Ka Makaainana, Volume VII, Number 6, 8 February 1897 — Page 6

Ka Makaainana.

6     HONOLULU, OAHU, POAKAHI, FEBERUARI 8, 1897.

IOSEPINE

---KA---

EMEPERESE PUUWAI OLU

O FARANI.

MOKUNA VIII.

IOSEPINE KA WAHINE A KE KANI-

KELA MUA.

[Mai ka Helu 5.]

E waiho ana no hoi maluna o ke pakaukau na leta a Napoliona iaia, me he mea la, ua heluhelu hou oia ia lakou a noho iho la e uwe.  Hookokoke aku la o Napoliona ia Iosepine me na kaina kakanalua, ku malie iho la me ke ano pihoihoi, a pane aku la:  "Iosepine!

Ea iao ae la o Iosepine i kona lohe ana i kela leo i kamaaina i kona pepeiao, @ana mai la i ke kane me na maka uwe, a me na waimaka e hiolo ana ma kona mau papalina nohea, pane mai la:  "mon ami," me ka leo waipahe, he leo hoi na Napoliona i uluhua ole ai e lohe, a e walea ai hoi kona pepeiao me he hanehane la i ke ano lai.

Ua puka aku kela leo me ka nahenahe, e lawe ana hoi i kela mau huaolelo o ka hoohaahaa, oia hoi, "e kuu hoa'loha."  I ke Napoliona lohe ana i keia mau huaolelo a kana wahine, me he mea la ua palahe na okana liilii o loko ona, a malule kona naau hookiekie.  Mahamaha aku la kona mau lima i kana wahine, ku ae la no hoi o Iosepine, apo mai la i ke kane, a huna iho la i kona mau maka iloko o ka poli o kana kane, me ka uwe haaloulou ana.

Ua hale he mau hora o ko laua kukai olelo ana, a ua hoauhe eia na kinaunau hoohuoi a pau mailoko aku o Napoliona.  Ua haawi hou aku oia i kona hilinai piha ia Iosepine, he hilinai hoi i hiki ole ke hoonioni hou ia.

Ia Napoliona i lele mai ai ma Fereusa, ua hookipaia oia me ka hauoli piha.  Ua hoomaopopo na makaainana ua hoi mai ke kaeaea o Italia me ka lohe mua ole ia no ka hana ana i kekahi hana ano nui, aole nae i maopopo ia lakou ua hana la.

I ka wa i hookuu ai ka heleuma o ka moku e lawe ana ia Napoliona, a i ka loheia ana hoi aia o Napoliona iluna o laila, ua hoopuni koke ia ae la ia e na waapa me na tausani kanaka iluna, a na paiakuli ka lewa i na leo huro.

O ke ohohia a me na hoohanohano ana ia Napoliona i hoomakaia maluna o ka ilikai o ke awa o fereusa, na hoomania aku ia ma kona alahele no Parisa, e moe @ ia kaoo o na maka ainana mai kekahi kulanakauhale a i keka@  Aole hoi i uumi iho na bele i ko lakou leo, e hooho mai ana no ko lakou hauoli, oiai hoi na puu e haalulu ana me ke kani o na pu-kuniahi, e wawalo ana ka leo kupinai ma na awawa, a ua ho-aia hoi ke ahi ma na puu a me na kakaipali ma-ka po.

I kona hiki ana aku i Parisa, a i ka ike ana mai o na pualikea i ko lakou alihikaua nana i alakai ia lakou e lanakila ma na kahua kaua o ka enemi, ua hoike mai lakou i ko lakou ohohia me na leo huro, a ua ala like ae la hoi ke kulanakauhale holookoa me ke kahea ana, "E ola mau o Punipake."

A mamuli o ka haiamu mau ia o ko Napoliona home me na Kenerala, na kanaka kaulana a me na kanaka kiekie o ka aina, me he halealii maoli la no kona ke napa aku.

No ka uluhua no hoe o kekahi o na poe ia lakou ka hooponopono ana o ke aupuni no ka puka mau ae o kekahi mau kumuhana i hiki ole ia lakou ke kaohi a paa mai paha malalo o ko lakou malu a me ka lakou hooponopono ana, ua koi mai la lakou ia Napoliona e lalau aku i na kaula kaohi o ka hooponopono aupuni, me ka hooia ana mai iaia aohe manaolana hou ae no ko Farani palekana, koe wale iho no ma o kona mau lima kakauha la.

