Ka Leo o ka Lahui, Volume II, Number 643, 16 February 1893 — Page 1
| This text was transcribed by: | Rosemary Mccune |
| This work is dedicated to: | Kaelene Ahu Rey |
KA LEO O KA LAHUI.
"E Mau ke Ea o ka Aina i ka Pono."
=================================================================================================
Buke II. HONOLULU FEBRUARI 16, 1893. Helu 643
=================================================================================================
HE MOOLELO KAILI PUUWAI
-NO-
SENIA LUTERA
-
Ka Ui Puuwai Mabala
-:O:-
ENELANI KAHIKO.
-
A I OI E
He Nanea Hooheno no kekahi Kauna Wahine Opio me kana mau Aloha Ekolu.
(Kakauia no Ka Leo)
-
MOKUNA XXVIII.
-
Ua makemake au e hoike aku ia oe @ ke kaikamahine a'u i aloha ai, e ke 'liiwahine - ua like oia me oe, aka nae, ua ano like aku kona nani me na kukuna olino o ka la, a ooe hoi, me ka hau aiai e kalii ana iluna o ka piko o na Kauna Alepa.
-
Oiai keia mau noonoo e noke hala ole ana iloko ona, aia hoi poha hou mai la ka leo @meni o ke alii Codona e haehae ana ia mau hora hakanu o ke kuluaumoe.
Ua haawi malie ai la ua ui @ei i kekahi mau leo pule i @ mana lani no ka hoomaha @ mai iaia, ia manawa o ka ukipuni i ke aloha, iwaena o @ pua rose e popohe ae ana malalo o na kapuai wawae o ka mea ana i aloha ai.
Aka, aole na lani i hoolohe mai i kaa mau leo uwalo, nolaila, hoolohe malie aku la oia i ka hone mai o ka leo o kana aliikane, e haehae ana i ka lewa nuu me kona leo hoopalili, i@ wa pu no hoi i pa pono mai ai na lalani hapa hope o ke mele a ua Codoua nei, i ka pepeiao o ua nohea nei, a oia iho keia:
"Aia a make oe e ka nani o na pua
Alaila pau na hoehaeha o keia ao:"
He oiaio wahi ana i hawanawana malie iho ai, he oiaio kela mau lalani mele a ke 'lii a o ka'u no hoi ia i pule iho nei, aole nae hoi i hooko ia, me he la ua ike mua no o Coflona i na mea a pau iloko o o ko'u puuwai, no ka mea e mau ana oia i kela mele i na manawa a pau me he moolelo ala ke kuawili; aka, e ike ana oe i ka hopena awahua o kau mau hana lapuwale, a e uu iho no auanei oe i ko ihu ke ahai aku ke kaikamahine o ka Lele me uwahi.
Ma keia wahi e ou mau hoa uhaiaholo o keia mooleolo, ua pauaho mai keia mokuna ia kakou, nolaila e kau nui aku kakou no kona hope mai.
MOKUNA XXVIII.
-
Ua aloha au ia oe! He oiaio ua aloha au a oi aku mamua o ko'u ola ponoi iho
_
Ua hala aku la ke kau o ka makalii, a ua hoea mai la ke kau o ke kupulau, aka, he oia mau no ke aloha pilipaa i kakia kuinao ia mawaena o na hoaloha elua, 'lii Codona a me Sir Laionela, a e kipa ma aku ana no hoi oia ma ko laua kakela i na manawa a pau, e hoohala ai i kekahi mau la.
Ina manawa a pau ana e hele aku ai no ka ike ana ia laua, e hele hookahi mai ana oia aole ona koolua, e kohu ai ke kauna ana i na hora loloa o ke kupulau, aole no hoi oia e hoopuka iki ana i ka inoa o kekahi mea e ae koe wale no ka haku Lutera, e hoohala wikiwiki ana i kona mau la kahanu a me ke kaumaha.
A ua nhi ia kona poo a kuakea me na oho keokeo o ke kanikoo, a he okoa loa hoi kona kulana ke ike aku, aole hoi e like me na la oiai kana kamalei me ia.
No kahi wa aku.
===========================================================
HE NANEA KAMAHAO
-NO-
MAIKA
-
KE KEIKI
Hapa Ilikini a Hawaii hoi.
-
KE KANAKA MUA LOA NANA I PANA KE AKUA BEA A NA ILIKINI I MAKA'U LOA AI - A O KA
WELI HOI O NA ILIKEOKEO - A ME KALUKU IA ANA O KELA HUI KEAKA A LI.
-
Hiu a wela, lawe a lilo, ke keiki Hapa Ilikini,
elua i ka manawa hookahi, na hana powa,
a me ka make ana o na hoahanau
Conegokena, ka mare ana
o Maika a me na hana
hoomainoino.
-
Ua like ke keokeo o kona lauoho, me ka hau o ka piko o Maunakea, a e aahu ana oia me ka aahu o ka oihana makai, a o kona papale e waiho ana iluna o ka papahele.
E kuuwelu ana kona lauoho nani ma kela a me keia aoao ona me ka hiehiena nui, oiai kona kino e lele ana i o a ia nei, no ka hoopakele ana ae iaia mai na lima kakauha aku o kona mau enemi, e iho makawalu ana ma na aoao a pau o kona oiwi kino kilakila.
