Ka Makaainana, Volume III, Number 3, 25 March 1895 — Page 8

8 HONOLULU, OAHU, POAKAHI, MARAKI 25, 1895.

NA PALAPALA.

[Aole maluna iho o makou ke koikoi o na hala a me na hewa no na manao i hoopukaia malalo o keia poo, aka, aia no maluna iho o na poe na lakou a kakau mai.]

Manao Hoihoi Alii.

E M R. LUNAHOOPONOPONO:
            Ae, ua pololei na olelo o kela palapala huna inoa a ke Kuokoa i hoike ae ai i ka Poaono nei no ko'u manao "e hoi hou ae ana ka Moiwahine." Aole i pio ko'u manaolana, a ina ua kuhihewa au, me a'u no ia, aole me kahi aku. Owau no ka i kuleana i ko'u manao ponoi iho, aole o kahi aku. HOKE.

He Kilakila ka Oiaio.

E M R. LUNAHOOPONOPONO:
            Ma ka nupepa "Kuokoa" o Maraki 23, 1895, ua hoopukaia he mau olelo hakuepa o ke kulana lapuwale loa, i awiliia me na manao lili hoomauhala kalai aupuni. Ua huna ka hakuepa iaia iho ma ke kanae ana i kona inoa ponoi, a ua hookomoia na manao epa maloko o ke kaunakoma,—"Ua loaa leta mai nei lakou mai ia J. Nawahi mai, e hai mai ana, e kali, e hoi ae ana no ka Moiwahine; oiai, ua pau i ka hopuia na Senate o Amerika no ka lawe i ka waiwai kipe."
            E hiki anei i ka mea nana kela palapala hakuepa, ke hoouna mai i ka lunahooponopono o ka nupepa "Kuokoa" i ua palapala nei a'u? Ina aole e hiki ke hoounaia mai ua palapala la, alaila, ke manaoio nei au, he hakuepa no keia na ka lunahoopuka o ke "Kuokoa"
            No ke aha la i hoao mau ai kekahi poe kanaka Hawaii, e hoolaha i na manao hakuepa wale? Heaha la ka waiwai o ia hana ana? No ke aha i hoino wale aku ai ia hai me na olelo kuamuamu hoino? Heaha la ke kumu? He lili anei? He ukiuki paha? Heaha la?
            O ke kanaka hoike i na manao oiaio, aole oia e hohe wale a pee, o ikeia oia, aka, ua ku aku oia imua o ke akea a me ke ao holookoa me ke kulana kilakila o ka oiaio a me ka hopo ole. "E like me kou makemake e hanaia mai ai oe e hai, pela oe e hana aku ai."
Owau no me ke aloha,
JOSEPH NAWAHI.
            Honolulu, Ma raki 23, 1895.

            E malamaia ana he hoike hapa o na Kula Sabati o Kaumakapili i keia Sabati iho maloko no o laila, a pela pu no hoi me ko Kawaiahao.
            He wahine opulepule, o Ana ka inoa, ka i laweia aku no ka Halemai Pupule i ka Poakolu iho la. Me ka hana nui na makai i noke ai a kau iluna o ke kaa no ka laweia aku.

KELA A ME KEIA.

