Ka Makaainana, Volume VII, Number 8, 22 February 1897 — Page 7

Ka Makaainana.

Honolulu, Oahu, Feberuari 22, 1897                          7

 

NA AINA MAMAO.

 

Mau Lono Huikau mai kela a me keia Wahi Like Ole.

Oehu Haunaele Kipi ma Guatemala.

            No Panama ka lono i loaa ae ma Nu Ioka o Feberuari 1 nei, e hoike ana ua oili ae he ala hoohaunaele kipi ma Guatemala.  Aohe nae hoi i loaa ae na hoike maopopo loa.  Ua hoao aku ka o Peresidena Zelaia o Nicaragua e loaa mai ona hoike iaia nau ia Peresidena Barioso e pili ana i ke ano maopopo maoli o keia kupilikii popilikia ma Guatemala, a hiki mai nae hoi i ka wa o ka hoounaia ana ae o keia lono i ka nupepa Ahailono o Nu Ioka, he ole loa ka mea loaa.

            Ua olelo hooia ia ua hookahua ae ka ka Peresidena i kekahi kulana kaihi mana o ke ano imihala wale maluna o na manao hoouna uweaolelo a pau.  Na nei lono i hooia loa ae aia io no he ala kipi malaila.

            A no Sana Sal@vadoa ae nae hoi ka lono ua komo aku ilaila o Tadeo T@r@bana@ me kekahi puali o 250 paha poe ukali aku mahope ona, a ua pepehi aku a make elua kanaka a hoomaka aku la e hao wale i ke kulanakauhale o Esekipalasi.  Ke uhai hahana la na pualikoa Aupuni mahope aku o ka meheu o na kipi.  Ua hoao ae na kipi e hana aku no pela ma kekahi kulanakauhale okoa ae, aka, ua uhaiia aku lakou e 100 koa o loko o ka papu, he umi i make a eha a he umikumamalua i hopu pio ia.

 

Hoomaemae i ka Awa o Puuloa.

            Ua puoho hou ae, aole no ka hoi i make loa, ka ninau o Hawaii nei iloko o ko Amerika Huipuia Ahaolelo.  Auwina la o ka la 3 nei i waho ae ai o Senatoa Palai o Maine he noi e hookomoia he haawina o $100,000 iloko o ka bila haawina huikau no ka hoomaemae ana i ke awa o Puuloa.  Ma ka manao o keia Senatoa ina ka e hooholoia ana ia haawina no ko Amerika Huipuia lu dala ae ma ia wahi he hoike ana ka ia no kona noho maua, a ina hoi e aeia e hoomaka aku ma ia hana, alaila he hookahua ana ka ia i kona komo a noho io maoli ana mai.  Ua hilinaiia keia manao mamuli o ka Adimerala Waka hoikem ana hoi i olelo ai aia no malalo mai o ia huina na lilo.

 

Ahewaia no ka Hanai Laaumake.

            No kahi wa ka hookolokoloia ana mai nei o kekahi wahine haole Pelekane no ka hanai laaumake ana i kana kane, i hiki ai hoi iaia ke hooko aku i kona makemake e mare me kekahi mea okoa aku.  He wahine ku onoono keia, nona ponoi iho, aka nae hoi, ua komo ka manao konia iloko ona, i awiliwili pu ia paha hoi kahi e ka lili.  Imua o ka Aha Kanikela Beritania oia i hookolokoloia mai nei e kekahi kiure a ahewaia, a he make kona hoopai i hookauia mai.  Mamuli o keia, ua ili ka mana hoemi mai i ke Kuhina Beritania wale no e noho ana malaila, a ua hoemiia e ia, oia hoi, ma kahi o ka make, e hoopauhaoia oia a pau kona ola.  He kakauolelo ke kane no ke Kalahu Lokahi Iukohama, nona ka inoa o Walter Raymond Hallowell Carew.  Ua ano like loa keia hihia me ko Misasa Mebirika (Mrs. Maybrick), he wahine Amerika e noho paahao nei ma Enelani no ka pau o ke ola.

 

 

Lanakila no ka Aoao Sepania.

