Ka Lahui Hawaii, Volume III, Number 4, 25 January 1877 — Page 2

Page PDF (1.27 MB)

KA NUPEPA KA LAHUI HAWAII.
HONOLULU, IANUARI 25, 1877.

Ka Ilina o Kawaiahao.

          He mea maopopo, ua piha ino loa ka ilina makua o Kawaiahao i na kino kupapau, ua ikeia ia mea iloko o na la i hala, a hiki mai nei i keia manawa, ua aneane kupono ole ka waiho hou ana'ku o na kupapau malaila. Ma ke ano he ilina kela no ka lehulehu, a ma o ka hoonele ia ana mai hoi o ia lehulehu, he mea pono i ke aupuni ka imi hou ana'ku i ilina kupapau hou no ka lehulehu. Nolaila, wahi a ka lohe mahui io makou nei, ma ka noonoo ana o ke aupuni, a ma o ka hooholo ana o ka aha Kuhina o ka Moi, ua manaoia e hookahuaia i ilina kupapau hou no ka lehulehu ma keia hope aku, ma ka aoao ma Waikiki o Puowaina. Ke manao nei makou, ua maikai keia noonoo ana o ke aupuni, oiai, aohe paha he wahi e ae i kupono no keia mea i manaoia. O ka hana wale no i koe, o ke kukulu ana aku i pa kupono, kanu nui i na laau, a hoonani me na pua, me ka hoomoe ana i alanui mai ke kulanakauhale aku nei. Ke kali nei makou no ka hoomakaia o keia hana, me ka mahalo nui.

O ke au holomua—Eia!

          Ma ko makou manao paipai o ka pule i kunewa hope aku la, ua hooikaika makou e hoala i ka manao o ka lehulehu ma na hana mikiala e hooholomua ai i na pono a me na pomaikai kuloko o ke aupuni a me ka makaainana ; a no ia mea, ua hauoli piha makou i ka lohe ia ana mai, ua manao ke aupuni e haawi mai i lima kokua, a i hookahi ka hooikaika pu ana e ohi mai a e hoonuu i na waiwai o ka aina. Ua hapai ae nei ke aupuni i na manao e hoopau ia ai ka luku ana i na ululaau, a e hoomaka hou ia hoi ka hooulu ana i na laau. Ke manao ia nei no hoi e kukuluia i mau wiliko, a wili raiki ma na apana a pau i ike ia he kupono, i hiki ai i ke kanaka mahi ko a mahi raiki ke hui pu me ke aupuni no ka mahele hapalua ana i na pomaikai. Ke manao ia nei hoi e hana hou la i manawai no keia kulanakauhale mai kahi kupono mai, i lawa pono ai na pilikia a pau o ka lehulehu, a maluna ae o na mea a pau, e kaapuni ana ke Komisina i hookohu ia e ke Alii ka Moi no ke kokua ana e hooholomua i na kumu hooi waiwai a me na pomaikai o ka aina i na mokupuni a pau, a e hoomaopopo hoi no ka hookumu ana i na kumuhana o ia ano ma na apana a pau a lakou i ike ai he kupono. Maanei, ke pahola hou aku nei makou i ka leo poloai—e ala !—e ku! e Hawaii. Ke minamina nei makou no ka haiki o ko makou manawa e kamailio laulaha aku ai ma keia mea, aka, i keia pule ae, e waiho aku ana makou he manao pili laulaha a me na hoakaka piha ana ma keia hana kamahao i ala ae ma ka noonoo ana o ke aupuni no ka pomaikai o na makaainana.

Ka Aha Hookolokolo Kiekie.

