Ka Lahui Hawaii, Volume III, Number 4, 25 January 1877 — Page 4

Page PDF (1.18 MB)

KA NUPEPA KA LAHUI HAWAII.
HONOLULU, IANUARI 25, 1877.

KOMI TE HOOPONOPONO NO KEIA AOAO.

LAIKI MAKUA,  MRS. KELA A. GILIMANA,
M RS. ELENA MAKALE,  MRS. C. C. COLEMANA.

NA NINAU NO MA RAKI.

          1.—O ka ahaaina hea a ka poe Iudaio, kai malama ia a hiki i keia la, aka nae, aole i hoikeia mai e Iehova, ua hookumuia iloko o Maraki, a heaha na ulia pilikia o ka hoomaka ia ana?
          2.—O ka luakini hea kai kukuluia a paa iloko o keia malama ?
          3.—O ke kulanakauhale hea o Palesetine, oia ka hoike o kekahi hana mana i hanaia, a oia ke au hulihia ana o kekahi kanaka waiwai a hanohano ? No ke aha ka mea i manao ia ai ua hoike ia ka ulia pilikia i Maraki ?
          4.—Owai ka inoa o keia malama ma ka ka poe Iudaio helu ?

KA la hiki mai—Ke Alii Herode.

          Aia kekahi alii ino loa, i kapaia kona inoa o Herode.  E noho ana ia he wahi mamao iki aku mai Betelehema aku. Lohe iho la ia, ua hanau mai kekahi keiki ma Betelehema, a ua olelo ae kekahi poe, o ua keiki ala oia ke alii. Nolaila, aole i makemake o Herode e alii ae kekahi mea maluna ona. Nolaila, olelo iho la o Herode, "E pepehi au i ke keiki i kapaia oia ke alii." Ua maopopo no ia Herode aia keia keiki ma Betelehema, aka, he nui loa na keiki hanau hou ma Betelehema, aole i maopopo ia Herode, owai la o keia poe keiki ka mea i kapaia, oia ke alii. Ua ike nae kekahi poe i ka mea i kapaia he alii ; aka, no ko lakou aloha ia Iesu, ua huna lakou aole i hai ia Herode. Aka, komo mai la nae kekahi manao ino loa iloko o ko Herode noonoo. Manao iho la ia "e pepehi ia na keiki a pau loa o Betelehema." E manao anei oe e ka mea heluhelu, e ae aku ke Akua ia Herode e pepehi i Kana Keiki ? Aole ; ua ike no ke Akua i ka Herode mea i manao ai e hana. Nolaila, hoouna mai la Oia i kekahi o Kona mau anela hemolele e kamailio a hai aku ia Iosepa iloko o kona wa hiamoe. I mai la ka anela ia Iosepa, "Aia kekahi alii manaoino e ake ana e make ke keiki. E ala ae e Iosepa, a e lawe ia Maria a me ke keiki i kekahi wahi mamao aku." Ala ae la o Iosepa, makaukau iho la i kona hoki, a hookau aku la oia ia Maria a me ke keiki pu. He pouli ka wa a lakou i hele ai. Aole he mea i ike i ko lakou hele ana. I ke kakahiaka ana ae, hele mai la na kanaka me na pahikaua. Na Herode i hoouna mai ia lakou. I hele mai lakou e luku i na keiki hanau hou a pau. (E like me keia kii au e ike nei eia keia mau wahine ke paiauma nei kekahi i kana keiki ua make, oia kela e waiho mai la iluna o ke anuu alapii me ka puanuanu, ua hala kona uhane i ka mea nana i haawi mai ; a eia ka lua o na wahine, ke hiipoi nei oia i kana keiki i make i kona alo me ka uwe, nui kona aloha i kana keiki. A aia aku mao, na elele lokoino a ke alii naau ino, aia ke paa la i kekahi mea ma kona lima, he keiki paha, ae, he keiki na kekahi makuahine, oia kela e holo mai la e hoopakele, aka, ke paa ia la oia e kekahi kanaka a ke hapai la kekahi a paki iho i ke keiki, e like me keia au e ike nei ; he menemene maoli keia hana hoomainoino i na keiki a kela alii i manao ai e hana, aole anei oukou e na makuahine Hawaii e aloha i ka oukou mau keiki no ka hoomainoino ia, e like me keia mau makuahine ? Ae, nui ke aloha i na keiki, no ka mea, oia ka makana makamae a ke Akua i haawi mai ai ia oukou, a oia ke aloha i oi ae ka walohia i kona mea a pau.) Komo aku la lakou ma na ipuka o na kauhale a pau, a ninau aku la, "He keiki anei kekahi ma keia hale ?" Ina he keiki ko loko o ia hale, alaila, e kaili mai no lakou mai ka poli pumehana mai o ka makuahine i kana kamalei a pepehi aku a make. A o ka makuahine hune, e uwe ana oia me ka ehaeha nui no kana keiki. Ina oe e hele aku ma na alanui, aole mea e ae au e lohe ai, aka, o ka leo makena o na wahine wale no, e hoopuka ana ma ko lakou mau waha, i na olelo kaukau a aloha keiki ; "O kuu bebe nani, auwe, ua make oia, aole au e ike hou ana iaia." Ua make anei o Iesu ? Aole ; ua lawe ia aku la oia he wahi okoa ma kahi mamao 'ku. Na kona Makua ke Akua i hookaawale aku iaia. Aole e hiki ia Herode ke pepehi iaia, no ka mea, aole i ae mai ke Akua iaia e make, aole i hiki mai i kona manawa. Mahope iho, make iho la o Herode. A hoouna mai la ke Akua i ka anela e hai mai ia Iosepa iloko o kona wa e hiamoe ana. I mai la ka anela ia Iosepa, "E Iosepa, e ala a e hoi aku i kou wahi, oiai ua make o Herode." Nolaila, ala ae la oia, lawe mai la i ka Haku a me kona makuahine o Maria a hookau aku la maluna o ka hoki, a hoi mai la lakou i Betelehema. He kamana ka Iosepa oihana. Me Iosepa a me Maria ka Haku i noho pu ai; ua hoolohe oia i ka laua mau olelo. He keiki akahai loa oia, a he aloha me ka hoomanao i ke Akua. Ua aloha ke Akua kona Makua iaia, a pela hoi na mea a pau, ua aloha lakou iaia; no ka mea, ua haahaa oia me ke akahai. Me ka pii ana ae o kona ulu ana a nui, pela ka nui o ko lakou aloha nona.

