Ka Makaainana, Volume I, Number 6, 5 February 1894 — Page 1

Ka Makaainana.
BUKE I----Ano Hou. Honolulu, Oahu, Feberuari 5, 1894. HELU 6

NA LONO HAWAII HOU.

                Ma ka moku kiapa Ala beta o kakahiaka Poaono nei, he 13 la mai Kapalakiko, ua loaa mai he mau lono no ka la 20 nei o Ianuari, oia hoi, he hookahi la mawaho ae o na mea i loaa mua mai.
            Ua hoolahaia ae a pau loa na palapala i kukaiia mawaena o Kuhina Wilisi a me Peresidena Dole i na la hope o Dekemaba, 1893, a me na la mua o Ianuari, 1894. Ma kekahi o na palapala a Dole, ua pakike a pane kikaho okoa maoli aku no oia ia Peresidena Kalivilana. Imua o ka Hale Ahaolelo Makaainana, i ka wa i heluheluia ai ka palapala a ka Peresidena, i ukaliia e na kukai palapala i hoikeia maluna ae, ua huro ae na Repubalika i ka Dole mau palapala, a o na Demokarata hoi i ka Wilisi. Aohe no nae hoi e nele ana, ke hala ae he mau la, e mimihi hou ana no na Repubalika, ke makee nui nae hoi lakou i ka hanohano o ko lakou aina, a oia ka oi ae mamua o na hooho leo nui wale iho no no ka hoohaahaaia a kuhaia aku o ko lakou Aupuni ma ke ano hana wale aku no.
            Ua hoikeia ae ma ka ahaaina pili oihana a ka Pe residena i haawi ai ma ka la 18 aku, aohe i konoia o Palani Hesekina (F. P. Hastings), kekahi o na hunona a Kapena Ki a kakauolelo hoi a ke Kuhina Hawaii malaila. Aole i maopopo ke kumu, eia nae, ua hoolahaia ae kona inoa ma ka papainoa o na poe i hiki aku. Malia ua poinaia a ua ike ole ia no. A ma ka la 20 no hoi i hoea aku ai o L. A. Kakina i Wasinetona.
            Imua o kela Komi te Aha Senate o Kiwini kahi i huai aku ai i kona ike, a ua ae aku hoi he koo oia no ka manao hoohuiaina. Ma ka la 16 aku, imua no o ka Aha Senate, ua ulu ae he paio hahana no hapalua hora paha, a ma ia paio ana, ua olelo ae o Hoa aohe kuleana o ka Moi e ae i ka huikala ana, me ka heluhelu ae hoi mai ke Kumukanawai Hawaii, a aole ia he mana kaokoa no ka Moi, eia nae, ua hiki ke kala aku me ko ka Aha Kuhina ae pu aku.

            No Waiohinu, Kau, Hawaii, na lono malalo iho: He ahaaina ka na poe hoohuiaina o nei i ka la 20 nei (Ianuari), a ua moa kolekole ka puaa. Ua kakau aku no hoi o Hon. J. N. Kapahu i kona inoa no ka hoohui ana i kona one hanau nei me Amerika. Pehea hoi keia e ka Box, Case, Barrel a me ka Hogshead!

Pau Elua i ka La Makani.

