Ka Makaainana, Volume VII, Number 10, 8 March 1897 — Page 2

2 HONOLULU, OAHU, POAKAHI, MARAKI 8, 1897.

 

LEONE DE BOANE

 

KA MEA OKUMU KIPI O COADOVA

 

MOKUNA I V.

 

KE ANA KUAHIWI.

Oiai hoi, ua maopopo loa ia de Boane o keia mea imua ona, oia; no ka lawehala haihai kanawai weliweli, eia nae, ua hoopuiwaia oia i ka hoike maopopo loa ia ana aku iaia; aka, eia ao nae hoi, aole loa oia ke kanaka e haawi pio maalahi aku ai i kekahi kauoha o ia ano ae la.

"Ua ike au ia oe," i leo nui ae ai oia, me ka hou pono ana aku i kona wawae mamua pono ona me ke oolea, a me ka hapai ana ae hoi i kana pahi, "a ua ike au i kou manao i nei wa. Aka, aole loa hoi au he kamalii e ae aku ai pela iho la au e upoiia iho ai e e kekahi puulu o na poe hiena. I hope aku!---i hope aku, a'u e olelo aku nei, a o ke kanaka mua e hele mai ana imua o'u, e lawe aku no oia i ke ana o ka'u pahi iloko o kona puuwai!"

"Ma o ka he la o ke Kaula, he keu ka hoi a kou aa, o kuu ilio Karistiano; aka nae hoi, aole loa e hiki i kau pahi ke kokua ia oe i nei wa. Aole loa au e hoohanini i kou koko ma nei wahi, nolaila, e waiho malie i ka oi o kau pahi a e noho malie."

"Aole me ke ola oe e lawe aku ai ia'u mai keia wahi!" i pane aku ai ka naita me ka leo okalakala. Eia nae hoi, ua akaka loa kona hopena mai kekahi kueia aku ona ana hoi i manao mua ole ai, a no ke kue aku hoi ia aohe oia i hoomakaukau e. Aole i mamao aku, a e pili ae ana hoi i ka paia pohaku ana e pili nei kona kua, e ku ana he Araba loihi me kekahi owali kaula-ili ma kona lima. Ua hooleiia aku keia owili kaula maluna o ke Karistiano me ka pololei loa, a i ke kipuka hoi i hoholo iho ai a hala ma lalo o kona mau poohiwi, ua huki awiwi ia aku a paa pono loa ana oia, a he wa wale no a huki ino ia ana aku o de Boane a waiho iluna o ke alahele paepae pohaku. Me ka malie loa keia hanaia ana, a me ka manao mua ole ia hoi, aohe i loaa he wa nona e kue aku ai; a i ka hiki ana ae i ka wa ana e hoomaopopo pono iho ai no ka mea i hanaia, ua hiki ole loa iaia ke eueu hou ae. Ua nakiikiiia kona mau au a paa loa, a ua paniia hoi kona waha.

