Ka Makaainana, Volume II, Number 14, 1 October 1894 — Page 3

Ka Makaainana.

 

HE MOOLELO KAAO NO MONE TIKERO KA HOLOLIO I KA WA HOOILO KA UI MAALO I KE KUPULAU A O KE KEIKIALII HARE MATINE KE KIAHA OPAKA O NINEWA

 

MOKUNA XII.

 

Ke aloha o ka Ipo i ka Ipo—Hanini ka waimaka elo ka laau—Ka Ui Maalo i ka wa Kupulau iluna o Hagara—Ke kaoo o na poe me na medala kila no Arabia—Ka hoohui mare i ka wa Hooilo—Ike kumaka i ka nani o Mokuleia, aohe laula a koe aku.

 

            Ae, e ka mea heluhelu, o ua kanaka la e holo ana maluna o ka lio keokeo, oia no o Mone Tikero. He manawa polole wale no a nalo aku la oia iloko o na ululaau, a i kona huli hou ana mai i hope, ua hooholo malie iho la oia i kona lio, a oia ka wa i oi loa aku ai ka hooho houoli ana o na kanaka iaia,—

            "O Mone Tikero, ka Hololio i ka wa Hooilo ! Auwe ka nani e!!"

            Me keia mau leo walaau mai na kanaka ae i hoomau mai ai ua mea hololio @a i ka hele malie ana a hiki i ke komo ana iloko o ka puka pa o ka pa alii.

            A ia ua hololio la i komo aku ai iloko me ka hoohanohano ia mai e na laina koa, oia pu no ka wa i komo aku ai ke kahunapule Uzima mahope ona me kena ike ole ae, aka, o na kanaka aia lakou ke haawi la i na hoomaikai iaia. O ka oi loa aku no nae, o ka Holoho i ka wa Hooilo.

            I ka manawa i ike mai ai o Tumerenia i ka hua o kona puhaka e hele aku ana imua ona, oiai oia e nana mai ana maloko o ka puka aniani o kona halealii, ua puka mai la oia a ma ke anuu e luna loa o ke alapii i ku iho ai oia a apo aloha mai la i kana keiki o na la ui.

            Iloko o keia manawa a laua e hui aloha ana, oia no ka wa i ikeia aku ai kahi keiki kilokilo o Peresia e hele mai ana ma kekahi aoao o ka halealii a me ka leo nui oia i noke ae ai i ka akaaka me he wahi keiki pupule la, a oia ka Mone Tikero i ninau aku ai:

            "E Muhiana, heaha keia au e noke nei i ka akaaka leo nui ana?"

            "E hauoli wale ae ana no au i ka Hololio i ka wa Hooilo, no ka mea, eia oia imua i ke alo o kona makuahine," wahi a ua wahi keiki la i pane ae ai.

            "Alaila, heaha ka mea hiki i ka Hololio i ka wa Hooilo e hana aku ai nou?"

            "Hookahi wale no a'u mea e noi aku ai ia oe, a i noho aku oe ma kahi o kou makuahine, e hoomanao mai oe ia'u," wahi a ua wahi keiki la.

            "E Muhiana, ke kaulana, ma kahi a'u e hele ai, o oe pu no kekahi; a ma kahi a'u e ai ai, malaila mai no oe."

            Akaaka ae la ua wahi Muhiana nei me ka leo nui, a pane ae la:

            "Ma o Alahe la, ke akua o kou mau kupuna, e kukuli hoomaikai mai no ka lahui o Arabia malalo o kou mau kapuai wawae; a o na lahui a pau o ka honua, e moe iho no   lakou ia oe, a aole loa hoi e lanakila na enemi imua o kou alo."

            "He mau olelo ano nui kela a kahi keiki i kamailio mai la," wahi a Tumerenia i pane aku ai i kana keiki:

            "Pela io paha la," wahi a Mone Tikero.

            Ia manawa no i hele aku ai ua wahi keiki la, a komo aku la hoi o Mone Tikero me ka Moiwahine Tumerenia no iloko o ka halealii, kahi a ka lehulehu o na poe hanohano o ka aina e noho ana, mai na kane a na wahine.

            O na kaikamahine hoi keia, aia lakou ke hoohai wale la no i ua keiki la, a ke oni wale la no i o a ianei. Ke haawi mau mai la no hoi lakou i na minoaka ana imua o na keiki la, aka, he ole nae ka maliu ia aku. No ka mea, na paa kana makau i ka lou ia e ka uhu nui o Makapuu, aohe ana hana i koe.

            Ua noho iho ua keiki la maluna o kona noho, a haawi ae la na kukai elelo ana mawaena ona a me kona makuahine, a iloko o ia manawa i hooholoia ai ko laua wa e hoohuiia ai maloko o na paia o ua halealii la.

            A he mea oiaio, aohe la maka kanaka nui e like me ia la i ike ia ma Arabia, ka la hoi e hoohuiia ai o Mone Tikero me kana ipo aloha. Ua hele mai kela me keia kanaka mai na wahi a pau o ka honua, e ike kumaka i ka nani o Aipo, aole hoi e lohe pepeiao wale no.

            A ua hele ke aloalii o ka Moiwahine Tumerenia a piha kuineki, a ua lawa no nae kahi e noho ai. Ua lawe pu mai hoi keia poe me na makaua he nui, oia na pohaku momi makamae like ole.

            Mamua ae o ka hora 7 o ka ka po, ua ikeia aku la o loko o ka halealii e hoomalamalamaia mai ana me na kukui like ole o kela a me keia ano, a pela pu no hoi me waho iho o ka halealii. Aia na lede hookipa ke holoko la i o a ianei, e hoohehelo ana me ko lakou mau aahu nani, a o na keonimana no hoi me ko lakou mau kahiko piha.