                Oia ka mea i ikeia i ka Poakolu i hala iho la. Ma ka hora 11 o ia awakea, ua hui ae o Mr. Paulo Numana me Heneri N. Kakela, lunahooponopono o ka Avalakaika, mawaho iho o ke alanui helewawae, mawaena o ka Halepai Kekake me ko Mr. Numana keena. Ia laua i hui ai, ua kuka olelo ae laua, kui aku ka loio a ua lele mai no hoi kela poo wiliwili maka-ha, ua keakea aku o Mr. W. H. Konuwela ia laua me ke pale aku ia Heneri, a ua iho aku ke kookoo o ka loio a pa ma ke poo a kahe ka waiula, a me he la, ua pa-kolu a pa-ha paha ka iho ana o ua kookoo la. O ke kumu, no ka hoolaha ana o kela makaaniani i kekahi manao i ka Poalua iho e pili ana ia Mr. Numana a me Mr. Kale Wilikini, e kapa okoa aku ana i kahi o laua i ka hoopunipuni. Ua makemake ole ka loio i keia ano paio pilikino me ka nupepa Avalakaika, nolaila, ua palapala aku e mihi akea ae. Aole i aeia mai, aka, ua ninau pono ia na olelo i kupono ole, a i ke kuhikuhi pono ia ana aku, aole oia i pane hou mai, aka, ua hoopuka hou ae he manao i kakahiaka Poakolu ae, e hooi loa mai ana no i ke ino no ka ino mua. O kela maluna ae ka hua no ia paakiki a hoomano. Aohe o Heneri i hoopii no kona hoehaia.
            Ia auwina la Poakolu no hoi, ua ulele ae no hoi o J. A. Makuna, loio, a me J. W. Lunina, mea ohi aie, maloko o ke keena o ka mea hope. Ua ulu ae hoi ia mamuli o kekahi nana mawaena o ua. I noi aku ka loio no kekahi palapala, ua hooleia mai, a i ke kulou ana iho o ka mea ohi aie i ke alo o kana pahuhao, ua kui aku ka loio iaia mahope aku o ka hono a-i a ua eha oia. Ua hoopiiia ka loio ia ahiahi no ka hoeha, a mai ka Poaono nei i hoopaneeia ai ka hookolokolo ana, imua o ka Aha Apana, a ka la apopo. O ke kumu pale a ka loio hoeha, ua hoao aku ka mea i hoehaia e ki aku iaia i ka pu, mamuli o kona lalau ana ae ma kona pakeke elemu.

            Nui ke anu o ka Aina Mauna o Hawaii i na la i hala iho la, pela mai nei kekahi makamaka ia makou, a ua kahe ae ka wai o kahawai. Eia nae hoi, o kahi mea hilu loa, na pilau na kahawai i na bipi make. Pilikia no ka hoi!

Ili ka Mokumahu C. R. Bishop.

                Ma ka Iwalani mai, i ka hora 8 o ke ahiahi Poakolu i hala iho la i ku mai ai mai Nawiliwili, Kauai, i loheia mai ai no ka ili ana o ka mokumahu C. R. Bihopa iluna o kohola akoakoa mawaena o Hanamaulu a me Nawiliwili. Oiai ka Bihopa e holo ana i ka hora 2 o ia wanaao, ua ili iho la oia ma kahi he ekolu mile mai ka aina mai me ka upu mua ole ia. No ka upu mua ole ia o keia pilikia, a mamua ae hoi o ka hiki ke hookaniia ka bele no kona kuemi hope aku, ua paa oia me ka naueue o na aoao a pau ma kahi o ekolu kapuai ka hohonu. He pouli loa ka po a he powehiwehiia loa ka ikeia aku o ka aina. Ua oehuehu ke kai i keia wa ona i ili ai me ka makani pu, a oia ke kumu i kau loa ai iluna o kohola. O na aoao keia, ua opa pu ia, ua poloke na kia a ua piha ka opu i ke kai. Malalo ka moku o ka hookele ana a ka malamamoku, R. A. Anaru, a ua auamo ae oia i na koikoi a pau no keia pilikia, oiai, ua haaleleia aku o Kapena Lekalea i hope, e waiho ana i ka mai. I ka ikeia ana iho aohe manaolana no ka hemo hou o ka moku ua hoounaia aku he lono ia Kapena Pilimana o ka Iwalani, ma Nawiliwili. Ua haawi aku ka Iwalani i na kokua ana i kona hoa, ua waiwai ole nae, a hooholoia e holo loa mai i Honolulu nei e hoike ai i na ona maanei no keia pilikia, a oia ka hoea ana mai i hoikeia maluna ae. A mahope iho o ka hue ana i na ukana, ua huli hoi hou aku i ka hora 11 ae no o ia po.
            I kakahiaka Poaono nei i ku mai ai ka Mikahala me na luna a me na luina o ka moku poino. Aohe manaolana i koe no ka hoopakele ana iaia. Mahope iho o ke kokua ana o ka Iwalani ua hooholoia e haalele aku iaia. Ua hookuuia he waapa a laweia he kaula i kula, a ma ia i hoopakeleia ai na ohua, oia na Misses Maraea a me Mole Buki, na kaikamahine a J. E. Buki, Miss Young (Iana) a me kona pokii a me na keiki lehulehu e ae. Ina e mau ka ino, alaila, aohe ana mea o ka Bihopa e koe iho; aka, ke emi iho la ke okaikai, alaila, e hoaoia no e hoopakele ae i ka ipuhao a me na mekini e ae a me na laau o ka moku. Aia ka hapanui o ke kino o ka moku iloko o ke kai, a o ka ihu ka i luna, he 25 paha kapuai. O ka hoomaemae koke ia ana iho nei no ia me na lilo nui. E hoounaia aku ana he kauoha e hana i moku hou ma kona makalua.

