Ka Makaainana, Volume V, Number 16, 20 April 1896 — Page 4
| This text was transcribed by: | Leimana Lukela Ritte-camara |
| This work is dedicated to: | Molokai Nui A Hina 3 |
Ka Makaainana.
HONOLULU, OAHU, POAKAHI, APERILA 20, 1896
KA MAKAAINANA,
HE NUPEPA OILI PULE.
W.H. KAPU,
Ona, Luna Nui a Lunahooponopono.
Wahi noho, ma Honolulu.
F.J. TESTA (Hoke),
Puuku.
KEENA: Helu 327. Alanui Moi, ma Waialeale, kokoke i Alanui Konia.
UKU O KA NUPEPA.
No ke Kope Hookahi $.10
No Hookahi Malama .25
No Ekolu Malama .50
No Eono Malama 1.25
No Hookahi Makahiki 2.25
Ina e hookaa mua ia, penei iho ka auhau ana:
No Ekolu Malama $.50
No Eono Malama 1.00
No Hookahi Makahiki 2.00
POAKAHI APERILA 20, 1896.
HE makehewa loa i kahi poe ke manao iho a haohao no ka loaa ole aku o ka lakou mau nupepa. O ke kumu o keia, ea, ua hoike mua ia aku no ka lohe, ua pau ke kuleana o ka hookaa ana, a ua hilinai ole ia no ka manawa e hele nei aia no a hoolele mua ia mai ko kapuahi. Ke hooko no i ko kapuahi, ua awiwi loa keia aoao e hookokoke aku. E hoao mai no ka pono, a pela no auanei e ike ai.
INA e hoomauia na kauka hiki ole ke hilinaiia iluna o na mokumahu e kipa mai nei i o kakou nei, ua hoea mai hoi ka wa e kipaku loa aku ai ia mau moku mai ke kipa ana mai. Ua hoopunipuni paha hoi kela kauka o ka Belegika no ka pono o kona mau haku, a ua nana ole hoi i ka hanohano o kana oihana. O kekahi poe kauka ae hoi, e like la paha hoi me ko ke Gei ka, ua makee lakou i ko lakou inoa a me ka hanohano o ka lakou oihana. Kokua makou i ka manao o ka Papa Ola e kipaku loa ia kela kauka o ka Belegika mai ka noho kauka ana iluna o ia moku.
MA ka aoao 3 o keia helu, ke hoopuka aku nei makou i kekahi mookuauhau iwikuamoo o ko kakou mau Alii, i haawi oluolu ia mai na makou e hoopuka aku. Ua hauoli makou e hoopuka aku, no ka mea, e like no me na hoakaka ana a ka mea kakau kuauhau, pela no hoi makou e manao nei, oia hoi, he mea pono loa e ike ka hanauna opio o Hawaii nei i ka moolelo a me ke kuauhau o na haku Alii o ka wa i hala a hoea loa mai i ka wa a kakou e luakaha nei, me ke koe ae no o na oehaa mawaho. He mea waiwai nui keia a e pono hoi e malama loa ia, no ka mea, ua laweia mai no mai na mea i hoopuka mua e na poe i ike a i hilinaiia no ka makaukau.
KUMU ALAKAI KAHIKO
Ua lilo ka hoopaeia ana ae o ka mea i loohia i ka mai hebera a me na eemoku e ae o ka mokumahu Gelika, e hoomaluhia nei makai o Kahakaaulana, i mea e nune a e kamailio nui ia ai iwaena o kakou, me ka oleloia iho he mau hana nanamaka keia na ke Aupuni. Ia makou hoi, aole loa pela ka mea i manaoia. Ua oleloia ma ia kanawai o na aupuni naauao, o ka waiho ana i kahi mea i loaa i kahi ano mai ahulau iwaena o na poe eemoku, he hana aloha ole ia a manao makee kanaka ole, no ka mea, ua kaawale hoi he kahua e hoomalu ai.