Ka mana o ka Pule.

          Aia ma ke kulanakauhale o Nu Ioka, kekahi wahi keiki, aole i loihi loa aku nei, ua loohia iho la oia i ka mai huki, no na la ke kaa ana i ka mai ; a oia ka mea nana i hoonawaliwali mai i ka ikaika o ke kino o kona makuahine, a pahua hoi ke akamai o ke kauka lapaau ; aole he manaolana, aole hoi, he akamai nana e hoola i keia mai a hoopau ae i na eha. O na aili liilii mau ana, ua eha loa ia oia a aneane pilikia, a i ka wa e hiki mai ai ka eha a nui, o kona nanaina he mea ano kaumaha, me he la, ua pau kona leo, a ua lawe aku ka mai a waiho iho iaia ma ka ipuka o ka make.
          O na mea a pau i akoakoa mai, ua pau ka manaolana, a ua poho ka manao ana, oiai me he la aole he kokua kokoke. Hiki mai la nae ke kahunapule, a hooluolu aku la oia i na hoa'loha i pili kaumaha me na olelo hoalohaloha a me ka pule ; aka, he wahi keiki nona na makahiki ehiku, he kaikunane no ke kaikuahine mai, a ua maopopo iaia ka Haku, ala oia ma na wahi a pau, a ua hiki iaia ke hana i na mea a pau ; a ua ehaeha ia hoi oia no ka mea mai, nolaila, hele mai la oia a noi mai la i kona makuahine, ina he mea hiki iaia ke hele a pule aku i ke Akua no Sissy. I mai la ka makuahine, o hele. Hele aku la kahi keiki a i kona keena, elike me ka mea i maa mau iaia ma ka pule ana i ke ahiahi a me ke kakahiaka, a nonoi aku la i keia noi: "E ke Akua, e oluolu oe e hoomaikai i ko'u pokii kaikuahine, ua mai loa ia oia. E oluolu e hoopau ae i kona huki ana i ole ai oia e loohia hou ; Ma ko Iesu inoa. Amene."
          Hele mai la oia mai ka pule ana, a hai mai la i kona mama i kana mea i noi ai, a i mai la, "e mama, ke manao nei au, e pakekana ana oia." Nolaila, e nana a hoohalike i ka hoolohe ana o ka Haku i ka manaoio o ke keiki uuku. Ma ia wa koke no, haalele mai la ka mai i ke kaikamahine. Aole i hoi hou mai ; a o ke ola ana ia o ua keiki la.
          Owai la ka mea hoole, aole na keia Haku hookahi i hoola i ka mai lolo, aole ma na hana mana ano kupanaha i keia wa, aka, ma ke noi ana ma ka pule, e like me na la o ka wa kahiko. Aole anei i hookoia ke kauoha, "O ka mea o oukou e noi ana ma ko'u inoa, owau no e hana ?"
New York Evangelist.