            He palapala no Honokona o Ianuari 4 ka i olelo ae: Ua hoike ae ke Kanikela Sepania maanei ua lilo pio mai ka i na pualikoa Sepania, e hakaka ana ma ka la 1 aku ma Cacarona a be Bigas, he eono lua i elliia, a me kekahi wahi hana poka no na kipi, mawaho ae o na pu, na lakou, a pela aku.  He 1,100 poe kipi i pau aku i ka pepehiia a make, a iwaena o lakou he lehulehu loa o na koa kanaka maoli i haalele a holo mahuka aku mai ko lakou mau puali.  O ka poino wale no ma ko na Sepania aoao he 24 make a he 68 eha.

 

Rusia ia Farani no Tureke.

            Ua olelo ae kekahi nupepa Rukini i hookonokonoia ka manao: Aole loa e hiki ia Rusia ka iho ka iho ae e hao wale ia Tureke me kekahi poe hoaie e ae o Tureke.  Ua haawi aku o Rusia ia Tureke i 100 makahiki e uku ai i kona poho kaua, ma ka huina o 3,000,000 rubela o ka makahiki.  Ua hoike o Rusia ua ike no oia ia mea ho lokomaikai,  a aole no paha hoi he makemake o Farani e panai aku i na haawina ukupanee iloko o kona pakeke i uku panai no ka noho hoa’loha ana me Rusia.  He hoike mau no o Rusia i ke kahua alakai hana like i lilo i mea mooleloia, oia hoi, aole e komo keakea aku ma na hana kalaiaina pili aupuni o na aina e ae.

 

Lono Ma’i Ahalau ma Inia.

            He lo@ telegarama pili oihana o Ianuari @ ka i loaa ae ma Iapana e hoike ana ua komo aku ka ma’i luku e holapu la ia Bomabe, Iuia, iloko o ko Iapana Oihana Kauikela malaila a ua lehulehu na poe i loaa ia ma’i weliweli.  O kekahi me pahaohao loa i keia ma’i. he nui ko na iole ma make wale i na la a pau mamuli mai o keia ma’i.

            He 5,000 ka heluna o na poe i loohia i ka ma’i ahulau ma Bomabe, Inia, pela kekahi lono hope loa, a mai loko o ia heluna he 3,841 na make.  Ua oleloia no na kulana pelapela kuloko mai no ke kumu nui o ko ka ma’i puka ana ae.  I kekahi la hookahi iloko o ka pule hope o Ianuari, ua piha ka 150 o na poe ma’i, ke kiekie loa i ikeia mai ka hoomaka ana.  Ke hoolalaia la ma Enelani e lulu i $5,000.00 no ke kokua ana i ko Inia poe pilikia i ka wi.

Na Hunahuna Lauhala.

            Ua hooholo ke Aupuni Beritania e hoomahuahua ae i ka Oihana Kaua ma o 7,380 kanaka.

            He kai huakai o na poe ma nao kokua i na poe Kuba ka i hoopuehuia e a makai ma Lima, Peru.

            Aia he mau lala o ko Kanada Aha Kuhina i Wasinetone kahi i hooikaika ai no ka panailike o na waiwai kalepa.

            Ua lilo ke kanawai e kue ana i kekomoia o na papale nunui iloko o na hale hana keaka i mea mana ma Kikako.

            Ma Parisa, Farani, Feberuari 1, i make ai o M. Martini, kamea nana i imi a hoohana mua i ka pu-raifela e hea nei i kona inoa.

            Ma kekahi palapala a Emeperoa Uilama i kakau ai ia Kuhina Nui vona Hohonelohe, na kapa aku oia i kona kupunakane o “Uilama ka Nui.”

            Ua hooholoia mai nei e ko Kaleponoi Aha Senate he bila kanawai e kue ana i na aha hookuku hakaka no kekahi uku makana.

            E noi ae ana ke Aupuni Beritania i ona komite ahaolelo kuikawa no ka noii ana i kela huakai paoa a Hemisona ma Aferika Hema.

            Elua mau kaikuahine o Generala Paulo Aranago i kauohaia e Generala Weila a haalele iho ia Kuba, no ka mea, o laua pu kekahi me ka mea nana i hoopahu ae i kekahi kaamahu, a ke ole laua e haalele, e hoopaiia no laua no ka hewa o ko laua kaikunane.