          Ua loheia ma na poai mai o ke kulanakauhale iloko iho nei o keia mau la, ua hoike mai la ka Lunakanawai Kiekie o keia aupuni, ka Hon. E. H. Allen, i kona manao e waiho mai i kona kulana ma ia noho, a e hoi aku  ma kona aina hanau. Ua lohe pu ia no hoi, ua ae mai oia e noho ma ka oihana Komisina Hawaii ma Wasinetona. Ma keia, ua hakahaka iho la kekahi noho o ka Aha Kiekie, a he mea hoi na ka lehulehu e kau nui aku ai me ka nune ana, "owai la ke panihakahaka." Ma ko makou ano, ke makemake nei makou e hai aku i ka lehulehu, aohe kumu e manao iho ai e ano pohihihi ana ka mana hookohu ma ka imi ana i pani, no ka mea, ua hoike mua mai kana mau hookohu ana i ke ano io o kona mau iini e hooia na pono pomaikai o kona lahui, a me he la, ma ka hookohu ana i kekahi o na mana hooko kiekie o kona aupuni, e hala ole ana ia ma ka wae pakiko ana, a ma ke kaupaona like ana hoi i ke koikoi a me ka mama o ka mea e noho aku ana imua o na maka o ka lehulehu. O keia kulana, he kulana koikoi, a he kulana hoi e hiki ole ana i kela a me keia ke hoopiha; a oiai ua koe iho he elua o na lala o ia mana, he mau mea hoi i ikeia no ke kupono ma ko laua mau noho, ke manao nei makou, he mea hiki wale no i ko kakou Moi ke kukulu hou ana i ka Aha piha.
          Ma keia wahi, ke hoihoi mai nei makou i na hoomanao piha ana, me ka manao maikai, i ka makamaka a me ka hoa'loha oiaio o ka lahui Hawaii, ka Hon. E. H. Allen. Ua noho mai oia ma keia paemoku no na makahiki lehulehu wale i hala, a ua lehulehu pu no hoi na makahiki o kona noho ana me ka malama i ka oihana kiekie nui i waiho ia'ku malalo o kana hookele ana. Ua hoomaka mai oia ma kana noho oihana, ke ole makou e kuhihewa, mai ke au mai o Kamehameha III; a iloko o na makahiki loihi, iloko hoi o na au o na Kamehameha a me Lunalilo i hala aku la, a hoea mai i ko KALAKAUA I, ua hooko oia i na hana a pau e pili ana i kana oihana a me na oihana e ae i waiho ia aku ma kona lima, me ke ku i ka mahaloia a me ka aie ana o ke aupuni Hawaii iaia. He oiaio, aole no paha e nele ana ka minamina ia o kona mau kokua ana, a me kana mau hooikaika ana ia Hawaii nei, a me he la, ma kona haalele ana mai i kona kulana, malaila no e hoonele ia mai ai o Hawaii me kekahi lima hana koo ikaika no kona mau pono. Me ia ko makou aloha.

Kekahi mau mahele o ke Akeakamai.

