Ka Makaainana, Volume IV, Number 5, 29 July 1895 — Page 1
Ka Makaainana.
BUKE IV. - Ano Hou. Honolulu, Oahu, Iulai 29. 1895. HELU 5.
Wahine i ke aka Aulani.
Auhea wale oe Puakinamu,
Ka wahine i ke aka pukaaniani,
Ilaila ke gula me ke daimana,
Ke ike iho oe e hulali ana,
Aia ilaila kuu lei nani,
Ke hilia mai la e ka nui manu,
He wahine akamai i ke kui pua,
I ka pua ohelo ai a ka manu,
Ka lehua makanoe ka'u aloha,
Hoopuluia nei e ke kehau,
Ka noe a ka ua liilii ea,
Kahiko i ka liko a o ka lehua,
Kuu komo daimana ka'u aloha,
E anapa nei hoi ko lima hema,
Hiki mai ko aloha i o'u nei,
Papahi lei nani na kuu kino,
Ko leo no ka'u i aloha aku,
I ka i ana mai, pehea-oe?
Ua malu nei kino nau hookahi,
Aole na ka nui na ka lehulehu;
Hainaia mai ana ka puana,
Ka wahine i ke aka pukaaniani.
HAUOMAIHI.
-
He Ulia Poino.
I ka auwina la Poaha nei, oiai kekahi poe keiki Pukiki e mumulu ana iluna o kekahi paila pou e waiho ana ma Ewa iho o ka uwapo o Kinau, ua hanee iho la ua paila pou la a paa elua keiki malalo a lele hoi kekahi mau keiki iloko o ke kai. Ua ike koke ia mai la keia pilikia e na poe e hana ana ma ia wahi, a holo mai la lakou e hue i na pou a loaa iho la na keiki i pilikia. He hookahi i haki ka wawae, he keiki Pukiki, a hookahi keiki i nawaliwali loa a hoihoiia i ka Halemai Moiwahine. A ua make loa oia mahope koke iho o kona hoihoiia ana aku i ka halemai. He kumu keia e ao mai ana i na makua mea keiki mai no a hookuukuu wale i na keiki liilii makai o ka uwapo e maau hele ai, o loaa auanei i ka ulia pilikia e like iho la me keia. A he mea pono hoi i ka oihana makai e makaala no keia mau ulia. O kamalii Pukiki aihue laau no paha nei, i mea wahie no kauhale.
-
Wahi a na lono e haalele loa mai ana o Ilamuku Hikikoki ia Honolulu nei, ma neia mua koke iho, a o hoi aku ana i Hilo e noho loa ai. Heaha ka hewa, aohe minamina iaia, a owai no hoi ke uwe aku nona.
Auwina la Poakolu nei i hopuia ai o Keoki Wainee no ka hoeha ana i kekahi Pake ma Kapuukolo aenei. A i ka po Poaha mai hoi i hopuia ai he elua mau keiki hou no ia hewa like no. Kakahiaka Poaono nei i noho ai ka Aha Apana e hoolohe i ko lakou hihia a hoopanee hou aku la a keia Poalima iho mamuli o ka lawa ole o na olelo ike ma ko ke Aupuni aoao e paa ai ka hihia. Ua hookuuia mai keia poe keiki mawaho nei me ka bona ole.
Huakai Imi Opiuma.
Ma ka hora 7 o ka po Poaono, la 20 nei, i holo aku ai ka Lehua ma kana huakai imi opiuma. A i ke kakahiaka nui o ka Poalua nei i huli hoi mai ai ua mokukaua la me kana pio i hoohuoi wale ia, o Palanike Ionesona, he Suedena, makahiki e noho nei mauka o Leleo a e hana nei hoi ma ka uwapo Alahao, a he hunona hoi na D.F. Sanafoda o Hamakua, Hawaii mamua. Ua manaoia ua ike keia haole i kahi i waiho ai o ka opiuma a ka mokukuna Noma e huliia nei. He poe kanaka ekolu ka i hopuia i Lahaina a hookahi i Lanai, a na lakou i lawe ka i keia haole a hiki i ke Kaikuono o Manele, Lanai, kahi i manaoia ai aia ilaila ka opiuma kahi i waiho ai. Na keia poe i hoike na mea e pili ana i ua huakai kamahao nei a ua wahi haole la i na la i hala aku. He 1,468 ka nui o na tini opiuma, a ua hoopaaia ka mawaho ae o ka pahu e waiho ana o ua poe tini la he heleuma nona ke kaumaha i hiki aku i ka 250 paona. Ua nokeia i ka luu no ekolu mana wa iloko o ke kai, aole nae he mea i loaa.
