Ka Leo o ka Lahui, Volume II, Number 317, 5 November 1891 — Page 3

KA LEO O KA LAHUI.

"E Mau ke Ea o ka Aina i ka Pono."

 

Eia Hou No.

 

            Ua hoike mai o Mr. Kahoonei ia makou, ua hoopa leo aku kekahi wahine kiekie o ka aina iaia, e hele ana e noi i mau kokua no ka Hui Kalaiaina; ua oluolu ka oia e haawi i hookahi dala, ina e kapae ae o Mr. Kahoonei i na inoa o Wilikoki, Nawahi a me Buki. Pela no hoi kekahi o na Kuhina, he kanalima dala, no ia kumu hookahi no. Pela no na wahi haole e hoao nei e hoomokuahana i ka Hui a me ka Aoao Lahui. E hoomaopopo kakou, o keia mau ano hana ano like, ka mea i hana ia i ke au o ka Moi a o ka Papa Kuhina o Kipikona, ke komo o ka Mana Hooko e hooikaika iloko o ke kuleana o ka pono koho, a mamuli o ia mau hana i ulu mai ai ka hoowahawaha ia o ia mau noho ana aupuni a hiki i ka hulihia ana o ke Kumukanawai. He mea hoonaauao ka moolelo o na hana o ke ao e a'o ai ia kakou i ka hana hewa a me kona hopena, a me ka hana pono hoi me kona hopena. Aole no hoi he mea hewa ka nupepa e leo e mamua, i @ a me an ako'akoa mamua o k@, e nahana ai ka waa aupuni ina e hookele hupo ia ana ke aupuni.

 

Paikau o ka Po Mahina Piha.

 

            O ke poo maluna ae, oia no ka mea e pili ana i kela pauahi hoopahaohao a hoolele hauli a makou i hoolaha mua aku ai mamua aku nei, i hoike ia hoi, he mau hana epa o ka hoolele hauli ua mau hana 'la.

            Nolaila, e like me ko makou rula maa mau, ka noii pono ana, ua hoomaopopo ia mai la, he mau hana apuhi wale iho no kekahi na ka poe kolohe, e pakaka hele nei o ka po. Nolaila, i keia po iho, e nohoo ai ka halawai nui a ka Puali Kinai Ahi no ka noonoo ana i ka mea kupono e panai aku ai maluna o ka mea manao kolohe, oiai, ua ike ia kela hipa eleele e kaalo ae ana ma keia huli o Kaala, ua paa kona mau kiwi i ke kaula ili a ke kaawai Helu Elua, (Engine Co. No. 2.).

            Nolaila, e ka poe manao kolohe a pau, aole loa e nalo hou ana na hana kolohe o kela ano i ka maka o Iehova [Helu Elua] ke Akua, eia la ua ike ia, a oia ka makou e hoike e aku nei. Pinepine ko makou wa i pahola aku ai i na olelo a'o he nui o kela ano keia ano iwaena o na makamaka, aole oukou i apo mai. O ka hua o ka makou a'o ana oia ko makou hailuku ia ana mai i ka lepo.

 

NUHOU KULOKO.

 

            Ua makemake ia na Luna lawe pepa a pau o ka LEO O KA LAHUI, e hoihoi mai i na helu o na la, 19, 20, 26, 27 o Okatoba nei, ma keia keena nei: ina nae he mau helu koe ia oukou.

            Ua makemake ia ua Luna Lawe Pepa a pau o ka LEO a me ka OIAIO, e akoakoa mai ma ke keena nei, i ka hora 10 a.m., o ke kakahiaka Poalima, no ka noonoo ana i kekahi hana i manao ia.

            Ke upu ia aku nei, e ku mai ana ka mokuahi Auseteralia i ko kakou awa nei i keia Poaono iho. Aole e nele kona lawe mai i na mea hou o na aina mamao i o kakou nei.

            E haalele mai ana o Mr. Ben Hogan ia Hawaii nei, ma keia huli hoi ana aku a ka Auseteralia.

            Ua akoakoa ae na lala o ka luakini o Kaukeano, no ka noonoo ana no a ogana hou o ko lakou luakini hou.

            Ma kahi o ke Kanikela Iapana ka Bana Hawaii kahi i hoohanohano ai i ka la hanau o ka Emepera o Iapana.

            Ina e mau ka haalele ana o na limahana o na mahiko i ka lakou hana, he kupono e hooakea na halepaahao.

            Ua huli hoi mai o J. J. Williams pai kii ma ka Malulani o ka Poalua nei, mai kana huakai aku nei i ka luapele o Kilauea.

            Ma ka la 2 o keia mahina, mai ka puhaka mai o ka wahine a Mr. Rosewarne he keikikane nui mohaha. Owai hou aku!

            E haiolelo hou ana o Lunakahiko Starr, ma ka Y. M. C. A., i keia po, hora 7:30; ke kono ia aku nei na mea a pau e naue ae.

