Ka Lahui Hawaii, Volume III, Number 51, 20 December 1877 — Page 2

Ka Nupepa 'Kuokoa.'
No ka Makahiki 1878!

          I na makamaka heluhelu nupepa, na hoaaloha hoi o ka aina oiwi, mai Waiohinu a hiki aku i Niihau. Aloha oukou.
          Mai ka la akahi aku o Ianuari, 1878, e lilo mai ana KA NUPEPA KUOKOA, na makou e hoopuka a e hooponopono. E kokua pu ana me makou kekahi mau kanaka Hawaii, a me na makamaka e ae, i kupono ko lakou makaukau no ka hooko ana i na iini manao o ka poe heluhelu ma na moolelo hoonanea me ka hoonaauao pu, na nuhou o na aina e, na manaopepa ku i ka hoeueu manao me ka hapai i kanaka iluna a hooholo imua, a me na palapala hoolaha mea hou a hoolaha manao.
          Aole hoopili wale i ka hoomana; aka, pili i ka Pono i na wa a pau, a me ka wiwo ole no ka pono o kanaka malalo o na kanawai o ka aina, oia ko makou manao.
          Ke kono aku nei makou i ka lokomaikai o na hoa heluhelu a pau o ka LAHUI HAWAII, e hui pu ae kakou ma ka nupepa KUOKOA no ka makahiki hou; a o na hoa heluhelu mua o ke KUOKOA, e hoomau mai no.
          Ka uku no ka NUPEPA KUOKOA, $2.00 no ka makahiki; $1.00 no eono mahina, ME KA HOOKAA MUA.
          E hooili mai na manao, na olelo hoolaha, a me na dala no ka makahiki hou ia.  H. H. PALEKA.

KA NUPEPA KA LAHUI HAWAII.
HONOLULU, DEKEMABA 20, 1877.

          E halawai ana ka Ahahui Euanelio o Hawaii Akau ma Kawaihae-kai, Kohala, Hawaii, ke hiki aku i ka Poakolu mua o Maraki, M. H. 1878. He pono e makaala ko Kohala Hema.
MA KE KAUOHA.

He Pono Anei?

          HE mea pono anei iloko o na wa e hiki mai ai na ulia poino maluna o ke kulanakauhale, e like me ke ahi o ka po Poalua nei, ke ku nana wale me ke kokua pu ole ma na hana e pale aku ai i ka poino ? Ua maopopo ia makou, o ka poe noonoo pono a me ka poe nona ka puuwai kanaka maoli, e pane koke ana lakou i keia ninau me ke kanalua ole: "Aohe pono, he hewa loa ke ku nana wale aku i ka poino me ke kokua ole." Aka, iloko o ia wa poino nui a ke ahi e pulumi aku ana i na haneri tausani dala o ka waiwai, ua ike maka aku makou i na kanaka kino nui ikaika e ku wale ana me na lima iloko o na pakeke, aohe wahi manao iki e kokua me ka poe e hooikaika ana e pale aku i ka poino. E kamailio ana kekahi poe, e like me keia na huaolelo: "No mea keia poino, a no mea ae keia; a o mea kai poino," a pela aku. A aneane hoopaapaa no hoi kekahi mau mea no ka mea i oi o ka poino. Ua pane ia aku kekahi mau mea e hele e kokua i ka poe e pauma ana i ka wai, no ka mea, ua pau ke aho o lakou; o kekahi poe ua hele e kokua, a no lakou ko makou mahalo piha; aka, ua hoole kekahi poe, a ua holo kekahi poe e pee mahope o na wahine a ma na wahi poeleele. Aohe a makou olelo e ae no ia poe, eia wale no, he pono e heluia lakou ma ka papa akahi o ka poe lapuwale. He kokua ole, a ua hoohilahila lakou i ka inoa o ke kanaka. O ke ano o ke kanaka maoli he aloha, he menemene a he minamina i ka wa e uhi mai ai na ulia poino maluna o ka lehulehu. Aka, o keia poe kohu ole a aloha ole, heaha la ko lakou ano ? He puuwai aha la ko lakou? Aole anei he pohaku? Ua lohe mai makou, ua hopu ia kekahi o ua poe nei e na makai, a ina pela ua pono no.
          Aka, aole o ka ehaeha wale ka i loaa ia makou ia wa no na hana opukekeue o ka poe lokoino. Ua hoohauoliia ko makou manao, a ua hikilele ae na manao oluolu me ke koni pu ana o na aa o ko makou puuwai me ka mahalo piha no kekahi poe keiki Hawaii a makou i iku ai e lawelawe ana me ka ikaika a pau, no ke pale ana aku i ka poino. He oiaio; ua komo k ino holookoa kekahi poe Hawaii o k akou me ka puuwai lokahi e kokua pu ana me ka poe kinai ahi. No lako u na mahalo piha. No lakou ke aloha pumehana o na poe maikai a pau. O ka lakou mea i hana ai, o ka hana ia a ke kanaka maoli, kanaka holookoa mai luna a hala ilalo. Oia ka poe au, e Hawaii, e haaheo ai; he poe hoohanohano i kou inoa. He poe lakou i hoao ia i ka la o ka popilikia, a ua ikeia ko lakou ano, he hiki ke hilinai ia. O kau poe keiki ponoi ia, e Hawaii o na moku, malama pono ia ko lakou mau inoa. Hoonui aku ia lakou; o na keikikane ia o ka aina oiwi e hilahila ole ai kona inoa he Hawaii maoli.
          Ke kono aku nei makou i na keiki Hawaii e hele aku e hoomahui mamuli o ka poe hana maikai.

