Ka Makaainana, Volume VI, Number 9, 31 August 1896 — Page 7

Ka Makaainana.

 

HONOLULU, OAHU, POAKAHI, AUGATE 31, 1896             7

 

NA AINA MAMAO.

 

Mau Louo Huikau mai kela a me keia Wahi Like Ole.

 

Waiho Malie ia Cuba.

 

          He kuahaua ka Peresidena Kalivilana i hoopuka ae i hanaia i Iulai 27, pela ka hoike o kekahi lono o Wasinetona o ka la 30 mai, e kauoha hou ana i ko na makaainana hoomaopopo aku i na kanawai kuikawa e pili ana i ke ala kipi ma Kuba a e hoike aku ana hoi e hoopii oolea ia no na kue ana a pau.  Ua kuhikuhi ae ka Peresidek@ i ka olelo hooholo ma ka hihia o Wiboga, i loaa ai hoi he mea no na makaainana e lalau a e kuhihewa ole ai i ke ano a me ka manao o na kanawai kaua.  Nui ko ka Peresidena mahaloia i nei hana ana mai ka aoao mai o na Sepania.

 

Kela Hooili Kaua Kipi o Cuba.

 

          Ke hookikina la na nupepa Sepania ma Havana i ke Duke o Tetuana, Kuhina o ko na Aina E, e koi aku i ka haawi pio ia mai o Kalosa Rolofo, kekahi o na kipi o Kuba, e noho la ma Amerika Huipuia i keia wa.  Ua hoalaia ae ko Sepania haawi pio ana mai ia Tiwidi me ka oluolu a maalahi me ke koi ole ia aku, a auo hoi, wahi a ke oleloia ae, ua loaa he wa no Kuhina Nui Olone e panai ae ai i ka maikai no kela hana maikai mua.

          He ahahui ka i hoalaia ae ma Nu Ioka, i kapaia o ke Kalabu Oseka Pirimelese, no ka malama ana i na poe i ma'i a i eha ma ke kaua ma Kuba, ua oleloia ae ma ke kahua-poo Kuba malaila, penei:  "Oiai hoi, ua papa loa ke Aupuni o Sepania i ke komo aku o ke ahahui Ke'a Ulaula iloko o na kahua o na poe Kuba, e kue loa ana hoi i na kahua hana makee kanaka a pau, e hoao aku no keia ahahui e lawe ae i kona wahi ma ia hana maikai a e malama aku hoi i na poe iloko o ke n@ ana a ka ehaeha a e make aku ana hoi iloko o na mahele o na poe Kuba."

          Ua olelo ae o Senora Canovasa iloko o ka Hale o na Elele ina ua uluhua ka lahui Sepania no ke kaua e noke la, alaila, e haalele no oia i ka noho a lawelawe oihana ana no ka wa mau loa.

          Makaukau loa ka o Kapena-Generala Weila, wahi a ka oleloia, no kekahi kuikahi kuikawa e hooponopono ai no ka hookiia o na hooili @aua ana ma na kumu e hololea pono ai i na aoao a pau.

          Ua hoouna telegarama ae o Kapena-Generala Weila i ka nupepa Ahailono o Nu Ioka, i ka la 8 nei, mai Havana, e olelo ana:  "Aole loa he kuikahi kuikawa, aka, ua paholaia aku ka huikala ana i na poe a pau e haawi pio mai ana ia lakou iho me ka lakou mau lako @@U8."

          Ua hoopiolokeia ae o Manasilo, pela ka hoike ae a ka mea kakau o ka nupepa Ahailono e noho la ma Havana, mamuli o ko ke Aupuni kauoha ana i ka hopuia o Mekia Robeleiho, poo alakai o na puali pualu kuloko o na Sepania, a me Kapena Ravenetoso o ka Puali o na Poe Kinaiahi i hoolakoia me na mea kaua, he mau puali hoi i ku makaukau mau no ke kaua mai ka hoomaka ana o ke kaua kipi.  Ua oleloia ua komo keia mau aliikoa iloko o kekahi ohumu kipi e loaa ka haawi pio ia o kekahi mau kulana kuwaho ano nui i na kipi, ina e kueia ae ana ke kulanakauhale e na poe kipi malalo o na alakai ana a Gomeze a me Gacia.  he aha koa ka i kaheaia no ka hookolokolo ana ia laua.

