Ka Makaainana, Volume III, Number 5, 8 April 1895 — Page 3

Ka Makaainana.

HONOLULU, OAHU, POAKAHI, APERILA 8, 1895.     3

 

NA AINA MAMAO.

Na Lono Huikau mai na Wahi Like Ole mai o ke Ao Nei.

Hihia Oki Mare o Vanabila.

            Imua o ke kau kuikawa o ka Aha Kiekie o Nu Ioka, Mareki 5, i aeia ai ke noi a Mrs. Aleva E. Vanabila no kona kaawale loa mai ia W. K. Vanabila aku, kana kane mare, mamuli o na hana moekolohe me hai. Mamuli hoi o keia moku ana o laua, ua hooholo a kauoha pu mai ka aha aole e hiki i ke kane ke mare vahine hou i ka wa o ka wahine e ola ana, aka ua hiki nae hoi i ka wahine ke mare aku i kana mea i anoi ai i ka wa o ke kane e ola ana, me he la, ua make oia. Ma Nu Ioka aole io no e hiki ia Vanabila ke mare hou, aka, ma na wahi e ae o ke ao nei, ua hiki no. Ua oleloia ua haawi aku ke kane i ola no ka wahine a me na keiki elua a laua he $3,000,000, a me kekahi mau apana aina me na hale, i wahi no lakou e noho ai  A ua ae no hoi ke kane e uku mau i ka wahine i $250,000 o ka makahiki no kona wa ola, me ka nana ole no kona mare me kahi aku. O keia W. K. Vanabila, oia ke keikikane elua a Wiliama H. Vanabila i make. O kona waiwai he $80,000,000.

 

Ki Pu ia o Li Hana Kana.

            Oiai o Li Hana Kana, ka elele imi maluhia o Kina, e hoi ana no kona wahi i noho ai ma Simoneseki, Iapana, i Maraki 24 i hala, mahope iho o ka hele ana no kekahi ahakuka me Kouna Ito a me Visekouna Mutesu, na elele maluhia o Iapana, ua ki poka ia aku la hoi oia e kekahi Kepani opiopio. Ua lele pololei aku ka poka, eia nae, ua pomaikai loa oia aole i nui ka poino mawaho ae o kekahi eha ma kona helehelena. Nui ka pioloke mamuli o keia hoaoia ana e lawe ae i ke ola o ka elele a ka Emeperoa o Kina, a ua lehulehu hoi ua hoike manao ana no ke kaumana kuhohonu i kau uku maluna o kela a me keia. Ua hopuia ka mea i hoao ai e laweola, me ka manaoioia na alakai hewa la kona manao makee aina, a ua oleloia no hoi ua pupule ka ua mea la, a nona hoi ka inoa o Moiama Kokunosuki.

            Ke holopono la ko Li Hana Kana eha mai ke kulana ano hopohopoia a i ke kulana e palekana ai, a ke nee mau la hoi kona oluolu imua. He kue loa o Li Hana Kana i ka unuhiia ae o ka poka, oiai, aia pono iho no ka malalo ae o kona maka hema. Ua hoouna ae ka Emeperese o Iapana he elua mau kauwa e lawelawe ai iaia. Aia ke komo nui la no ua palapala a me na olelo hoa`loha`loha mai kela a me keia wahi.

 

Na Hana Hiena a na Poe Tureke.

