a o ka mea waiwai ma kona home ; o ka makaainana ma kona wahi, a o kakou a pau, e pelu iho i ko kakou mau kuli me ka haahaa imua o kela Mana Kiekie Loa ; a ina i maliu ia mai ko kakou mau nonoi ana e Ia, he oiaio no e mahuahua ana no o Hawaii.
Ka Hooulu Lahui o waho. Ma kuu manao ana, aole no oia ka hooulu lahui. He hana ia a ke akamai o ke kanaka imi waiwai, e poonao mai ana i ka poli o ko kakou waihona aupuni. He nui na dala o kakou i lilo no keia hana mai na la mai o Kamehameha V ka hoomaka nui ana mai, aole nae i hoolilo nui ia na dala ma ke kii ana i mau mea e hooulu lahui ai, aka, i mea e kokua ai ka oihana Mahiai; a i keia wa koke iho nei, ua manao ia, a ua olelo nui ia, e hookomo mai i ko waho poe i mea hooulu, a oia ka ka mea e mau ai ke kuokoa ana o ke aupuni. Aohe mea a kakou e hoohalike ai i ka hooulu lahui ana oia ano, mai na moolelo mai o na au i hala, ua kii ia na kanaka me ke dala a ka lehulehu i mea hooulu, a o ka oiaio nae, ua kii ia lakou i mau lima hana no ka mahiko. A ke pau ka manawa i ae likeia ai no ua poe la, alaila, o ko lakou la hoi no ia i ko lakou aina, aia iho la mahea ka ulu ana o ka lahui ma ia ano. Ina pela ke kulana mau o ko kakou hooemiia ana, aole anei kakou i hopohopo no ko kakou kulana kuokoa.
2 O ka noho lokahi ole. Ua ike ia ka mau o ke ano lokahi ole o ka lehulehu. Ua ike ia hoi ma na hana laulea ole aku i ka Moi. Ua ike ia no hoi ma na hana i hana ia aku ai i na L. M., a me ka hale hookolokolo i ka Ahaolelo Kuikawa o 1874. He mea keia i hopohopo ia ai. No ka mea, o ke aupuni, he ohana hookahi ia, a he mea pono ke loaa ia kakou ka noho lokahi ana.
3 Ke kue ana o Hawaii i kana mau ae like me na aupuni i hana kuikahi me ia. Ina e manao ana kakou e haawi aku i kahi pono i kahi lahui e, he pono ke haawi i pono like i na lahui e ae e noho makamaka ana me kakou. O ke kuikahi panailike i hooholoia iho nei mawaena o kakou a me Amerika Huiia, e hoonele ana i kekahi mau lahui e i pono no lakou, e like me ka kakou i haawi aku la ia Amerika Huiia wale no, ua kue ia hana ia Beritania Nui, a me Farani na aupuni makamaka loa, i hooia mai i ko Hawaii nei aupuni kuokoa ana, a me keia aina o Hawaii e hana aku ai i kona mau makamaka kahiko. Ina i hoala ia mai kekahi mau kumu kue mai ia laua mai, a me kekahi mau lahui e ae i kuikahi pu me kakou, ua hala ole lakou ma ia mea. (Aole i pau.)