          Hoopololei.—Ua olelo ia ma ka helu i hala ae, "ina elua a oi aku, kapaia ka momenetu (momentum) ;" o ka pololei, momeneta (momenta).
          O ka mo tio o na mea kino a pau, he motio huiia ; nui wale na mea e hooikaika mai ana i kela a me keia motio. A o na mea kino a pau loa i hoolele ia, ua alai ia e na ikaika elua ; aka, e 3 ikaika i ike ia ma na mea i hoolele ia, aole nae e kapa ia ka mua o lakou, he ikaika alai, oia hoi : 1 Ka ikaika o ka mea hoolele. 2 Ka ikaika alai o ke ea. 3 Ka ikaika umekaumaha o ka honua.
          Ua kapa ia ka ikaika mua, "Ka ikaika hoolele pololei," o na ikaika elua i koe, ua kapaia "Na ikaika alai i ka ikaika mua." Ma kekahi mau mea, elua ikaika ; a ma kekahi 3, 4, 5, & C. Aohe palena o na mea a pau i imi ia, pela no e pau ole ai i ka imi ia na ikaika huiia o kela mea keia mea. 1—Ka hui ia ana o na ikaika elua a lilo i motio hookahi.—O ka hui ia ana o na ikaika elua a oi aku i motio hookahi, aole no i ike pinepine ia ma na mea a pau, aka, ma na mea hooleleia ; ua loaa na ikalka 3 i hoike ia maluna. Penei, ina e nou oe i kekahi laau e 3 mea i ike ia. 1. Ka ikaika o ko lima i ka hoolele ana i ka laau.
          2. Ka ikalka o ke ea o alai mai ana i ko ka laau lele ana.
          3. Ka ikaika o ka umekaumaha e ume ana i ka laau.
Nolaila, ua lele ka laau ma ke kaha pelu, aole ma ke kaha pololei au i hoolele aku ai. Ua huiia na ikaika 3 i ka laau e lilo i mosio hookahi no ua laau la. Eia kekahi: Ina e holo ka waa mai kekahi aoao o ka muliwai a i kekahi aoao, he 2 ikaika i ike ia malaila, 1 ka ikaika o ka mea hoewaa e hoonee ana imua. 2 Ka ikaika o ke au e hoonee ana i kai; nolaila, hele kapakahi ka waa. Eia ka loina o ka motio no na ikaika elua. Loina—Ina i hoohalikeia na ikaika elua i ka mea kino, me na aoao i pili pu o ka huinaha-kaulike; alaila, ua like ka motio huiia o laua me ke kaha kapakahi o ka huinaha-kaulike (quadrilateral.)
          Penei : E hoailona aku i ka huina 4 kaulike i na hua pi-a-pa, A, E, I, O ; ma A he popo kuu aku kekahi e hoonee ana i ka popo ma ke kaha pololei o AE, a hiki ma E i ke sekona 1 ; loaa i ka ikaika elua nee aku ma ke kaha pololei EI a hiki aku ma I i ke sekona 1 ; nolaila, aole e motio aku ka popo i E aole hoi i EI ; aka, ma ke kaha kapakahi o AE & EI oia o AI i ke sekona 1, no ka mea, ua haawi ia i ka popo ka motio mua ma AE, aka, ua haawi ia me ia motio hookahi ka motio e nee aoao aku ai i EI ; a o AI = AO, AE = OI, nolaila, o AI ke kaha kapakahi o ka huina 4 kaulike AEIO, ke ala motio o ka popo i hoonee ia e na ikaika elua. (O ka wehewehe ana no ka pana-pua a me ka lele ana o ka manu, ua waihoia.)
          2, Ka pa ana mai o na ikalka lehulehu.—He kakaikahi ka ike ia o na ikaika lehulehu e ili ana i ka mea kino hookahi, aka, eia ka rula mau ma ke kaha kapakahi e hele ai ka mea kino i hoonee muaia e na ikaika lehulehu. Eia ka loina o ka motio hui io no ka pa ana mai o na ikaika lehulehu.
          Loina.—Ina i hooikaika ia kekahi mea kino e na ikaika he lehulehu nana e hoonee aku iaia ma na aoao a pau o na huina lehulehu, koe hookahi aoao ; ke ili pakahi mai ia mau ikaika ma na tekona okoa ; alaila, ina ili pu mai lakou i ka manawa hookahi, e motio aku ka mea kino ma ka aoao i koe o kela huina lehulehu.
          Penei, ina 4 mau ikaika e hooikaika ana i kekahi mea kino e hoonee ana ma na aoao o kekahi huina lehulehu, koe hookahi aoao, alaila, ua motio ka mea kino ma ka aoao i koe o kela huina lehulehu; oiai, ua ili mau ia mau ikaika ma na sekona okoa. (Ua waiho ia ka wehewehe o keia loina, no ke pohihihi loa me ke kii wale no e hiki ai.)
          3. Ka weheia ana o ka mo tio hookahi, a loaa na ikaika he lehulehu.
Elike me ka hui ia ana o na ikaika he lehulehu a lilo i motio hookahi, pela no hoi e weheia ai ka motio hookahi a loaa na ikaika lehulehu nana i hooikaika aku a loaa kela motio. (He like pu keia me ka loina maluna, aka, ke hoopuka ia aku nei ka wehewehe o ke kii e hoomaopopo ai i keia lala e o keia mahele ; he kii keia i mahalo nuiia e ka poe i ao ia no ka maikai o kona mau wehewehe, nolaila, ua manao ia e hoopuka aku i ka wehewehe ana i na tausani i kuluma mua i keia e kuhikuhi mai no oukou i ke kii, ke ae ia e ko lakou oluolu.)
          Ua loaa ka wehewehe o keia lala 3 ma ka holo ana o ka moku me ka makani ku-e. Penei, e kapa aku i kekahi moku o MN, o AE ka pea, o IO ka ikaika o ka makani ku-e e pa mai ana i ka pea. E hana i ke kaha IU i huina kupono i ka pea a me OH i kaulike me IU, a me IH i kaulike me OU ; alaila, e kapa aku ia JO ka makani huiia o na makani elua IU & IH ua kaulike me ka pea ; nolaila, ua lilo i mea ole, pela no o IU ua like me HO nana e hoonee i ka moku. E hana i ke kaha HL i huina kupono i ka iwikaele o ka moku MN a e hoolawa aku i ka huina 4 like OHHL ; alaila, e wehewehe ae i ka makani HO i like me na makani elua. (HO ke kaha kapakahi o OKHL.) E kapa aku 1 ua mau makani la o KO & LO ; aka, o KO, ua ili kupono i na iwikaele, nolaila, ua lilo i mea ole, koe wale no o LO ka ikaika e hoonee ana i ka moku ma ke kaha pololei NM o kona motio ; nolaila, o LO ka ikaika okoa e hoonee ai i ka makani ku-e (IO) i ka moku.
Ma keia pule ae e hoomaka ai ma ka mahele 4.  (Aole i pau.)

