Ka Makaainana, Volume V, Number 4, 27 January 1896 — Page 1
Ka Makaainana.
BUKE V - Ano Hou Honolulu, Oahu, Ianuari 27, 1896. HELU 4
AMERIKA ME HAWAII.
-
Olelo Hooholo Hoohui a ka Aoao
Repubalika Amerika.
E like me ka makou i olelo ai ma ka helu i hala, pela no hoi makou e hooko aku nei ma keia nei, ma ko makou lawe ana mai a unuhi ae i kela olelo hooholo hoohuiaina i waihoia ai imua o ka Ahaolelo Amerika. A e like no hoi me na hoakaka e ae a makou, pela no hoi ko makou poe heluhelu e ike iho ai no lakou iho. Malalo iho ka makou unuhi ana o ua olelo hooholo la.
"Ke ae nei ka Ahaolelo o ka palena aina i hui kupono ia me ia a i kuleana pono ia ai hoi e ke Aupuni o Hawaii, a i maopopo mau ma ke kapaia o ke Sandwich Islands, e kukuluia ae hoi i mokuaina hou ma ke kulana Mokuaina o Hawaii, me kekahi ana hooponopono aupuni repubalika e aponoia e ka lahuikanaka o ke Aupuni o Hawaii i oleloia, ma o na elele la i akoakoa iloko o kekahi ahakuka, me ka ae o ke Aupuni o ku nei, i hiki ai hoi ia ke hookomoia mai ma ke ano o ia kekahi o na Mokuaina o keia Hoohui ana.
"A o kekahi hou ae hoi, o ka ae ana o ka Ahaolelo i olelo mua ia aenei, ua haawiia no ia mamuli o na kumu mahope iho a me na hooia ana mahope iho, oia hoi: "1. O ka Mokuaina i oleloia e hookumuia ana no ia mamuli o ka hooponopono ana a keia Aupuni i na ninau a pau e pili ana i ka palena a mana kuleana hooponopono paha e ulu ae ana me na aupuni e ae a mau aupuni mua paha o Hawaii a o kona kumukanawai hoi, me ka hoike kupono no kona aponoia ana e ka lahuikanaka o ke Aupuni o Hawaii, e hoounaia aku no ia i ka Peresidena o Amerika Huipuia no ka waihoia aku imua o ka Ahaolelo no kana hoohana hope loa ana ma ka la a mamua ae paha o Ianuari 1, 1898.
"2. O ka Mokuaina i oleloia, ke hookomoia mai iloko o ka Hoohui ana, mahope iho o ka haawi ana mai ia Amerika Huipuia i na waiwai o ka lehulehu a pau a no na loaa pomaikai o ke Aupuni o Hawaii, e paa aku no ia i na dala a pau o ka lehulehu o na ano a pau e kuleanaia ana paha, a i ole ia, ua aieia i ke Aupuni i oleloia, a pela no hoi me na aina waiho wale a noho kanaka ole ia a pau e waiho ana maloko o kona mau palena, e hooliloia aku no ka hookaa ana i na aie o ke Aupuni o Hawaii i oleloia, o ke koena iho o ua mau aina la, e hooliloia aku no ia e like la me ka ua Mokuaina la e kauoha ai, aka nae, aole loa ma kekahi ano, e hiki ai ua mau aie la i oleloia ke hooiliia mai maluna o Amerika Huipuia.
"O kekahi hou ae hoi, ina e manao ana ka Peresidena, o Amerika Huipuia ma kona noonoo ana he mea pono loa mamua ae hoi o ka hoomaka ana e waiho aku i ka olelo hooholo mamua ae i ke Aupuni o Hawaii ma ke ano he manao koi aku ma ka aoao o Amerika Huipuia no ka hookomoia mai, e kukai aku me ia Aupuni, alaila, e hooholoia, e hookomoia mai kekahi Mokuaina e kukuluia ae ana mai loko ae o ko Aupuni o Hawaii e mau la, me hookahi elele iloko o ka Ahaolelo, iloko o ka Hoohui ana mamuli o ka mana o keia kanawai, mahope koke iho o ka aelikeia ana o na kumu o ia hookomoia ana mai e na Aupuni o Hawaii a me Amerika Huipuia, a e Hookaawaleia hoi he $100,000 no ka uku ana i na lilo o na huakai elele (misiona) a me na kukai ana, ina paha ma ke kuikahi a mau palapala paha e like la me ka ka Peresidena e hooholo ai.
-
He $1.25 ko ka haneri hua alani o na Kona mai nei i kuaiia aku makai o ka uwapo i ka Poaono iho la. Ola no!
Eia ka mea omo lepo awa o ke Aupuni ke luai nei i keia kakahiaka, no ka wa mua loa, ma ka aoao ma Waikiki nei o ka uwapo a Haaliliamanu, ma kahi o ke kahawai i paia iho nei no kela alanui ae kahakai i manaoia.
Ke haawi aku nei o Makapolena Ma i na Waina Kaleponi ma na kumukuai haahaa. Ua maemae loa hoi ka lakou mau ano waina a aole hoi i paipaiia e like me na ano waina lehulehu e ae e kuaiia nei ma keia makeke.
I ka wanaao Poaha iho la, i kau Pake maauaua e nonoho ana ma alanui Maunakea ma ka lakou hana mau, ua hele aku la ka makai a kipaku ia lakou e hele i kai o ka makeke hou, kahi i hookaa waleia no ia mau hana. Ia hele ana hoi ilaila, hooleia mai la aia a hoolimalima aku. Nolaila, ua hoi hou no i kahi mau a hiki i ka wa e weheia ai ke koho ana o na rumi o ka makeke.
ULIA KAAMAHU.
