Ka Lahui Hawaii, Volume III, Number 51, 20 December 1877 — Page 4
KA NUPEPA KA LAHUI HAWAII.
HONOLULU, DEKEMABA 20, 1877.
KOMI TE HOOPONOPONO NO KEIA AOAO.
LAIKI MAKUA, MRS. KELA A. GILIMANA,
M RS. ELENA MAKALE, MRS. J. M. KUKE.
KE KUPINAI, OLELO MALIE.
Aole loa i hoomaopopo o Tommy liilii i ke kupinai.
I kekahi la e paani ana oia ma kekahi kula oia hookahi. Kahea aku oia, "Ho, ho, halo," a lohe koke oia i kekahi leo e pane mai ana, "halo." Puiwa ae la oia i keia, a kahea aku oia, "owai oe ?" Hoi mai ka pane, "oe." Huhu oia i keia, a kahea aku, "Mea ino loa." me ka leo nui loa; a nui loa ae la kona huhu i ka lohe i ka olelo i pane ia mai, "Mea ino loa," nolaila, mau kona kahea aua i na inoa ino, a hoi hou mai lakou a pau, ua like ke ino. Holo oia i o a ianei, e imi ana i ke keiki pakike, e hoonaukiuki ana iaia aka aole oia i ike i kekahi mea. Hoi koke oia i ka hale i kona makuahine, a hai aku iaia ua pee kekahi keiki ino ma ke kula, a ua kapa aku iaia i na inoa ino o kela a me keia ano. Akaaka ae la kona makuahine, a hooluliluli kona poo iaia—"E Tommy, ua hoike oe ia oe iho keia manawa. Ua lohe anei oe i kekahi mau olelo e, o kela mau olelo wale no paha au i olelo ai?" "E like me ko ike ana i kekahi wa i ko helehelena ua hoike ia iloko o ka wai pela i lohe ai oe i kou leo iloko o ke kupinai.
Ina ua kahea aku oe i na huaolelo oluolu, ua hoihoi ia mai na huaolelo oluolu ia oe. A pela e ike ana kakou ma keia ola ana. Ina he ano aloha a lokomaikai kakou, e ike ana kakou e lokomaikai ana na kanaka ia kakou; aka ina he pono ole a aloha ole kakou, aole hiki ia kakou e manao e loaa ana ia kakou i ka hana ia mai i oi aku ka maikai, mai ka poe i halawai mai me kakou.
"O ke kanaka i nui na hoalauna, e poino oia malaila." Na Solomona 18:24.
PALAPALA A LAIKI MAKUA.
HELU 8.
Ma ka halawai halelole a'u i kakau ai ma kuu palapala hope, malama lakou i kekahi halawai hoole i na waiona iloko o kela mau la halawal he umi, a o ka elemakule i kakau mua i kona inoa, he kanaka ano maikai. O ka nui o na makahiki o keia kanaka a me kana wahine, aia mawaena o na makahiki he kanahiku a me kanawalu, aka, he paa ko laua hele ana, a he ano e uuku wale no ko laua mau helehelena no ka nui o ko laua mau makahiki. Ua noho pu laua no na makahiki he kanalima a oi aku, a o ko lakou ohana me ka poe i mare mai iloko o ko lakou ohana, me na moopuna a me na keiki o na moopuna, hui lakou a pau he kanaono ka nui.
Olelo mai ka elemakule ia makou, aole oia i hui me kekahi ahahui hoole i na mea ona, aka, i "ko lakou kamailio ana no ka pakiko," hoomanao oia no na hua ino o ka inu ana i na mea ona, a aole no hoi i loaa ka pilikia iaia no kona inu ole ana i na mea ona, aka, mai ka umikumamahiku o kona mau makahiki, aole oia i lawelawe ma na mea inu ona, nolaila, manao oia e noi aku e ae ia mai oia e kakau mua i kona inoa, no ka mea, oia ke kanaka kahiko loa maloko o ka hale lole, oia me kana wahine he mau kupa no ke Aupuni o ka Lani, o ka poe no ia aupuni, oia na mea i oi aku ka pono ma na aina a pau.