Ke hoomanao nei no paha ka lehulehu i ka Kipikona, Kuhina Nui a Peresidena o ka Papa Ola, nona hoi na hoomanao ana i hiki ole ke hoopoinaia, mea i hana ai ma ka hoomalu ana i ka mokumahu Maderase iwaho o ka Nuku o Mamala no kanakolu a oi la. Ua ala mai he hoopii koi poho ana i ke Aupuni mahope mai no ia hana a uku io ai no ke Aupuni i ke poho no ia hana ana ma kahi o $30,000 a keu. Ua loihi ka paio ana imua o ko kakou mau Aha a ko no na agena o ua mokumahu la.
Ma na ano apau, ua pono a ua pololei kela mea a Kipikona i hana ai, oia hoi, ua makeeia ke ola o ka lehulehu o ka aina nei. Ua oi aku hoi ia mamua ae o ka poino ana o kahi ola hookahi, a he mea ole na dala e lilo ana. Eia nae, aole pela ko na Aha manao ma o na kanawai la o na aupuni. Nolaila, ua lilo ia hana i kumu alakai no nei wa, a eia hoi na hoohana ana o keia wa e like la me na mea i aoia mai e ko ia wa mau lawelawe ana. Ua hiki ole i ka Papa Ola ke alo ae, no ka mea, he kahua hoomalu ko kakou, a o ke Aupuni wahi hana wale no ka hooili aku i na hoolilo no ka hoomalu ana maluna o ka moku nana i lawe mai i ka mai. Ma ia wahi, ke kakoo nei makou i na lawelawe ana a ke Aupuni ma o ka Papa Ola la.
NINAU AUHAU KULOKO.
O ke kumukaha ano nui keia o ka manawa e puke nei i na noonoo ana o ko kakou poe ha@ @ehaa hou; a ia lakou hoi @ nei imua o ka Ahaolelo, @ @ea i waihoia aku e @. Waiwai ma ko ke Aupuni @ e hiki ai la hoi ke loaa he kahua no ka hoohana aku. Ua hoike aku makou ma ka helu i hala no ka hoolahaia ana ae o kela hoike helu auhau a ke Kuhina Waiwai i hoomakaukau ai, ana hoi i makemake ole e hoike akea ia i kona wa i waiho ai imua o na Senatoa. Ia wa like no hoi makou i hoomaikeike aku ai no kekahi mau heluia ana o kekahi mau hui mahiko i hoohui ole ia malalo o na kanawai o ka aina nei.
Ua akaka loa ma keia hoike helu ke kaulike ole o ka hookauia ana o na auhau, e like no hoi me ka makou i olelo mau ai, aole loa ke koikoi maluna o na poe waiwai, aka, maluna no o na poe ilihune. O kekahi o ia mau helu kaulike ole ka makou e lawe mai nei a waiho aku imua o ka lehulehu, a i mea hoomaikeike a kakoo hoi i ko makou kahua.
E nana ae kakou i ka Hui Mahiko Ewa, o ka mua loa ia ma kela hoike helu, ua hoohuiia no $750,000 a ua pau i ka ukuia. Ua hoike aku na luna hooko i ke Kuhina Kalaiaina ma ka la 1 o Iulai, 1895, he $651,663.55 ka waiwai io mai na mea paahana a me na mea e ulu ana. Ma kahi hoi o ka uku ae o ia hui mahiko iloko o ka Waihona he $6,516.63, ma ka hookahi pa keneta, ua loaa ma kela hoike he $5,786.83 ka huina auhau i ukuia, a ke kuhi hewa ole makou, ua komo pu iloko o ua huina na auhau o na limahana. O ka mea pololei maoli, ma ko makou manao ana, e auhauia lakou i ka huina i hoohuiia ai, oia hoi, he $750,000, a e loaa ana he $7,500 ma kahi o kela $5,786.83. A like no me ua hoike la a ke Kuhina Waiwai he $103,055 ka waiwai io e ke ko e ulu ana, alaila, e loaa ana i ka Waihona he $1,030.55, eia nae; aole pela ke ano o ka mea i loaa. Ke kohoia hoi ma ke kaumaha o ke kopaa i loaa mai ke ko e ulu ana i Iulai 1, 1895, ua kohoia ma kahi o 9,000 tona, a ma ke $65 o ke tona, he koho kupono ana ia no ka ulu ko, e loaa ana he $585,000 ka waiwai io, ua like ia me $5,850 ma kahi o $1,030.55. Nui no ke kapakahi a me ke kupaiahana o kela mau hana ana a na Luna Helu.