Ka La Kalikimaka ma Kawaiahao.

          E akoakoa ana na haumana Kula Sabati o Kawaiahao a me na Kula apana, ma ka Poalua ae nei, la 25 o keia mahina, ma ko lakou luakini, i ka hora 10 o ke awakea. Malaila e hoohalaia ana he hapalua hora paha ma ka himeni ana ma na mele Kula Sabati. Mai Kawaiahao aku, mamuli o ka lokomaikai o ka Peresidena o ke Kula Kahunapule i kona haawi ana mai i ka pa halekula, e hele ana ke anaina a luana iloko o ia pa no na paani ana a me na hana lealea, a mahope iho he ahaaina; maluna iho no o ka manienie uliuli o ua pa nei, malaila kahi e halii ia ai na pakaukau mea ai.
         He manaolana ko makou, e ike nuiia na haumana iloko o ia mau hana. A mai poina na haumana makua, o lakou pu kekahi i kuleana pu iloko o na hana o ke Kula Sabati ma ia la.

Ua Hele hou kekahi o na Kumu Makua.

          MA ka la eha o keia mahina i hookuu mai ai o Rev. J. F. Pogue i ke ea o keia noho kino ana, a hoi aku la i kona Haku a me kona wahi e maha ai.
          Me kakou no ia iloko o keia mau makahiki iho nei, he hoa lawehana no hoi ma na mea e pili ana i keia Nupepa. Ua hanauia o Pogue ma ka Mokuaina o Delaware, Amerika Hui, iloko o ka makahiki 1814. Iloko o 1844 kona holo ana mai i ko kakou paeaina; a mamuli o ka hana ana i lawelawe ai, oia ka hoike ana i ke ala o ke ola i ko Hawaii nei, malaila kona hoomanawanui ana a hiki i ka hopena o ke kino. O ka wahine kanemake ana i haalele mai nei me ka u ana nona, oia kekahi o na keiki a Wini Makua, kekahi o ko kakou poe kumu i pae mua ma keia mau moku me Binamu ma, a i hoonohoia no hoi ma Waimea i Kauai.
          O na wahi a pau a Pogue i lawelawe ai i ka hana, ma Koloa i Kauai kahi ana i hoomaka ai; mailaila aku hele ia i Kealakekua i Kona, Hawaii; a mailaila ae hoihoi ia i kumu no ke Kula o Lahainaluna. Ke ole makou e kuhihewa, he 15 makahiki o kona noho kumu ana malaila. Mai Lahainaluna aku kona hele ana a noho he Kahu no ka Ekalesia ma Waiohinu i Kau. Aole nae i liuliu loa kona noho ana ilaila. A i ka wa i haalele ai o Rev. L. H. Gulika i ka oihana Kakauolelo no ka Papa Hawaii, ua kohoia o Pogue ma kona wahi; ma ia hana kona lawelawe ana a hiki iloko o Iune o keia makahiki; ia wa, waiho aku la ia i ka hana me ka manaolana e hoomaha no ka nawaliwali o ke kino. Mamuli no o ia nawaliwali kino kona hoi ana aku nei e ike i ka aina hanau. A ma ke alanui, i kona hoi ana mai, kahi ana i halawai pu ai me ka leo hookuu a me ke kauoha e hoi aku i kahi o ka maha mau loa.
          Aloha na Kumu a me na Makua i hala mua. Aole lakou e hoi mai io kakou nei; aka, e hele aku no kakou io lakou la.
          "E kiai oukou a e pule; no ka mea, aole oukou i ike i ka la a me ka hora."