O kekahi o ko makou mau hoalauna e noho kokoke mai ana, he alii ia no keia aupuni o ka lani. Mai manao oukou e noho ana oia me ka hanohano alii, o kona home he hale uuku ilihune, a ma ka hana o kona mau lima i kela la keia la, loaa oia i ke ola kino nona a me kona ohana, o kona mau makahiki nae, oi aku mamua o ke kanahiku. Aka, olelo na mea a pau i ike iaia, "he kanaka hewa ole, aole loa i ike ia ua hana oia i kekahi mea pono ole."
Ua noho pono oia malalo o kona alii. I na manawa a pau, aia no oia ma kona wahi iloko o ka hale o ke Akua, e hulali ana kona helehelena me ka makemake. Ma ka hale he hoihoi, a hoomanawanui me kana wahine nawaliwali, me ka hoohalahala ole, aka nae, mamua oi aku kona waiwai mamua o keia wa. E hana ana i na mea a pau i hiki iaia e oluolu ai kona home, ma ke kanu ana i na laau a puni, a e hooikaika ana me ka hoomanawanui i maemae na mea a pau. Aole anei i hoopomaikai ia ke ola e like me ka malu o ke Akua, e like me ka mea nani e hoopuni ana iaia.
Ua loaa ia'u kekahi Keiki Alii hou aku maanei. O kekahi kane a wahine kahiko i hele pu no na makahiki he kanalima a oi aku ma keia ola ana me ka hauoli, e noho mau ana ma ko lakou wahi ma ka halawai haipule, a ma ka halepule. He mau mea e ae no hoi kekahi, na kane a me na wahine, piha i ka hauoli, kokua i ka poe ilihune, e hoopomaikai ana i ko lakou mau home iho, a me ka lehulehu. Aka, auwe! he poe e kekahi maanei, he inoa ko lakou ma keia aupuni o ka lani," aka, ma ko lakou mau hana, he kanalua ka naau, no ke aupuni hea la lakou. I kanalua ole ka naau ma keia mea no kakou iho, oia ka makemake oiaio o
LAIKI MAKUA.
HE KII O KA AKAU LOA.
O kakau e noho nei ma keia aina mehana, aneane hiki ole ia kakou ke hoomaopopo; he wahi e like me keia i hoike ia ma keia kii, e loaa ia ma ko kakou honua nei. Ina aole kakou i lohe no na aina e ma na buke, ua like kakou me ke lii o Siam, i ka wa i hai ia oia e ka poe hele mai e ike iaia i kekahi wa, no ka paakiki loa o na muliwai ma ko lakou aina ponoi, ua hiki ke kauo ia na kaa piha me ka ukana maluna o lakou, olelo oia he wahahee ia olelo a pau loa.
Maanei he kii ko kakou no ka wa hooilo ma na wahi ma ka akau loa. Ma ka aoao hema o ke kii, ike oukou ekolu mau hale hau. Ua hanaia lakou no loko o na apana hau, i hoopaa pu ia me ka wai i lilo i hau paakiki. Mehana loa keia mau hale, aka he lepo loa. Ua aahu na kanaka i na lole i hana ia no loko o na ili holoholona. No ka nui o ke anu aole lakou manao i ka maemae, a o ko lakou mau lole e like me ka lakou mau hale, he lepo loa. O na ilio a me na reindeer ko lakou mau holoholona laka. Ua ao ia na ilio e kauo i ko lakou mau kaa honua; aka o ka reindeer ka holoholona i makemake loa ia e lakou, he mama loa i ka holo. Ke ike nei oukou i kekahi maanei e holo ana maluna o ka hau. Ua hoomaka keia kanaka e hele ma kekahi wahi. E nana, ua uhi ia oia me na ili holoholona! O kona kaa honua he kupaianaha ke nana ia, aneane manao ia he waapa paha.
He uuku na laau a me na mea ulu i loaa ia ma keia mau wahi o ka akau loa. Aka, he mau mea nani a kupanaha ko lakou, ma ka wa hooilo ka oi. Ua ike pinepine ia ka Aurora Borealis, ua oi aku kona nani mamua o ka mea i manao ia e oukou. Ua uhiia ke ao e kekahi apo laula o ka malamalama, mai ia e poha mau ana na kukuna aiai o ka malamalama. Ke ike nei oukou ua hoike ia ma ke kii.
NO KA HELE MA O.
