Ka Leo o ka Lahui, Volume II, Number 412, 17 March 1892 — NU HOU KULOKO. [ARTICLE]

NU HOU KULOKO.

O ka la hanau keia o Kamehameha III ka Lokomaikai. Mai poina e ka poe puni heihei waapa i ka hoomaalo aku ma ka Iahamauleo i keia la. Nui na kudala a Mokana i malama ai ma keia pule. Nuinui laki Kimo. O ka Poaono ae nei ka la e kudala ia ai ka hale hana hao Union, makai ae nei o Huehue. Aohe kula a na kamalii o keia la no ka mea, e pau nui ana i ka holo kaa ahi ilalo o Ewa. I keia po ka Hula Europa ma Halealii. Niniu poahi ana ka'u lehua I ka ai kikoni a na manu. E holo aku ana no na Aina Hikina ka Mea Hanohano L. A. Kakina ma ka mokuahi Australia o ka la 29 o keia mahina. Iluna o ka puu o Puowaina kekahi poe lede me na Keonimana kahi i hoohala ai i keia mau po mahina lailai. Maluna lakou o na lio kahi i kiliopu ai. Eia ke hoakea ia nei ke Alanui Moiwahine ma o ka ae ana mai o W. L. Wilikoki i haawi i kekahi lihi o kona pa, a e lilo aku ana ia i alahele maemae. Imua e Hawaii. Aohe hana o na hale oihana Aupuni o keia la, a me kekahi mau hale kalepa o keia kulanakauhale no ka pau loa ilalo o Ewa i ka heihei waa me Kaahupahau.

I ka la apopo e kaihalulu mai ai Mahimahi o Kona kai opua i ka lai, i ke awa lai o Kou nei me na hua alani momona a kekahi o ko makou mau limahana. Ua hiki no. Ono ka pu-u! Ma Wailuku, Maui, ua niau palanehe aku la ka uhane o ke kaikamahine hiapo a ka Lunakanawai Kaapuni Geo. E. Richardson. Ua piha i keia opio he ehiku makahiki o kona hanu ana i na ea o keia ao inoa a kuu aku la kona luhi no kela ao ma o. Minamina wale ia opio o ka lahui. Me na makua i hoonele ia i ke kama ole ko KA LEO upu ana. Mamina wale. Ua ike ia aku la kekahi moku ano e e pokakaa hele ana mawaho ae Leahi i kela po aku nei, a ma ka hoike a ko makou kilo, ua ike a ahuwale ka na hiona o kela moku iaia, oiai hoi kona imi ana ka i kahi maikai ana e hoopae mai ai i kana hana makamae iuka nei o ka aina. Akamai no hoi keia wahi kaaka la i ke kilo ana i na ouli.