Mai ke kulanakauhale kaulana mai o Europa.

          [E hoomanao ae ana no paha ko makou mau makamaka, ua loaa mau ia makou ka lokomaikai o kekahi lede opio o ka malu ulu o Lele, no na mea e pili ana i kana huakai i ko na aina e, i na la i hala iho nei. I ka wa ona i kakau mai i kela leta i kona mama, e kilohi ana oia i ke kulanakauhale kaulana o ke ao nei, a iloko oia mau nani a pau, ua hoomanao mau oia ia hope nei me na huaolelo ku i ke aloha a me ka naauao. Penei kana leta hope mai nei i kona mama, ka mea hoi a makou e haawi aku nei i na hoomaikai piha ana no ka lokomaikai i ka haawi ana mai i ka leta a kana kaikamahine i waiwai no ka lehulehu ma o ka LAHUI HAWAII la.]
PA RIS, SEPT. 25, 1876.
E KO'U MAMA ALOHA NUI LOA;—
          Ua halawai mai au me ka oukou mau leta ma ka la 20 o Sept ; nui kuu aloha ia oe, a hoomanao mai la au i kau mau hana aloha ia'u i ke keiki, a hoomanao pu mai hoi i kahi a kaua e hooikaika'i i ka imi ana i ola uo keia noho ana, hele mai la ia mau mea a kokoke ia'u, a na ka waimaka no e hele, aka, ua hauoli no nae au no kuu ike ana iho, he lanakila no ko oukou noho ana, a he ola oluolu no hoi, a na ke Akua e malama ia kakou.
         Haalele makou ia La dana i ka la 15, a holo aku ma ke kaa ahi a hiki ma Dover, kau aku la ma ka mokuahi, elua wale no hora hiki ana i Farani ; nana aku la au i keia aina, nani, uliuli no hoi na laau, aohe mea a ka maka a me ka manao e kanalua ai, aohe puu, aohe kee, a kuhikuhi mai la o Mrs. T. ia'u i kahi i kaua ai ; a he mau minute pokole mahope iho, kau aku la makou maluna o ke kaa ahi, a kau aku la ka ihu no Parisa ; eiwa wale no hora hiki ana ilaila i kahi a ka nani i noho ai, hora 6 kau aku la makou ma ke kaa, a holo aku la i ka Hotele, alakai ia aku la makou a hiki iluna, nana aku la au i ka rumi hookipa, Auwe! He hulali wale no na mea a pau loa ; hele loa aku la hoi au a loko o na rumi moe, ua like wale la no na mea a pau ; aohe kee a ka maka e kilohi ai, oia paha ka mea a kanaka e olelo ai, "Pali ke kua, mahina ke alo," puka loa aku la hoi au a waho o ka lanai, nana aku la au i ke alanui, me he mea la, ua pau i ke ahi, ua hele wale a moa unounoa Puna i ke ahi a ka wahine, o na ano a pau, melemele, ulaula, omaomao &c.
          A ao ae, hele aku la makou ma na alanui, a me na halekuai, o ka hulali no a ka daimana, o ka oaka no hoi a ke gula, a o ka anapa no hoi a ke dala, a me na pohaku nani ma kela a me keia aoao o na alanui. Kekahi mea hilu loa, o ka lohe ole mai o na kanaka o keia wahi i ka olelo haole, aka, ua loaa no ko makou mahele olelo, he ike i na olelo a pau loa, a oia ko makou alakai e hele nei. A kekahi la ae, oia ka la pule, ua like no nae me ka la noa, aohe malamaia o ka la o ka Haku ; hele aku la makou e nana i na wahi kaulana o kela me keia ano, pii makou i kekahi wahi, oia kahi e ike ia ai o ke kulanakauhale mai o a o, he 365 alapii. Pii aku makou a hiki i ka hapalua, hoomaha kekahi o makou, a pau pii aku a hiki i ka wekiu.
          Ia hiki ana o makou, nana aku la makou ma o a mao, ike aku la i na ulu laau e hoopulupe ia ana e ke onaona waianuhea, na alanui no hoi, hihia ; hihi aku hihi mai, "Hihi kaunoa hihi i Mana, aloha wale ia laau makua ole ;" o kanaka hoi keia, ua like me ka moa ka liilii, a poniuniu na maka ke nana aku.
          I kekahi la ae, hele aku la makou e makaikai i kahi i waiho ai o ke kino kupapau o Napoliona, aia iloko o kekahi pahu mabala, me ka nani o ka hana ia ana, me na hae a me na kii a puni, o ka papahele keia he mabala wale no, a peia makou e hele nei i na wahi kaulana o neia mau aina. Ekolu paha o makou pule i koe, alaila, holo aku no Geremania.
          Eia hoi kekahi, inehinei, Sept. 24, holo aku la makou i kekahi kauhale ma Vosile, oia hoi kahi o Mary Antonate ka Moiwahine, ka wahine a Lui I, ke alii o ka poe Farani, aia hoi malaila na mea nani, komo aku la makou ma kona rumi hookipa, he mau mea nani wale no, o na noho keia, he wai gula wale no, na kukui ua puni i na aniani anuenue, komo hou aku la makou ma ka rumi hookipa malu, aia malaila kana mau mea nani a pau iloko o kekahi pahu ume nui, a komo hou aku la makou iloko o kona rumi moe, he nani wale no, o ka uluna he silika wale no, o ka paku he silika me ka lihilihi a puni, a me ka uhi o ka moe, he silika me ke kalaunu mawaena a me na kihi, a pau ia, hele hou aku la makou he hale hou, oia ka hale kaa o Napoliona, ilaila au ilihia i kuu ike ana i ke kaa, he gula wale no na mea a pau i hana ia ai, mai na huila a i na mea a pau loa o ke kaa, a o kona kumukuai $5,000,000, a o ke koikoi ua poina au ; eia no ia'u ke kii o keia kaa, a he mau kaa e ae no kekahi eono e waiho pu nei.
          Ma ka mahina paha o Iune, e hoi'ku ai kekahi o makou, a e hoi pu aku ana paha au ke ae mai ke Akua.  * * *

