Ka Makaainana, Volume III, Number 3, 3 May 1888 — Page 2

KA MAKAAINANA.
HE NUPEPA PUKA LA.
F.J. TESTA, (Hoke).
Luna Hoopuka a Luna Hooponopono.

            E hoopuka ia ana i kela a me keia La, mai ka Poakahi a Poaono, no ka hapaha dala o ka pule ma ke kuike. No ke kope he elima keneta.
            E hookaa ia na dala a paa i ka Luna Hoopuka a Luna Hooponopono, a ma kona inoa no hoi e hoouna ia mai ai na kauoha a me na palapala o na ano a pau.
            Keena Hana:--Alanui Moi, mauka iho o ka Halewai Kahiko.

POAHA, MEI 3, 1888.

            HE MAU MAHAHIKI pokole aenei i hala ua kalahea nui ae ka poai e noho mana nei maluna o na hopena o keia aina no ka inoino a maikai ole o ke dala Kalakaua a me dala pepa. Aupuni, aka, iloko o keia mau la, ua nalo a ua meha loa ia mau leo hauwalaau. Ua nui mai nei ke dala gula Amerika iloko nei o ka aina, a ua oi aku ia makemake ia o na dala pepa Aupuni, no ka mea, he mama ma ka lawe ana. Nui no hoi na apiki o keia poe.

            UA HULI HOI mai nei i ka aina nei o James Lowell, kekahi o na opio Hawaii i hoouna ia e ke Aupuni no ka hoonaauao ana ma ka hana lima ma Galasagao, Sekotia. O keia kekahi o na hua a ke au hooponopono Aupuni ma ke ala o ka maemae a ai pakiko ana, o ke kikoo aku i na opio a pau a ke au hooponopono Aupuni mamua aku i hoouna ai. A i ka hana ana a hoomaopopo iho, ua ike ia he lili a he nonohua maoli no ko na poe alakai o keia au. Me he la, o na mea a pau i hana ia mamua aku o keia au a lakou la e paikano nui mai nei, ua inoino, ua ekaeka a ua pilau loa, a o ka maemae (?) wale no ko keia au. Eia no paha ka lehulehu ke hoomanao nei, aole no i loihi loa aenei na mahina i hala aku a iloko no hoi o keia au vaniki, ua hoouna aku na Kuhina i kekahi opio Hawaii malalo ona, ilo o ke Aupuni no ka hoonaauao ana iaia ma Amelika Huipuia. A nolaila, heaha la ke ano a me ka like o keia mau loina a i elua. o keia ninau, ke nana a ke hoomaopopo lea iho ka lahui--o ke kauoha aku e huli hoi mai a me ka hoouna hou aku no i na aina e. Nani wale (?) na hana a keia poe Kuhina. O ke alanui paha ia la e hele la i ka maemae iloko o ka ai pakiko ana o keia au, a nani no hoi ka ai pakiko ana iloko o ka maemae launa ole o ka vaniki. Aole loa i akenui ia ka hoonaauao ana ia Hawaii opio ma na ike o na aina mamao, a o ka hoomau no ia kakou iloko o ka poopoo iole e pee ai oia ka mea i iini nui ia.

KE KILOKILO.
He Mau Hoike'na no na Ouli Pahaohao,
Mai na Ouli Maikai a me na Oali Ino o ke Kanaka mamuli o na Hoailona o ke Zodiac.