Pela hou ino no hoi ua hui mahiko, o ia ka Hui Kopaa Onomea, i hoohuiia malalo o na kanawai ma ka waiwai io, o $150,00, a maluna hoi o keia waiwai io ua ukuia i kona poe paa kuleana iloko o 1894 he $150,000, o ka puka ia i loaa ia lakou. He $100 ka waiwai io o ka mahele, aka, aole e loaa no ka $200, e like ia no hoi me ko Ewa, ua hooholoia no $150. Eia nae, he $4,547.24 wale no ka keia mahiko i uku ae iloko o ka Waihona, me ka hui pu ia no ka me na auhau o na limahana. Ma kahi hoi o $1,000,000 ka waiwai io ma ke dala maoli, ua hoike ae i ke Kuhina Kalaiaina ma ka la 15 o Iulai, 1895, he $733,236.25 wale no ka waiwai io o kona mau waiwai o na ano a pau. Kupaianaha no keia ano hana. A ma kahi hoi o kona uku ae iloko o ka Waihona i $10,000, uku ae ia a emi malalo iho o hookahi hapalua. Nui no paha hoi ke epa o na hana.
Eia hou iho no ua hui mahiko waiwai nui, o ia ka Hui Mahiko Lihue, e paaia nei kona mau mahele kuleana e kekahi poe kakaikahi loa. He 7,000 ka nui o kona mau mahele ma ka $100 pakahi, a ma ka hoike i ke Kuhina Kalaiaina he $601,414.50 kona waiwai io, eia nae, ua uku ae he $6,188.14 wale no iloko o ka Waihona no kona auhau, me ka hui pu no ka me na auhau o na limahana. Ua kohoia ka waiwai io piha o kona mau mahele ma ka $285, a aole e loaa malalo iho. Ina pela io, alaila, ke hoonuiia me kona mau mahele, e loaa ana he $1,995,000 ka waiwai, a i ole ia he elua miliona dala. A ina pela, alaila he $20,000 ka huina auhau kupono a ia mahiko e uku ai ma kahi o $6,188.14. Nui no paha ka apiki, a nawai ole waiwai no hoi o na ona mahiko.
Ua lawa kakou no keia wa me keia mau wahi hoakaka ae la. Ua maopopo loa ka oiaio o ka makou i olelo mua ai, a ua uku ka mea waiwai uuku i ka auhau piha a oi loa aku paha no kona waiwai, a o ka mea nui hoi e like la me na mahiko, ua uku lakou a emi iho malalo o hookahi hapalua pa keneta. Eia nae, no ka hiki maopopo ole o keia kumuhana i ke kuekaa pono ia, nolaila, eia ke noonooia nei ka pono o ka auhau ma ka loaa makahiki o kahi mea a hui paha Ma ko makou manao, o ke ano helu oi loa aku ia o ka pono, no ka mea, e loaa ana he kaulike, a e kau ana ke koikoi ma kahi i kupono e kauia.
"HAEHAE KA MANU!"
Pupule; ae, oia! O ke ano maʻi keia i loaa i ko Hana keiki Hanuna imua o ka Hale Lunamakaainana i ka Poakolu iho la, ma kona waiho ana ae he mau ninau i ke Kuhina o ko na Aina E e pili ana i ka Puali Puhiohe Lahui, (1) ma paha eia ke Aupuni ke uku nei i kekahi o na lala o ka puali puhiohe Hawaii ma na aina e, a (2) ina paha he kokua ka puali a o kona mau lala paha i ke Aupuni e ku nei a ua lawe anei kekahi o lakou i ka hoohiki e kakoo ana i keia Aupuni? Hoomakeaka no!
Kuhalahala no ka manao @ paana kakoo Aupuni oe@