Ka Leo o ka Lahui, Volume II, Number 723, 11 July 1893 — UA HALA, UA NALO [ARTICLE]

UA HALA, UA NALO

Hora 9. a.m., July 9, 1893, ua kipa ae la ka anela o ka make i ka hale kino lepo o Mrs. Puapua, a kaili aku la i ka hanu o ke ola mai iaia aku; ma Honuakaha oia a hala aku la.

Ua hoea mai oia mai ka puhaka mai o Kekoi a me Hoopale, i ka makahiki 1827, a ua piha iaia na makahiki he 65 a oi o ka hanu ana i na ea mauleule o keia ola ana. Ua waiho iho oia he mau keiki na moopuna, ka ohana ke kini, a me ka lehulehu e paiauma aku nona ma keia kae o ka luakupapau No Holualoa I, i Kona, kona one hanau, a oia ka makou e hoike aku nei i ka lono walohia luuluu kaumaha, ehaeha a paumako, e ka Lai Malino a Ehu, ua hala o Mrs. Puapua, ua pau kona ike ana i kou mau kapakai aloha, na kualono uliuli, na Hala o Mapuena, auwe luuluu ino, ehaeha wale. Nolaila, ma ka aoao o ka ohana, ka lehulehu a me na kioi no apau o ka mea i moe aku la i ka moe Kau a Hooili, ua kuu ka luhi, ua pau na inea. E na kini o ka mea i hala aku, O ka la o ka Haku me he aihue ala oia i ka po. E hoomaikai ia ka inoa o Iehova mana i haawi mai, nana no e lawe aku. I ka hora 2, ua manelo ia aku oia no kona hale lua. E alawa ae i ka olelo hoolaha a ka Hui Hololio Poomaikelani e pu ka aku nei ma ko kakou pepa o keia la. E hoomau ia aku ana anei ka hapa ana o ka Hae Aupuni, no na la he 15 a i ole 30 paha, oiai ke hapa mai nei no? Aia i Wainiha Kauai o Kimo Kauhane a me 8-l a no ka hopu ana i na mai alii ma na apana, o ua aina kaulana ala. Nui na mea hou a me na hana lealea i malama ia ma na Waiehu Maui, pela no ma Hilo Hawaii. Me he la ua oi aku ke ohohie ia o keia la ma kela mau wahi mamua o Honolulu nei. Ua hoowahawaha ia na hana o ka la mamuli o ka hoihoi ole ia o na hana a ka poe hoohui aina.