            O na hana hoomainoino a luku wale aku no i hanaia aku e na poe Tureke maluna o na poe Amenia, ua oi loa aku ka weliweli a me ka manaonao maua ae o ka mea i lohe wale ia, a ua kakooia mai hoi na lohe ana e na poe misionari Amerika iwaena o ia lahui. Aia no hoi iwaena o na poe Amenia he heluna o lakou he poe kupa Amerika, oia hoi, ua haalele iho i ko lakou aina a holo no Amerika e noho ai no kekahi mau makahiki a hiki i ko lakou lilo ana i poe kpa, alaila, huli hoi hou no ka aina oiwi. Ua komo aku iloko o kela poe i hoopoinoia kekahi o keia poe, ua ui ae lakou i ko Amerika Huipuia komo kokua aku ia lakou, eia nae, aohe ia Aupuni i ae aku, no ka mea ia lakou i huli hoi hou ai i ko lakou aina, ua pale ae lakou ia Amerika ma ke kua. Ua oleloia ae ina e komo aku ana o Amerika iloko o na hana ma Europa, he kue loa ana ia i kona kahua alakai aole e komo akeakea aku i na aina kuwaho a e hoohihia wale hoi iaia iho me na hana o na aina e, a oleloia ai e kekahi nupepa o Parisa he mana hou oia iloko o Europa ke komo io aku ma kela hana. O kekahi no hoi, he poe Amerika ka hapanui loa o na poe misionari malaila o ka heomana Kalawina. Ina aha aole o Amerika e komo aku ana, alaila, o Rusia paha ke komo ae ana, no ka mea, ua uiia aku kona akeakea mai ma o ka Ekalesia Helene la  Mawaho ae nae hoi o keia mau lono a pau i oili ae i ke ao malamalama, ua hoole o Tureke i kona hewa, oia hoi, ma o kona mau luna oihana a aliikoa, i hui pu ia hoi me na koa, a ua hookauia aku no ka hewa maluna o na poe Amenia, no ka lele mua, a aia he heluna nui loa oia lahui ke hoeueu la e kipi kupe aku i ka maa hoomalu o Tureke. Ma Vana, Amenia, i ka La Pule, la 9 o Maraki, ua akoakoa ae he 3,000 kanaka ma kekahi halawai e kue i ka hoomauia o na hana lapuwale a uko ole, a ke mau la no hoi ka hopuhopuia o na kanaka me ka hewa ole. Ua hele aku ke komite o ka halawai e ike i na kanikela a pau, me ka uhai aku o kekahi kaoo kanaka nui mahope o lakou, no ka uwalo aku ia lakou e noi aku i ko lakou mau aupuni no ka hookoia mai o ka Pauku 61 o ke kuikahi o Berelina. Aohe akaka o ka panina, ka hopena a me ka pahuhopu o keia mau hana.

            Mamuli mai no hoi o kahi mau hana e like me keia ae la ke ano, i hana a lawelaweia no kahi mau makahiki lihi i hala ae, a oi loa aku nae hoi iloko o ka makahki i hala iho la, ua hoouna aku ke Aupuni Tureke i aha nieniele no keia mau mea i hanaia, mamuli paha hoi kahi o ka hookikina ana a na mana e ae. Ua hoikeia ae na nui a lehulehu na olelo ike i waihoia ae imua o ua komisina la,a  ua oolea maoli no kahi e kue ana i kekahi poe luna aupuni Tureke a me na poe Kude. Aole nae hoi ua aha la i waiho ae i kana hoike, aka, ua manao wale ia e aai loa aku ana no ia maluna o na poe i hewa a i hawahawa na lima.

 

Na Hunahuna Laulaha.

            E holo makaikai ana o Haku Rosebere i kahi wahi mehana no kona ola.

            Ua hooholo ko Nebarasaka Hale o na Lunamakkainana i bila kanawai kue i ke kikalika (cigareta).

            He bila kanawai ka ke kulanakauhale o Toronoto, Kanada, imua o ka Ahaolelo o Onotario, e noi ana e kukuluia ae i oihana panihakahaka ahi me $1,000,000 kumupaa.

            Iloko o ka Hale o na Elele o Farani, ano mai nei, i kukaia ai ke kulana like o ka ikaika mawaena o na pualikoa Geremania a me Farani me ka piolokeia. Ua olelo ae he Kuhina Kaua he 50,000 ka heluna oi ae o ko Geremania poe koa i ko Farani.

            Ua hoi aku o Beritania Nui ia Nicaragua e uku ae i $75,000 iloko o ehiku pule (mai Maraki 19 mai paha) ma ke ano koi poho no ke kipakuia ana o Haki, ka agena kanikela Beritania ma Bulufila i ka wa i uluaoa ai ma ka Aina Mosekito (Makika) i kela makahiki aku nei.

            Ua hololea loa na kukai kuikahi ana mawaena o Iapana a me Amerika Huipuia, a ua apono loa ia hoi e na poo o na Aupuni a i elua. He kuikahi keia o ke ano like me ka Beritania Nui i hooholo mua ai, a o Hawaii nei hoi ka mua loa, e ae ana i ka maa hookolokolo ponoi o Iapana i na poe kanaka o na lahui e ae e noho ana maloko o kona mau palena.

