Ka Makaainana, Volume II, Number 18, 29 October 1894 — Page 6

Ka Makaainana.

 

HONOLULU , OAHU, POHAKU, OKATOBA 29, 1894

 

NA AINA MAMAO.

Na Lono Huikau mai na Wahi

Like Ole mai o ke Ao nei.

AKUKANA-GENERALA TANASE.

 

Hapala Ka a Kapili Bulu Manu Ia Oia

  Mamuli o na hookikina ana a kekahi poe i palulu i ko lakou mau helehelena a i lako hoi me na pu, i ka waena konu po Poalima, Iune 22, i komo aku ai o Akukana -Generala Tanase iloko o kekahi kaa i noi paa pu ia, ma na Waimapuna Kolorado, laweia a he 13 mile iloko o ka waoakua hapalaia oia me ke ka a hoopililiia aku me ka hulumanu a hookuuia ma ke ala e hiki aku ai i Deneva, he 65 mile ma ka akau.  Ua ulu mai keia kana mamuli o kona inoia e ko laila poe no kana mau hana kokua i na poe eii lanahu haalele hana a kue hoi i na ona lua lanahu.  Hora 3:30 o ka wanaao o Iune 23 i hikaka hele ae ai oia a ke alo o ka pa o kekahi kahua hanai holoholona, he ewalu mile mai kahi ona i hoopoinoia ai, a na kuhea nawaliwali aku oia no ona kokua.  Aohe mea e ae o loko o ka hale mawano o kekahi kanaka opio, a i kona puka ana iwaho, ua ike aku oia he kanaka eleele me ka helehelena i kapilipiliia me na hulu manu pauma ele koko.  Aohe ona wahi aahu e ae mawaho ae o na kamaa, lolewawae, palemai o luna a me ka papale, a na keia mau mea ae la i huna aku i na mea e pipili ana i koua ili.  Me na huaolelo paupauaho pokole ua hahai ae oia iaia iho a hina iho ia i ka honua.

 

Loaa he Samaria Maikai.

  Ua holo aku keia opio a i kekahi mea okoa aku, e Anaru Maloe [Andrew Malloy], kekahi o na kanaka i lawelawe ai ma ke ano hope makai nui ma Karipili Kariki e kue ana ia Tanase.  Oia ke Samaria maikai.  Ua hookipa aku oia ia Tanase, hookuu iaia e hoomaha, a awiwi e hana koke i pa lio i kekahi kaa.  "E lawe aku ia'u akahi kokoke loa e hiki ai ia'u ke hoouna olelo aku i ke'u ohana a e loaa ai hoi ona kauka,"  wahi a Generala Tanase.  Ua kakakii aku laua a hiki i Loko Pama i ke awakea.

 

Hui me ka Ohana a me na Hoa'loha.

  Iloko hoi o keia wa, e pioloke ana o Deneva, a ma kekahi kaa kaokoa i haalele aku i ka hora 11:40 A.M. no na Waimapuna Kolorado, i kau ai ka wahine, ke kaikamahine a me na hoa'loha lehulehu o Generala Tanase.  Aohe wahi mea i loheia nona a hiki wale no i kona hoea ana i Loko Pama, a na manao wale ia no ua make oia.  Ua hoea loa aku kona ohana ilaila a hoihoiia mai oia no Deneva, me ke ano pulepule mamuli o ka noonoo nui no keia mea i hanaia aku maluna ona.

 

Kona Pahele a Hoowalewaleia Ana.

  Nana no i hoike maoli ae i ke ano o kona paheleia ana a puka ai oia iwaho o ka hotele, kauolupeia iloko o kekahi kaa a heo aku la.  Iaia ka i komo aku ai, ua ninau aku oia no ke ano o keia hanaia ona pela, aka, ua paneia aku oia me na oleloino me ke kauohaia aku e pani kona waha ina aohe ona makemake e pepehiia a make.  Ua hoao oia e lele mai ke kaa aku, aka, ua uhauia iho oia ma ke poo me kekahi pu panapana, a moku hamaina ka alualu Ekolu kanaka iloko o ke kaa me ia i palulu i na helehelena me na hainaka a hiki ole iaia ke hoomaopopo aku owai la lakou.  Ua hooweliweliia kona ola ina oia e kuhea ana no ona kokua, me ka puili mau ana o ko lakou mau lima ma kona waha, i hiki ole ai iaia ke kahea, oiai, ua hoao no oia, me ke pai pu aku no iaia.