            Ma o kekahi koho nui hewa hewa ua hoola ka Ahaolelo o Konetikote i kekahi olelo hooholo e kauoha ana i ko Peresidena Kalivilana ike aku ma ko Amerika Huipuia aoao i ke aupuni a na kipi o Kuba i hoala ai.

            Ua lokahi ka manao o na kauka loea loa o Amerika Huipuia me ko Ladana poe kauka loea ma ka olelo ana ua komohia ka ma’i pupule o ke ano aihue ia Misasa W. B. Kakela, i hopuia mai nei ma Ladana no ka aihue i na mea o loko o na halekuai o laila.  No Kapalakiko aenei oia a me kana kane, a ua o hoi ae a ke noho mai la ilaila.  He mea kalepa mea-ai ke kane a na nui ka waiwai.

 

            Eia mai no makou ke oili aku la me ka hele a uluwehiwehi me na mea hou like ole o kela a me keia ano no ka pomaikai o ko makou poe heluhelu, a na oukou hoi ia e e nuu iho i na ono a ka Puukolu.

 

S. K. PUA,

He Agena no na Waiwai Paa

He Mea huli i na Kuleana Aina i mea e maopopo ai;

He Mea Ohi i na Aie i hiki ole ke Ohiia e na Poe no lakou na Aie, a

He Mea Hana i na Ano Palapala Pili Kanawai a pau.

KEENA HANA: - Ma ke keena o R. W. Wilikoki, Alanui Konia                

                                                                                                aug. 31 – 1mk

 

Kuai Waiwai Paa ma ke Akea

            Mamuli o ka mana i loaa ia’u mai ka Aha Kaapuni, Apana Hookolokolo Ekahi o ko Hawaii Paeaina, a ma ko’u ano he kahu malama waiwai no ka’u mau keiki elua, o George a me Almira McIntyre, he mau keiki oo ole, nolaila, ma keia ke hoolahaia aku nei ka lono o ka POAKOLU, FEBERUARI 24, 1897, HORA 12 AWAKEA, ma ke alo mauka o Aliiolani Hale, ma Honolulu, Oahu, o ia kahi a me ka manawa e kuai akea ia aku ai o ke kuleana huikau o ua mau keiki oo ole la iloko o na apana aina i hoakakeia malalo iho, penei:

            Kuleana hookahi-hapalima (1-5) iloko o kela apana aina kahuahale ma ke alo makai o ko Sam’l C. Dwight aina, ma Leleo, Honolulu, nona ka ili he 97.9 anana; a me ke

            Kuleana hookahi-hapalima (1-5) iloko o kela apana aina kalo me kauhale, ma Hauhaukoi, Kapalama, Honolulu, makai o ko Nancy Summer Ellis aina, kokohe i alanui Liliha, nona ka ili he 586.8 anana.

            Ua hoakakaia keia mau apana aina ma ka Palapala Sila Nui 2258, Kuleana Helu 2133, ma ka inoa o Kaluahi.

            O na lilo a pau no na palapala, ma ka aoao no ia o na poe koho.  E ninau ia Henry Smith, Kakauolelo ma Aliiolani Hale, no na mea e ae a pau.

GEORGE McINTYRE,

Kahu Malama Waiwai o George a me Almira McIntyre, he mau keiki oo ole.

                                                                                                            fby 8-3 ts.

C. E. Williams me Keiki

Ed. A. Williams, Luna Nui

Helu 611, Alanui Moi, ma Ewa iho o ka Pa o Aigupita.

 

He mau mea kuai lako hale o na ano a pau loa.

 

He mau mea Hana Pahu Kupapau o Hooponopono Hoolewa.

 

            E hoolakoia no na Kaa Kupapau, na Kaaipo a me na Kaa-ohana.

            Ina no e ninau ia laua, e loaa no na Pohaku Kia Hoomanao no na He Kupapau.

 

            O ka Ialoa kekahi hana hiki loa la laua, aia ia malalo o ka lawelawe ponoi ana a Ed. A. Williams, F. D. he mea i puka pono mai ka Kalaka Kula o ka Ialoa, Makai ana iloko o Mei, 1894.

NA TELEPONA

K@ Helu 179 – Kauahle a me Kahea @ Helu 818