I keia wa like no hoi, mamuli o ka oi kelakela ae o ka ikaika o kekahi aoao, ua hoopioia o Gaberiele, a me ka nana hou oleiho na mamakaia aku na pio o na powa, laweia aku la ma ka malapua a puka i ka muliwai, kahi o ko lakou waapa ponoi o kakali ana, a iloko hoi o ia i waihoia aku ai na Karistiano. Ia Miramolina nae hoi i lawe ae ai i kona noho'na mahope, ua onouia aku ka waapa a kaawale, a ua hoe awiwiia aku no luna o ke kahawai. Me ka eleu i lawelawe lima ai na Araba i ka lakou mau hoe, me ko lakou hoe me ka puai leo ole ae, a na ko lakou alii no hoi ka hookele ana, me ka hoomamao loa ae hoi mai na waapa kakaikahi e holoholo ana ia wa o ka po. E uwiuwiki moakaka mai ana no ka imoimo ana o na hoku, eia nae, aole i nui loa ko lakou malamalama e hiki ai hoi ke ikeia ae kahi mea ma kahi mamao loa aku. Ua hoomau aku no ka holo ana o ka waapa a hala mai la na paia pohaku o ke kulanakauhale--hala, ma o aku o na palena hope loa o na malapua a me na hale nani nunui--a hala loa aku no hoi a kahi papali i ku ai o ka pupupu hale o ka mea malama a kaomi waina a hala hope loa mai la ia--ua hoomau aku no ka hou ana imua a kahi o kekahi kahawai uuku i hooiho makawalu mai ai o kona wai mai na kuahiwi mai. Iloko o keia wahi mana i hookomoia aku ai ka waapa, a ia lakou i hala aku ai he mile a oi, ua hiki aku lakou i kekahi kio akea malalo pono iho o kekahi wailele, a malaila lakou i kaohi iho ai. Pouliuli keia wahi a ano anoano i ke kiekie loa o na kumulaau nunui na lakou i huna loa i ka ikeia aku o na hoku, a mamuli wale no hoi o ka eleu a makaukau i hiki loa ai ka waapa ke laweia a laila, iwaena o na pohaku nunui awaawaa, a me ke ko hoi a ke au ikaika. I lawa no a hooleleia na pio i kula, ua wehe koke ia ae na kaula hauhoa mai ko laua mau wawaeae, a o na apana lole hoi ma ko laua mau waha, ua hoihoiia ae ia no ko laua mau maka; a me ia hoopouliia o ko laua ike, me ka mau no o ka paa o na lima, ua alakaiia aku laua no kahi e. "Akahele loa ka hoi oukou," wahi a Gaberiela, "o ka hoopouli ana i ko maua ike i kahi pouli e like la me keia, a ma keia wahi hoi. Heaha kau i manao ai e hiki ia'u ke ike aku? Ei nei--ua hoomaopopo mai anei oe ia'u? E, aole anei oe e pane mai?"

Eia nae, aohe wahi puai leo i loaa iki ae iaia, he olea he ole loa no.

Aole i pau.

 

UWILA MAI KA PO.

 

No na Hana Malu o ke Ao o Noonooia Nei.

I ka hoohui ana i ka inoa "Keahi" me "mahuka," e loaa ana ka haina Keahi mahuka. Ke a "Keahi," he "mahuka" no ka hope, nawai hoi ka noho ana iho, ina nae he mea io ia ke hoea mai. Ke uwahi no o luna, he ahi o lalo.

Ma keia wahi i ku mai ai ka nane a ke kanaka 9 kapuai. "Nane 5--Ke pii ae la, a ke holo ae la."

Haina--Piiholo, Makawao, Maui. He kupa, he kamaaina i ka Ua Ulalena, he aina kahiko Lei-anuenue, hoailona kapu alii, he onohi no na kai. Ke pii aku nei, aia ke holo ae la, he auhee nui. O na poe i pii aku ma na kulana kiekie, ke pau aku la i ke auhee, aia la, ke holo la!" Owai? O Mr. Ranawe ma.

5--"Nekina," He hale inu rama keia, he hale me ona ai, e oleloino ai, e hakaka ai me ka hooulu haunaele, a pela aku. Ina o ka hoike keia a ka moe no na hanaino e hoea mai ana, o ia ka hakaka me ka haunaele iloko o Honolulu, alaila, ua hiki io mai ka la pouli no me Honolulu. A ina he hoike loli ole ae ko na hale i hoolakoia i na kukui uwila ma ke ano kino maoli, malia paha o a io ae no ke kukui uwila iloko o kekahi hale a mau hale paha, alaila, he hai maoli aha mai no ia no ka moe me ka nane ole. Alaila, he puhiahi maoli no paha ia. Aka hoi, ina o ka mano koa ia me ka wiwo ole iloko o kela hale kino keia hale kino, a he hoike ia no ka a o ke ahi o na mano uwila iloko o kela a me keia hale kino, he hana ia e hoike mai ana i na hana o ka hale inu rama, oia hoi, ka hakaka me ka haunaele a uluaoa paha iloko o ke Aupuni. Ina o ka hoike io keia a kekahi hapa o ka moe ke ku ma ia ano, he mea ehaeha no ia ke hoea mai ma ia ano.