PAU AHI NUI WELIWELI MA HONOLULU!
Poino na Hale Hana, na Paila papa, na Hale-papaa a me ka Uwapo.

          He mea kaumaha ka ili ana mai o ka poino nui, malana o ka poe nona na waiwai i hooneoneoia e ke ahi ana ole, a ua ili pu mai hoi ia pilikia maluna o kekahi hapa o ko kakou mau lima hana, i hooneleia i na hana no keia noho ana, a me ka lehulehu holookoa a pau. Ua ike ia ke ahi mawaena o na hora eiwa a me ka umi, a na kani kuike mai la na bele, e kahea ana no keia lono pilikia, oiai na alelo manamana o ke ahi e palu ana i kana hana me ka weliweli nui, e holapu ana i kona mana ahailono ole hoi, a ia wa ua holomoku mai la na kanaka o na waihooluu like ole mai ko lakou mau poopoo mai a hiki ma kahi o ka poino.
          Ua hoomaka mua ka a ana o ke ahi ma ka hale lio e pili la makai iho o ka hale pohaku hoahu waiwai o Henere Macfarlane, Green & Co, oia hoi ka hale kudala o E. P. Akamu, a no ka nui o ka ikaika o ka makani, ua pahola aku la ke ahi me ka hikiwawe maluna oia mau hale e pili koke mai ana, a holo aoao aku la a hiki i ke alanui Papu, a hina aku la ke ahi i kai me ka holapu papa ana aku i na hale hana e ku pili ana malaila, oia ka hale kupa pahu na hale mekini a me ka hale wili raiki o Hopper, na paila papa o ka Hui o Allen a me Robinson, na hale hoahu ukana a me na paila wahie, a me na hale hana e ae makai o laila, me ka nee mau ana o ke ahi i kai me ka hakalia ole, oiai hoi ka makani e kuehu ana me kona ikaika, a ma ia mea, ua holo mama loa ke ahi a loaa aku la na paila papa mawaho aku o Pakaka, a mailaila aku hoi a loaa ka puu lanahu e pili ana i ka pa o na hale hoahu waiwai o ke aupuni, a pau pu iho la me ia hale a me ka hale hoahu ukana mokuahi, a nona ka pau, palu pu ia iho la ka uapo a koe o ke poo o na pou e pili iho ana i ka ilikai; a malaila aku i na paila papa makai aku o olaila.
          No kekahi manawa, ua ku mai no na hale hoahu ukana o ke aupuni imua o ke ahi, a ina paha aole kela puu lanahu i hoahuia mawaho olaila, ina no ua palekana. Aka, ua hoopau ia ae ka manaolana o ka poe i komohia e manao menemene ana no ka pakele o keia mau hale, a ua hoomaka aku la ke ahi e a ia mau hale; a mamua ae nae hoi o ka pahola ana aku o ke ahi maluna o keia mau hale a me na uapo, ua pau mua aku la na moku e pili mai ana ma ia mau wahi i ke auhee a me ka okiia ana o ko lakou mau kaula hoopaa, a hekau aku la mawaho aku a ili aku la kekahi ma kela kapa o ke awa.
          Ua hoomaka aku la hoi ke alelo o ke ahi e palu maluna o ka hale hana o West a me Chayter, mauka pono iho o ka Hale Dute, a koe iho la he puu lehu; aka, mamuli o ka makaala ia ana, aole i lele aku kekahi poino maluna o ka Hale Dute.
          I ka makaikai ana aku i na hiohiona o kahi a ke ahi i hooneoneo iho ai, ua hoike mai ia he puu lehu ka mea i koe iho, a he haawina kaumaha e ehaeha ai ka manao me ka pilihua; no ka mea, o na waiwai a pau a ke ahi i hao aku la, oia no na pomaikai a ka lehulehu e kaana like nei, aole wale no ka poe nona ia mau waiwai, na pono e loaa mai ana.
         O ke aupuni hoi kekahi i poino mamuli o ka pau ana o na hale hoahu ukana a me na aapo pili o na moku. Ua hoomaopopo ia hoi, o Hopper ka mea i oi nui o ke poho, aia maluna o ke $50,000, a ua hoopaa ia oia iloko o ke Panihakahaka no na dala he $11,000.
          Ma ka noonoo ia ana o ke poho holookoa o na mea a pau, ua oi aku ia maluna o $200,000. Ua hooikaika no na Hui Kinai Ahi o kakou me ko lakou eleu a pau e hoopio aku i ke ahi, aka no ka ikaika launa ole o ka makani e pa ana, nolaila, ua aneane hiki ole no ke kaohi mai i ka holo papa ana o ke ahi. He mau Hawaii oiaio kekahi i komo pu aku e kaana like ma na hooikaika ana e hoopakele i kekahi mau ukana a me ke kinai pu ana i keia poino. Aka, ke haawi nei makou i ka mahalo i ka poe nana i hoopakele i na lio a me na kaa a me kekahi mau ukana e ae o Kimo Pelekane a me kekahi hapa uuku o ka waiwai o kekahi mau hale e ae, mamua o ka hiki ana aku o na lapalapa okooko o ke ahi a haawi aku i kana uku he puu lehu nui maluna oia wahi. O keia poe kai aloha i ka poe i poino, ma ka pahola ana aku i ka lima kokua, aole e like me kekahi poe kanaka e ku nana wale ana me ke kokua ole aku i ka poe e haawi ana i ko lakou mau ikaika a pau ma ke kinai ana i ke ahi.
          Ua lono pu ia mai no hoi, ua aneane no e hoea ae kekahi ahi mauka o Kaopuaua, ma kekahi wahi e kokoke ana ma ka pa luakini o Kaumakapili ma ka aoao ma Ewa o alanui Beritania ; no hookahi hora a oi ae mamua o ka lua o ke ahi, ma ia po hookahi no, aka, aole i oili pono ae na ula ahi, ua hoopio koke ia. A ina paha o ka pahola loa ae o ke ahi ma kela mau wahi, he mea maopopo e pulumi holookoa ia ana ke kulanakauhale, ai ka palena o ke kai.

