Ka Makaainana, Volume VII, Number 4, 25 January 1897 — Page 2

Ka Makaainana.

 

2    HONOLULU, OAHU, POAKAHI, IANUARI 25, 1897.

 

KEONE DE BOANE

KA MEA OHUMU KIPI O COADOVA

 

MOKUNA II.

KE ALOHA I KA IWIHILO.

[Mai ka Helu 3]

  "Aole e omo, e kaawale koke aua kaua," wahi aku a ka kakou kaeaea, me ka leo awiwi a kuio loa.  "Ea, aole anei oe e puai wahi leo iki mai ana ia'u?  Aole anei hoi  au e manaolana aku ua aloha oe ia'u?"

  Ua hookaukaulua a hoohakalia hou iho ka ui a ka nohea waianuhea i noho alii ai.  Me ka malie pumehana a me ka lamalama o ke poha aua mai o na kukuna o kona mau maka, a me ka oiaio kuio loa ma kela a me keia mau miao ana o kona mau helehelena ui, ua pane maopopo a moakaka aku oia me ka hunahuna ole iho:

  "Aole loa au e wahahee i mea e pakele ai o kekahi leialii; a mai ia oe mai hoi, aole loa au e huna i kekahi mea mai ia oe mai.  Ina o ka nawaliwali ia, alaila, ua nawaliwali au; ina o ka hewa ia, e Ala, e kala mai ia'u.  Aole loa e hiki ia'u ke olelo ae aole o'u aloha ia oe, no ka mea, ua paa a ua lilo aku ko'u puuwai aia i kou malama ana.  E oluolu mai, e ka naita hanohano, a e haawi mai i na hoomanawanui ana a pau no'u.  Ma kekahi manawa aku e halawai hou ai no paha kaua."

  "Aia a hiki aku ia manawa," wahi a ka naita," e ike ai au ua aloha oe ia'u?"

  "Me kekahi aloha e ola mau aku ana oiai ko'u puuwai e pana ana," i pane aku ai o Luda, me ka niki ole loa iaia ke huna a hoomalu mua loa o loko o kona uhane no nei aloha hou i ku aku la i kona iwihilo, he pa huna pua hoi na ke kea pua loea.

  He manawa pokole ma nei hope iho, ano kokoke loa mai ana na poe hou e hele mai la a ua hiki ole loa hoi ke hoomauia aku na kukai kamailio hou ana, a huli ae la ka naita o Noamanade e apo aku i ke seika hanohano a kilakila.

 

MOKUNA III.

ANO POLULUHI A HAKUMAKUMA.

  He naita puipui nona na makahiki hapa mai ma keia ola ana o Baala Tama, ke kuhina nui o Abederamana III., a he nanaina mohaha a oiaio kona.

  Ua piha oia me ka haaheo a hankei no kona kulana, a he makee loa hoi oi i kona mau pono, eia nae, na mamao loa aku ka manao hookaumaha a hoopono ole mai iaia aku.  O na poe hoi i ike aku iaia ma ke kulana aliikoa wale no, ua ike iaia i kona ano kuoo a haawi pio ole, a o na poe nae hoi i lilo i poe hoa'loha nona, ua ike iaia i kona kupaa a oiaio loa.

  Iwaena nae hoi o na poe i hele pu mai me ko kuhina, he hookahi kanaka a makou e hoomaikeike aku ai, oia hoi, oia aku ana kekahi mea e lilo ana i mea nui ma keia moolelo kaao a kakou.  A o keia mea, oia no o Abu Zama, Kiaaina o Cazala.  He kanaka opiopio oia, i oi ole aku na makahiki i ke kanakolu; kino puipui a waiho malo like; a maluna ae hoi o na mea a pau, he kanaka nu maoli no oia, e like hoi me na ouli kuwaho o kona mau nanaina a hiohiona.  Oia ke keiki a kekahi kanaka i kokoke loa mamua aku a he hoa'loha pumehana hoi no ka moi, a no ia mai hoi ke kumu o ka loaa ana iaia o ke kulana oihana ana e paa aha; no ka mea, ina paha i wae o Abederamana iaia ma o kona kupono no ia wahi, aole loa oia e hoonoho aku iaia i kekahi kulana ano nui loa o kekahi oihana kia ina.  Eia nae, ina i ike ka moi i ka uuku o ka makaukau hooko iloko o ke keiki a kona hoa'loha kahiko, aole oia i hoohuoi iki no kekahi ino maopopo iloko ona; nolaila, ua waiho malie aku no oia iaia ma kona kulana hanohano.  A ua oi loa aku no hoi kana i hana ai.