                Pau io no kanawai koa i ka auwina la Poakahi i hala, mahope iho hoi o ka puka ana aku o KA MAKAAINANA nei.
            E hoea mai ana he mau olohe ma ka pahupahu biliodi i o kakou nei ma keia mua iho, mai Kapalakiko mai, a e hooikeike ana laua maanei.
            Eia ka Papa Hoonaauao ke noonoo nei no ke kupono e weheia i kula olelo Enelani mauka o Nuuanu, ma kahi kokoke i ke kahua uwila.
            Ke hoomaka nei na makai i ka hoolei kipuka kaula no na ilio mekala ole no ka makahiki i pau. He 49 ilio i hei ae i kakahikaka Poaono nei.
            Ma ke Kinau o ka Poalima nei i hala aku ai ka Ilamuku Hikikoki no Hilo, Hawaii, a ua oleloia o kona hoi loa keia a aohe e ike hou ia ianei.
            Mahope iho o ka hora 3 o ka auwina la o nehinei i ku mai ai ka Miowera mai Vanekouwa, a i ke ahiahi loa ana iho no i eku loa aku ai no na Panalaau Hema.
            Aohe ka he ae o ka Ilamuku, wahi a ka loahei, e loaa hou ona laikini kuai waiona ia Keoki Hapakela no ka Be Hoki, mamuli ka a ke noi a na wahine haole.
            He ulele kinipopo (be sebolo) ko ke kahua kinipopo hou i kakahiaka Poaono nei, mawaena o na hui Sana Lui a me Aloha, a ua eo i ka inoa mua, he 15 puni kue ia 5.
            La 29 iho e ku mai ai ka mokumahu Pe ru mai Kina mai a me Iapana mai. Aperila 1 ka Warimu mai na Panalaau Hema, a o ke Kina mai Kapalakiko ma ka la 2 aku.
            Ma ke anaina pule ae o Sana Anaru a ka Haku Bihopa o Honolulu i awakea o nehinei na luina o ka mokukaua Pelekane Nimipe a me ko lakou mau alii. Malaila pu ae o Komisina Haoese.
            Ua huli hoi aku a ku i Kapalakiko kahi mokumahu uuku Hailama Binamu mai Makala aku ma ka la 9 iho nei, he 61 la holo. He wahi moku holoholo keia mawaena iho no o ia mau paemoku.
            E hoea mai ana ka Bihopa o Salisebure ma ka mokumahu Warimu o Aperila 1 ae no Vitoria. Ina e kaulua iki iho ana ka moku, alaila, e haiolelo ana oia maloko o ka luakini o Sana Anaru ia ahiahi iho.
            Ehiku poe oiwi nana a kuai pia me ka laikini ole, mai na kane a na wahine, i ae nui i ko lakou hewa imua o ka Aha Apana i ka Poakahi, la 11 nei, a ua hookauluaia na hoopai. Aia a paa hou, alaila, he hoopai wale no.
            Ua loheia ua hooholo lokahi iho na lala o ka Papa Kahu Waiwai o Kaumakapili aole e ae e wehe hou ia ke keena maluna ae o ka luakini no na ahamele ma keia mua aku. E malamaia ka ihiihi o ka hale o ke Akua. He hewa iho la ia!
            Ua hooholo na lala o ka Puali Puhiohe Lahui ma ko lakou halawai i ka po Poakolu nei, e ae i ke kono a kekahi poe no ka holo i Kikako, ke aeia mai nae hoi ka lakou koi i $60 no ka mahina ko lakou uku pakahi, a i ka mea nana i kono mai na lilo a pau.
            O keia ka la hoano no ka hoikeia ana aku o kona hapai ia Malie Hemolele, ka Virigine i Hoomaikaiia, a he mau anaina pule hoi ma na luakini o Sana Anaru a me Malieokamalu.
            Ma ka la 9 iho nei ma kahi kokoke i ke awapae o Kukaiau, ua poiia iho la e ka nalu a hukiia aku la a nalowale o Kahinalani (w), oiai oia a me kekahi poe wahine e ae e kui opihi ana. Ua lele koke aku ke kane e hoopakele iaia me ka hana nui iwaena o na nalu e poi ana a loaa no hoi ka wahine ua make.
            Ua lohe wale ia e hoonoho kiu mai ana ka ke Aupuni no kekahi poe o ka aoao Alii, i paa mua iho nei no i Kawa, no ka hakilo ana i ko lakou mau keehina a me ka hoolono ana i na olelo e haule iho ana. Aia ka a molehulehu, alaila, hoomaka a aumoe, pau. Mea ia mai nae hoi o makou a me ko makou puuku ka kekahi. E loaa ana!
            Wanaao Poalua, la 19 nei, ma Ewa, ua pau iho la i ke ahi kekahi kanaka kamaaina, o Napeaewalu ka inoa, mamuli o ke ahi koe i a ae i ka paku makika. Ua kahea oia i poe kokua a ua ala aku ke kaikamahine a me ka wahine a kinai i ke ahi. He ano lolo kona ma'i, a o ia paha kekahi kumu o ka pilikia ana. La 22 mai lele loa ae ai kona hanu ola. Aloha wale oia.
            Ma ka paani kinipopo i malamaia ma ka pa o ke Kula Kamehameha i ka auwina la Poaono nei, mawaena o ko ka Piladelepia mau keiki laeoo a me ko ke kula mau keiki, ua lilo ke eo i na haumana kula ma ka loaa ana ia lakou he 19 puni iloko o ewalu komo ana, a he 5 hoi a ko ke kai poe keiki iloko o eiwa komo ana. Ua nui no na poe i hele aku e makaikai i na lealea.