Ke keiki luina koa.

          I kekahi moku he mau la wale no ke kaawale mai ke kulanakauhale 'ku o Nu Ioka, ua loohia iho la ua moku la e ka ino nui ; aneane pule okoa ka pa ana a ka ino.
I kekahi po, ua ikaika loa ka ino, a ua kiekie mai na ale me he mau pali la, aia hoi, loaa iho la ka pilikia i ka moku, ma ka hihia ana o ka rigina o luna o ka wekiu o ke kia waena, a aia wale no he mea nana e pii aku a hooponopono me ka pololei iloko o ia hahana a ka ino. Kahea aku la ka malamamoku i kekahi wahi keiki, no luna no o ka moku, a kauoha aku la iaia e pii aku iluna o ua kia la a hooponopono ae i ka rigina i hihia.
          Lalau iho la ua keiki la i kona papale, a lalelale iho la no ka manawa, alawa ae la ia me ka hopohopo iluna a ilalo o ke kia e ku ana, e luli ana hoi i o a ianei a me ka ooloku o ke kai, a holo mai la mai kahi ana e ku ana me ka awiwi a iho aku la ilalo o ke kia waena. A no na minute paha elua, hoea mai la ia, a me ka leo pane ole, paa aku la kona mau lima i ke alapii rigina o ka moku, a pii aku la me he manu la ka palamimo. Me na maka poniuniu o na luina i kiai aku ai lakou i ke keiki iloko o ia iuiu anoano a ka launa ole. "Aole oia e hoi ola hou mai ana," wahi a lakou ia lakou iho.
          Aka, iloko o na minute he iwakalua, ua pau ae la ua hana nei i ku i ka pilikia i ka hana ia, a hoi ola mai la ke keiki ilalo ; ku iho la oia ma ka papahele, a me na helehelena piha hoihoi, iho aku la oia ilalo ihope o ka moku.
          "Heaha kau i iho ai ilalo i ka wa i kauoha ia ai oe e pii aku iluna?" wahi a kekahi eepakeke i ninau mai ai i ke keiki koa.
          "I iho au—e pule," wahi a ke keiki me ka pu-ai, o ka ula, a me ka eueu o ka lehelehe.

KA ELA KUMUMANAO
NO KE KAUOHA HOU.
"HE KAUOHA HOU KA'U E HAAWI AKU NEI IA OUKOU, E ALOHA KEKAHI I KEKAHI.—IOANE XIII; XXXIV."
MOKUNA III.
KE KAKAHIAKA POAONO MA OKALANA.