I ka wa i hookaawale ia kakou mai na makamaka aloha, aole mea e hoolu ai ia kakou e like me ka loaa ana i na palapala, a me na hoailona o ka hoomanao mai lakou. I ka wa e haalele ana o Iesu i keia ao, kaumaha loa kona poe haumana, aka olelo oia ia lakou e haawi ola i ke kokua ia lakou, i noho mau loa me lakou. Aole makemake ke Akua i Kona poe kanaka e hoopoino Iaia, a i kuu manao, he nui na ano ana i lawe ai, i hoomanao kakou Iaia. I kekahi manawa, lawe oia i na kanaka mai ko lakou hana ae ma ka mai. He mea paha keia e hoomanao ai kakou, aole kakou e noho loa maanei, a e pono ia kakou e hoomakaukau e halawai me ia. I ko kakou wa mai, oi aku ko kakou hoomanao ana i ke Akua mamua o ko kakou hoomanao i na mea maikai o keia ao. A i kekahi wa haawi mai ke Akua ia kakou i na pomaikai o keia ola ana, i hauoli kakou, a hoomanao kakou i ka Mea nana i haawi mai iaia, a loaa mai ai na mea maikai a me na mea pono a pau.
I kekahi manawa ua lawe ia aku e ka make na makamaka aloha, alaila hahai ko kakou mau naau a me ko kakou mau manao ia lakou, a hoao kakou e hoomanao i ke ano o ka lani, a pehea ko lakou launa ana me Iesu malaila. No ke kaumaha loa o ko kakou mau manao ia mau manawa, huli kakou i ko kakou Haku, e like me na keiki e uwe ana, i ko lakou mau makua, e hooluolu na mai. Aole ano e ae a ke Akua i hookokoke loa mai ai ia kakou e like me keia. Haawi pinepine mai ke Akua na kakou i ke ola kino ikaika, a me na la malkai, a me na po nani, e hoike mai lakou a pau i ka nani o ke Akua, a e hoopaa ia kakou iloko o ka hoomanao Iaia. I na wa a pau a'u i ike ai i ke anuenue ma ke ao, me he mea la, e lohe ana au i ka leo o ke Akua e olelo ana, "Ke kau nei au i kuu anuenue ma ke ao."
O keia mau mea a pau ua like me na palapala a me na mea hoomanao mai na makamaka aloha, a ua haawi ia mai lakou mai ka mea i loaa pono ia iaia ka inoa makamaka, o kona aloha he mea pau ole. Pehea kakou e pane aku ai i keia mau palapala ? Ma ka pule a me ka hoomaikai ana, a me ka hoolilo ana i ko kakou ola i mea hoonani aku iaia.
No Christopher Columbus.
HELU 31.
No na makani ino, aole hiki ia Columbus e hoi pololei i Hayti, nolaila, holo oia i ka hema, a puni ka mokupuni o Iamaica iaia. Pau ka mahina hookahi i ka puni ana i keia mokupuni. Aole hiki iaia ke haalele i kona mau moku liu, a me na luina luhi, e makaikai i ka aina, aka, kuu ka heleuma ma na awa okoa. Holo mai na kamaaina ma na waa e lawe mai i ka ai i na Paniolo, a kamailio o Columbus me lakou ma ka maheleolelo. Hele mai kekahi alii a me kona ohana i na moku, a makemake e hoi pu me Columbus i Sepania. Lawe pu mai keia alii me ia kana wahine, ekolu kaikamahine, elima keikikane.
Olelo oia ua lohe oia no ka mana o Columbus, a no ka hiki ole i kekahi lahui e kue iaia, nolaila, makemake oia e hui me ia, e haalele i kona aina hanau a hele aku i Sepania me ia. Noonoo o Columbus no na pilikia e loaa ana iaia, a hoole i ka lawe ana i keia ohana me ia. Olelo oia i keia Lii, e lawe oia iaia i makamaka no kona mau alii, e hoomalu ia e ia, aka, aole hiki ke lawe pu iaia me ia i Sepania. Nolaila, hoi keia ohana ma ko lakou waa, a holo aku la na moku.
I ka la 4 o Sepatemaba, komo na moku o Columbus ma ke awa o Isabella. E hoomanao oukou, ua haalele lakou i keia wahi i ka la 24 o Aperila. Eha mahina ko lakou hele ana. O ka poe i noho, aole lakou i lohe no keia mau moku i kela manawa a pau.