Nolaila, iloko o na pule eha mahope iho o ko Napoliona hiki ana i Parisa, ua hulihia kela hooponopono aupuni o Farani, a ua kohoia o Napoliona, Siesa, a me Dukosa i poe kanikela, a ua kohoia hoi he iwakalua--kumamalima o na lala o na ahakuka o ke aupuni e hui pu mai me na kanikela no ka hoolala ana i kumukanawai hou.

Ua lokahi ka mahalo o na makaainana no keia hoololi ana.  Aole paha kekahi hana pili kalaiaina i loaa koke ke kokua lokahi ana o na makaainana e like, la me keia.  Mailoko ae o ka uluaoa a me ka pioloke i holo awiwi ae ai o Napoliona, i ole ae e lohe mua o Iosepine i na nu hou o keia hoololi ana i hooikaika ai mai na lehelehe aku o kekahi mea okoa.

Ma ka la mua o ka hookahuli aupuni, oiai na leo uwa e wawalo ana mawaho o na hale aupuni, e hoaka ana hoi na pahikaua i unuhiia, aia o Napoliona ke hakoko la me ka Ahakuka o ka Elima Haneri.  A mamuli o ia hana i hiki ole ai iaia ke hoouna aku i ka lono ia Iosepine.  I ka la nae mamua iho, ua hoike mau aku o Napoliona ia Iosepine i na anuu a pau o na hana o ia la.

Ma ka la 19 o Novemaba, ua kali o Iosepine mai ke kakahihiaka a hiki i ka po ana aole i loaa iki aku iaia kekahi wahi lono mai ia Napoliona aku.  No ia mea, a no kona hoomaopopo no hoi, iloko o na hakoko ana mawaena o na aoao kalaiaina like ole Farani, aohe palekana no ke ola, nolaila, ua nui kona pihoihoi.  E puiwaiwa wale ana no oia ke lohe aku i ka halulu mai o ke kaa, a me ke kamumu mai o na kapuwai wawae ma ke alanui kipapa.

Aole i pau.

Loaa Pono ua Kolohe Imihala.

No kela hihia opiuma mai no paha hoi a Kapena J. Kanae i hopu ai ma Kapauhi, a makou no hoi i hoike piha aku ai ma kekahi helu i hala ae, ke kumu o kona pau, no ka mea, wahi mai o ko makou hoikeia mai, e ke kiu i hoike ai no ia mau kini opiuma a me ka hoao ana e kipe iaia ka mea ka nana i ahiahi a i niania i ke Ilamuku, a no ka hilinaiia no hoi pana, na hoopauia oia @e ka nieniele pono ole ia.  He wa loihi i hala ae, ua hakiloia kahi o ua Pake la, nona ka inoa o Chew Kun, e noho nei mauka o Leleo aenei, ma kekahi hale i @aia e Misasa Naai Kaaua.  Eiwa mau wahine Pake a keia kaaka, eia nae, he mau maunu pakaukau laua i pono nona a me laua a me ua keiki, oiai, he akole a aohe hana a keia Pake.  Ua oleloia mai aohe ae o keia mau wahine i na Pake ole loa, aia wale no ka i na poe kalepa kiekie a waiwai o lakou.

Aumoe o ka po Poakahi, Ianuari 25, i hoea mai ai he wa poao e hopu ai, oiai kekahi mau Pake koikoi e kipa ike aku ana   O ke kumu hiki ole ke hana i na wa e ae, ua paa mai o loko o na puka a pau i ka hao a me na kua nunui.  Mamua ae o ka hopu ana, ua hoopaaia na @ilio hae o ka po o kekahi pa iho, a e ole ia, maalahi ai ka na makai hana.  A i ka halo ana ma o a maanei o kela hale, ua ike aku o Kapena Keoni Keaka alehe bipi  me iho e puhi opiuma ana kekahi Pake ma kekahi keena o hope, a hoonohoia he makai malalo pono iho o ka puka niani ma ia wahi, a o ke Kapena a me Makai C. Opunui, kakali no ka wa pono.  I lawe no ke a hiki aku keia mau kipa hale o ke aumoe, kekeke ana i ka puka, o ka hemo mai la no ia me ka nakeke mai o koko a kiei ana he poo wahine.  Komo aku nei ka mua, a aohe i komo pono aku kahi iho, holo aku nei na makai a pii i ke alapii me ka palanehe loa a kulaiia aku nei na Pake kalepa a kuonoono, a ua hele pololei ia aku a hopuia ka Pake e puhi opiuma ana, oiai, me ka palapala huli no i hele makaukau ia aku ai no ka haku hale, e noho ana no oia iluna o kekahi noho.  Oia a me ke puhi opiuma ka i laweia ae no ka Halewai.