            Ma ka halekula kaikamahine ae o Kawaiahao ka Moiwahine Liliuokalani i ke kakahiaka Poalua nei, a ua haawi ia he mau haiolelo hoolana i na opio o ia kula.

            Ua hoouna ia aku o Jno. Brown no hookahi mahina, e makaikai ai i ka hotele o Kawa, no kona lima nui a hanaino i kona kokoolua o kona ola ana. Nanahu ke kanawai.

            Ma ka hookolokolo ia ana o ke Keikialii Kunuiakea i ka Poalua nei imua o ka lunakanawai Hapakini, ua hookuu ia oia, me ke a'o pu ia mai nae, e akehele kona lawelawe ana me kana pu.

            Ua lohe ia, e hoomaemae hou ia aku ana ka Hotele Hawaii, a e hana hou ia aku ana i lanai ma ka aoao e huli ana ma alanui Likeke, a e kukulu ia aku ana i hale puhi ohe hou ma ke kihi o na alanui Hotele a me Rikeke. Maika'i Kaua'i!

            Ke mau nei no ke ohohia ia o kela pahu himeni ma ka halekuai haukilima ma kai mai o kahi o Haka. He umi keneta ka uku, lohe oe i na mele maikai, ke kani no o ka piano, ka akaaka no, ka pa'ipa'i no o ka poe makaikai i ka wa e pau ai o ka himeni ana, a he ku maoli no i ka nanea ke hoolohe aku. Nui ka naauao o ka mea nana i hana keia mea kani.

 

            HOOLAHA PAAUPUNI.

 

            Ke hoolaha ia aku nei ma keia e kuai kudala ia aku ana no holoholona i hoakaka ia mahope nei, ma ka Poaono, Novemaba 14, 1891, ma ka hora 12 awakea, ma ka Pa Aupuni ma Makiki, ke ole e kii mua ia mai:

            1 Lio kane keokeo leponalo hao ano e.

            1 Lio wahine hauliuli, he eleele na wawae eha a puni a me ke kamaa hao, me kahi keokeo pohaka ma ka uha hope aoao hema; he eha ma ka aoao akau; aole kuni.

            E hookomo mai ka ona o keia mau holoholona iloko o umikumamalima la, i ko lakou kuleana, a i ole ia e kuai ia aku ana no ma ke kudala e like me maluna ae.

D. Kaoao

Luna Pa Aupuni.

Honolulu, Novemeba 5, 1891. d–3ts.

 

OLELO HOOLAHA.

 

            E ike auanei na kanaka a pau, eia ma ka Pa Aupuni o Makiki, kekahi mau lio hele hewa, lio k melemele, keokeo lokihi ma ka lae, hualo poemuku, 2 wawae eleele mua, 2 wawae keokeo hope; hao kuni R H uha hope akau. Lio k eleele keokeo lokihi ma ka lae, 1 wawae keokeo hope hema, 3 wawae eleele; hao kuni D hope akau. O ka mea a mau mea nona keia mau lio e pono e kii koke mai o haala na la he 14 kuai kukala aku no wau ke hiki aku i ka la 31 o keia malama, ma ka hora 12 o ke awakea Poaono.

David Kaoao.

Luna Pa Aupuni.

Oct. 20, 1891.  30 @td.

 

OLELO HOOLAHA.

 

            Ua makaukau ka mea nona O-inoa malalo iho, e hana i na Pua HAKU PUNA ELEELE a me ka pohaku e ae no na pa kupapau, a me na kahua kukulu kia-hoomanao. O ka poe makemake e waiho mai i ka lakou mau kauoha me Ioane Akina

J. BOWLER.

Sept. 22, '90. d–1v*

 

OLELO HOOLAHA HOOPAU HOPE.

 

            E ike auanei na kanaka a pau ma keia, mai keia la aku ua hoopau loa aku au i ko H. C. Ulukou noho Hope ana no'u ma na ano a pau loa e pili ana i ka malama ana ka hooponopono ana a me ka 'ohi ana i na auhau o ko'u mau waiwai a pau loa maloko nei o keia aupuni. O na poe a pau loa e paa ana he mau waiwai no'u ma ko lakou lima, e hoihoi ae lakou ia'u ponoi ma ko'u wahi noho ma Honuakaha, ma Honolulu, Oahu.

KAPIOLANI.

[Ma o Jos. Nawahi la.]

Honolulu Oct. 31, 1891.  314–d3m.

 

Aila Kuai.

 

E LOAA NO MA KAHI O

J. F. COLBURN.

(KEONI KOLOBANA.)

Ma ke Kihi o na Alanui Nuuanu me Moi.

 

            E loaa no ke kumukuai haahaa loa o $2.5 o ka pahu. Hele mai hookahi, hele mai elua, hele mai no a pau.

            Ko oukou hoaloha,

J.F. COLBURN.

Honolulu, Iulai 8, 1891.  232 dtf

 

HE HOOLAHA I KA AKEA.