          E noho pono ae iluna, e Helena, heaha kau e kulou nei ? wahi a Mrs. Cornway i hoomau aku ai i ke kamailio ; aole anei e hoopau ia kela hana mau au o ka noho ana iluna o kou mau wawae ? Mamuli ulu ae a kekee ae ko wawae elike me Simona. Auwe, e kuu keiki paakiki! pehea la i hiki ole ai ia oe ke hana elike me ka Lile hana ana.
          Nana ae la o Helena iluna i na mea a kona makuahine i kapa mai ai iaia he mau nanaina lapuwale. Auhea aku la na hiona oluolu mai kona mau maka aku, a hoopunana iho la maluna o kona mau kuemaka, na lehelehe a me na maka, na ouli piha o ka huhu enaena. Aloha ino o Helena ! Ua hooikaika oia ia ia iho e noho pono, e noonoo mau ana hoi no ka leialii nani o ke ola, a me kahi e loaa ai iaia. Aka, aole i hoomaopopo kona makuahine ia mau mea, a ua hoeha aku la i ka naau o ke keiki me ke kaumaha luuluu. O ka lili ia Lile oia kona enemi nui. He kaikamahine o Helena i maa mau ma ia mea. Pela ka olelo a kona makuahine, a nolaila, ua lawe kela a me keia ia mau olelo, a o keia olelo, "maa mau," aole pela ; he mea oiaio, e uhi ana i ka nui o na hewa aka, he mea maa mau ia lakou ka hoopaa ana.
          He keiki nawaliwali oia me ka manao hoihoi, he akamai me ka hopo ole, aka, he mamao loa aku oia ma ke kalohe a me ka paa pono ole o ka haawina ke hoopaa. He paakiki me ka pilikia mau, he loli wale ma kona mau manao iho, lokahi ole me kona enemi, a he piha lili me ka noonoo wale no e hoowahawahaia ana oia e kela a me keia, a e hookamaemae wale ia aku no. Me he la, o keia mau manao, he uuku wale no kana i ae ai e lawe no ka maikai a me ka hauoli o ka poe a pau e noho pu ana me ia. Aka, aia he aoao molaelae ma ko Helena mau manao. Elike me ka nui o kona mau pilikia, ua aneane aku la e huna ia, aneane e pau aku no kekahi mau manawa, ma o na manao a me na noonoo maikai i ala mai iloko ona. He olelo, he nana ana, he hoohauoli ana mai kekahi mea ana i aloha ai nana e hooluolu i kona naau, a me ka hikiwawe i pau ae ai kona inaina a me kona mau manao ino, a hoi mai la i ka hauoli, a ma kona mau ano mau, ua pumehana kona aloha, aole i pauaho ma ka hoao ana e oluolu, akahai aole elike me kona ano mau mamua ka paakiki me ka poino mau.
          He ouli ano oolea ka nanaina o Helena, a he hialaai oia i na mea nani a pau. Ua oi aku kona hialaai i ka ui o kona makuahine mamua o kona anoi i ko kona makuahine aloha. Ua lilo mua aku kona mau iini i kona cousini ia Ela, no ka lahilahi maikai o kona helehelena, a hinuhinu ka waihooluu o kona lauoho me ka palupalu olunahe o kona mau wahi lima. Ua kahaha nui oia me kona manao a pau no ka nani o kona wahi pokii kaikaina; oiai, ua lili loa ia oia nona, me ka makemake ole a ano hookae ke lohe i kekahi mea e mahalo ana iaia. Kilohi iho la oia iaia iho, ma ka nana ana i kona helehelena ano mau,  me kona lauoho a kii kohu ole, a kuko wale iho la no iloko ona, ina oia he ui me ka mahaloia a me ke aloha ia; e like me kekahi poe maikai a ui, wahi 'na i hoohalike ai, a pela oia e kuko ai a hiki i ka uluku loa ana o kona manao manao me ka ehaeha a haloiloi mai hoi na kulu waimaka ma kona mau maka.
          Aole he mea nana au e makemake mai! Heaha la ka mea i hana ai ko kakou Makua ma ka lani ia'u a pupuka a wahine ui hoi o Lile, wahi ana iloko ona.
          Aloha ino o Helena! He mea kupanaha anei na olelo kupono ole a kona makuahine, nana i hoeueu aku i na manao ino a pau iloko ona, a o ka helehelena ano ahiu a piha inaina kai kona mau maka? Ala pono ae la kona kino iluna, oiai oia e noho ana ma kona noho, a hoomau aku la i ka hoopaa ana me na helehelena makona.
          E hele e komo i kou lole, e Helena, wahi a Mrs. Conway, me ka alawa ana aku i ka manawa o ka wati, a o ka hora eiwa ia. Aka, aole i eu iki ae o Helena.  Aole i pau.