            Ua hopuia o Kakaio i ka Poaha iho la, no ka aihue ana i ka wati me ke kaula no, he waiwai no kekahi haole o luna o kekahi o na moku kalepa e ku nei iloko o ke awa. Wahi a ka haole ua lawe aku o Kakaio iaia ma kekahi o na hale i maa mau i ka pipiliia e na poe inu rama, a ua inu oia a ona a i ka pau ana ae o kona ona ua lilo ka wati. I ka Poalima nei imua o ka Aha Apana ua hookuuia oia.
            Ua waihoia aku ko J. K. Nakookoo hihia puhi ahi no keia kau kiure ae, mamuli o ke ahi i a a ae pau ole ka halelaau kahiko makai iho o ko F. A. Sefa Ma halekuai, e noho keena oihana loio ia nei e A. Rosa, J. K. Kahookano, Enoka Johnson, a me kahi poe e ae. Iloko o Ianuari i hala, i na la welawela o ka pule mua o ke kaua, keia puhi ahi. Elua ae nei no hoi pule o kona hemo anamalalo o $2,000 bona.
            He wahi haunaele ano ole ka i ulu ae iloko o ka hale inu rama Cosemopolitana i ka po Poaono nei, mawaena o kekahi mau haole, eia nae, ua pau a pau na makai i ka hooio i ko lakou wahi ikaika, me ke kokua pu ia hoi e Kaanaana, ma ka onoonou ana i ke poo o ka haole ma ka aoao o ke alanui hele aoao. No ka lawa ole paha o ka ikaika o Kaanaana me na makai ke lawelawe kupono aia no a "wela ka luna i Kilauea." O kahi makai hoi i kulakulai ai i ko makou puuku, he hamohamo wale aku no mahope.
            O ka makana i luluia e na haole o ke kulanakauhale nei no ka puali makai, ua maheleheleia aku imua o lakou i ka Poakolu iho la. Ia Kapena Poo Paka, he $500; i na kapena makai, $100 pakahi; a ia Holi a me Lokana na makai i ku ai i ka poka $100 pakahi. A i na makai iho he $25 pakahi. Oki loa no ka hoi. I ko makou mau keonimana he mea puhi kika wale no ia. E aho no ia!
            Mawaho ae o na inoa elua a makou i hoike aku ai no ke kulana Ilamuku, ma kela helu aku nei, elua mau inoa hou ae e loheloheia nei, oia o Timi Mare, peresidena a moho hoi no ka Ligi Amerika, a o kekahi iho o Kale Wilisona, he mea no ka aoao Alii. O ka hoike ana mai keia a na lawe olelo ana o keia la, koe nae hoi ko makou hooiaio loa aku i ka oiaio aia no a ikemakaia ae.
            He 127 poe Iapana i hoea mai nei ma ka mokumahu Kuokoa i ae ole ia e ke Aupuni e pae mai, oiai nae hoi ua loaa no ia lakou na palapala kikoo dala i ko lakou banako maanei no $50 a keu aku. I ka Poaono nei i komo ae ai he noi palapala kuu kino no kekahi o lakou a ua ku ae imua o Lunakanawai Kaapuni Kupa ma ke keena. O ka palapala mua loa keia o ia ano i hoopukaia mai ka pau ana o ke kanawai koa.
            Ua lawe aihueia he wati pakeke na ka wiliki ekolu o luna o ka mokumahu Kuokoa i holo aku la i ka Poaono nei. Ua hoike ae oia ma ka hale oia o Kamakele, he wahine i kekahi po kahi i inu ai a ona, a i ka pau ana o ka ona aia hoi ua lilo kana wati. Ua hopuia o Kamakele, a ma ka ninauia ana ua hoole ka wahine aole oia i ike, o na dala elua o loko o ke eke kana i lawe. Aole i loaa ka wati a hala wale aku la oia.
            Ua huli hoi mai ka moku okohola Gehede i kakahiaka Poakolu iho la, mamuli o ka loaa ana o kekahi ulia poino oiai oia e holoholo ana mawaho ae nei o kakou, malalo o na hookele ana a ka malamamoku. O kona kapena ua noho no iuka nei. Aia he mau puka nui ekolu ma kona aoao, i ka ihu, he hana na kekahi poe luina kolohe a ua manao wale ia no na kela poe haole ekolu no i hopuia ai ma ke ano hoohuoi na lakou i puhi malu i ke ahi he mau pule mamua aku. Eia oia ke hana hou ia nei.
            Oiai o lutanela makai Haka e hoihoi ana i kekahi mau haole holo malu o ka moku okohola Gehede iluna o ka waapa i ka Poaha iho la, ua ulu ae he wahi manao ano e iloko o na haole a hoomaka ae la e kui a loaa pono o Haka a hina ana ilalo, a he peku mahanahana hoi ka i haawiia aku i kahi kapena makai kaulio iaia i hoao mai ai e lele maluna o na haole. A e ole ka nui o na poe kokua makai o ka uwapo o Burua ma, ina aole e paa kela poe haole. Ua hoao ka makai e lawelawe ino, pela mai ko makou lohe.

LEO HOOMAIKAI.

                Ke pahola aku nei maua i na hoomaikai a nui i na poe a pau i haawi mai i na kokua ana, a me na hoohiwahiwa pua ana i ka maua kaikamahine hiapo i aloha nuiia, i make, MARY MAGUIRE. MR ME MRS S PARKER mar 25-1mnw