Pane ia A. P. Kalaukoa.

E KA LAHUI HAWAII; Aloha oe:—
          Ua paipai ia mai au e kamailio 'ku imua o ke akea, a me ka mea nona kela inoa e kau ae la maluna. No ko'u ike ana iho nei ma ka Nupepa Kuokoa; no ka hoolaha a Huaa e pili ana no ka hana naaupo a A. P. Kalaukoa, no kona haihai kanawai, a manao ino e hookii i ke ola o ka lehulehu ma keia kaona, eia ka ninau ia oe e A. P. K. nohea mai keia manao ino ou? no ka hana naauao anei? no ka manao ino paha? kupanaha! kupanaha maoli kou noonoo! o oe ke kanaka i hooili ia aku e na kanaka a pau i ka hanohano, a he hoa no ka Ahaolelo ma ka helu 2 o keia apana, o ka hana anei ia a ke kanaka iluna oia wahi e like me keia ke ano? aole! aole! he hana keia na ke kanaka naaupo, o ka hele e papa i na maauaua pai ai me ka hookokona e hoopii i ke dala hookahi a me ka hapalua o ke pai ai.
          No ka manao anei he mau lua dala ma Honolulu nei ; a he mau hale hana dala maanei? kai no hoi o oe no kai noho iho me na poo la i ka uapo, a nahu ia iho ko kua e ka la. E na poo la o ke kaona nei, nana ia iho o A. P. K. ke upu ia nei ko kakou make, a pehea kakou, e nana wale aku anei kakou ia ia? aole, ua pili keia hana ana i ke kanawai, hokai nohoi ua maukauka ka hoe hewa, a A. Kalauli, e Lota, e Levi Keliipio, e ia iho ka puaa nui, molia ia ae i kuahu a ke Aeko i loaa ka ohua noho o Kawa, ai i kahi samano awaawa, o kou mau noonoo e A. P. K., he noonoo lalau, hooikaika iho oe i Lunamakaainana, ko'u ko waha e hemo ia oe kekahi pilikia, hemo io no, noho iho nei oe ia hale hanohano, he kohu kii oe, na hai kahi manao o ka liki wale iho no kau, e hoopilimeaai ai, a eia hou keia noonoo lalau ou. E na poo la, a me na makaainana o Honolulu nei nana i koho 'ku ia A. P. K., e ku iluna e nana pono. Ina e lokahi oukou, a e hoao kakou e kahea ia Wailuku a me ia mau wai eha, a me ka mokupuni kaili la olalo, e kokua mai ia kakou iloko o keia mau la, alaila, ua ola no kakou, e na keiki lalawai o ke kaona nei, E. Mikalemi, J. Keau, a me J. Moanauli kokua ia iho ka lehulehu, i loaa hoi kana. Eia keia mea kupanaha, ua ike au ma ka hoolaha a Huaa ua hele oe e A. P. K., iloko o ka luakini o Kamoiliili me na kanaka e hui i kau hana lapuwale malaila, nawai i kauoha ia oe e hele malaila? aole ia he hale i kukuluia no kau hana, oia hale, he hale imi i pono no ka lehulehu, he hale kahea aku i ke Akua e hoola mai i na kanaka, aole i hale imi a kuka i mea e make ai ke ola o ka lehulehu, auwe! na luna ekalesia oia apana ka puni wale, heaha la ka manao o ke kahu ke hoi mai.
          O kou mea no i noonoo lalau ai e A. P. K., aole oe i hoonaauao maikai ia, ma kou moolelo i puka i ka "Lahui Hawaii" mamua aku nei, mai ku makahiki no a ku ana. Aole au e pane nui aku ana ia oe i keia wa, aka, i na oe e pane mai ana i keia, ua makaukau au e lena i na kakaka a na keiki koa o ka pa kaua kaulana o Makalapine, a i onioni hou mai oe, e lawe mai ana au i ka hauna pahi hope a Keneki, ke koa kaulana o Sekotia, a i ole ia o ka Wiliama Walaka paha.  JOHN UILAMA.
Kawaiahao, Jan. 24, 1877.

