Ka Leo o ka Lahui, Volume II, Number 652, 1 March 1893 — KA MOOLELO O HIIAKAIKAPOLIOPELE. [ARTICLE]

KA MOOLELO O HIIAKAIKAPOLIOPELE.

I HOOPONOPONOIA MAI KA POE KAHIKO MAI A ME KA POE I HOOPAA I NA MOOLELO A ME NA KAAO KAHIKO O HAWAII NEI.

A pau ia kahea ana aia nei, i mai la laua la, penei, kahaha! aole paha o ka maua ke haawi aku nau o kau ke haawi mai na maua, alaila hele ae olua maluna o ka maua alanui aole paha e loaa wale aku ka maua ia oe. Alaila, nonoi hou no keia ia laua i ka ia ma ke mele penei: Kahulihuli—e Ka papa o Wailuku He ole Kekaha Kuai i'a—e Homai ka ia Homai ana hoi ka i'a I aina aku hoi—e A pau ia noi ana a ia nei, hoole hou mai la no laua la e like me mamua; o ko ia nei nonoi hou aku la no ia ma ke mele penei: Kahulihuli—e Ka papa o Wailuku He ole Kekaha Kuai paakai—e Homai ana hoi ka paakai I aina aku hoi—e O ka laua nei hana no ia o ka hoole manawaino mai, me ka i pu mai no hoi i ka huaolelo o ka nele: Aole e loaa ia oe ke alanui, aia wale no a haawi mai i ka uku ia maua. Ike no keia i ko ia nei nele nonoi hou no keia ma ke mele penei: Kahulihuli~e Ka papa o Wailuku He ole Kekaha kuai ko ! He ole Kekaha Kuai ko—e Homai ke ko I aina ae hoi—e Hoole hou mai la no laua la, noi hou aku la no keia:

Kahulihuli—e Ka papa o Wailuku He ole Kekaha Kuai kapa—e Homai ke kapa I aahu ia aku hoi —e Hoole hou mai la no laua la, ooi hou aku la no keia ma ke mele penei; Kahulihuli—e Ka papa o Wailuku He ole Kekaha Kuai wai—e Homai ka wai Homai ka wai hoi—e I inu ia aku hoi—e I ka pau ana o keia mele a Hiiakaikapoliopele, olelo aku la keia i kanaka e noho ana e nana i ke kuai o lakou nei i ke alanui, i aku la keia; ka! ina paha o keia noi ana aku nei a'u ia laua la a he mau kanaka, haawi mai la; aole hoi e hihi o ke noi ana o na akua, aohe wahi mea a maliu mai, Ninau koke mai la ua poe kanaka nei: ka ! he mau akua anei kela mau kanaka? Ae, aku la o Hiiakaikapoliopele, me ka i ana aku: he mau akua laua la. Mamuli o keia ae ana aku a ia nei, ua hoopaapaa iho la oia me ka nui o kanaka, no ka mea, aole hookahi o lakou i maopopo. he mau akua keia mau kanaka; hoi iho no hoi, aole lakou i ike o Hiiakaikapoliopele ko lakou hoa papa olelo.

Ua pane hou aku la keia ia lakou: he oiaio ka'u e hahai aku nei ia oukou: he mau akua laua la, he mau moo; ina au e kii ae ana, he ike ae no oukou i holo o laua la. Iloko o keia mau hoakaka a ia nei, aohe wahi mea a maliu iki ia mai; aka, ua pakela oi loa ae la ko lakou hoopaapaa mai, me ka i pu mai ia ia nei e pili; ua ae aku la keia. Ua ninau hou mai la ua poe nei, heaha kau kumu pili i manao ai? O ke aha auanei ua kumu pili a kamahele, hookahi wale no paha o na iwi, wahi a Hiiakaikapoliopele. Ua kukui aku keia lono a lohe ke alii aimoku, o kona pane koke ae la no ia.