Ua hookuuia ua wahi haole la mawaho nei no ke kali aku i kona hookolokolo ma Wailuku, Maui, ke hookolokoloia hoi oia, oiai, he koo ikaika loa oia no nei Aupuni mai mua loa mai.
-
Make Manaonao a Ulia Poino.
Ma ka la 22 nei, ua make loa iho la kekahi Kepani hana o ka mahiko o Kilauea, Kauai. O ke kumu, i haneeia e ka lepo i hui pu ia me ka pohaku, oiai e eli ana i puka malalo o ka lepo i wahi no ke kaa e komo aku ai. Iaia no e hoomau ana i ka eli, ua hanee iho la ka lepo o luna o kahi ana e eli ana, a paa loa iho la ia malalo a pakele aku hoi elua. He umikumamalima minute i hueia ai o ka lepo a loaa aku ai ke kino ua make loa. Ua nahoahoa ke poo a ua hemo hoi ko loko iwaho. Ua hoihoiia aku ke kino make no ka halemai, a ilaila ke koronele i noho ai e noonoo i ke kumu o kona make ana, a hooholo iho la ua make ma ke ano ulia.
I ka auwina la no o ia la, ua haule iho la he Pukiki mai luna iho o kekahi nini pohaku o 16 kapuai ke kiekie, oiai oia e manao ana e kiola i kekahi pohaku mai luna iho. Eia nae, iaia i hoao ai e hana pela, ua huki pu ia aku'la oia a haule ana ilalo, o ka pohaku mamua a o ko Pukiki aku mahope. Eia oia ke waiho nei ma kahi moe me ke ano kupilikii. He hapaha mile ka mamao mai kona wahi i haule ai a hoea i kahi o ke Kepani i make ai.
-
Hou Pahi Weliweli.
Mahope iho o ka hora 5 o ke ahiahi Poaono nei, mauka o Koiuiu ua hou ia iho la o Paulo, he makai kaulio, e Keo Koa, he inoa makuakane no Hanale Kipili, ka muli loa hoi o kona makuahine. Ua lele aku ua kanaka. nei e hou i ka haole no ekolu manawa, a o ia ka wa i holo aku ai o Kimo Kupihea e hopu ia Keo me ke kokuaia e kekahi mea okoa ae a hiki i ka lilo ana o ka pahi. Ua paa ae o Keo i ka Halewai a o ka mea i poino ua hoihoi loa ia no ka Halemai Moiwahine e lapaauia ai a ke pii ae la kona oluolu. Mamua iho ka o ka hou ana o ua wahi kanaka la i ka makai ua pepehi mua iho oia ika makuahine o Misasa Kami Kuaika a pau, holo aku la iwaho o ke alanui e hana ano e ai. O ka eono iho la ia o na manawa o ua wahi kanaka la i loaa ai i keia ano e maluna ona, oia hoi, he opulepule. Oleloia hoi he ikaika o Kimo Kupahoa, ia Keo nae, puhili. I hikii kaula ia oia-i hiki ai i kai nei o ka Halewai.
Ma ka noho ana o keia hihia hou pahi imua o ka Aha Apana i keia kakahiaka, ua hoopaneeia aku la a noho hou ma ke kakahiaka Poaha, mamuli o ka oluolu kupono ole o ka mea i houia.
-
Pa i ka Pohaku a ke Kanaka.