HOIKE HUI O NA KULA SABATI O
Kekaha, ma Kalaoa, N. Kona, H.

          Ma ke kauoha a ke Kahu Kula Sabati J W H Kukapu, ua hoohuiia na Kula Sabati eha i ka Ekalesia o Kekaha ma ka luakini o Haleola, ma Kalaoa. N Kona, H., i ka la 13 o Okatoba, 1877.
          Ma na la mamua ae o ka hoike ana, ua kohoia o J G Hoapili i komite nana e hoike i na Kula Sabati, a ua loaa ka oluolu ia e ia ma ka lawelawe ana ia hana maikai iloko o ia la.
         Eia na Kula Sabati i hui mai. 1 Kula Sabati o Kohanaiki, 2 Kula Sabati o Haleola, 3 Kula Sabati o Kaisareia, 4 Kula Sabati o Napuu.
          I ka hiki pono ana i ka wa i oleloia no ka hoike, i ka hora 8 a oi paha o ke kakahiaka, ua akoakoa mai na kumu, na haumana, a me ka poe makaikai pu ma kahi i oleloia no ka la hoike. A ma ia wahi i hoonohonoho pono ia'i ka huakai. Penei ka hoonohonoho ana, ka mea iaia ka Hae Hawaii mamua loa, ka poe puhi ohe iho, ke kula o Haleola me kona hae, ka kula iho o Kaisareia me kona hae, ke kula o Napuu, ke kula aku o Kohanaiki me kona hae, a o ka poe makaikai mai mahope loa. Me na aahu like ole o kela a me keia kula.
          I ka hiki ana i ka luakini, ua kaapuni ae la na kula, elua poai puni ana, a hoonoho ia aku ma na noho kela a me keia kula. Ua weheia ka hana me ka himeni hui a ke anaina, "Kai a naue i ka nani," pule o Rev. G P Kaonohimaka. Mahope olaila, ku mai ke komite a hoike i kana olelo hoolana. E na keiki, e hoolohe i ka oukou mau makua no ka Haku, no ka mea, he pono keia. A pau kana wehewehe ana, ua haawi mai ka puali puhi ohe a me ka pahu i ka leo mele "Hoku o Betelehema," malalo o ke alakai ana a Saml. Beniamina Kaalawamaka.
          A i ka meha ana iho o keia mau leo kupinai, ua ku mai ke Kahu Kula Sabati a wehewehe pokole no na hana e pili ana ia la. Mahope iho olaila, lulu dala na Kula Sabati no ka pahu hookani, me ka haawi ana mai o ka papa himeni o Haleola i himeni lulu, o S B K ke alakai.
          Ma ko Hoapili ano he komite, ua lawelawe pu oia ma ia hana. I ka pa-e ana mai o kona leo nahenahe imua o ke anaina, ma ke kahea ana. O ka apana o na Kumu Kula Sabati ka mua. I ke kulu ana iho o na paka ua, haukawewe lua kela. Mahope iho, ka apana o na mea kani. I ka ulele ana iho, ua like no a like. Pau ia, ka apana o na haumana Kula Sabati. Owe no hoi ke kai ia lakou. I ka apana no hoi o na hoahanau, kulukulu no hoi lakou. A o ka apana o na malihini, oia ka hope loa. Ke nana aku ia lakou, niniu launa ole, a paa ole no hoi i ke kaohi mai, i ka ua mea o ka iini a me ka makemake. O ke kukulu no ia la, me he wai la no Waikulu. I ka hoohui ia ana ae o na wai materia, ua piha pono ke kiaha a ke aloha, oia hoi, he $50.00.
          Mahope olaila, ua mele mai ka papa pokii o ke Kula Sabati o Haleola he himeni olioli, leo, "Mele oli ae oli ae," pau ia, hookuuia ke anaina no ka paina, i paa aku ka houpo lewalewa. Oiai he nui aku na hana i koe. I ka pau ana o ka paina, ua hea mai la ka leo o ka bele, a hoi aku la ke anaina iloko no na hana i koe.