          Aia no ka o Makimo Gomeze, wahi a ka lonoia ma Kuba Hikina kahi i hoomoana ai, ma kahi kokoke ia Sabana, Miranada, e hoao ana e hoala ae i mau puali kaualio hou no ka hele ana aku no ke komohana.

 

Kamailio ko Kina Kaeaea ia Enelani.

 

          Ua hiki ae o Li Hana Kana i Enelani a ua ike oia i ka Moi.  Oiai hoi oia malaila, ua kamailio oia no ke kumu nui o kana huakai ilaila a ua ka nupepa manawa o Iulai 31 i hoopuka ae i kona manao.  Ma kona manao, pela ka hoike o ua manao nupepa la, mai hiki no ka ia Enelani, ina oia i manao pela, e keakea aku i ke kaua o Kina i poino ai ia Iapana.  Nolaila, ua hoahewa oia ia Enelani me na olelo uwalo a ao hoa'loha no a me ka olelo ae ua hoohikileleia o Kina oiai oia aohe i makaukau no ke kaua  O kona makemake i nei wa, ma ke ano hoike hoi no ke aloha io, e haawi aku o Enelani ia Kina i ke kuleana e hana aku i mau pakui oi ae o ke kuonoono i na hoouku dute ana i kauia malalo o ke kuikahi mawaena o laua maluna o na waiwai e komo aku ana ma na awa [manawa] o Kina.

          Mamuli o ka emi o ke sileva, wahi ana, ua haule mai na loaa mai ia mau dute mai a i ka hookahi-hapalua o kona waiwai io mua.  Ua loaa no hoi ia Iapana he mau hooluolu ana o ia ano like mai na mea i papa kahiko la.

          Ua kamailio ike ae nae hoi oia, e like me na manao nupepa la, e hooliloia no keia hoomahuahua ae i ko Kina mau loaa no ke kuai ana i na lako kaua ma Europa.  Ua hooia ae oia aia ke lawelaweia la he mau hoololi a hoomaemae ano nui loa, a ua hui pu aku me ka hoolako ana i kekahi puali aumokukaua [content unreadable] kekahi pualikoa nui, maloko mai o elima makahiki, e loaa no ia Kina he kulana e hiki ai ke hoolilo aku i kona hoauhee koke ia ana iho nei i mea hiki ole loa

 

Kana Huakai Makaikai Kaapuni.

 

          A no Ladana, Enelani, mai ka lono o ka la 8 nei, ua hoopokole ia ae kana huakai i Amerika Huipuia.  E hoi awiwi ana oia mamuli o kekahi mau hana poholalo ma Kina e kue ana iaia Poalima, la 21 nei, i manao ai oia e ku ma Nu Ioka, a i kahi la ae e malama ai i kana aha #ke mua.  La Pule ae, e kau kakahiaka nui loa aku ai oia i kekahi kaamahu no Piladelephia, a hoohala he mau hora malaila, a i ka auwina la iho e holo loa aku ai no Wasinetona, kahi one e noho ai no hookahi pule.  Mai laila ae oia e holo pololei loa ai no Vansko@wa, Kolumebia Beritania, kahi ona e ka@ ai ma kekahi mokumahu no Kina.

          [Malia o kipa mai no i o kakou nei.  L. H.]

 

Hooweliweli Manaonao ma Cerete.

 

          Ua makemake o Auseturia e kau like aku ko Kerete hoomaluia ana maluna o na poe Tuke a me ko Kerete poe oiwi ponoi.

          Ke paakiki la na Elele o na mana e ae aku ka Pote (Aupuni Tureke ma Konakinopela) i na poe i holo ai a noho ma Kanea, i mea e pakele ai, e haalele aku la mau mokupuni, oiai, he poe wahine wale no ka hapanui.