Imua o ka Aha Apana i kakahiaka Poakolu ae, ua ae oia i kona hewa no ka malama opiuma, a hoopaiia e uku i $50 me na koina, a ua uku koke ia ae no.  O ka ewalu iho la keia o na hopuia ana o keia kiu niania, he mea hauhau no paha hoi, akahi no nae hanaaua i ae okoa ai i kona hewa.  ma na hihia ona mamua, elima pakele ana a elua e waiho nei no keia kau kiure.  I ae paha oia i kona hewa no kela mau mea i kipa ike aku i na wahine ana o ke aumoe ka uku, o ikeia ae paha hoi laua.

David M. Kupihea.

KO'U MOTO:  "O ka lokahi o ia ke alahele o ka lanakila mau a me ka pomaikai."  E na makamaka a me na hoa'loha oiaio o Hawaii nei:  E oluolu mai, ina o keia moto e kau kehakeha ae la maluna ke sila oiaio e kalele nei i kou puuwai i na manawa a pau o kou noho'na oluolu ana, alaila, ke hawanawana mai nei kou alakai kiekie loa ia oe, "O ia, o ia ke alahele o ka pono a me ka pololei."  Nolaila, e ike, e hoomaopopo a e hana aku oe i ka hana e hauoli ai ke kanaka Hawaii, a e haaheo ai hoi o Hawaii nei i na kau a pau, no ka mea, o ia wale no kou makuakane a me kou makuahine oiaio, kou hoa'loha oiaio loa a puni ke ao nei.  Nolaila, e na hoa'loha oiaio o Hawaii nei, o ka opio nona ka inoa e kau ae la maluna, ua makaukau oia e hooko a e waele aku i ke alahele o kou makemake i na wa a pau, oia hoi, ua makaukau e hana i na Palapala Pili Kanawai a pau, na Bila Kikoo Dala Banako o na ano a pau, na Palapala Kauoha Waiwai i na aina e.  He loea ma ka malama ana, a me ka hooponopono ana i na hemahema a me na hauhili o na buke helu waiwai.  Ua makaukau e hoikeike aku i na loina a pau e hiki ai ke hooholomua i na oihana kalepa o na ano a pau.  No loina like ole e hooholomua ai me ka maalahi i na oihana hookuonoono a hoopukapuka dala, a me ke ano o ka hookele ana i na banako waiho dala, etc.  Ua makaukau e huli pono i na mea helu pohihihi, a me kekahi mau mea e ae e pili ana i ke Ana Aina, ua hiki e huli i na degere pololei a me ka nui o na eka, a me na palena pololei o na aina hoomaopopo ole ia.  Ua makaukau e haku, a e unuhi i na olelo Enelani, farani, geremania a me Latina ma ka olelo Hawaii.  Ua hiki e wehewehe me ka moakaka i na hihia like ole e hiki ai e kaupaona like ia me na kanawai o ka aina nei a kuwaho paha.  He agena no kekahi o na hale oihana kalepa nui o Kaleponi.  Ua makaukau e hooko i na kauoha waiwai a pau a na hoa'loha a puni ka Paeaina.  No ka pomaikai o na poe mahi kope, kulina, uwala, kalo, pia, etc, ua makaukau e hoolilo aku i na waiwai o ia ano e waiho mai ana no ke kuai.  He oluolu na kuka olelo ana a he oluolu loa ka uku.

E loaa no au ma ka Halekuai Lahui Kalahiki i na wa a pau.  E hoouna mai i kau leta, a i ole, e kipa mai no, a mai no a poina.

S K PUA,

He Agena no na Waiwai Paa

He Mea huli i na Kuleana Aina i maa o maopopo ai;

He Mea Ohi i na Aie i hiki ole ke Ohiia e na Poe no lakou na Aie, a

He Mea Hana i na Ano Palapala Pili Kanawai a pau.

KEENA HANA:--Ma ke keena o R. W. Wilikoki, Alanui, Alanui Konia.