          I ka akoakoa ana o na mea a pau iloko, oia ka wa i hoolaaia ai ka pahu no Iehova Sabaota, a no na hana maikai e ae, oiai he pahu hou keia. I ka pau ana o ia hana, na ke Kula Sabati o Kohanaiki i haawi mai i himeni no ka hoomaka ana i na hana o ka hoike, leo mele, "Ke ola i ke Akua," pau ia, he puhi ohe me ka pahu. Ia wa i hoomaka ai ka hoike o ke Kula Sabati, o Haleola ka mua, himeni "Hae Hoonani, aoao 9,"  haawina kula, no ka moolelo o Aberahama, o G M Paiwa ke alakai pau ia, o ke kula iho o Kaisareia, himeni, "Hae Hoonani, aoao 27," o Mrs. Susan K Kaelemakule ke alakai, haawina kula, no ka moolelo o Solomona, o John Kaelemakule ke alakai, no ke kula o Kohanaiki, himeni haku. "E haalelu aku ia Iehova," haawina kula, aia ma Kanawailua 27;15—26, o J W H K ke alakai, pau ia, puhi ohe me ka pahu, o S B K ke alakai mau no ia hana. Mahope olaila, ke kula pokii o Haleela, himeni "Hae Hoonani, aoao 11," haawina kula, na kanawai he 10, o S B K ke alakai. Kula Sabati o Kohanaiki, himeni "Hae Hoonani aoao 16," haawina kula, aia ma Isaia 28; 16, oia ke kahua o ko lakou haawina, a aia ma Mat. na pauku paanaau, mai ka a a hiki i ka w, o J W H K ke alakai. No ke kula o Kaisareia, himeni, "Hae Hoonani, aoao 27," o Mrs. S. K. K. ke alakai, haawina kula, no ka moolelo o Davida, o J Kaelemakule ke alakai. No ke kula o Napuu, himeni 232, haawina kula, Mat. 7 ;36, o A Kahukula ke alakai, pau ia, puhi ohe a me ka pahu. Pela iho la ka hoonohonoho ana o na hana o ka la, pau e ka manawa, aole i laua aku na hana i hoomakaukauia no ka hoike, a na ke kula o Kohanaiki i haawi mai i himeni hookuu, "Ihiihi no o Iehova Sabaota," o J W Haau ke alakai.
          I ka pau ana o keia leo mele, ua ku mai ke komit Hoapili a waiho mai he mau olelo paipai i na Kula Sabati, a i kokua ia mai hoi e ke komite haimanao o na malihini, oia o Makainai. Mahope o keia, pule o Kaonohimaka, a hookuuia na hana o ka hoike.
          I ka pau ana o na hana, ua noho iho no ke anaina no kekahi hana nui i koe, oia hoi ka hoohuiia ana o kekahi mau paa mare elua e ka Rev. G P Kaonohimaka, he mau lala lakou no ke Kula Sabati, oia o J W H Kukapu, ke Kahu Kula Sabati o Kekaha, me Miss Rebeta Akina, o ka lua hoi o na paa mare, oia no o G P Kaholoaa o Napoopoo, S Kona, me Mrs. Kaaua. I ka wa i makaukau ai ka mare, ua hoohanohano ia na paa mare me na hoa o ke Kula holookoa, o na kane ma ka aoao o na kane e mare ana, a o na wahine hoi ma ka aoao o na wahine e mare ana, me ko lakou mau aahu like.
          Mahope iho o ka mare ia ana, ua ku mai o Hoapili a paipai uuku i na paa mare a me na ku aoao, a hookuuia ke anaina me ka pula a ke kahu, Rev. G P Kaonohimaka.
          Ma ka hora 7 1/2 o ia ahiahi, ua malama ia he wahi paina na na mare, ua naue mai no kekahi poe e paina pu me lakou, a e hauoli pu no hoi.
