Ka Makaainana, Volume II, Number 17, 22 October 1894 — Page 8

Ka Makaainana.

HONOLULU, OAHU, POAKAHI, OKATOBA 22 1894

 

Huaelo Wale na Hana Kamehai

            Hoomakeaka no hoi na hana oehaa a ke Kalabu Repubalika Hawaii. Po Poalua iho la i halawai ai ia ahahui o na luna Aupuni a me na oiwi ohakulai no ka wae ana i ka lakou mau moho holo balota. Ma kahi hoi o ka wae moho ana, ua waiho aku o J. U. Kawainui he olelo hooholo no ka apono aku i na moho a ka Aoao Uniona Amerika, a aohe i apoia. O ke kumu i ae ole ia ai, no ko Kawainui kakauinoa ole ana i ua olelo hooholo la ana mamua, me kona manao he poe kamalii wale no kela poe oiwi nana e alako ma na ihu, aka, ua aoia aku oia a ko ole kona manao piha haakei. Ua hoouluhuia aku o Peresidena Keoki Makamu a hiki i ka puka ana o na olelo pilikino ma na aoao a elua, a no ia uluhua a piha inaina o ua kaeaea la i hiki ole ke hilinaiia aku, ua waiho koke mai oia i kona kulana a ua ae koke ia, nolaila, aohe peresidena o ua hui la, Pau ae la hoi ia, ua onou hou ia ae no ua olelo hooholo i like me ka mua, a na I. D. Keliipio hoi ia i waiho aku, a no ka piha molowa loa o na hoa i na hana kohu kamalii hupekole loa, ua ae okoa ia aku, a o ka panina no hoi ia o na hana huaelo wale.

 

Loaa ka Opiuma i na Owau.

            Mamuli o ka hoike e ia ana aku o ka lohe ia Kapena Poo Waipa e na kiu Pake i ka Poakahi i hala, ua loaa he mau tini opiuma i ka auwina la Poalua mai, oiai e laweia ana maluna o kekahi kaa kikane no ka hooili aku ma ka Mikahala no Kauai. Ua kiaiia kekahi halekuai Pake ma alanui Moi nei, kokoke i ka Huina-a-Kale, a i ka hele ana o ke kaa, ua hookoloia aku a hopuia ma Waikiki iho o ke Burua Ma halekuai, ma alanui Kaahumanu aku ko Waipa oili ana aku. I ka ike ana mai o ke kia kaa iaia, ua hoohuli koke ae oia i na lio no ka uwapo waapa, eia nae, aole ia he mea e hala ai o ka ike. Ua laweia ae a ka Halewai, a i ka weheia ana iho o kekahi pahu, ua loaa iho he 24 tini i uhiia a paa me ke ti lau. I kai o ke uwapo o Kalaudine i hopuia ai ka ona nona ia waiwai a ua hemo oia a me ke kia kaa malalo o $250 bela pakahi. Ua ae oia i kona hewa imua o ka Aha Apana i ka Poalima nei a hoopaiia e uku i $100 a me na koina.

            A mamua ae hoi o ka holo ana aku o ka Mikahala i ka au wina la Poalua iho la, ua loheia he mau pahu e ae no kekahi me 56 tini i hala i na maka o na owau. I mea hoi e houlolohi ole ai i ka moku ma ka hue hou ana no ia mau pahu, oiai, ua komo mua ilalo, no ka mea, i ka hora 11 A M. i laweia ai i kai, ua hoouna palapala ia aku i Lihue no ka makaalaia mai.

 

            Kakahiaka Poaha, la 11 nei, mauka o Koleaka, ua hookui ae kekahi kaa hoki Aupuni me ke kaa o kekahi wahine haole, a poino kekahi huila o ke kaa Aupuni. Aohe i hiki i kela wahine ke alo ae, oiai, ua pi ae kona lio i ke kai lalani mai o na kaa hoki a kuemi hope kona lio a hookui ana na kaa a elua. O kahi mea hilu loa nae hoi, oia ka makemake ana o ke kahu o ke kaa i poino e hopuia a e hooukuia kela wahine.

 

KELA A ME KEIA.

 

            Poalima nei i uhao lanuhu ai ka Haiakina.

 

            Piha kauna o na hoopii koi poho i keia Aupuni, a e noho ana keia mau hihia i keia kau kiure ae.

 

            Ua hookohuia o Kauka Remona [Raymond] i kauka Aupuni no Koloa; Kauai.

 

            Poaha iho e ku mai ai ka monowai mai Kapalakiko mai a holo loa aku no na Panalaau Hema.

 

            Ua hanau mai na ka wahine a ko Waialua Lunakanawai Apana, Edewada Hoa, ma ia wahi no, he keikikane, i ka la 14 nei.

 

            Kakahiaka Poaha iho la i ku mai ai ka Malulani, i loaa pono mai ai hoi ka Alameda a hala na eke leta. Apopo no oia holo aku.

 

            Ma ka Hawaii o ka Poaha iho la i huli hoi mai ai ka Loio Kuhina a me na luna e ae o ka Aha a me na loio mai ke kau kiure o Kohala.