Ua ikaika na makani ino, a ua nui ka makau, ua poho lakou a pau. Ua ike oukou i ka nui o ka makemake o na Paniolo i ke gula. Ua manao o Columbus e loaa ana ke gula a nui, e hoouna i Sepania. Manao oia e loaa ana iaia i keia holo ana, aka, aole i loaa iaia kekahi gula. Eia wale no na mea i hana ia iloko o keia mau mahina eha, ka hoopau i ke kaahele huli i ka mokupuni o Iamaica, no ka mokupuni o Cuba.
Ua hoohoka ia na kanaka i hele pu me Columbus, a ua ike oia ua manao na lahui Paniolo e hana ana oia i na mea i oi aku mamua o na mea i hiki iaia ke hana. No kona makau e hoahewa ia ana oia ma Sepania, me ka luhi, a me ka pihoihoi o ka holo ana ma ka moku, loaa oia i ka mai, a no ka nui loa o kona mai, i ka wa i hiki ai oia ma Isabella, ua pau kona ike, a manao na kanaka maluna o ka moku e make ana ia ; aka, ua hoala ia oia mai keia ano kokoke make e ka leo o kekahi kaikaina aloha, oia o Bartholomew Columbus . Aole laua i halawai no na makahiki he nui.
Mamua loa o kona holo ana ma kona holo moku mua, hoouna o Columbus i keia kaikaina ia Henere VII o Enelani e nonoi iaia e kokua no ka holo moku imi aina. Loihi ka manawa a hiki o Bartholomew i Enelani, a loihi loa aku i ka loaa ana o ka ae o Heneri VII e kokua ia Columbus. A loaa ka ae o ke Lii, hoomaka oia e hoi, a hiki oia ma Parisa i kona hoi ana, lohe oia malaila no ke kokua i haawi ia e na Lii Paniolo, no ka hele ana, a me ka hoi ana mai o Columbus, no na aina i loaa iaia, a no ka lua o kona holo ana. Ua hele mai nei oia e hui me kona kaikuaana, a e hana pu me ia ma kona mau hana luhi.
KA HOPUHOPU ANA I NA DIA MA TEXAS.
Ua ike na kanaka Hawaii a pau no ka hopuhopu ana i na bipi ahiu ma na kuahiwi o Hawaii a me Kauai, a ke manao nei au, ua like ia me ka hopuhopu ana i na Dia ma Amerika, penei ka hoakaka ia ana ma kekahi nupepa. Ua loaa i ka poe huli Dia kekahi mau ilio i ao ia e hopu i ka Dia, a ua hapai ia keia hana he hana lealea loa; a he mea aneane hiki ole ke hai, ka mea oi i ka lealea ma keia hana, o ka lio, a o ke kanaka holo ma ka lio paha, o ka ilio a o ka Dia paha. Penei ka hana, koho i kekahi Dia e hele hookahi ana ma ke kula, no ka mea, aole pono e hoopuiwa i ka nui o na holoholona, o ka mea wale no i hopu ia. Ua maa na Dia i ka ike ana i na lio, a aole nana i ka mea e kau ana maluna o ka lio ina e hele malie ana, a hiki i kahi kupono e alualu. E holo ka Dia ma ke kula me ke alo i ka makani, ina hoopuiwa ia a holo, nolaila ua ao ia ka ilio a me ka lio i maa i ka alualu, e holo no ma kahi o ka makani mahope iho o ka Dia e alualu ia ana. Holo malie ka ilio akamai ma ka aoao o ka lio o kona kahu, a haawi ia ka olelo, ina hookokoke lakou i ka Dia mamua o kona holo ana aku, i ole loihi loa ka holo ana o ka ilio. A puiwa ka Dia a hoomaka ka holo, ua hoopuka ia ka uwa, alaila o ka hana o na mea a pau e holo, a hiki mua ilaila. Holo iki aku ka Dia, alaila huli i ka akau a i ka hema paha, i huli kona alo i ka makani. Kiai ka lio a me ka ilio no ia mea, a huli koke mamua ae o ka Dia, a pela e hopu ai ia ia, me ka holo ole ana a loihi, e like me ka holo ole ana a loihi, e like me ka hahai ana ma kahi i holo ai ka Dia. He mea ai ka io o ka Dia, a he ono loa.