            Maraki 4 i mare ai o Misi Ana Gonia ia Kouna Paulo F. Boniface de Casetelane, he lala no kekahi oihana alii o Farani. Na Akibihopa Corigana laua i hipuu ae ma Nu ioka. He kaikamahine ka wahine na Jay Gould, ona miliona o Nu Ioka i make, a na kona kaikunane, George J. Gould, i haawi a hookuu aku iaia e mare. I ko laua wa i uoia ai, e hanaiia ana he 1,000 o na keiki ilihune ia awakea, he haawina kokua hoi mai ia Ana Goula a me kona pokii, misi Helena Goula.

            Ua oleloia o ko Samoa mea ka euluku mau nei, wahi a ka hoike a na palapala pili oihana Amerika mala la, mamuli no ka oi o na komo a hana akeakea mau a na kanikela o na aupuni e ae. Me he la pela io no. Nui no hoi ka pioloke ma Samoa i ka ikeia ana na kekahi hui kalepa Geremania nui e hookomo a e kalepa la i ka pu, a me na lako kaua i ka aoao kipi a kue i ko Malietoa aupuni.

 

Nui Ka Ino ma Mahukona.

            Nui ka makani o Kohala nei i keia mau la me ka ua pu no hoi. I ka holo ana mai a Kilauea Hou i ka la Sabati i hala aku la, aole i ku i Mahukona, ma ke alo iho o Kahua kahi i ku ai a malaila i hooleleia mai ai na eke leta, ma ke alo iho o ka palekai o ke alahao. Na kamalii hana o Mahukona i kii aku i na eke leta maluna o ke kaa pauma a hiki i Mahukona ia La Pule. Ma kela huli hoi ana mai nei a Kinau mai Hilo mai a ku i Mahukona ia po, ua hooleleia he elua waapa, hookahi i hiki pono iuka, o ka lua o ka waapa ua puhiia e ka makani a mawaho ae o Koaie. I ka piha ana o keia wapa i ka ohua, ia huli hoi ana aku ua mamao loa ka moku, a ia makaukau ana e hoi hou iuka nei, aole i hiki, ua puhi hele ia a loaa ka lua o ka waapa i puhi mua ia ai. Ia wa i hoikeia ai ke kukui i ka moku, ua pii pololei mai a loaa keia mau waapa elua, ua hiuia iluna a mawaho ae o ka hale ipukukui hookuu hou ia ka waapa no ke kii ana i na ohua i koe iuka o Mahukona. Ia hoi ana aku o keia waapa a pili i ka moku, ua hiu aku o Kinau no Kawaihae.

            G. W. K.

            Mar. 28, 1895.

 

            Wahi a C. J. Laiana, iloko ka o 1850 i hoau mua loa ia ai na wahi leta maanei.

            Makai o ka uwapo mokumahu o Poka Ma, mamua o ka holo ana aku o Malulani i ka Poalima, Maraki 29 iho nei, ua puiwa ia iho la a lele pi ka lio kaa o kekahi o na kaa hoolimalima e ku ana malaila mamuli o ke kani ana o ke oeoe mua o ka moku, a hoomaka ae la e owala me ke peku ana a loaa ke kuekue lima hema o ka malamamoku a eha loa, pela pu no hoi me ka aoao hema. He mau kaikamahine elua ke ku ana mamua pono o ka lio i kela wa, a e hoomaka ana ke kalaiwa e peki hope a loaa ai kela ulia.

 

HALEKUAI LOLE NUI.

GOO KIM – Alanui Nuuanu

            E loaa no na papale wahine ano hou loa maanei, na papale kapu, na lole kalakoa o na ano ike ole, pela pu no hoi me na lole silika, na lihilihi hoonani o na ano like ole, na kamaa aulii mai ke nui a ka liilii, na koloka hoopumehana o na la puanuanu, na hulu papale keokeo, ulaula, eleele, a pela aku. Oluolu ke kumukuai.

            E hanaia no na paa lole kane no ka uku haahaa. Na papale kane ano hou loa maanei. Na hainaka silika, mai ke nui a ka liilii, E loaa mau mai ana na lole hou ma na mokumoku a pau mai na aina e mai.     KUKIMA.

            apr 5-4mnw