 

            Ua noi ae ke kauka o luna o ka mokumahu Kulanakauhale o Pekina i ka Papa Ola i wahi oihana kauka Aupuni ma kekahi o na apana o keia Paeaina.

 

            Oiai ua pau iho nei ke kaunu a hoolai ana a kahi kupakako peke o ka Malulani i na la kinohi o kona noho mare ana, e au hou aku ana oia i ke kai i ka la apopo.

 

            Mamuli o na olelo a na poe ike, ua hoahewaia kaupoku o ka luakini o Kawaiahao, a no ia mea hoi, eia ke kukuluia nei i lanai haipule ma ka aoao mauka iho.

 

            Ua hoopili ae na poe panihakahaka i ke Aupuni no ko T. B. Mare hale hana hou i hanaia iho nei. Ma ko lakou manao, aole ia he hale pale ahi maloko o na palena pale ahi.

 

            Piha kauna o na Pake puhi opiuma i ahewaia imua o ka Aha Apana i ka Poakahi, a hookahi i ka Poalua mai, a hoopai nui ia no hookahi malama hoopaahao pakahi ma ka hana oolea.

 

            O na ohua Pake a me Kepani a ka Pekina i lawe mai ai, ua hoolele nui ia ae i Kahakaaulana e hoomalu ai, a i ka auwina la Poakolu iho la i hookuu nui ia mai ai.

 

            He Pake, o Akana kona inoa, ka i hoounaia i Kawa e noho ai no ekolu malama ma ka hana oolea no kona aeahaukae, a i ka Poalua iho la kona laweia ana ma ke kauoha a ka Lunakanawai Apana.

 

            Aole ka hoi kela Pake oki pahi o Kaalaa a hoea loa i Pauoa o kahi Pake o ka Holomua, he mea okoa no ka, o ka like nae hoi o ua inoa. Hewa no makou i ka paewa wale o ka hoike ana.

 

            He hookuku kinipopo Pelekane ko ka auwina la Poaono nei iwaho o Makiki, o ka hope loa hoi ia no keia kau, mawaena o ko ka Haiakina poe a me ko uka nei. Ua lilo ka eo i na keiki o ka aina nei.

 

            Ua papa leo ae o E. B. Tomasi a me J. H. Sopa i ka auwina la Poalua iho la ma alanui Moi nei, kokoke i alanui Papu. E ole e hookaawale koke ia laua, oiai, ua welawela na olelo, ina la paha ua ulele io na ai a ka ui.

 

            Ua hoole iho nei ka Aba Kiekie i na kumu hoohalahala a Bila Kamaki no kela olelo hooholo a ke kiure i hooholo ai mamua aku nei e uku oia i $500 poho no ka hoeha ana ia Mrs. A. K. Iaukea. Nolaila, hookahi no hana pono iaia o ka uku ae a o ka pau ae la no hoi ia.

 

            Ehiku poe Kepani i hopuia e Kapena Kahookano a me Lutanela Kanae a me na kokua i ke aumoe Poalima nei ma Kapuukolo nei. Imua o ka Aha Apana i ka Poaono nei, ekolu i hoopaiia e uku i $10 pakahi me na koina, no ko lakou ae okoa ana no i ko lakou hewa, a eha i hookuuia.

 

            Iwaena o na poe i hopuia a i paa ma ka Halewai i nehinei, o Joe Fereira kekahi, o kela ohana Pukiki hiena mau o Puowaina aku nei, no ka hoopuka i na olelo hooweliweli i kekahi mea o uka o Kauluwela aenei. Ua hemo oia malalo o $100 bona e malama i ka maluhia a me $50 no kona hoea ae imua o ka Aha Apana i keia la.

 

            Wanaao Poakolu iho la i hopuia ai he ekolu kane haole a me elua wahine Hawaii no ka walaau po, maloko o kekahi hale mauka aenei o Koiuiu, mamuli o ka hoopiiia e ko ia wahi poe noho kokoke aku, no ka ona a hanakuli me ka hulekui, oia na hana o ka po. Imua o ka Aha Apana i kakahiaka ae, ua hoopai nui ia e uku i $6 pakahi.

 

            Ua ehaia kekahi wawae o Ferede Harisona a eia oia ke hele nei me ka laau. I ka holoholo waa oia i ka La Pule, la 7 nei, me kona waa mai nei o na Paemoku Hema, a i ka hoi ana mai a hapai oia a me elua mau mea e ae i ka waa no kula, ua opa pu ia kona wawae. He mano ke kumu o ka hele ino ana i ikeia aku ma kahi kokoke mai ia lakou.

 

            Ua hooleia iho nei e ka Aha Kiekie ka hoopii hoohalahala a Beni Galega, kahukaa o Kimo Kamabela no ke nali ana a moku kekahi lihilihi o kekahi pepeiao o Beti Pitasona. Imua ai o ke kiure, ua ahewaia oia, a ua hoopaiia no eono malama hoopaahao a e uku i $5. Ma ka manao o ka Aha Kiekie, ua lawa pono loa na ike e hooia ai no kela hewa. Nolaila, eia oia i Kawa e noho nei.