NO NA MAKUAHINE.
Ma ko kakou palapala hope loa, ua kamailio kakou no na ano okoa o na kamalii, a no ka hoomanao ana i ko lakou manao i ka hooponopono ana me lakou.
He nui na pilikia o na makuahine i ke alakai ana i ko lakou mau keiki. O kekahi o lakou ulu mai no loko o ka hoomalu ole o na makua ia lakou iho. O ka hoomalu ohana, e hoomaka ia me ka makua. E ao oia e hoomalu ia ia iho. E hoike oia imua o kona mau keiki i ke ano akahai, hoomanawanui a me ka lokomaikai, no ka mea, ina aole, aole hiki ia ia e ao ia lakou e hoomalu ia lakou iho.
Huhu kekani keiki a pai i kona kaikuahine, a lohe ka makuahine i ka leo uwe, huhu oia a hahau i ka keiki. Ua lohia ka makuahine a me na keiki i ka hewa hookahi. Ua huhu laua, a i ka wa i huhu ai laua, ua hahau aku i kekahi mea e. E makau ana paha ke keiki e pai aku i kona kaikuahine, aka e ao ana anei ia pela he mea hewa ka huhu? Ike oia ua pai aku kona makuahine i kona wa huhu, nolaila manao oia ua pono ia ia ke hana pela. Aka pela ka hana a na makuahine he nui wale. Aole lakou i ao i ka hoomalu ia lakou iho. Oia kekahi o na mea i pono loa ke ao ia, aka, oia no hoi kekahi o na mea i paakiki loa ke ao ia. Aka e ao ia ina makemake oukou e hoomalu i ko oukou mau keiki.
He ano pupule ka huhu. Aole pono e ao ia i na kamalii. E pono e kaumaha ka makuahine i ka wa i hana hewa ia kona keiki, a e ike ke keiki i kona kaumaha. Me ka huhu ole a me ka noonoo, e hoopai oia e like me ka mea kupono. Aka aole loa hoike i na manao huhu, a hoopuka i na olelo huhu i kona keiki. Ina ua inaina ole kona naau iho me ka huhu ole, ua makaukau oia e noonoo i ka mea kupono no ke keiki, a e ao aku oia ia ia ma kana hana ana a me kana mau olelo. He mana nui no hoi kona maluna o ka naau o kana keiki.
KE ALAULA.
MOKUNA 37.
KO PETERO HOOLE ANA.
Ua ala no ua poe kanaka hewa hoino nei ia Iesu, a ao ia po. Ua hoouna hoi lakou i ka lakou mau kauwa e lawe mai ia Iesu. Aia hoi lakou maloko o kekahi hale nani, e noha ana maluna o na noho a puni ke keena, e kamailio nui ana, a e kaunui ana hoi ko lakou manao no ka laweia mai o Iesu.
Olelo aku la lakou kekahi i kekahi ; "Ina e hiki mai Oia, pepehi no kakou Iaia—e lawe aku kakou imua o ka lunakanawai."
Mahope iho, hiki maila o Iesu, me na kauwa a ka poe hewa. Ua hauoli nei ua koe hookiekie nei, no ka ike ana mai ia Iesu.
Kukulu aku la lakou Iaia, mawaenakonu o ke keena nui. A hoopuka aku la lakou i na olelo hoino no Iesu. "O Oe anei ke Keiki a ke Akua?" Wahi a lakou.
"Ae," wahi a Iesu, Owau no Ia "A iloko o ka la hookahi, e ike auanei oukou Ia'u e hele mai ana me na anela maluna o na ao, alaila, ia manawa oukou e ike maopopo mai ai, Owau no ke Keiki a ke Akua."
Alaila, ua hoopihaia ua poe hewa nei i ka inaina.
"Ke lohe mai nei anei oe i Kana mea e olelo nei?" Ke olelo nei Oia, he Keiki Oia na ke Akua; e lawe aku Iaia imua o ka lunakanawai, a e pepehiia Oia."
Ua ku no o Iesu me ke akahai, a hiki pono ole hoi ke hoopuka ae i hookahi huaolelo.
A pehea iho la na haumana ?
Ua pau nui aku la i ka holo.
O Petero anei kekahi i holo ?