Aka, he mea pono ke nanaia ka inoa "Nekina," no ka mea, ua hoea mai keia inoa (Nekina) no loko mai o Nationa, a i ole, National paha; oia hoi, "Lahui." Nolaila, o Nekina, o lahui ia, alaila, e hoopili i ka ino alahui me na hana a na poe ona o loko o ka hale inu rama, oia hoi, ka hikaka, ka hakaka me ka haunaele; e loaa ana ka haina, hakaka lahui, a i ole, haunaele lahui. Aka, heaha la keia haunaele lahui? Malia paha, he mea pono ole paha ke hanaia ana maluna o ka lahui; nolaila, na keia mua aku e hoike mai, a i ole, e hoea mai ana ka la, e haule mai ai o kahi hana. Aka, he mea pono ke nana hou ia kekahi inoa o keia hale inu rama, oia hoi, "Emepaea" (Empire). O ia paha o "Aupuni," A ke hoohuiia o Aupuni me Lahui, e loaa ana ka haina piha "Aupuni Lahui." O ia no paha ke Aupuni no ka lehulehu, ma o ka lehulehu a o ka lehulehu e like me na kumuhana e ka hui Liberala; oia hoi ke "Aupuni Makaainana Repubalika." A ina e hoohuiia ka hana haunaele o loko o ka hale inu rama me Aupuni Lahui Repubalika, e loaa ana ka haina, he pioo, he uluku, he holoke, he mahuka no na poe o ke Aupuni Makaainana Repubalika. He mea ku no keia i ke pahaohao ina o ka hoea mai o kekahi ano e like ae la me keia. Kupanaha o na kupanaha! He mea anei kahi e upuia nei e ke Aupuni? Ahea hoea mai? He mea anei ma o aku a hoea mai? 6--A mai loko mai o keia hale inu rama (Aupuni Lahui) i hora mai ai ka leo o kekahi haole e i ana, "e okiia na poo o na kanaka mahope mai." Ina o ke ano maoli no ia o ia olelo ke hoea kino mai, he mea pono ke waihoia ia hoike na ke moe; a ina ua aui ae, o ia ka'u e olelo ae ai, a o ia keia: Ina he olelo kinai keia i na poo alakai o na ahahui a me na poe hoolaha nupepa lahui, ao ko lakou kakoo mai mahope o ka lahui; eia io paha ilaila ke ano o ka huaolelo "okipoo" a keia haole e olelo nei; e ahaia la lakou? Ua upuia ka paha lakou? E nana aku no.
Aole i pau.

 

E alawa ae i ka makou poe hoolaha e puka aku nei ma keia helu.

 

Ma ka hale (inu rama) Kukai o na Poe Kalepa, kihi akau o na alanui Moi me Nuuanu, e loaa ai ka Hapa me Hapa, elua kiaha no ka hapaha (25 keneta). Waina Kaleponi, $1 no ke galani. Pela no hoi me ke Sake maikai loa. no ka Barani maikai, $1 no ka omole. E hoomanao i keia. 8-4

 

I ka la apopo e holo aku ai ka mokupea Mau Flint no Nu Ioka me ka lawe aku he 4,850 tona kopaa no ia awa, a o ka mokupea Dirigo he 5,000 tona a me Roanoke he 5,400 tona, a o ke Kenilworth ke lawe nei oia he 3,850 tona. o keia poe moku a pau no Nu Ioka wale no.

 

Kakahiaka Poakolu nei, hora 5 a oi, i haalele mai ai keia i ola ana o Misasa Wainee ma ko laua wahi noho ma Kamanuwai, a haalele iho la i kana kane, ka ohana a me na makamaka e noho a aku ma keia aoao me ka paumako nona. ma ka auwina la Poaha ae i hoolewaia aku ai kona kino koou no kona home hope loa e hooluolu ai ma ka ilina o na Pake ma Pauoa, a ua ukali pu aku ma keia huakai na makamaka, ka ohana a me na hoa'loha no kona hale lua i hoomakaukauia.