          I ka pau ana o ka paina, ua malama kekahi mau lala o na Kula Sabati i koe iho i i Kula Baibala no lakou, a ua koho ia o A Kahukula i lunahoomalu no ia hana. Ua hoomauia keia hana i kela a me keia ahiahi, a hiki i ka Poakahi, a ma ia la i kaawale loa ai na hoa, a hoi kela a me keia i kona wahi iho. I ka nana ana i na hana o ia mau ahiahi, ua ku maoli no i ka maikai a naauao, a he mau hana no hoi e lana ai ka manao.
          I ka la Sabati ae, ua hui hou mai na Kula Sabati no na hana i koe, a me ka ahaaina a ka Haku. A i ka pau ana o ia mau hana, ua koho na apana Kula Sabati i komite hooponopono, a e imi hoi i na mea e holomua ai ke Kula Sabati. Eia na lala o ia komite, J W H Kukapu no Kohanaiki, G M Paiwa no Haleola, J Kaelemakule no Kaisareia, a o A Kahukula no Napuu. I ka noho ana o ka papa komite, ua kohoia o G P Kaholoaa i puuku malama dala no ka manawa, a o Rev. G P Kaonohimaka a me S B Kaalawamaka i mau hoa kuka. Noho ka lunahoomalu o ke komite ma ka noho. A eia na mea i hooholoia.
          Hooholoia.—Na ke Kahu Kula Sabati e hoolaha aku i ka manawa e hoike ai na Kula Sabati, no ka ekolu manawa hoike i ka makahiki.
          Hooholoia.—E ukuia ke Kahu Kula Sabati i ekolu dala no ka hoike hookahi ana.
          Ma ke noi a A Kahukula, e noonoo ka aha i na hemahema o na Kula Sabati, hooholoia.
          Noi mai o G W Paiwa, e hoolakoia i elua ohe puhi, (flute) a me elua ohe piula no ke Kula Sabati, hooholoia.
          Noi mai o A Kahukula, e hoolakoia i 10 buke Hae Hoonani no kona apana, hooholoia.
          Noi mai o Kukapu, e hoolakoia i buke moolelo no ke Kula Sabat, hooholo loa ia.
          Noi mai o J Kaelemakule, e hoolako ia i mau buke wehewehe huaolelo Baibala. Kokua mai o G M Paiwa, e kuai ia i 2 buke no ko laua mau apana, hooholo ia.
          Hooholoia.—Ua ae ia ka pahu o ke Kula Sabati e hele aku i na hana kuwaho i ikeia he pono ma ka nana ana a na lala o ke Kula Sabati.
          Hooholoia.—O na loaa apau o ka pahu a me ka ohe i lulu ia iloko o na la Hoike Kula Sabati, e lilo no ia mau pomaikai no ke Kula Sabati. A o na loaa e ae mawaho, no na paahana ia a me na hemahema e pili ana i ke kino o ka pahu. Ina hoi he mau hana e pili ana i na luakini, koe ia mau pomaikai, aka, na ka oluolu o ka luakini nana ia hana e hoomanao aku i wahi uku no ka poe luhi.
          Hooholoia.—E lilo keia mau olelo hooholo i rula paa loa; a no ka oiaio, ke kau inoa nei makou.
J W Kukapu,  G M Paiwa,
A Kahukula,  J Kaelemakule.
Komite.
          Noi mai o G P Kaonohimaka, e hoolahaia ka moolelo o na hana o ka Hoike Kula Sabati ma na nupepa "Ka Lahui Hawaii" a me ke "Kuokoa," hooholoia. Kohoia o S B Kaalawamaka, nana e hoolaha i keia moolelo ma keia nupepa, a o J W H Kukapu hoi i ke Kuokoa.
          Ua ala mai nei na hana maikai ma keia kihapai, a ke ku nei iluna me ka lana o ka manao. Aloha no.
S B KAALAWAMAKA.