            Ua hookaawaleia ae la ka rumi hookipa nui o ka halealii no na paa mare, a aia hoi o Tumerenia e noho ana iluna o kona nohoalii me na kihei velavta maemae a luhe iho ana, a e anapanapa ana na pohaku momi hookinohinohi ma kona mau aoao.

            I ka aneane ana i ka hora 7:30, ua ikeia aku la ke kaa o Mone Tikero me ka Pua Lilia o Zubieda e holo mai ana mai ke kahua hoomoana mai, me ka hoomalamalamaia e no ihoiho kukui, aia hoi na kanaka noho kuahiwi ke ukali mai la ma kela a me keia aoao, e malama ana hoi i ka maluhia o ko lakou mau haku.

            Oia no hoi ka manawa i olo ae ai ka pihe hauole o na kanaka ma ke alanui, a hoolei aku la i na poke pua iluna o ke koa, a ua hele a—

"Puia kai o Holo Hanakahi, Onaona i ka hala me ka lehua."

            I ka wa i komo mai ai ka huakaik holookoa iloko o ka pa alii, ua haawi ae la na keiki he ekolu mau leo huro a ua paiakuli ae la ka lewa i ko lakou mau leo. A oia no hoi ka wa i lele iho ai o Mone Tikero me kana aloha mai luna ihe o ke kaa me ke kokua pu ia e ka elemakule Igeboseda, a pii aku la no ke alapii o ka halealii.

            Aia hoi na alii hanohano o ka aina a me na poe maka hanohano o ka hanua ke ku nui mai la aluna me ka haawi ana mai i na hoomaikai ana ia laua.

            Ua alakaiia aku la laua a ma ke alo iho o ka moiwahine, malaila, i ku iho ai laua no ke kali ana i na huaolelo hope loa no ka hipuu paa ana ia laua a lilo i hookahi, mai ke kahunapule aku. Aia hoi ko laua mau maka ke nana pono la maluna o ke kahunapule.

 

            Ua lohe mai makou, ua loaa i na hoike o Kale Aki ma kela hoopii ana iho nei ana ia. Keo Maile [Joe Fern], no ka hoike wahahee ka laau kaulana a Kawelo, o Hoolehelehekii, a eia nui ke noke nei i ka milimili. A ma ke alo iho ka o ke keena loio o ua o Aki, i ku iho ai kaena a ke kaikaina o Isabela,— "Kipa, free!" oiai, oia ka puuwai aloha a Keo. Aloha no na hoike o Kule Aki!

            Mau Ninau i ka Aha Keikie.

            Ma ka hoopii a Jonathan Shaw, luna ohi auhau, kue ia Kale Wilisona, no ka auhau, ua waihoia aku na kumu malalo iho na ka Aha Kiekie e noonoo mai: 1—Aohe kuleana hoopii; koe mai mai ke Aupuni Kuikawa a i ka Repubalika o Hawaii; 2—Malalo o ke kanawai auhau, o na auhau i kupono e ukuia iloko o 1893, aole hiki ke hoopiiia mahope mai o ka hala ana o ia manawa, oia hoi, Iulai 1, 1894; 3—O na auhau i kupono e ukuia iloko o 1893, aole ia e hiki ke hoopiiia a ke ohiia e kekani Aupuni i kukuluia mahope mai nei o ia manawa. Kini no ka mea hoopii, Petesona no ka mea hoopiiia.

 

            Eia ke manaoia nei e hoala ae i hui malu Masona hou, i loaa hoi ke kolu.

            O ke kani a ke pio, hone i ke kula, haupu wale ae no o kela keiki holoholo po o Makiki Ae!

            O ka inoa o kela hui waapa hou i hoalaia ae nei e na poe i haalele ai i ka Hui Healani, o ka Hui Waapa Leilani. Eia ia hui hou ke hele aku nei ma kahi e holomua loa aku ai, oiai, he hui ia no na oiwi a me na makamaka aloha aina.

            Aia ka hale e halawai mau nei ka Puali Hoola ma ka hale pohaku Dai@ona ma alanui Moi nei, oia kela keena o kekahi hui @alu Masona mamua iho nei, malna ae o ko Keeni Nota hale hana piula. I na po a pau lakou e halawai nei.

            Ua ae ke Aupuni e haawi hoolimalima no 15 makahiki i ka Hui Waapa Healani, no kekahi kahua makai ae o ka hale waapa o ka Hui Makala. E kukuluia aku ana i hale o $3,000 ka lilo, aia nae hoi a lawa pono ia mau dala ma ke noi a me ka lulu ana.

 

KO HONOLULU HALEKUAI KOPA.

 

            Eia malaila e loaa ai ke kopa maikai loa no $4.50 o 100 paona, a 17 auka o 25 paona no $1.25.

            Kopa Polu Geremania, 10 keneta no ka paona, elua suka no 25 keneta.

            Kopa Palepalu, 42 paona o ke kini, $1.25.

            Lanahu Kiawe, 40 keneta no ke eke.

            Na Kapu Poi, me ke apo keleawe, 50 keneta a me 75 keneta, e like me ke ano.

            Paakai apuupuu maoli, 100 paona o ke eke no 50 keneta.

            Kukaepele Iapana, ekolu ope (30 pahu) no 10 keneta.

            Wahie kiawe, 200 paona no $1.00

            Mea Hoonoono Kope, 15 keneta no ke ope

            E loaa no ua kumukuai kiekie loa no na ili bipi, kao, a pela aku, a me ka aila paa.

            N. BREHAM (Berrehama), I maopopo ma ka inoa o ke Kanaka Kopa Palupalu.

            Alanui Betela, mauka iho o Kakela & Kuke. aug. 20-tf