KA ULANA ANA.

          E malama i na minu te, pela e holo ai na hana. Ke ike nei kakou ma keia kii i ke kupunawahine e ao ana i kahi moopuna e ulana i ke kakini. Ke ao aku nei ia i kahi e hookomo aku ai i na kui, a me ke ano o ka owiliwili ana i ka lopi e ulana ai a paa ke kakini. Ua maa kahi kupunawahine i ka hoohana mau i kona mau lima mai kona wa opiopio mai, nolaila, he mea hiki ole iaia ke noho wale iho me ka hana ole. O ka hoopiha mau ia o ka manawa i na hana kupono e hiki ai ia kakou, oia no ka mea e olioli ai ka noho ana o ke kanaka. Nolaila, e ao aku oukou, e na kupunawahine, a me na makuahine, i ka oukou mau moopuna, a me na keiki e hana i na mea kupono i ko lakou mau lima mikioi e hana ai.
          He manawa no na mea a pau ; he manawa e paani ai na keiki, a he manawa e kula ai i na buke, a he manawa e hana ai na lima. O ka noho palaualelo ana, oia ke kumulau e hoolaha mai ai i ke kolohe. "O ke poo o ke kanaka palaualelo, he hale kamana ia no ke diabolo."
          I ke au i kunewa ae nei ihope, ulana na wahine Hawaii i na moena akaakai, moena lauhala, moena pawehe, oia hoi ka makaloa, a ke hana nei no kekahi o na wahine i keia wa i keia hana maikai e hoomaikai ai i ka hale a me kahi moe. Aka, o ka hapa nui o na wahine o ka hanauna opio e ulu mai nei, e ike ole ana lakou i keia hana maikai e pono ai a e iako ai na hale. O ka hana nui a na kaikamahine e makemake nei e ao, oia no ka humuhumu a me ka hana lihilihi. He mau hana maikai no laua a i elua, aka, mai haalele i ka hana moena e maemae ai ka hale. E awili pu na wahine opio i ka ike o na makuahine o lakou me ka ike hou e loaa mai nei mai na haole a me na kumu hou. E hoopiha mau i na lima i ka hana, a i ke poo i ka ike, o ka naau hoi i ka noonoo. E hoopaa i na mea i loaa, a e kikoo aku i na mea hou.
          E ao na kupunawahine i na moopuna i ka ulana moena, i ka milo kaula, i ka humuhumu lole. Pela e lilo ai na moopuna a oukou i mau wahine makaukau a noho pono, e pomaikai ai ka aina, a e pono ai na kane a me na keiki a lakou.

HAAWINA KULA SABATI.
HELU 5—SABATI, FEB. 4
KUMUHANA.—Elia me Ahaba.
PAUKU BAIBALA.—Na I Lii 18:5—18.