          Umi tausani o na poe Moselema i hoopoino aku ia Herakeliona, a lehulehu o ko laila poe i pau i ka pepehiia a make.  Hiki ole loa i na Kiaaina ke kinai aku i na hana hiona hoomainoino, a ua hopohopo loa ia o luku lauleha loa ia aku na poe Karistiano.  Iloko o hookahi la, ua piha he tausani o na poe i haalele aku ia laila.

          O ka mokukaua @ Beritania Huda a me ka mokukaua Farani Linoi ka i holo aku no Herakeliona.

          Elima haneri poe Moselema i holo pee aku iloko o na luakini Mahomeda ma Kerete, a ua oleloia he lehulehu loa o lakou i hele a pololi i ka hele i na mea e pono ai ke ola.  Ua hopohopoia o lele kue ia aku na poe Karistiano.

          Ua hoopuniia ae ka puka-pa Herakeliona e elima tausani poe Moselema, a o ke Kiaaina, oiai oia e hoao ana e hoomalielie aku ia lakou, ua hukiia oia mai luna aku o kona lio a ua hoeha kukonukonu loa ia.

Na Hunahuna Laulaha

 

          No ka pule i pau i Iulai 11, ua oi aku mamu o kanalima poe nihilisa i hopuhopuia ma Sana Peterobuga, Rusia, a @e heluna o na papapai palapala malu ke kali i hopuia.

          Elua mau aliikoa Geremania e ao ana i na koa Pake ma Sauabai i hakaka-lua ae me na pahikaua, a mahope iho o ka eha mahani ana o laua i kahi a me kahi, ua hoopau ae i ko laua ano e ma o na kiaha waiona la.

          Ua puka ae he mau manao maloko o kekahi nupepa oihana kana o Geremania e kokua ana i ka hakaka-lua, i manao mau ia hoi he nupepa pili oihaha ia, a ua oia e lelo he kokua ka o Emeperoa Uilana i ka hakaka o na mea elua me na mea eha e make ai.

          U apa ka mokukaua hao Italia Roma, o 5,000 tona ka nui, i ka uwila i Iulai 29.  Na ia mea, ua holapu ae la na alelo ula o ke ahi me ka emoole loa, a ua hopohopo loa ia o loaa aku kahi hoahu pauda, nolaila, ua hoopiholo ia ka moku ma ke kiia ana me kekahi topido.

          Ke hoopuka hou la no na nupepe Europa i ka lono, e like me ia mamua aku nei, no ka lo@hia o ke Za i ka haawina pulepule, mamuli hoi o ka maka'u i ka eueu ae o na poe nihilisi.  Ua hoikeia ae he mau haneri i pau i ka hopuhopuia.  Aole no nei lono i hilinai nui ia.

          O ka hoohalahala a ke Aupuni Beritania i ka hookuuia o Kapena Lotea, ke aliikoa Belegiuma @ana i kauoha e lliia o Stokes he haole kalepa Pelekane, no ke kuai ana i na pu me na lako kaua i na kanaka ma ka mahele Conogo o Aferika, ka i hanaia mai nei ma Barusela imua o ka Aha Kiekie o ka Aina Kuokoa Conogo, a ua hookuuia no.

 

Robert Napunako Boyd

 

(ITALIA)

 

He Ana-aina a he kokua no hoi ma ka hooponopono ana i na waiwai paa, huli ana paha i na buke o ke Aupuni, a pela aku.

          Keena Hana:  Mauka iho o ka Hale Leta, maluna ae o ka haleaina Pake Alanui Betela.

apl 13-mp

 

E Kau i Helu no Kou Hale

 

          Ke hooia aku nei makou e kau i Helu Pololei a Paa Mau no kou HALE a HALEKUAI paha ma kau mea e uku ai.

          Ke hooia aku nei makou aole loa oe e hoololi hou ae i kou Helu.

          Ke hooia aku nei makou e helu pololei ia keia Kulanakauhale mai LOKO A WAHO a e hiki aku ana ko makou mea Helu i on la ma nei mua koke iho.

          Aia oukou a kakoo like mai, pono ka makou hana.  E loaa no ia oe he

Helu Pioia, Kele-@we, Aniani, Hao

a ano e ae paha au e makemake ai.

 

Q. H. BERRY,

Luna Nui.

aug. 17--@mw