KA HUAKAI A NA KAMAHELE.
KA HOKI HOOPAKALAKI.
He Kaao.

          E hai aku a'u i kekahi wahi kaao a'u i lohe ai mai ka'u kumu aloha mai, i hoomahuahua ia e ka'u maka kila, malia, ua ku i kuu noonoo, no kou papaaina, a penei : He kanaka hia-a mau o Kele o kona noonoo, e hoolono mau ana i kahi o na pomaikai, me he la e huli aku ana kona mau pepeiao i kahi a ka makani e pa mai ana. Me he nu ana la na ka makani Kona, aia ka; lohe mai la ia, ua hu nui ke mai la ke gula mauka o ke kuahiwi, kahi a na kanaka e ae he nui i holomoku aku la ilaila. Ha! ha! i pane ae ai oia, no keaha la wau i haule ai mahope o ka huakai a ka poe hiki mua ? O ko'u kulana, oia ka hiki mua i ke kahua o ka hana, malaila wale no e kupono ai na hakoko ana a ko'u ikaika. Pela oia i lumiluia'i iloko o kona mau noonoo iho, me he la, ua oli mele ae oia i keia mau hua hoolana.
          Ke kau nei au kau ka manao,
          E ake no a hiki aku,
          Kela kuahiwi gula e,
          E naue au a oli ae.
          Kahea ae la ia i kana keiki, a olelo aku, ka ano ka manawa, e liki ia oe iho, e holo mama aku i ke kuahiwi gula a'u i lohe mai la, kahi a na kanaka e heihei mai la no na pomaikai holo mua o ka imi waiwai ana. Uila ae la na manao o ke keiki; a pane ae la. Ua pono, e lawe pu au me Kake oia kona wahi hoki no ka mea, e lawe mai auanei ia i ke gula i ka huli hoi ana mai. Kau ae la ia maluna o kona hoki, he puolo, na mea hana, a me ke o ko laua hele ana, a kapio aku la na kapuai ma ko laua ala e hiki aku ai i ke kuahiwi. A oiai o Kate he wahi hoki nuhanuha, lalau aku la o Kele i ke kaula a huki hele aku la mamua, oiai oia e hele wawae ana. Hoea mua aku la laua ma kekahi kauhale, kahi e paapu ana na kamaaina o ia wahi, a hoomaka mai la lakou e pahenehene, no ka hoki ka-e wale a me ke keiki hookano, e hoolilo ana i kona makua i kauwa. No keaha la oe i kau ai maluna o ka hoiki, a naue kou luaui maluna o kona mau kapuai wawae? Wahi a lakou i pane mai ai. Aole pono! aole pono! e noonoo hou iho oe e ke kanaka ui opio. No keia hua, hilahila iho la ke keiki a pane ae la, e ka makua, o oe maluna nei e pono ai, a na'u e huki ke kaula. Ee ae la ka makuakane, me he la ua noho pono iho la ka nani iluna. No na kaulahao i hala e a me na minute e holo mama ana, hoea hou laua ma kekahi kauhale, kahi i pane hou ia mai he mau mapuna leo henehene hou ma ko laua mau pepeiao, i ka i ana mai e like me mamua. Anoninoni iho la na manao o ka makuakane, a pane ae, nani ka like ole o ka noonoo o ko onei poe me ko kaua, heaha la ka pono o kaua? Nolaila, penei laua i hana iho ai, o laua elua kau iho la maluna o ka hoki e nana hakalia ana me ke ulolohi. A! eia hou keia poe! wahi a ke kanaka opio ia ia i ike aku ai i kekahi poe e ku mai ana, e huipa hou mai anei ko lakou mau elelo ia Keke, a i ole he.