5. I mal la hoi o Ahada ia Obadia, e hele oe ma ka aina i na kumu wai a pau, a me na kahawai a pau; e loaa paha auanei ia kaua ka mauu e malama ai i na lio me na hoki i ola, o hoonele ia kaua iho i na holoholona a pau.
6. Mahele ae la hoi lana i ka aina a pau ia i ka hele ia. Hele ae la o Ahaba ma kekahi aoao, oia iho no; a hele ae la hoi o Obadia ma kekahi aoao oia iho no.
7. Oiai o Odadia ma ke alanui, aia hoi, halawai mai la me ia o Elia: a Ike hoi oia ia ia, moe iho la oia ilalo ke alo, i aku la, o oe no anei kela haku o'u, o Elia?
8. I mai la oia ia ia, owau no : e hele oe e hai aku i ko'u haku, aia hoi o Elia.
9. I aku la hoi kela, o ke aha ia ko'u hewa e haawi ai oe i kau kauwa i ka lima o Ahaba e pepehi mai ia'u?
10. Ma ke ala ana o Ieho va kou Akua, aohe lahuikanaka, aohe aupuni, kahi i hoouna ole aku ai kuu haku e imi ia oe ilaila : a i ka lakou olelo ana. Aole ia, lawe oia i ka hoohiki ana i ke Akua, o ia aupuni a me ia lahui kanaka, i ka loaa ole ana ou ia lakou.
11. Ano hoi, ke olelo nei oe, e hele e hai aku i ko'u haku, aia hoi o Elia!
12. Eia hoi auanei keia, a hala au mai ou aku nei, e lawe aku ke Uhane o Iehova ia oe ma kahi e ike ole ai au; a hele au e hai aku ia Ahaba, aole hoi e loaa oe ia ia e pepehi mai auanei oia ia'u; aka, ke weliweli nei au kau kauwa ia Iehova mai ko'u wa kamalii mai.
13 Aole anei i hai ia i ko'u haku ka mea a'u i hana aku ai i ka wa i pepehi ai o Izebela i na kaula o Iehova, o ko'u huna ana ae i hookahi haneri kanaka o ko Iehova poe kaula, papakanalima ma ke ana, a hanai aku ia lakou me ka berena a me ka wai?
14 Ano hoi, ke olelo mai nei oe, e hele e hai aku i ko'u haku, aia hoi o Elia! a e pepehi mai no oia ia'u.
15. I mai la hoi o Elia, ma ke ola ana o Iehova o na kaua, imua ona e ku nei au, e hoike io aku no au ia'u iho ia ia i keia la.
16. Hele aku la hoi o Obadaia e halawai me Ahaba, a hai aku la hoi ia ia; a hele mai la o Ahaba e halawai me Elia.
17. Eia kekahi, i ka wa i ike ai o Ahaba ia Elia, i mai la o Ahaba ia ia, o oe no anei ka mea i hoopilikia i ka Iseraela?
18 I aku la hoi oia, aole na'u i hoopilikia i ka Iseraela, aka, nau, a na ka ohana a kou makuakane, i ko oukou haalele ana i na kauoha a Iehova, a ua hahai hoi oe mamuli o na Baala.
Pauka Gula. Olelo aku la Iosua, No ke aha la oe e hana ino mai ai ia makou? E hana ino mai ana o Iehova ia oe i keia la. Iosua 7:25.
Mele—Him. 219, 8—6. Leo.
2
Ka poe e ai makani nei,
A maona ole no;
E na pololi me na mai,
E hele mai oukou.
4
Ka poe maule makewai,
Mai lilo i ka po;
Maanei ke kumuwai maikai,
E hele  mai oukou.
Pule no na aina e, aina nele, aina hoomana kii, & c.
Na Ninau a na Kumu.
P 5. Owai O badia, a heaha kona ano? P 3. Heaha hoi kana hana aloha? p 4. Heaha ka Ahaba kauoha ia Obadia? Heaha ka pilikia nui o ka aina? p 2. No keaha ka wi? no keaha ka ua ole? Ehia makahiki i hala me ka ua ole? p 1. Kokoke anei ka ua? Nawai e hooua mai?
P 6. Pehea ka laua hana i pau ka aina o ka hele ia? Laua wale no anei ka i hele? O laua paha na luna, he mau kauwa paha kekahi i hele pu.
P 7. Owai ka i halawai pu me Obadia? A pehea iho la oia? A ninau pehea?
P 8. Pehea Elia i pane ai? a kauoha aku ai?
P 9. A pane Obadia pehea? no keaha kona makau?
