Ka Makaainana, Volume III, Number 5, 8 April 1895 — Page 1

Ka Makaainana.

 

BUKE III --- Ano Hou.         Honolulu, Oahu, Aperila 8, 1895.       HELU 5

 

Lokahi ka Manao me ka Lahui.

 

Mea e ka manao e hana nei,

I ka lohe ana mai na hana,

Ka aku ke aho ia Waitina,

Ka peresidena nui o ka Aha Koa,

Nana e kaana mai i ka pono

No kuu lahui i alohaia,

Hana e launa ole o Wili Kini,

Huole lelepi o Waialae,

Kana hana o ka pelo i ke kauaka,

E hai pau mai i ola oe,

Mai puni aku oe i kana mali,

E i aku e ke ola ia Kaiani,

I moiia kona ola no ka lahui,

I ola nou e ke aloha aina. 

            Hookahi puana kuu puuwai,

            No na poe i aloha i ka aina.

 

Hebodoma Hemolele.

 

            Mai nehinei mai ka hoomaka ana o ka Hebodoma Hemolele iloko o na Ekalesia Katolika Roma a me Enelani, a ua kapaia nehinei o ke Dominika Pama (lau niu) a La Pule Lau Oliva paha.  Maloko o na luakini oia mau hoomana maanei e malama ia ai na anaina haipule, i na wa like ole, o kela a me keia la.  Poaha iho ka la holoi wawae iloko o ka Ekalesia Roma.  He la nui ia no ka Moi Vitoria e haawi ai i na kokua ana, mai kona mau lima ponoi aku, i na poe hune e noho kokoke aku ana i kona wahi ma Enelani.  A o ka Poalima aku ka la i kapaia o ka Poalima Maikai, a o keia La Pule ae hoi ka La o ke Alahouana.

            Auwina la o nehinei, i ke anaina pule Hawaii i ka hora 3:30, he 12 poe [9 kane a 3 wahine] oiwi o kakou i lilo i poe hoahanau no ka Ekalesia Enelani ma ke kau lima ana mai a ka Haku Bihopa o Honolulu nei.  I ke awakea aku, iloko o @a luakini o Sana Petero, eono poe Pake [2 kane a 4 wahine] i loaa ia kuleana like Poakolu iho, hora 7 ahiahi, e malamaia ai no he anaina o ia ano.

            Neoneo o Kamaki Kuea i ka aha puhiohe a ka hana Aupuni i ka po Poalima nei, i na kahuli leo-lea o ka lahui e uhene ana ma ka Hotele Hawaii.  Aohe mea hookahi malaila mawaho ae o na poe puhiohe.  Heaha no la ka mea hoohoa ae.

            Ehiku poe Pake piliwaiwai i kopiia i ka Poakahi i  hala e uku i $10 pakahi a me na koina, a he umi hoi i ka Poaono nei i loaa no ia haawina, me ka hookuuia o 32 poe e ae no ia hewa.  No kela La Pule aku ke hopuhopuia ana o keia poe hope iho.

            He eono poe aʻo holomoana o ka mokukaua Piladelepia i huli hoi aku no Mea Ailana ma ka Alameda o ka Poaha nei, no ka hoike ana i ko lakou makaukau.  Ma ia moku hookahi no i holo pu aku ai ka Peresidena o ka laina mokumahu holo piliaina o Poka Ma no Kapalakiko malalo o kekahi hana.  Ua manaoia nae i holo aku nei oia e kaai i mokumahu hou i pani no Pele.

 

AUWAI IO KE ALOHA.

 

Mahiehie no na Kokua Manawalea no na Ohana o na Pio Kalaiaina.

 

            Ua hoopua iki wale aku no KA MAKAAINANA nei ma ka helu i hala no ka mea pono ia kakou e hana ai no ke kokua ana i na ohana hele, h@ne, a pilikia io maoli o na hoalahui o kakou e noho nei ma ke ano he poe pio kalaiaina malalo o ke Aupuni.  A e like no hoi me ka makou i hoomaikeike aku ai no kekahi  halawai e malamaia ana ia auwina la no ka noonoo ana i keia kumuhana ku i ke aloha oiaio pela ia po i hanaia like me ka mea e hoikeia aku ana mahope iho. 