 

            Kakahiaka Poakahi i hala, ua 76 ka nui o na poe i hopuia e na makai mai ka auwina la Poaono mai a ao ia po, a ua $1,073 i ahu ae i ka Halewai ma ke ano bela, ka oi loa hoi no kahi wa loihi i hala ae. A ka hora 4 P.M. o nehinei, ua paa ae he 57 poe hana hewa, a he 42 o ia poe no ke ki-pa, pepa, a pela aku mai na oiwi, na Pake a me na Kepani. O na piliwaiwai no nae hoi ka hapanui e hopuhopuia nei.

 

            He kaapio ka i hookui ae me kekahi kaa hapaumi i kakahiaka Poaono, la 13 nei, ma ka huina o na alanui Moi nei me Liliha, aohe nae mau manuheu ano nui i loaa i na kaa. E noho ana mamua o ke kaapio me ka hookele kaa he kaikamahine opio, a oia ka mea i kupou poo aku mamua a waiho ana ke alo ilalo o ka honua. Iaia i kupou aku ai, ua palulu ae oia i na lima i kona mau maka i wahi e pakele ai kona nanaina, eia nae, o na lima aku la ka luahi, ua pau i ka paholeholeia.

 

            Eia na Kepani ke liuliu nei e malama me na hoohiwahiwa ana i ka la hanau o ko lakou Emeperoa i Novemaba 3 ae. Ua oleloia e kai huakai aku ana he puali o na Kepani me na aahu koa a kahi o ko lakou luna Aupuni maani.

 

            He Pake ka i nui ae ka waha i ka holina i ke aumoe Poalima, la 12 nei, hola 10:30 paha ia, maluna aku nei o Kawaiahao, i kuiia ka kona ihu e kekahi keiki Hawaii. Ua hoea ae he makai kaulio, aohe mea i loaa, aka, ua kuhikuhi ka Pake i kahi i holo ai o ua keiki la, a ua komo aku ka makai iloko o ka hale a puka ma kahi aoao me ka loaa ole o ua keiki la, pau nae hoi na poe o ka hale i ke ala.

 

            Ua hoopahupahu a hoolaumaniaia kahi ahua pohaku akoakoa mawaena o ka hale hana hao a me ka makeke kuai ia o Ulakoheo, ma Ewa iho o ka Hale Makeke kahiko, i na la i hala iho la, a he nani maoli no ia i ka nana aku. I ka Poakolu iho la ka hoomaka ana. Ua hoohoa ae kahi kaamahu hoomanunu alanui a paa okoa malaila, aohe e hiki ke nee aku a hemo ae. Eia no ke ku nei a malia o hemo ae i kahi o keia mau la iho.

 

            Ma kela hoopii a Ana Kapuakela kue ia I. D. Iaea a me Kikila Balaunu, kahu waiwai, e kapae ana i kekahi palapala hoolilo aina mai ia Pilipo (k), i make, o Ewa, ua loa mua ka pono i ka aoao hoopiiia ma ke kaulike imua o ka Aha Kaapuni ma ke keena. Ua hoohalahala ka mea hoopii i ka Aha Kiekie, a aponoia mai ka olelo hooholo a ka Lunakanawai Kaapuni. O ke ano nui o ka olelo hooholo, aole keia he hana ma ke kaulike, aka, ua kupono loa ma ke kanawai.

 

            Ewalu poe kamalii hele kula i paa i ka hopuia e Makai Kula Bila Makawela i ke awakea Poalima nei, makai o ka uwapo Osianika. He poe kamalii no keia i maa i ka hele e luu dala i na wa o na mokumahu e holo ai, a i keia hana ana hoi, pau nui ana i ka noho i Kalakaua Hale. Oiai lakou iloko o ke kai, ua pau na lole o lakou i ka lilo i ka makai, a i ka hoi nui ana aku no kula, pau nui ai i ka hopuia. Imua o ka Aha Apana i ka Poaono nei, ua aoia lakou a pau nui i ka hookuuia.

 

HOOLAHA I NA HOAAINA

 

            Mai a mahope aku o keia la, o Mr. E. B. FRIEL hookahi wale no ka mea i hoomanaia e lawe mai i na uku hoolimalima mai ko'u poe hoaaina mai e noho ana ma ka Ahupuaa o Wailuku, Maui.

CLAUS SPRECKELS.

Ma o kona hope ponoi la, WM. G. IRWIN.

Honolulu, Okatoba 15, 1894.

| OK 22--2 ml. |

 

HUI HOOPUKAPUKA HAWAII.

 

HOAIE DALA MALUNA O

Na Waiwai Paa a me Lewa.

 

KUAI A HOOLILO I NA

Kuleana Mahele Hui a me na Bona Aupuni.

 

Mau Agena Waiwai Paa ma na Ano a pau.

 

13 a me 15, Alanui Kaahumanu. Tele

pona Mutuala, Helu 637.

ok. 22---22ml.