          Ua loaa mai na leta e mahalo ana i ka haiolelo a ka Hon. G. W. Pilipo.

Heaha ke ano?

E MR. LUNAHOOPONOPONO; Aaloha oe:—
          Ma ka helu hope iho nei o kou hoa kalaimanao ka nupepa Kuokoa, ua ike iho la au i kekahi itamu nona ke poo, "I hookahi wale iho," a ua ano kahaha wau. He oiaio o ke ano a me na huaolelo o ua itamu la, ua pili kino, a he hoike ana hoi i ke ano hoino me ka manao nonohua o ka enemi ; ua manao au e hele maoli aku a ninau i ka Luna Hoopuka o ua pepa la i ke ano a me ka makemake o kela itamu i kakau ia e ka mea ana i hoonoho aku ai i Luna Hooponopono no kana nupepa, aka, he mea makehewa paha, oiai, eia no ka nupepa LAHUI HAWAII, ka waha olelo oiaio o ka mea i hana ino ia mai e ka opu keemoa.
          Heaha la ke ano ? He oiaio anei e ae ana ka Luna Hoopuka e hoike ia ua lili kana pepa no ka malama ia ana o ka la 2 o Ianuari e kekahi mea manao maikai ma ka apana o Puna, Hawaii? He oiaio anei o kona makemake ia e hoolilo ia kana nupepa i enemi no ka mea hewa ole ma ka hoopuka ana i na olelo kuamuamu, me ka hoino wale ana i kahi poe me ke kumu ole? Aole paha! Aka, nawai kela mau huaolelo? Ma ka rula paa o ka papa pai ma na aupuni a pau o ka honua nei, ua hoike oiaio mai kela itamu na ka Luna Hooponopono no i kakau ma o kona manao iho. A owai ? Ae! Owai ke kanaka kulana maikai e manao ana he hana maikai kela ? Ua hoike mai oia i kona lili, ua wehe hamama ke pani huna o kona ipu inaina, e ake ana e hoopoino i ka hoa kanaka, mamuli o kana mau hoino, a ua hooia mai hoi i kona nele i ka manao maikai. Aka, ua minamina nui au nona, no kona haku hana, a no ka nupepa Kuokoa , oiai, mamuli o kana mau olelo pelapela i hoopuka ai, ua hoohaahaa oia i ke kulana o kona haku hana, i kona kulana iho a me ke kulana o ka nupepa ana e hookele nei ; he kumu hoi e haalele mai ai ka manao maikai o ka lehulehu a nele i ke kahua holomua a kupaa.
          E ka manao ino kumu ole, e ka hakukole, a e ka puni kuamuamu pilikino, e hoopau i kau hana haumia, a mai alako i ka manao maikai o ka lehulehu mahope o kou meheu awahua. Mai manao oe he mau olelo inaina keia, aka, he aloha nou, no ka mea, owau no keia me ka oiaio, o  KOU MAKUA.
Maemae, Ian. 24, 1877.

Mai pau ke ola.