Ua loaa mai ia makou ka lono, he mau pule ae noi ka i hala, ma Halawa, Molokai, ua u aoao iho nei kekahi keikikane a me kekahi kaikamahine e haele laua i ke kanu pohuli iloko o ka loi. A holo iho nei ka manao iloko o laua, kau iho la ma na lio, a i ka ike ana i kekahi mea a ua ui la i ae mua ai, kuupau iho la laua i ka holo o na lio a hoea i kekahi wahi mamao kupono, kukulu ae la na lio a u lele aku la a malalo o kekahi pa pohaku e u paheehee ai i ka welowelo. Ia laua e u noke ana i ka hookuu i na ai hoopau a ka lawaia, a e ulele ana hoi owai la o laua ka mea oolea, hanee iho la ka pa-pohaku a haule pono iho la kekahi pohaku nui maluna o ka uha o ua kaikamahine la a paa loa iho la, aole hiki iaia ke oni ae. O i noke iho hoi ka hoa lealea i ka hapai i ka pohaku a aole wahi mea a hemo ae, a e ole e kii okoa i ke kaikunane o ua kaikamahine la, hemo ai ka pohaku. I ka wanaao Poaono nei i hoea mai ai ua kaikamahine la mai Molokai mai ma ka Mokolii, me ka eha no o ka uha, a ianei pana hoi e kaulai hou ai a loaa ae paha hoi ke ola, alaila, hoi hou no ka aina.
-
Na ka Hoku ke Eo.
Ma ka ulele kinipopo o ka Poaono nei, na ahai aku ka Hoku i ka lanakila ma ka loaa ana ia lakou he 14 ai-puni kue ia 9 wale no o Kamehameha. Eia iho na ai-puni:
1 2 3 4 5 6 7 8 9
Hoku 3 2 1 5 0 1 2 0 0 – 14
Kam 6 0 2 0 0 0 0 0 1 - 9
O Kamehameha kue ia Ikeole ia na hui e paani ana i keia Poaono iho.
-
Ma ka hoopii koi poho a Kamohoalii kue ia Maunaloa a me Palani, no ka hoihoiia mai o kekahi lio kea opio a me $50 poho, ua haule ka mea hoopii imua o ka Aha Apana i ka auwina la Poalima nei. Ua hoohalahala aku ka mea hoopii. No uka loa o Kalihi keia poe a pau, a no A. Rosa opio hoi ka lio e koiia nei.
I nei kakahiaka nui i huli hoi mai ai ke Komopani A o na koa Aupuni, mai ka hele hoomaamaa paikau ana iwaho o Maki Ailana,. i Kapiolani Paka, a hala loa no paha hoi iwaho o Palolo, Mokapu, a me ia mau wahi ae. Auwina la Poaono nei lakou i pau nui ai i ka hele, malalo o ke alakai ana a ehiku poe hookani pahu liilii.
I kekahi mau la aku nei, ua hamo iho o W.H. Makalena, ka malama buke o ka Hui Mokumahu Pili-aina, i kona lima i eha me ka aila alakohola, a i ka po Poaha nei hoi, ua poina loa oia i kela aila e pili la i kona lima a koe i ke kukaepele no ka ho a ana i ka ipukukui. I ka a ana o ke ahikoe, ua loaa koke mai la kona lima a lalapa ae la i ka nui loa. Ua holo koke aku oia a hookomo i kona lima iloko o ke kapu wai a pio iho la ke ahi. Ua papaa nae ka lima i ke ahi a hiki i ke kuekuelima.
I ka Poalua iho la, ua pii nui aku kekahi poe haole iuka o Nuuanu e hoohala manawa ai maluna o kekahi kaa noho aoao. I ka makaukau ana e hoi mai, ua kau mua ae la ke kalaiwa kaa a hoohuli malie mai la i na lio, aka, mamua o ka holopono ana o kona manao, ua pa mai la kekahi makani ikaika a huli pu iho la hoi ke kaa, Ua paholehole ke kalaiwa a maui pu ia no hoi kekahi o kona mau wawae. Ua telepona koke ia mai i ke taona nei, a hoounaia he kaa hou, oiai ke kaa mua ua pau i ke okaoka.