            Hora 3 o ia auwina la Poakahi i akoakoa ae ai kekahi heluna kakaikahi o na wahi e a me na kane aloha aina ma kahi noho o J. Nawahi, mauka o Kapalama aenei, a ua hookahuia a ku he ahahui no ke noi hele ana aku iwaena o ka lahui, i na poe no hoi e aloha mai ana, no na kokua ana mai i keia hana maikai, a oia hoi ka Ahahui Kokua Manawalea i na Ohana Pilikia o na Poe Pio Kalaiaina, a i ole no hoi ia olelo iho no hoi he Poe Pio Aloha Aina.

            Eia iho na luna ikohoia: Misasa Aima Nawahi, peresidena; Misasa Mineva Fenana, puuku; J. K. Kaulia, kakauolelo.  Ia halawai no hoi i kohoia ai na papa komite, a penei iho no ia:

            Komite Hooko, elima la a, o lakou no na Misasa Nawahi a ioe Fenana, na Misi Luse Pibode a me Hate Hailama, a me J. K. Kaulia.

            Komite Waiwai, he 19 na lala, no lakou na inoa o Aberahama Fenana, lunahoomalu, a me na Misasa Amalia Keoe, Lala Mahelona, Lilia Aholo, Kekona Pilipo, Lahapa Mauliawa, Mikala Maile, Kilikiliula Weed, Maraea Kaulia, Ema Kipili a me Keluia Kainoa, na Misi Hate Kini.  E. K. Doir@na, Hanaia a me Mele Keaomakani, a me W. F. Reynolds, (Reinolo), F. J. Testa (Hoke) Enoch Johnson ame J. K. Kauila. 

            Komite Ninaninau, elua lala, o J. K. Kauila a me Enoka Johnson.

            Komite Kaahele, e nana i ohana pilikia, elima lala, oia na Misasa Nawahi, Minewa Fenana, na Misi Luse Pibode me Hate Hairama a me J. K. Kauila.

            Ma keia halawai no i hoomaopopoia ai no ka pono e malamaia kekahi mau buke kakauinoa no na poe kokua mau, a ua hooholoia pela.  Aia ia mau buke iloko o eha keena e loaa ai, oia no na keena like ole o na lala kane eha o ke komite waiwai.

            Auwina la ae o ka Poalua mai i haawiia aku ai na palapala noi kokua dala i na lala o ke komite waiwai, a no elua no la o ka hele nui ana a halawai hou no ma kahi mua i ka auwina la Poaha iho la, a ua hoihoi aku na lala eleu o ua komite la i na hua ohiai i loae nui ia lakou.  Penei

           

KA HOIKE O NA LOAA:

Mrs. Laura Mahelona              $  85  00

Mrs. Amalia Joy                          54  35

Miss E. K. Doiron                       47  50

Mrs. Maraea Kaulia                     43  50

Miss Hanaia                                40  00

Mrs. Keluia Kainoa                     12  70

Mrs. Kekona Pilipo                     11  55

Mrs. Lilia Aholo                          10  50

Mrs. Lahapa Mauliawa                 7  00

Mrs. Kilikiliula Weed                   2  00

                        Huina              $314  10

 

            la halawai i hoomaopopoia ae ai he 35 ka nui o na ohana popilikia io maoli, a ua hooholoia he $2 ke kiekie e haawiia ai i ka pule hookahi i kela a me keia ohana, a i  ka Poaono nei no i hoomaka koke ia ai ke kokua ana, me he la mai ka la mua mai no o keia malama.  Eia iho

 

KA HOIKE MUA O NA HOOLILO:

Ohana o           Poaka                          $    1  00

"                    Keoni Beka                       2  00

"                Makakoa                           1  00

"                   Pita Hookano                 1  50

"                Kahaiao                         2  00

"                      D K Koa                           2  00

"                      Kaanaana                          1  50

"                     L Kameakane                 2  00

"                     R Palau                            2  00

"                      Manuel Kuhio                1  50

"                     D Keaunui                        1  00

"                     J K Kamali                        2  00

"                     Kaanaana                          1  00

"                      Keawekalohe                 2  00

"                      Nahinalau                         1  00

"                      Inoaole                                       1  00

"                      Pihana                                        1  00

"                     Enoka                                        1  00

"                     H P Kaohi                         1  00

"                      Kamaka                             1  00

"                      H Kalei                             1  00

"                      Aberahama                        1  00

"                       Kaowili                             1  00

"                       Geo. Makalena                  1  00

"                      Kaaihue                             1  00

"                      Kamai                                           1  00

"                      S Kalalau                           2  00

"                       Elia                                   1  50

"                       D Damiana                       1  50

"                       Kan@uu                           1  50

"                       Keamopohaku                   1  00

"                      Kauai                                 1  00

"                       John Mahuka                     2  00

"                       Waianae                            1  00

"                       John Piko                          2  00

                                    Huina              $  48  00

Koena ma ka waihona i

            Aperila 6, 1895                      $266  10

            O keia huina o na lilo i ukuia i kela a me keia poo ohana, ua ukuia aku ia i wahi ola no lakou no keia mau la e like me ka lakou mau olelo hoike i ke komite ninaninau,  a ua hoopaneeia ka uku ana i na aie hale hoolimalima a me ka poi a hiki i ka wa a ka papa hooko e ike ai i ka lawa kupono o ka waihona no ka uku ana i na lilo aie o na  ohana, ke hiki.  He mea makehewa no paha ka hoomaopopo ana aku no na aie, ina he mau aie kahi, no ka manawa mamua aku, aka, e pono no e nee aku imua a i ko mua aku no e nana pono ai.  Mai no a hooki iho i ka hana i hookumu a i hoomakaia, aka, e hoomau aku, oiai, aole  keia wa wale no ka mea nana.  Eia aku no ua wa o mua aku nei mai keia pule aku.

            Aka, o ka lulu a me ke kokua mau ka oi loa aki, ina ma ka pule a ma ka malama paha, e laweia ana mai ka hapaumi a pii aku.  E hoomanao kakaou ke houluuluia na kulu wai liilii, e lilo ana no ia i mea nui, a pela no hoi me keia.  Oia, e alu like mai.

            Ua hoikeia mai ia makou ua hoohoa aku no ka kekahi o na lala komite wahine, oia o Misasa Mahelona, i ke Kuhina Kalaiaiana i ka Poalima nei, no ke noi ana aku no na hale kaawale o ke Aupuni ma ka Pa Hoopae, Limahana makai o Kakaako, i wahi no na ohana e noho ai me ka uku ole, a ua paneia mai ka he hana pono ia e noonoo ai a e noonooia aku ana e ke Aupuni.  Mawaho ae o keia ua loaa mai kona inoa no kekahi kokua dala ana.  Ua loheia o na hale ohua waiho wale kekahi o ke Aliiaimoku e loaa mai ana.

            Lapuwale no hoi o na lapuwale, lilo ka luhi o kahi poe i mea ole i kahi poe, me he la no hoi ua nele me ka noonoo.  Po Poaono nei i ikeia ai kekahi o na wahine i kokuaia e holo kaa poniniu ana.  No ka pilikia hoi ka mea i kokuaia ku ai, eia ka a he uhaai maopopo no na mea pono ole a waiwai ole.  E hoopau koke i na kokua ana ia poe, a e hookuu aku ia lakou e hele loa pela.

 

            Puali Puhiohe Lahui.

            Ua hoopiha makolukolu ia ae ke kuea o ka Hotele Hawaii i ka po Poalima nei, i na poe o na lahui like ole mai na kane, wahine a me na kamalii, io ke ake e lohe honi na kahuli leo lea o ka Bana Lahui Hawaii.  I ke ao okoa no kahi poe o ka hele ana i loaa ona wahi e noho ai, a i ka poeleele ana iho ua hele a piha a hookeke.  O ka piha no ia mai loko aku o ka pa a me na alanui a ane hiki ole i na kua ke hele ma kekahi aoao.  Ua kohoia ka nui o na poe i akoakoa ae malaila ke hui pu ia me na poe maka malihini e nonoho ana iluna o ka lanai o ka Hotele, aia ma kahi o ka elima a eono tausani, a ane kokoke aku no paha i ka 15,000 a Ka Leo o ka Lahui.

            He manawa loihi aenei ko lakou noho ana me ke puhi hou ole, a iloko nae o ia kowa loihi aole loa i hoano e ia ae ka lakou mau leo.  O "Leahi" ka lakou leo maki mua loa i puhi mai, he nani maoli no, aka, aohe hie o na leo e ae iho.  O na himeni iho no me ua hula., he nani maole no i ua poe keiki ai pohaku nei.  Ua piha ohohia ke anaina i ko lakou hoopoina ole i na leo mele kahiko o kakou nei.  Mahalo a nui

            Ua hoihoiia o Ohumu, he wahine Hawaii iuka o ka Halemai Pupule, i ka Poalima iho nei.