-
Make Manaonao a Mainoino ia
Opio Oiwi
Mahope iho o ka hora 2 o ka auwina la Poakolu iho la, ua pii aku la a a'e maluna o Hanale Ferene kekahi huila o kekahi kaa ukana o ka Hui Alahao Oahu, oiai no e pahu malie ia ana e ko kaamahu, a make loa.
O ke kaamahu e pahu ana ia i kekahi mau kaa a kaawale aku ma kekahi alahao. Holo aku nei hoi o Hanale e wehe i ke pine i paa ai, aka, paa iho nei kona wawae i ke kuiki a hina aku la ilalo, aia no nae ke kaa ke nee malie la. A mamua o ka hiki ana ke hoopaa i ka holo o ke kaa ua pii aku la ka huila maluna o kona kua a hala ma kahi aoao. Lohe mai nei kekahi poe i ka uwe ae o Hanale, a o ia no ka manawa i kaheaia aku ai kekahi poe e hele mai e kokua. Ua hapaiia ae oia a ka hale hoolulu a mai laila aku i hoihoiia ai no ka hale, mauka o Kapalama.
Auwina la Poaha i hoolewaia aku ai a nalo ma ka ilina o Maemae, me ka ukali ia e na kaikaina o ka makuakane, ka lehulehu o na makamaka me na na hoa'loha, na kumu o ke Kula Kamehameha a me kona mau haku hana.
He keiki oia na Robata Ferene, e noho mai la i Kohala, a kaikuaana hoi o Heneri, Lipine, Keoki a me Keo e noho kalaiwa nei no ka Hui Alahao Hawaii. He keiki mahalo nui ia oia e na haku hana no ka eleu a me ka mikiala hana.
-
Kiure Hawaii, Kau o Feberuari.
Malalo iho e ikeia ai ka papainoa o na kiure Hawaii i waeia iho nei no ke kau kiure o Feberuari aenei: J N Taylor, A Bishaw, S Ladd, G W Macy, C B Dwight, A Morris, Wm Ringer, H Kamana, J Paaniani, E S Holt, G W Nawaakoa, Wm McGuru, S C Dwight, T W Jackson, M K Keohokalole, L Me Keague, J Padaken, C L Hapakini, James Mahoney, D Kamakauahoa, W L Paka, R H Baker, P. Souza, J W Mahelona, J K Kamealoha, S P Nohea, H Kolomoku, E M Jones, R Kamaka, W K Waiamau, G E Smithies, H E Cook, H Kaaha, J N K Keola, a me J L Kawewehi.
-
Ma ka la 13 ae o Feberuari i noho ai ka Aha Kiekie e hoolohe i ka hoopii hoohalahala a Linekona no ka hewa o ka heluia ana o kekahi mau balota ma ka apana o Honokaa, Hamakua Hawaii.
Kalaiwa me ka Laikini Ole.
Ia Keoki Ferene, kalaiwa kaa basa o ka Hui Alahao Hawaii ma ka hoolewa o kana keiki hanauna, ua lilo ke kalaiwa ana o kana kaa i kekahi no o na kanaka hana o ka hui. I ka ike ana o Makai Kaa Mese he mea okoa ke kalaiwa, ua hopuia iho la ua kalaiwa kaa la a hoopaaia i ka Halewai no ke kalaiwa me ka laikini ole. Ua hele aku ka lunahoohana me ka manao e aeia mai oia e ku hope aku, aole nae i aeia. E ole ko Kapena Paka hoea ana aku, mahope nae o ka paa ana no kekahi mau hora, ua hookuuia mai oia me ka bela ole ia. I ke ku ana imua o ka Aha Apana i ka Poalima nei, ua hoopaiia oia he $2 me $2.20 koina. Ua hoohalahala loa aku ka mea hoopiiia i ka Aha Kaapuni ma ke kiure.
-
Paiki Dainamaita.
Ua loaa aku ia Lutanela Makai Nidamu i ka po Poaha iho la ma alanui Kahunapule he wahi paiki eleele ano hoopahaohao. Lawe ae la oia i ua wahi paiki la a ma kahi malamalama i ke kukui, a nana pono iho la. E kau ana he mau huaolelo ma ka aoao o ua paiki la, penei: "Dainamaita." Ua lawe loa aku la oia a ka Halewai, a i ka wehe ana ae e nana, he mau iwi kanaka ko loko a e mau ana no ka honohono lepo. He mau iwi poo kanaka elua ua wahiia i ka welu keokeo, a o kekahi mau iwi ua opeia iloko o kekahi pepa hauliuli. He mau apana pepa okoa ae kekahi i loaa aku iloko. Ua manaoia, o ka hueia ana mai no paha ia mai loko mai o ka lua, a e manaoia ana paha e hoouna i Kina.
-
Ua make hikiwawe loa ia kekahi Pake i ka po Poaha iho la ma ke alo iho o kekahi halekuai Pake e kokoke la i ka Be Viu. E iho mai ana paha oia no kai nei, aka, hookui iho la kona wawae me kekahi apana papa a o kona hina aku la no ia ilalo, a o ka lele loa ae la no ia o ke aho. Ma ka hoike a Kauka Emekona, he mai ma ka puuwai kona kumu i make ai. Ua kanuia oia i ka Poalima nei mauka o Pauoa.
I kahi mau la o ka pule i hala iho la, ua oki iho la kekahi elemakule nona ka inoa o Lulana i kekahi mau ilio me kana koi a make loa. A pau hoi ia, ua hoomaka aku la oia e alualu i kekahi mau wahine elua me ka nou pu aku i ua koi nei ana ia laua aole nae i loaa aku. Ua paa oia i ka hopuia a hookaaia ma ka Halewai. Makai o Kalia kona wahi i hana ai i keia mau hana lapuwale. Ua manaoia ua loaa oia i ka opulepule.