  Ua noi aku oia i kona kuhina nui e haawi aku ia Abu Zama i ka lima o ka ui Lula; a ua ae no hoi ke kuhina e hana aku pela.

  Ua olelo ae nei makou he kanaka ui o Abu Zama; eia nae, o ka mea e imi ana i hoa'loha oiaio, aole loa e hiki ke aa e hilinai aku iaia.  O ka hulili a hulalali o kona mau maka poni, ua like ia me ka puanuanu o ka hau aaki huihui a kohu noo-nahesa la, a o ka pinana o kona lehelehe lahilahi a malohaha, ua awahia a ku i ke ano pahenehene.  Ua awiwi aku o Baala Tama iaia i ike aku ai i kana kaikamahine,  a i ka pau ana hoi o kana puili ana iaia, ua pihoihoi loa oia e mao popo i ke kumu o keia haule o  a i ka po a ao mai kona alo aku.  Me na olelo kakaikahi, ua hoike aku la oia i kona luaui e like la me ka hiki no kona hele ana aku no kuahiwi - ke kimopo ana aku o na powa - ka hopu pio ia ana o kona mau ukali - kona holo ana - a me kona hoopakeleia ana e ka naita Noamana koa.  ua enaena ae la oia iaia e kamailio ana, a ua oi ae hoi ke kukonukonu o ka hulili o kona mau maka, iaia hoi i hoike aku ai no ka de Boane hana hiwahiwa i lawelawe ai no ka hoopakele ana iaia.  O ka mahalo a piha hoomaikai wale no ka kona luaui i ike mai iloko o kona nanaina a me kona leo, a iaia hoi i huli ae ai i ka kakou koa, ua puili aku oia iaia ma ka lima, a haawi aku la i na hoomaikai ana iaia me na waimaka iloko o kona mau maka.

Aole i pau.

 

Na Lono Huikau no ka Paeaina Holookoa.

Na Hana ma ka Ua Haao.

  1  -  Ua hoopaiia o D S Scott no ka moe kanawai ole i kekahi kaikamahine malalo o 14 makahiki, he 3 malama paahao hana oolea a me $324 koina, ma ka la 2 o Ianuari.

  2  -  Ma ka la 21 ae o hoolohe ai ka Luna kanawai Apana i ka hihia limanui o ka Luna Nui o ka mahiko o Pahala i kekahi wahine Kepani.  Ua hoolimalima na aoao elua i na loio o Hilo.

  3  -  He elua pule ka wili ole ana o ke ko o Pahala, eia nae, ua ikeia ka puka o ka mahu; nolaila, ua hopohopoia malia paha o ke kupueu o Kilauea, a nolaila hoi, ke eliia nei kahi o ia mahu i hoea mai ai, me ka hoohuoi nae, nohea la ka mahu, oiai, aohe wili ko.

  4  - Nui ka ua a me ka makani o Kau nei.

KUPUA.

 

Mau Lono no Hamakua. Hawaii.

  He hapaha i haia ae o ka hora 11 o ka po o ka la 31 o Dekemaba, 1896, ua hanau mai la ka wahine a C. P. Mahi-opio, he keikikane nui a maikai ma Kapulena, Hamakua Hawaii.  O ka eiwa iho la ia o ka laua mau keiki, oia hoi, iwaena o keia mau keiki eiwa, he ewalu keikikane a hookahi keika mahine.  ua hala aku ma o hookahi keikikane, koe ehiku keikikane e oia nei, me hookahi iwihooluokapopoki.  Ua nui ko ke Akua lokomaikai i ka haawi ana mai i na hua maikai a ohana iwaena o ko laua mau puhaka; a e "hoonaniia ke Akua ma na Lani Kiekie Loa, he malu ma ka houna, he aloha i kanaka."

  Nui ka malie o Hamakua a nui pu hoi me ke kai, ke hele la a pipii kamalii ma na kaula liilii, a hala aku i ka heoheo o na haka.

KAPULENA.