            IULAI. O Liona kona hoailona. I keia malama o Iulai komo iho la ka hoailona o ke Zodiaka, oia hoi o "Liona" (Leo or Lion) a na keia mau hoailona e hoomalu nei i keia mau wahi: Farani, Italia, Bohemia, Sikili, Roma, Bath, Berisetola, Faunetona, Potemuta, Ceremona, na mauna Alepa, Apulia, Ravena, Piladelepia, Kaladea a hiki i Basora.
            O ke kanaka i hanauia i keia malama, eia kona mau ouli ; He kanaka huhu, he alunu, he kuoonoono ole, he ake hoopaapaa a me ka hakaka me kona mau hoalauna, a e komo mau ana iloko o na aha hookolokolo.He kanaka hoolala hana me ka manao e hookoia kona makemake, eia nae, aole no e hookoia. Ke mare ia oia, aole no oia e kupaa ana mamuli o ka wahine hookahi, he kane maua oia i kana wahine, a he makuakane hoohemahema wale i kana mau keiki.
            O ka wahine hanauia iloko o keia malama, eia na ouli: He wahine nunuha, he huhu a he ake hakaka, he wahine imihala i kona hoa'loha. He makuahine ino oin, aohe malama i kana mau keiki, a he wahine lapuwale hoi. E komo mau ana oia iloko o na pilikia he nui, ae pono ana no oia iaia iho.
            AUGATE. O Wahine puupaa kona hoailona. O ka hoailona o ke Zodiaka i komo iloko o ka malama o Augate oia no o "Wahine-puupaa" (Virgo or Virgin) a nana hoi e hoomalu nei i keia mau aina: Tureke, Mesopotemia, mai Tigirisa a Euperate, Ierusalema, Kanedia, Silesia, Koretia, Bagade, Babelonia, Tesali, Korineto, Morea, Parisa, Liona, Tulusa, Basila, Helevetia, Ridina a me na Paemoku o Inia Komohana.

            O ke kanaka i hanauia i keia malama: He kanaka makau wale, he ano hopohopo, aka, aole nae he kanaka hohe wale;lie hoopono ma kana mau hana me ke akahele. He ake nui ole i ke kamailio, he oluolu a me ke akahai, a he ano keonimana ma kona kulana, he ko a me ka holopono kana mau hana. He kanaka aloha wahine oia, he kane oluolu, a he makuakane maikai.
            O ka wahine i hanauia loko o keia malama. He wahine hana pololei a me ka hoopono, he lokomaikai, he ake nui ma ka hoomaemae ma kona kino iho, he manaopaa, he oluolu ma ke kamailio ana. He wahine aloha oiaio oia i kana kane, he makuahine oluolu a me ka malama i kana mau kieki, a he wahine manao hana.

            SEPATEMABA. O Ana-Kaupao na kona hoailona. Iloko o keia malama o Sepatemaba komo no ka hoailona o "Ana-Kaupaona" (Libra or Balance) a ke hoomalu nei ia i keia mau whai: Kina, Iapana, kekahi mau wahi o Inia e kokoke ana i Kina, Auseturia, Baketeriana, Usebeka, Aigupita luna, Liyonia, ke Kai Casepiana, Viena, Lisebona, Anatewepa, Faranakefota, Sepire a me Charleston.
            O ke kanaka i hanauia iloko o keia malama: He kanaka hana pololei, he manao e hana i na mea a pau me ke paewaewa ole, he hooko i kana naau hana a pau. He kanaka puni i na mea oiaio, a he enemi nona na mea e kue ana a me na mea pono ole. E loaa ana iaia he inoa hanohano a me ke'kiekie, a he hoaloha oia no ka poe maikai. I kona wa e kau ai i ke kulana kiekie, e ike ana no oia i kona mau hoa o ka noho ilihune pu ana, a he kokua hoi ia lakou. He ano akahai a me ka noho malie, he enemi nona na hana hewa. He kane make wahine oia, a he makuakane aloha keiki.
            O ka wahine e hanauia iloko o keia malama: He wahine akamai me ka malama ana i kona inoa maikai, he hiaai ole i na hana lealea, he hanohano ma kona nanaina, he hoalauna oluolu, he hoa kakele olelo akamai me ka noiau, he nui kona aloha ia e kona mau hoaloha. O ka hana i na mea e oluolu , ai ka manao o kana kane o kona pulakaumaka no ia. He wahine hoolohe a me ka malama i kana kane, a he makuahine malama keiki me ka makamae.