Ua olelo o Petero e make pu no oia me Iesu, aka, oia no nae hoi kekahi i holo aku la.
A mahope iho, manao ae la o Petero, "e hele ana wau e nana ia Iesu ; ke makemake nei au e ike i na mea a ka poe hewa e hana aku ana Iaia."
Nolaila, hele mai la o Petero ma Ierusalema, a komo aku iloko o kekahi hale nani. Komo mua aku la Oia ma ke keena nui, aia hoi na kauwa e noho ana puni a ke ahi maloko o ua keena nui nei, e hamama ana kekahi ipuka, a ma ia ipuka i ike aku ai o Petero ia Iesu. Aia hoi oia malaila e ku ana imua o na kanaka hewa. Manao iho la o Petero aole he mea nana e ike mai, oia kekahi o na haumana o Iesu, o pepehi ia auanei oia. Aka, ia Petero e noho ana ma kahi o ke ahi, e hoopumehana ana iaia iho, olelo aku la kekahi kaikamahine iaia, o oe no kekahi o na haumana a Iesu.
Alaila, maka'u iho la o Petero, a olelo aku la, "aole, aole loa owau, aka, olelo hou mai la kekahi kaikamahine e ae iaia, ke hooia aku nei au, o oe no kekahi haumana a Iesu."
Aole, wahi a Petero, aole loa owau. Nolaila, hoi hou aku la o Petero ma kahi o ke ahi, a hoomaka iho la e kamailio pu me na kauwa.
Aka, ua hoomanao kekahi poe o lakou, i ka ike ana ia Petero maloko o ka mahinaai, a hele mai la lakou i o Petero la, a olelo mai la, ua ike maopopo makou o oe no kekahi o Kana mau haumana. Ua ike no au ia oe maloko o ke kihapai, wahi a kekahi o lakou.
Alaila, hoomaka mai la ko Petero huhu, a kamailio me ka inaina, ma na ano kupono ole, e hoole mau ana, aole oia he haumana na Iesu.
I ua o Petero no e olelo hoino ana, lohe aku la oia i ke kani ana mai o ka moa.
Alaila, hoomanao ae la o Petero i ka Iesu i olelo mai ai iaia, a nana pono aku la oia ia Iesu, a huli ae la o Iesu a kau pono mai la ka nana ana o Kona mau maka maluna o Petero. Ehaeha wale ia nanaina! Aole i pane leo aku o Iesu, aka, Kona nanaina, me he mea la e i mai ana, "O Petero anei keia kuu makamaka, i olelo mai ai e make pu oia me A'u? O kona aloha anei keia Ia'u, aole hoi anei oia i olelo iho nei, aole oia i ike Ia'u?"
Kaumaha loa iho la ko Petero manao, me he mea la e naha ae ana Kona puuwai, a hele aku la oia iwaho o ka hale, a uwe iho la me ka walania. No ka mea, ua aloha io no o Petero ia Iesu, aka, na Satana i hoowalewale iaia e lilo i kanaka ino, ma ka olelo ana aole oia i ike ia Iesu.
Ina i haipule o Petero ma ke kihapai me ka hiamoe ole, ina ua loaa iaia ka noonoo maikai. Aka, ua haipule mau o Iesu no Petero, i ole ai e hoowalewale ia kona uhane mahope aku e ke Satana.
MOKUNA 39.
NO PONETIO PILATO.
Iloko oia po holookoa, ua ku no o Iesu iloko o ke keena nui; ua lohe pono Oiai ka Petero mau olelo a pau a oia Kona mea i ehaeha nui ai. Ua like ua poe kanaka hewa nei, me he mau liona la, a me na tiga, a o Iesu hoi, ua like Oia me ka hipa keiki. Ua nana aku nae ua poe hewa la ia Iesu, me ka hoino nui ana.
I kekahi manawa, Iaia e kamailio ana, ua papi amaila kekahi kauwa ma kona papalina, aka ua uumi wale iho Oia i keia me ke ahonui. Aole i hiki mai ka lunakanawai, no ka mea; nolaila, i kakali ai ua poe hanaino la, a hiki i ke kakahiaka.
Hoopuni maila na kauwa ia Iesu, a hoouhi maila i ka lole ma kona mau i maka, a hili maila Iaia, me ke kulai ana, kuha aku la, a hoohenehene aku la Iaia.