 

 

Hui Aloha Aina o Hana.

  Ua ala a ua ku ka Hui Aloha Aina o Hana i keia mau la, ke ku nei me ka makaukau no ka hoea mai o ke kumukanawai nui o ka Paeaina mai ka Hui Aloha Aina Nui mai o Honolulu.

 

NA LUNA NUI O KA HUI.

P. K. Momoa..................................Peresidena

G. P. Wailehua Hope ....................Peresidena

P. Kauimakaole.............................Peresidena Hanohano

G. P. Kauimakaole........................Kakau olelo Mua

J. W. H. Momoa, Kakauolelo Elua

J. K. Keonui..................................Puuku

  Elima lala o ke Komite Imi Kumuhana i kohoia, a he umikumamalima na lala o ka Papa Hooko i kohoia a me na hoa o ae he nui i koe iho i hoopaaia ko lakou mau inoa i mau lala no ka hui, i hakalia wale no i ke kumukanawai e lohiau mai nei, o ia ke akenui o na lala o ka hui e hiki koke mai.  He mahiehie na kane a me na wahine i ka Hui Aloha Aina.

G. P. KAUIMAKAOLE.

Kakauolelo.

Makaalae, Hamoa, Ian 15, 1897.

 

Hui Aloha Aina o na Wahine o Hana.

  Ua hoala ae na wahine o ka Uakea o Hana i Hui Aloha Aina na lakou, a ua ku i keia wa me ke ohohia nui o na wahine, mea ole ka loihi i ka helewawaeia mai, he mau mile ka loihi o kahi poe e hele mai ai.

  Ua kohoia na luna nui o keia hui, o ia iho keia:

Mrs. G. P. Wailehua, Peresidena

Mrs. J. N. P. Kahilina. Hope Peresidena

Mrs. Kauai Kana, Peresidena Hanohano

Mrs. G. P. Kauimakaole, Kakauolelo Mua.

Mrs. J. W. H. Momoa, Kakauolelo Elua

Mrs. J. Lohiau, Puuku.

  He mau lala elima, o ia ke Komite Imi Kumuhana, a me na lala 8 o ka Papa Hooko, he umikumamakolu o na hoa i koe he mau lala lakou.  Holomua ka hui a na wahine.

  E oluolu ka Peresidena Nui o na Wahine o ka Paeaina e noho ana ma Honolulu, e pane mai ina he kumukanawai ko ka Hui Nui o na Wahine ma Honolulu, a e oluolu e hoike mai i ko makou kakauolelo.  Me ka haahaa.

MRS. G. P. KAUMAKAOLE,

Kakauolelo.

  Makaalae, Hamoa, Ian. 15, 1897.

 

Robert Napunako Boyd

(ITALIA)

  He Ana-aina a he kokua no hoi ma ka hooponopono ana i na waiwai paa, huli ana paha i na Buke o ke Aupuni, a pela aku.

  Keena Hana:  Mauka iho o ka Hale Leta, maluna ae o ka haleaina Pake,

Alanui Betela.                                                                       apl 13-mp

 

DR. C. A. PETERSON,

(KAUKA PITASONA).

Ua Nee Ae Oia a ka Helu 28

ALANUI EMA.

NA HORA KEENA: -8-10 A.M.; 2-4 A ME

7-8 P.M.

nov. 30            TELEPONE 752        3ml

 

C. E. Williams me Keiki

Ed. A. Williams, Luna Nui.

Helu 611, Alanui Moi, ma Ewa iho o ka

Pa o Aigupita.

He mau mea kuai lako hale o

na ano a pau loa.

He mau mea Hana Pahu Kupapau a

Hooponopono Hoolewa.

 

E hoolakoia no na Kaa Kupapau, na Kaaipo

a me na Kaa-ohana.

Ina no e ninau ia laua, e loaa no na Pohaku

Kia Hoomanao no na He Kupapau.

 

O ka Ialoa kekahi hana hiki loa ia laua, aia ia

malalo o ka lawelawe ponoi ana a Ed A.

Williams, F.D., he mea i puka pono mai ka

Kalaka Kula o ka Ialoa Maikai ana iloko o

Mei, 1894.

- NA TELEPONA -

Keena, Helu 179 - Kauhale a me Kahea Po.

Helu 815.

@                                     @ 3-mp