—Aole i pau loa ae na huaolelo, hooho mai lakou la, e na mea lokoino! na puuwai aloha ole!! ua kupono anei ka hoki uuku i keena hooluana no olua, e kuka olelo ai iloko o ka ulu laau? Kahaha; wahi a ua kanaka hia-a mau nei. E ake au e olioli pu me ke kanaka puuwai maemae, nana e hoohauoli mai i kuu puuwai luhi i na lono o ke gula. No keia mau olelo hou i paluku hou ia'i ko laua mau noonoo, penei laua i hana hou ai. Hele wawae iho laua e alakai ana i ka hoki e huki ana hoi me ka ikaika, a malia e mahalo ia paha kaua no keia mea. Pela laua i kaukoo aku ai ma ke alanui paheehee iloko o ka ululaau, a i ka hoea ana iwaho, me he la ua hauoli launa ole mai laua i ke kokoke ana mai o ka nanaina o ke kuahiwi i ko laua maka. Oiai laua ua hauoli loa, aku, mamua o ko laua alo, aia ekolu poe maluna o na lio mama, a e halawai auanei lakou i kahi hookahi. Halo e na kahu hipa! i pane mai ai ka mea kiekie o lakou, e paa ana i ke kakaka ma ka lima. Aneane olua e haule iloko o ka naaupo a me ke kuhihewa, o ke kanaka ke alii, maluna o ka holoholona, a like me makou ano, no ka mea, oia wale no a mea kupono ma keia hele o olua. Ina aole pela, ke manao nei au, no ka olua mau uhau pinepine ana, e weheia auanei na lehelehe o ka hoki a kamailio mai ma ka leo kanaka, oki ae la kana olelo, a hala aku la lakou. Nolaila, hoololi hou ae la laua, a hana iho la penei: lawe ae la laua a hauhoa iho la i na wawae o ka hoki, e like me ke kupee ana i ka puaa hooomo ia'e la ka auamo, a kau ae la kela me keia poo ma na ai o laua, o kekahi mamua a mahope kekahi, e koikoi hele ana ma ke alanui, me ka ikaika laua i hoonou aku ai, a hiki ma ke alahaka, auwe, pehea iho la laua ilaila? Haki ae la ka laau auamo, haule aku la ka hoki ilalo o ka muliwai, a nalo aku la. nani ka menemene o ke kanaka opio ia ia i nana aku ai i kona hoki iloko o na ale poipu o ka wai, a wahi a ka makua i pane ae ai. No kela hoki wale no i hooluaiele ia ko kaua noonoo, nolaila, hooholo iho la ke keiki e hoi i ka home, a nana i hoi, o ko laua peki mai la noia. Hoi ka makua me ka minamina i ka waiwai, a o ke keiki me ka minamina i kona hoki ahonui, no ka mea, wahi ana me ka leo ha-u-ha-u, mamuli o ko'u manao i haule ai oe iloko o ka poino nui.
          E ka mea heluhelu, nau no e kui iho i na mapuna manao, i lei no ke ano ahiahi.  MOHALA.

          Ma ke ahiahi Poakahi o ka pule i hala, i ka manawa a ka moku kuna Jenny e hoopuka ana mailoko nei aku o ke awa, ua i keia aku la oia a kau ana iluna o ka hapapa makai aku o ka hale ipukukui, a hiki i ko makou wa i haalele aku ai, e paa ana no oia, a mahope wale iho ka ka hemo ana, a holo aku la ma kana huakai no Kauai.