I ke kakahiaka ana ae, olelo ka poe hewa, ano kakou e lawe ai Iaia nei imua o ka lunakanawai.
Nolaila, oili aku la lakou mailoko aku o ko lakou hale nani, a iawe pu aku la ia Iesu me lakou.
Aia hoi kekahi lunakanawai e noho ana maluna o kekahi noho kiekie ma ke alanui.
O Ponetio Pilato kona inoa. Aole no i ike mua ka lunakanawai ia Iesu. A oleio mai la ka lunakanawai; heaha la Kana mea i hana ai?
Olelo aku la ka poe hewa, ua kapa Oia Iaia iho he Moi.
Alaila, olelo aku la o Pilato ia Iesu, he alii anei Oe ? Pane mai la o Iesu, Ae, pela io no. Aka, manao iho la o Pilato, no ka malkai o Kona nanaina, aole oia i makemake e hoopai aku ia Iesu.
Alaila, walaau nui ae la ua poe kanaka hewa le, me ka olelo ana, e pono Oe ke kau ia ma ke kea.
Aole wahi a Pilato, e hahau aku no Iaia, a ua lawa iho la no. Nolaila haawi aku la o Pilato ia Iesu ma ka lima o kekahi poe koa, a na lakou i lawe aku Iaia maloko o ka hale a hahau aku la Iaia me na kaula i hipuupuuia a hiolo mai la ke koko ma Kona kua. Alaila, hoohenehene aku la na koa lokoino Iaia, no Kona olelo ana he Alii Oia. Wehe ae la lakou i Kona mau aahu ponoi, a hoaahu aku la Iaia, me kekahi mau aahu nani e ae, e like me ko na lii e aahu ai, he hauliuli a me ka ulaula.
Alaila olelo ae la lakou, e hookau kakou i leialii ma Kona poo. No ia hoi, lawe ae la i na kakalaioa ooi, he kohu like me na kui pine a owiliia ae la a paa, a like me ka leialii, a hookau aku la ma Kona poo.
Olelo ae la lakou, he mea pono paha i kookoo kekahi nona, (no ka mea he paa mau na 'lii i na kookoo ma ko lakou mau lima,) nolaila hookomo aku la lakou i ka ohe ma Kona lima i kookoo, a lawe hou mai la lakou ia mea mai Kona lima mai, hahau aku la ma Kona poo; a kukuli aku la lakou imua Ona me ka hoohenehene, a olelo aku la, E ke Alii! E ke Alii!
Alaila, alakai mai la o Pilato Iaia ma ke alanui, kahi hoi e akoakoa ana na kanaka ino, a he heluna nui hoi, a a hoike aku la oia imua o lakou ia Iesu me ka olelo aku: E nana mai i ko oukou Alii.
Ua manao o Pilato, e loaa ana la hoi ia lakou ka manao kaumaha, ke ike mai no Kona hanaino ia; e kahe ana ke koko ma Kona lae, no ka puka puka ina kakalaioa ooi, a ua hahauia hoi Kona kua, a ua hoaahuia i na aahu nani, i hoomaewaewa Iaia; aku ua loko ino ua poe hewa nei, me he mau tiga la.
"Aole," wahi a lakou. E kau Iaia ma ke kea! E kau Iaia ma ke kea! A hooho maila na kanaka a pau: E kau Iaia ma ke kea! Aka, ua aloha mau aku no o Iesu ia lakou.
"E kauia anei ko oukou Alii ma ke kea? Wahi a Pilato.
"Aole Oia ko makou Alii," wahi a na kanaka. A ua nui ae la ka walaau ma ke alanui, oiai na kanaka e hooho lokahi mai ana.
Alaila, manao iho la o Pilato, e hooluolu aku oia i na kanaka hewa, a olelo aku la oia, e lawe aku oukou a e pe- Iaia. Alaila, hauoli ae la na kanaka, aka, na na koa i wehe mua ae i na aahu nani mai Ona aku, a hoouhi mai la i Kona mau aahu ponoi.
He mea e ke ino o Pilato, no Kona ae ana aku e kaulia ka Haku ma ke kea! Ua manao no o Pilato he maikai o Iesu, aka, ua hookuu aku oia e pepehiia mai ka Haku, i mea e oluolu ai na kanaka.