E KA LAHUI HAWAII E; Aloha oe
          He wahi mea hou ku i ke kaumaha ka'u e hooili aku nei, a nau hoi ia e ahai hele ae ma na wahi a pau, i ike mai ai na kini lehulehu o ka mea nona keia mau hua e kau ae la maluna, "mai pau ke ola."
          Ma ka Poaha, Ianuari 4, 1877, haule iho la o Kaui, he kaikamahine opiopio nona na makahiki he 15 a oi, mai luna iho o kekahi kumu niu, ma Puunou, Lahaina, Maui. Penei ke kumu i haule ai:
          Ma ia auina la o ka Poaha, lana koii koi ae la ka manao o Kaui, a o ka ono hoi a ka puu moni ai, nana hoi i hooikaika i na aa koko o ka puuwai palapalu, o ka lapaku ae la no ia o ka manao e pinana iluna o ka laau, me ka manao ole e loaa ana la hoi i ka pilikia. O ko ianei hoomaka ae la no ia i ka pii a malalo o na ha e loha ana, lalau ae la na lima i na ha maloo a huki mai la, a hoolei aku la, a lalau hou ae la no na lima i na ha hou ; o ke ano maule mai la no ia o ke kino a puni, o ka hoomaka iho la no ia o ka hoholo ana, a ma ka hapalua o ka niu, o ko ia la wala aku la no ia a pahu ana ilalo; o ka pau ae la no ia o ka ike. Ia wa i kiiia aku ai e kekahi poe, a hapai ia ae la a ma ka hale, a no na minute loihi o ka waiho ana, a pohala ae la. O ke kiekie o ke kumu niu, 24 kapuai.
          O keia kaikamahine i haule ai, o Paka ka inoa o kona makuakane, a o Kalewaiku kona mama. Ua hanau ia oia ma Puako, Hawaii, a ke moe lolii nei oia ma ka hale no na mauiui o ka haule ana. Aole i nui ka poino, aka, ina oia e kunu a kuha mai, e puka mai ana me ke koko.
          Mahope iho o ka pohala ana ae o Kaui Paka, puka ae la na moeuhane palaualelo o ka po, penei : moe iho la o Makauahoa k., he mea pili no ia Kaui, i ka moe palaualelo, a ike aku la ia i kekahi manu nui me na hulu omaomao ma ke kua, a he melemele ma kona umauma, ma ka welelau o ka pali kiekie, e hoomoe ana i ka punana, a e waiho ana kekahi mau hua ma ka punana. Aohe i liuliu ia nana ana aku a ia nei, (Makauahoa) ike aku la no ia i ka Kaui uhane palaualelo, e unuunu ana i ka hulu o ka manu. A pau ka unuunu ana, o ka haehae mai la no ia i ke kino, a hoolei mai la ilalo o ka pali. Ia wa lohe ia aku la ka Ikuwa o na paia o ka pali, a ko ia la puoho no ia. Ua lilo nae kela moeuhane palaualelo, i mea e hiaa ai o ka po, aole no hoi ia i hoopuka iki i keia moe, aia nae a ike ia ka pilikia, alaila hai ae, a pela no ka kona kini lehulehu. Nolaila, aohe waiwai o na moeuhane palaualelo o ka po.  SAML. K. KAIHUMUA.
Lohaina, Maui, Ianuari 10 1877.

          E alawa ae e na maka o ka poe heluhelu, a nana ae i ka hoolaha a E. B. Friel e puka aku nei i keia la.

LEHULEHU WALE AKU!

M R. LUNAHOOPONOPONO; Aloha oe:—
          Ua ike au i ka manao o W. Y. Kekoalaulii ma kou helu o ka la 28 o Dekemaba, 1876, nona ke poo, "He punana na ke Diabolo," a ua mahalo au no kona ake nui e hoikeike a e ao aku i na mea a pau e hana ana ia mea. Aka, me he la, ua paniia kona mau maka a ua palulu ia kona mau pepeiao ma na ano hana a na wahi e ae a pau, koe wale no ko ka Moiwahine Emma. Oiai, aia no maloko ponoi o kona wahi e noho la ; aia no ma kahi e kokoke ana, aia no malaila a puni, na punana o keia ano, a i oi loa'ku no kekahi ma ke ano haumia, aole nae he hoolaha mai. Me he la ua ike io no oe e W. Y. K., i kau mea i kamailio ai, a ua pono no oe ma kou pane ana, aka, pehea ka hoi ia e kau ala i ko maka? He pono no ia ea?
          Ina kou he makemake e hoomaemae, e pono e hoomaka i ke kumu, mai huna. Nolaila, weheia mai, a e kuokoa me ka wiwo ole no ka pono o kou lahui. Ei iho no ua puni mele me na puni hula, a me ua punana na ke Diabolo. Kuailo mai.  IKEPONO.
Honolulu, Ian. 23, 1877.

MAI NA AINA E MAI.
Hoolilo ana i kanaka Hawaii.