  Holo ke kaa a ku, kauolupe hou ia iwaho a hoomakaia ka weheweheia o kona lole iwaena o na leo hooho hauoli o 25 paha poe, me he la ua hiki mua no ilaila, a ilaila kahi i kakali ai no kona hiki aku.  He oi loa aku no paha malaila, o na leo kamailio wale no nae hoi kana i lohe aku.  O na poe i paluluia, o lakou ka mihimihi mai, aka, o na poe palulu ole, he hoomamao loa aku hoi lakou. O ke

Kumu o ka Inaina o keia Poe Iaia

wahi no a lakou i kuhi aku ai iaia, no kona kue ma ke kaua ana aku i na ona lua lanahu a me na hope makai nui, kona alakai ana hoi i na pualikoa o ka Mokuaina ma ka aoao kokua i na paahana olohani, a me ka haawi aua i kekahi kauoha e kiia na pukuniahi waena o na hope makai nui, a o kekahi hoi mamuli ona i ioake ai na hope makai nui ma Puu Bulu No keia mau mea i manao ai lakou e pepehi iaia a make.  O na ano olelo pelape a a pau ka i luaiia aku iaia.

 

Kamailio Oia no Kona Pakele Iho.

  Mahope o ka pau ana o ka lakou mau olelo, ua haawiia mai i manawa nona e kamailio ai nona iho.  Me ka noonoo ole ae no kekahi mea, koe wale no aia oia imua pono o ka make, ua uwalo aku oia e hoopakeleia kona ola no kona ohana, a o na olelo wale no kaua wahi pono e hana aku ai, a ua uwalo oia a oi aku mau ua ae o kana e hana ai imua o kekahi aha hookolokolo. 

  Ua hoakaka aku oia no ka manawa o na pualikoa a me na hope makai nui ma ke kahua mokomoko, me kona hoaiai aku no aole iaia ka hoomalu ana o na koa, aka, ia Kenerala Buruka malalo aku o Kiaaina Waite, ka Alihikaua Nui.  Ua hoike aku oia he oiaio ua komo pu oia ma ia mau hana, aka, ma ke ano loio wale no ao na paahana.  I ka wa i haawiia ai o ke kauoha e ki i na pukuniahi iwaena o na hope makai nui, aohe oia i lihi launa aku, oiai, he mau mile kona mamao.  A oiai no hui, aole iaia ke alakai ana o na koa, ua hewa ole oia no ka make ana o kekahi poe.  Ina e make oia, alaila, e make no, eia nae, aole i loaa ia lakou ke kanaka pololei, a he pono ole loa hoi ka hoopai make nona.  Iaia a pau, ua kukakuka ua poe la a hooholo e hiliia oia i 100 kaula.  I ka hoikeia ana aku iaia, ua olelo aku oia, e ki iaia i ka pu, no ka mea, aole paha e ole aku ana oia mahope iho o ia hoopai, a he oi ke aloha ke make oia ma o ka poka la.

 

Hoomakaia na Hana Hiena.