 

            E ike auanei na ano lahui a pau, e noho ana ma ke Aupuni Hawaii, mai na kane, wahine, a me na keiki; i loaa i na ma'i o kela a me keia ano, e naue mai i ko'u Keena hana, a na'u e hoopau aku i na ehaeha a ka ma'i maluna o oukou e na makamaka, he hiki ia'u ke lapaau i na ano ma'i a pau, ma'i iloko o ka opu, hu'i ke kino, aki iloko o ka iwi, eha o ke poo, ma'iwahine a pela aku. Mai hoolohe aku e no hoa, hele mai hookahi, hele mai elua, hele mai no a pau loa; he oluolu ka auhau, ke hui me ia ma na kukai olelo ana; ua makaukau wau e pulama mai i na kono ana mai mai na Mokupuni mai, me ka eleu a me ka hikiwawe loa, he makamaka a he hoaloha maikai no oukou e na Hawaii.

Owou iho no,

DR. LEONG KENG PONG.

Helu 40, Huina o na alanui Kamika me Hotele, HOnolulu, Oahu. Aug. 31.  1y.

 

Hale Hana Wai Momona

WAI-ANIANI

Sam. Lad me John Grace na Ona.

 

            Ka poe wale no na lakou e hana nei NA WAI HOOMAEMAE KOKO KAULANA oia hoi ka SASEPARILA

A ME KA

WAI-HAO

NA WAI MOMONA AWAPUHI, SASEPARELA, LEMI, WAI PIPII, SODAMAOLI, SIDA, KAMEPANA, &c.

Mutual @0 - TELEPONA @

 

KUAI HOOPAU NUI.

 

Mai keia manawa aku a hiki i ko Makou hoonee ana aku iloko o ko makou

HALEKUAI HOU

Ma ke Alanui Papu, –(NA HALE BURUA.

 

E hoolilo aku ana Makou i ko makou waiwai a pau o na ano Lole:

NA LOLE NANI,

NA LOLE I HUMUIA,

KAPU A ME PAPALE,

PAHU LOLE, a pela aku

No na Uku Hooemi Loa Nae.

Egan & Gunn.

ALANUI MOI kokoke i ke ALANUI PAPU.  tf–d.

 

Poino i ka Wai!

POINO I KA WAI!

 

            E hoomaka ana keia mawaena o keia la a me ka Poalua a hiki mai o keia pule ae, me ka nana ole ia o na lilo.

N.A. SACHS.

263–dtf.  Honolulu.

 

HOOLAHA HOU

B. F. Ehlers & Co.–PAINAPA

HELU 99 Alanul Papu.

 

            IA OUKOU E NA MAKAMAKA A ME NA HOALOHA, OIAI HOI, UA makaukau makou i ke kuai hoopoho aku i na lole o na Wahine, Kane, a me na Kamalii, oiai, e hoi mai ana o B. F. EHLERS me na lole hou ma keia moku mai a oia ke kumu o ko makou kuai hoopoho ana, i kaawale ai na wahi no na LOLE HOU.

            E kipa mai e na makamaka, i hoopau ia ai ko oukou kanalua no ka makou kuai hoopoho aku ia oukou. Owau me ka oiaio,

            tf  B.F. EHLERS & CO.

 

He Kuai Nui Hoopau aku.

E HOOMAKA ANA I KEIA

POAONO, AUGATE 1, 1891.

 

Ua Lilo ko makou Waiwai he mea Mohai wale!

Ua Hoemiia ke Kumukuai ilalo, aole i ko Makou Pono, aka nou no–

Papa Kumukuai no 30 La wale no:

200 paa lihilihi keokeo puka aniani......................................$   .90

20 i-a Kalakoa maikai...........................................................  1.@0

12 keokeo 1 i-a laula.............................................................  1.00

8 keokeo 1 i-a laula...............................................................  1.00

139 kakini lakeke o na Kamalii (huluhulu  ...........................    .45

93 kakini ka'e waihooluu o na wahine..................................    .05

Huluhulu no na paa lole kupono, .25 keneta o ka i-a, e kuai no makou i keia

            mau la no 7 i-a no......................................................  1.00

Papale Kula o na Kamalii......................................................    .35

Na Kawele nunui, 2 no.........................................................    .25                                 

Kakini eleele maikai..............................................................    .25

Na Papale i kahiko maikai ia.................................................  2.50

RUMI HANA LOLE MALUNA, HOLOKU etc., HANA IA ME KA OLUOLU LOA. E HOOPAA AKU NO MAKOU NO NA KUMUKUAI MALUNA NO 30 LA. NO KE DALA KUIKE WALE NO KEIA KUAI ANA.

C. J. Fishel.

            Ka maka@ o na Hale lako o na Wahine, oia hoi ma alanui Papu a me Hotele, kahi i hanau ia ai na  k@ hoo@ a ano @ no hoi.