E KA LAHUI HAWAII E;—Aloha:
          Ua ike ae la oe i keia mau wahi hua e kau ae la maluna, oia hoi ka "hoolilo ana i kanaka Hawaii" ma ka inoa o ka Moi Kalakaua.
          Oia hoi keia : Elua Lahui o ka Moana Pakipika e noho nei ma Sacramento nei i hoohiki ma ka inoa o ka Moi Kalakaua. He kanaka maoli lakou, ka Malaia a me ka Malina.
          A ma keia eepa ana a lakou, ua loaa mai ko lakou mau palapala hoohiki maleka i ke kau koho balota iho nei o ke Alii o Amerika. Nolaila, ma keia ae pololei ana, ua loaa pakahi mai ia lakou na paloka me ka oluolu.
          Nolaila, e nana pu mai kakou i keia oiai hoi, ua ike iho makou ma na nupepa elua e hele mai nei i o makou nei la, e olelo ana, he manawa hoopii Lahui kona noho ana. Nolaila, oia na Lahui elua, ua lilo e ke ea e waho, a he mau lahui hoi i ano like me kakou, a he mau lahui maikai no, aole elike me na Pake. O keia lahui, (Pake) he lahui ino loa i oi ae mamua o na lahui a pau o ka honua holookoa, a makou e ike mau nei i na wa a pau.
          Aka, o ka poe waiwai, he aka iki ko lakou, a he mele hoi nana pahu poheoheo; a elua a ekolu paha makahiki, heo ana; o keaha iho ka oukou, o ke ahuawa. He nui a laula na hana ino o keia lahui i koe a'u e ike nei, aka, e hooki ana au maanei.
          O ke aloha no ko oukou e ka Luna Hooponopono, a me na keiki ulele hua metala o ka "LAHUI HAWAII."
JOHN KAPU.
Sutter Co. Kaleponi, Dek. 8, 1876.

NA AUI A KA MAKAPENI.

          —Heaha ka mea i like ai o Solomona me Roketaila? No ka mea, o Solomona he alii ia no na Iudaio, a o Roketaila hoi, he Iudaio no na alii.
          —O na pua Rose, ua memele kona ula i ke kakahiaka, a o ka aoao palupalu nani, ua hoopaweo oia i na maka i ka liula.
          —Palapala aku la kekahi keiki i kana aikane, no kana wahine hoopalau me ka olelo aku penei: Ua ike au i kuu hoa o ka manawa e hiki mai ana, o kona helehelena he like me ko ka pua Rose, a o kona ili nae, he puahilohilo me he la ua ku ai ia, aia nae iuka o Puaahaunui kahi i noho ai. Ua loaa ia Huaa ka nane. He wahine inu awa ka!  HUAA.

WAIMEA, KAUAI.

JAN. 19, 1877.
E KA LAHUI HAWAII E; Aloha kaua,—
          He wahi mea iki ka'u e hai aku ia oe, a nau hoi ia e hoikeike ae ma na palena o na kai au e alo mai nei.
          Eia no ia ma ka la 18 o Ianuari nei, 1877, ua mare ia o Capt. Nika me Pakekepa (w) ma ka hora 9 o ke ahiahi ma ka hale o ka mea e kakau nei, a ua mare pono ia laua malalo o ke kanawai, na A. Kaukau laua i mare. Me ka mahalo.
H. H. KAHANANUI.

E KA LAHUI HAWAII; Aloha oe:—
          Ma ka la 4 o keia malama ua hu hou ke ahi pele, ma ka hale puhi ko o J. Makee, ma Ulupalakua. O keia ahi pele, aia malalo o ka hohonu o ka lepo, ua like paha me elua anana a oi aku paha a emi mai paha, ua hu mua keia ahi pele i ka makahiki 1869 a ke hoomaka hou mai nei oia i kana hana weliweli. Me ke aloha i ka L. H.  JOHN KAIKIOHUA.
Oneuli, Honuaula, Jan. 11, 1877.

          Ua hai mai o K. N. Kealakuhilima o Laie no ke kuai ana aku o H. Kauaihilo mai kekahi kanaka pupule mai i ka aina, me ka maopopo ole i kana mea e hana ana. Ko makou manao, aole mana o kela kuai ana. Pela anei?

          Ua haawi aku ka Rev. J. Manuela i kona palapala haalele i ka ekalesia o Kaneohe, o keia mokupuni, no ka nui loa o ko lakou aie iaia. O ka ekalesia e makemake ana i kahu oluolu, a hooikaika no lakou, e pono e kahea koke mai.