  O ka manawa keia o ua poe hiena la i kapai aku ai i ke ka wela maluna ona, mahope iho o kela kaualupeia ana aku mai ke kaa, he kanaka poupou puipui ke ku ana, me he la oia ke alakai, a nana hoi i kahea aku no ona ka wela, hooko mai hoi kahi poe i kaula, a uwa mai hoi kahi poe iho, "E pepehi a make."  He wahi mamao iki aku kahi o ke ka i hoomakaukauia ai, no ka mea, he ikeia aku no ka ula mai o ka momoku lanahu.  Ua laweia aku ke ka a hoomakaia keia hana hiena a hoomainoino.  Ekolu poe na lakou i kapai aku i ke ka, a me kela me keia hapala ana a ka palaki, e hoopuka mau ana lakou i na olelo pelapela loa.  Me ka wela loa hoi keia e hamoia nei a me ka nui hoi o ka eha i like loa me he mea la e make ana oiai no nae e ola ana.  Ua lilo na uwalo ana aku ia lakou i mea ole loa, he oleloino wale no ka pane i loaa aku me na leo hooho hauoli ia mai hoi no na poe hoomainoino e hoomau aku i ke kau ana.  Mahope iho o ko lakou hoomaopopo ana ua paa pono kona kino me ka helehelena i ke ka, ua hoihoi hou ia aku ko ianei mau lole.  A i ka wa ana e komo ana i kona mau lole, ua mahae liilii aku la ua aluka nei mao a maanei.  Ua kuhikuhiia aku iaia ke alanui ma ka akau a oleloia ma ia alanui oia e hele pololei ai me ka huli hou ole aku i hope, a ina oia e hoes hou i na Waimapuna Kolorado a i Karipili Kariki paha, o koua ola ae ke pani.  Pela oia i hele aku ai iloko o ka pouliuli me ka loaa wahi hale ole.

 

Huluaa o ke Samaria Maikai.

  Ia Maloe i lawe mai ai i ka lio a me ke kaa, ua haawi ae oia i pu- panapana ia Generala Tanase, hookahi no hoi iaia a olelo aku la:  "Ina lakou e kii mai ana ia kaua, e haule like no kaua," a hoomaka aku la laua i ko laua holo ana no Loko Pama.  Ua hopohopo laua ke heia aku ilaila, aka, ua kupaa o Maloe mahope o ka mea i hana ino wale ia, a pela no a hiki i Deneva, a ua hoaumoe ae oia ma ka halenoho o kana mea i kokua ai a i hoopakele mai la mai ka poino a popilikia aku.

  He hoahanau o Generala Tanase no Lunamakaainana Tanase o Misouri a me Lunamakaainana Tanase i pau o Mikigana Iloko o na ano e ma Karipili Kariki mawaena o na haku a me na poe eli lanahu, ua lawelawe oia ma ke ano loio no na poe eli.  O kekahi kumu ona i ino loa ia ai, oia no Kona alakai ana i na pualikoa e kue aku i ka Hale Aupuni i ka manawa o ke paonioni ma Deneva e pili ana i ka Papa Oihana Makai.

 

Hoino Loa Ia keia Hana Inoino.

  Ma Deneva i hanaia ai a hemo ke ka a me ka hulu manu me ka wai wela a me ke kopa a me kekahi mau mea e ae.  He kanaka oia i aoo, ua piha ke 50 makahiki, a ua manaoia mamuli no o kona ano oolea o ke kino a palekana ai oia, eia nae, ua kokoke loa oia e pupule mamuli o keia mau hana hiena maluna ona.  Ua lilo keia hana i mea e hooinaina loa ai ia Kiaaina Wailea ua hoopuka ae oia he kuahaua pili oihana e haawi ana i makana o $1,000 no ka loaa a ahewaia o hookahi a o na poe no paha a i lawelawe ai i keia hana hiena.  Aole oia wale, aka, o ke Kuhina Waiwai kekahi o ia Mokuaina i haawi pilikino ae he makana o $250.  He mau ahahui kekahi i hoopuka ae he mau olelo hooholo e hoahewa loa ana i keia hana a ua haawi ae no hoi kekahi he makana o $100.  O na koa a me na poe eli lanahu kekahi o Karipili Kariki i inaina loa.  Ua hauoli loa nae hoi na poe eli akahi no a akaka loa ke ano o na poe i hiki aku ma ko lakou wahi ma ka aoao e kakoo ana i ke kanawai a me ka maluhia.

 

Loaa a Hopuia kekahi Poe Kolohe.

  Iulai 25 i hopuia ai kekahi poe o Kulanakauhale Kolorado o na makaikiu mai Deneva aku, no lakou na inoa o John Mullius (Keoni Mulina).  Herman Rubbake (Heremana Rubake) a me C. H. McKinney (Makine), o na Waimapuna o Kolorado, no ke komo pu ana aku ma na hana e