Aka, oia mau make he nui e iho makawalu mai ana imua o ke alo o ua opio nei, ua like ia me ka ole, no ka mea, ua hehikehi kulana iho la ua keiki nei i ka ohuku ale, a i ka wa ana e waiho aku ai i na ai aiwaiwa o ka ikaika hoohana o kona limahema aia hoi e lohe ia aku ana na leo; auwe, o kona poe enemi.
I kekahi manawam, ua kii pa-ha ae oia i kona mau enemi, oia hoi ka manana a ua opio nei e hoohana pa-lua ai i kona ma lima.
I ka hala ana ae he hapalua hora mahope iho oia manawa, ua ike aku la o kapena Sula ma i ka emi mai o na ikaika hoohana o ua hoa nei o lakou, mahope
iho o kona lanakila ana maluna o kona mau enemi he elima, a koe he elima e paio ana me ia ia manawa.
Ia manawa i kii aku ai o kapena Sula a hookaawale ae la i ko lakou hoaloa mai kona ma enemi mai, me ka i ana aku o Kapena Sula a hookaawale ae la i ko lakou hoaloha mnai kona ma enemi mai, me ka i ana kau o Kapena Sula ia lakou:
Uoki, e na hoaloha, mai hana oukou i nahana ino maluna ona; no ka mea, he kanaka ia no ke aupuni.
Uoki koke kou waha e na lapuwale, o make koke oe ia makou i keia manawa, lohe aku la ko eeiao huluhulu, wahi a ua poe nei i hooho mai ai ma ka lokahi.
Me ka ui ole aku i kona mau hoa no ke kokua ana mai iaia, ua lele aku oia maluna o ka mea nana i luai maopopo mai na huaolelo maluna ae, a haawi aka la i kekahi o kana mau puupuu aiwaiwa, nana i hoouna aku iaia iluna o ka papahele, me kona aho e ailiill ana iloko ona.
I kona pahu ana ilalo, ua lalau io la ua kapena nei ma na wawae a hapai ae la i ke kino o kona enemi iluna, a me ia kino kanaka hoomaka aku la oia e uhau i ke koena o kona mau enemi i koe iho, a i ka hala ana he hapaha hora mahope iho, aia hoi ua pau loa iho la ke koena o na enemi i ka luku ia, a o ke kino kanaka e paa ana, he oia ma no aia mai ke poo a na wawae, koe wale iho no he elua mau niho i haalele mai i ko laua mau pili, ua hoomoe malie iho la o kapena Sula i ke kino make o kona kokua iluna o ka papahele.
Aole i pau.
==========================================
E ka Lahui e!
---o-o-o---
E Ka Lahui Hoi!
-
E KA LAHUI ALOHA O HAWAII!
-
Eia ko oukou LEO la! KA LEO O KA LAHUI!
-
He nupepa keia e kokua ana i ko oukou ma pono pili paa mai na kupuna mai, a mai ka po mai, ka pono hoi o ko kakou aina, a me ko kakou Noho Moi.
He nupepa keia e hoike ana i na mea ano hou loa, o ko kakou mau Paemoku a me na nuhou ano nui o na Aina E mai; Ma keia nupepa no, e ike ponoia ai na mea ano nui loa, e pili ana i na hana a na Komisina elua i holo aku nei no Wasinetona.
Oiai, aia aku nei ko kakou makamaka kakau nupepa noeau i Wasinetona, me ke Komisina Alii; oia o Hon. J. E. Bush, ke kolopa uneune o ka Moana Pakipika; alaila, o na lono oiaio loa a pau, no na mea e hanaia ana me Wasinetona, e hoouna pololei ia mai ana ia i ko kakou nupepa, ma keia mua iho.
Oiai, no ka pono o ko kakou aina wale no ko kakou lahui a me ko kakou Moi, ko Mr. Bush hele ana aku nei; a aole no ke kumakaia ana aku; alaila, e hooikaika pu ana oia me ke Keikialii Kawananakoa a me Mr. Numana; e loaa a e hoihoi hou ia mai kou mau pono oikelakela e Hawaii.
-
Ke haawi aku ne KA LEO O KA LAHUI i na hoomaikai ana he nui loa; ku ka paila hana ka haawe; no na makamaka a pau loa e hoouna mai ana i na mea hou ia makou.
A pela pu no hoi me na poe a pau loa i pahola mai iko lakou mau lima kokua no ke ola makamae o ka kakou nupepa, ka ahailono o ka lamaku iloko ona home aloha o Hawaii.
-------------------------------------------------------------
HUI ALAHAO A ME AINA O OAHU.
Papa Manawa
Mai a Mahope o Okatoba 1, 1892.
NA KAA
*
AM AM PM PM
Haalele ia Honolulu 6:15* 8:45 1:45 4:35+
Hoea i Honouliuli 7:20* 9:57 2:57 5:35+
Heaiele ia " 7:30* 10:13 3:45 5:42+
Hoea i Honolulu 8:35* 11:55 4:55 6:50+
NO KULANAKAUHAE MOMI IHO.
Haalele ia Honolulu 5:10|| P.M.
Hiki i Kulanakauhale Momi 5:48||
Haalele ia " " 6:55* A.M.
+ Poaono wale no
* Koe ka Lapule
|| Koe ka Poaono
Sept. 28 tf-dly.
-------------------------------------------------------------