NA AINA MAMAO.
Ka Hooneeu Pualikaua a Rusia.

            Ua lono ia aia o Rusia ke unuhi la i kona mau pualikoa mai na palena komohana, o ka aina mamuli o ke ano noho malie a liuliu ole ae o Geremania a me Auseturia, aka, ua hoole loa ia ae ma Ladana, Aperila 20. Ua hoike ia ae mai na wahi e hiki ai ke hilinai la ua hoomaka hou o Rusia i ka hooneeu ana i kona pualikoa me ka awiwi a ka launa ole mai a aia ma na palena, o Ausefuria ka hapanui o keia mau hooneeu awiwi a hooikaika ana a Rusia.
Ko Kenerala Bulanagere Ohohia Ia.
            Mahope iho o ka hoopanee ana o ka Ahaolelo ma Parisa, Aperila 19, ua huli hoi aku o Bulanagere no kona hotele maluna o kekahi kaa hamama, a malaila i halawai mai ai me ia na hooho hauoli ana a 60,000 kileo. Ua maluhia na mea a pau. He mea hiki ole ke hoole ia keia mau hoike'na o ke ohohia ia o ua Kenerala kaulana la; ua kiola aka na ledo i na pua rose iloko o kona kaa. Ua panai na ai ke Kenerala i kona aloha a me kona mahalo i na lede, ma ka lalau ana i na pua a kaomi iho la ma koha puuwai, he hoike hoi no kona makee a mahalo nui.
            Ua hoomau ia no na uluaoa ohohia ia o Bulanagere i ka waenakonu po, a oi loa aku nae mawaho pono iho o ke keena o kekahi nupepa kokua ia Bulanagere. He lehulehu na poe i hpouia e na makai, aka; ua pau nui no i ka hookuu hou ia. Ma ka manao nao o na nupepa lehulehu o Parisa ua ano lauwili a lolelua ke koho ana o ka Ahaolelo ma ka la 19, oiai, ua koho mua e hilinai ana i ka Aha Kuhina, a mahope ua koho ma ka aoao kokua i ka hana koke ia o ka hoololi o ke Kumukanawai, me ke kapae ia o ke noi hoopanee i ka noonoo ana a ke Kuhina Nui.
            Ma ia ahiahi iho ua akoakoa ae he 1500 mau haumana ma ke alo iho o kekahi hotele e uwa nui ana "Ilalo me Bulanagere!" "Ilalo me ka mea alunu mana!" a pela aku. Ua ulu koke ae he uluaoa haunaele mawaena o lakou a me na poe mahope o Bulanagere, a ua lehulehu no na poe i eha. A mahope ua hookaawale ia na aoao paio a i elua e na makai.
Kela a me Keia.
            Ua kono aku ka Moiwahine Vitoria i ka Moi a me ka Moiwahine o Italia e hoea ae ma Kakela Winesoa iloko o Iune, a ua ae mai laua i ke kono.
            Ua olelo hou ia ae ma Ladana, Aperila 18, e holo hoi aku ana ke Duke o Malaboro no Amerika Huipuia, a malaila oia i manao ia ai e mare ana me kekahi wahine kanemake waiwai.
            Ua hoike aku o Haku Salisebure ko Geremania Keena o ko na Aina E aohe apono a makemake o ka Moiwahine Vitoria i ka hoohui mare i mahao ia mawaena o Kama'liiwahine Vitoria me Kama'lii Alekanedero. Me na manao paakiki o kekahi poe ua hoike ia ae na ke Duke Dino i hoolako ia Kenerala Bulanagere me ke dala i hiki ai iaia ke holo balota no ka Mahele Koho o ka Noada. Ua olelo ae nae o Bulanagere o ka hapanui o na palapala e loaa ana iaia, e hoike aku ana no ka makaukau e haawi a e hoolako aku iaia me ke dala.