P 10. Heaha kekahi mau olelo a Obadia? No keaha keia huli ana ia Elia i kela wahi, i keia wahi? A loaa ole pehea ka hoohiki? Nawai i huna ia ia i loaa ole?
P 11. Olelo Elia ia Obadia e hele a hai aku aia owai?
P 12. Kanalua no nae Obadia, heaha ke kumu o kona kanalua ana? No keaha e pepehi ai Ahaba ia ia? He kauwa weliweli ia Iehova o Opadia mai ka wa hea mai?
P 13. Heaha ka Obadia ninau ia Elia? owai keia mea pepehi i na kaula o Iehova? Ehia kaula a Obadia i hoopakele ai, huna ai? A hanai ia lakou me ke aha? P 14. Ehia hai ana a Obadia i keia mau olelo hookahi? nani kona makau?
P 15. Pehea o Elia i hoohiki ai? makau anei oia i ka make ia Ahaba?
P 16. Hana anei Obadia e like me ka Elia kauoha? Na keaha i hoopau i kona? Pehea hoi o Ahaba?
P 17. A i ka halawai ana o Ahaba me Elia, heaha kona ninau hookano?
P 18. A pane aku Elia pehea me ka wiwo ole? Na keaha i hoopilikia i ka aina? Owai ko Ahaba makuakane? Heaha hoi kona ano? Owai kekahi akua hoomana o Ahaba?
Mele.—Him. 216, 11. Leo.
1
E huli, e kanaka auwana nei,
Nohea la ka ikaika e hele i ka po ?
Mahea la ke kino e pomaikai ai,
Ke lilo ka uhane a make mau no?
2
E huli, e huli, o make oukou,
Haalele oukou i na aoao kekee ;
Na Iesu ke ola i hoomakaukau ;
Pehea la na uhane ? e make anei?
Na ninau a ke Kahu.
Na makua. Heaha ke kumu hana ? Owai Elia ? Heaha ka ke Akua olelo muai ia ia no ka ua ole ? Ua hooko ia anei ? I ka makahiki ehia o ka ua ole i olelo hou a o Iehova ia Elia no ka ua? A hai mai e aha oia? Aia anei i ke Akua ka ua me ka u a ole? Ua wale anei me ke kumu ole? A maloo wale anei ka aina me ke kumu ole? Pono anei ke ohumu a hoohalahala no ka ua, a no ka ua ole?
Na keiki. Owai keia kauwa alii i makau ia Iehova mai kona wa kamalii? Okoa anei keia Obadia, a okoa kela Obadia ke kaula? Owai ka Haku o keia kauwa? Ahaba—he haku maikai anei oia? Hoomana oia ia wai? Ina he mau haku hewa, he mau makua hewa ko oukou, pono anei ke hoohalike me lakou? E makau oukou ia wai? Heaha ka mole o ka naauao? Heaha ka oukou e hana'i i ka poe pilikia hoomaau ia, pepehiia? E kokua, e hanai, e imi e hoopakele e like me Obadia.
Ke kula a pau. Hai mai i ka pauku gula. Owai kela nana i hana ino i ka poe Iseraela? Pehea Akana i hana ino ai? Heaha kona hope Owai keia hoopilikia ana i ka poe Iseraela? Pehea kona hoopilikia ana? No hea ka ua ole, ka maloo, ka wai ole, ka wi? Pela anei i keia wa? Mahea kahi e imi ai i ka ai me ka wai a loaa ole? A noi aku, aole nae e loaa? Luka 16:24, 25.
Mele.—Him. 204, 8. Leo.
1
Ke hele aku nei oukou
Ilalo i ka lua po,
Ma kahi i hiki ole ae
Ka noonoo, mihi, huli mai.
2
Malaila no e okiai
Na Sabati, na halawai,
A kau maluna o lakou
Ka pouli, make oia mau.
Pule no ka poe hewa &c.
Haawina no Feb. 11, I Na Lii 18:19—29.

          "Aia hoi, ma ka pono no e malama aupuni ai ke alii nui, a ma ka pololei hoi e noho alii ai na 'lii."
          "E like auanei ke kanaka me kahi lulu o ka makani, me ka mamalu hoi no ka ua; e like me na auwai ma kahi maloo, e like hoi me ka malu o ka pohaku nui ma ka aina maluhiluhi."
          "Aole e kapa hou ia ka mea lapuwale, he maikai nui, aole hoi e i ia ka mea alunu, he lokomaikai."
          "He hewa na mea hana o ka mea alunu, imi no oia i na manao hewa, e hookaumaha i ka poe poino i na olelo wahahee, i ka poe popilikia hoi e olelo ana ma ka pololei."