Ka Puali Puhiohe Lahui.

                O ka Poaha nei, Feberuari 1, ka la i piha ai ka makahiki hookahi o ka haalele like ana a me ke kipakuia ana o na keiki puhiohe Aupuni e ke Aupuni Kuikawa, no ka ae ole o ka hapanui e kakauinoa i ka hoohiki oihana. Ua haawi ae lakou he aha hoolaulea ia po ma ke kahua o ka Hotele Hawaii, a ua lehulehu no na poe i hele aku, ua 1,000 paha me ka nana ole ia ae o ka makani, ka ua, ke koekoe a me ke anu hui koni o ia po, o ka makahehi a me ka ona punihei no ka mea nui ma ko ka lahui aoao. Iloko o ia makahiki,
            "Ua lawa makou (lakou) i ka pohaku,
            I ka ai kamahao o ka aina,"
a owai la ka mea hiki ke hoole mai, oiai, ua hoomanawanui lakou mahope o ke Aliiaimoku a lakou a me ka lahui i makee ai. Aole loa lakou i makemake iki e hoi hope a e nanakee i ke Alii a lakou i aloha ai, nolaila, ua hoomanawanui no kahi poe o lakou i ka hele ma na hana lima hooikaika kino, makai o na uwapo, ma na kaa kikane, a ma na ano hana e ae e pa ai o ka lima. O ka makou hoi, e hoomau i ka hoomanawanui, mai pauaho koke, oiai, ua kokoke loa ma i ko kakou wa e aka haaloulou ai, a mamae na iwi aoao.
                Ua hoao hou ia ae nei no e loaa ka ae ana o lakou e holo i ka Hoikeike Hooilo-kuwaena ma Kapalakiko, ma o ke noi ana a T. W. Hopena, Agena o ka Hoikeike Hawaii a me ke Kii Ahi-Pele a Kakina ma, a aohe no i apoia ka maunu. E aho keia haawi mamua o na haawi mua, eia nae, aole i maopopo ko Kakina ma hopena o keia mua aku, e puka ana paha a e poho ana paha, a o ka aina no keia, noho iho. Ke hooikaika nei o Mr. E. C. Makapolena a me J. D. Sepekela e loaa ka ae o lakou e laweia lakou i Kapalakiko iloko o Aperila ae. E ahona ia mamua ae o Kakina ma, he hookauwa kuapaa okoa mai no kana i ola ai oia a me lakou ma ae.

Ua Hala i ke Ala Hoi ole mai.

                Ua hala aku i ke ala hoi ole mai ma Kalaupapa, i ka la 29 iho nei o Ianuari, ka bebe hou loa a Maria D. Waiwaiole, iloko o na malama pokole wale no o ka hanu ana i na ea o keia ao. He onawaliwali kona a ua hiki ole i ke akamai o ke kanaka ke hoopakele mai iaia mai ka hoi ana aku iloko o ka honua. Ua moe aku la oia i ka moe kau moe hooilo. Me ka makuahine ko makou kumakena pu ana. Aloha wale ia opuu makamae.
            Ma ka hora 9 o ka po Poaono nei, Feberuari 3, ua kuu mai la o Mr. J. Kaaepa i kona hanu ola ma Mana ae nei, a hele kohana aku la iloko o ka opu o ka honua. Ma ka hora 4 o ka auwina la onehinei i maneleia aku ai kona kino puanuanu no ka ilina o Makiki. Me ka ohana ko makou u pu ana.