Ka Makaainana, Volume VII, Number 12, 22 March 1897 — Page 2

2 HONOLULU, OAHU, POAKAHI, MA RAKI 22, 1897.

LEONE DE BOANE
KA MEA OHUMU KIPI O COADOVA

MOKUNA I V.
KE ANA KUAHIWI.
[Mai ka Helu 11.]

                "A he mea ano e anei hoi kahi ma ia mea? Aole anei hoi i maopopo i kela a me keia kanaka ma Coadova nei kahi o ka naita Noamanade i noho ai?"
                "Ae—aka, e noonoo iho, e kuu haku. Mai ka manawa mai a kaua i haalele aku ai i kahi pupupu hale o ka mea kaomi waina a hiki i ka hoea ana mai o keia poe epa piha manao hiena, ua oi iki wale ae no ia mamua o umikumamalua hora—"
                "Umikumamalima hora, ma ka haahaa loa, e Gaberiela."
                "Ina pela—ua hiki no ia. Aole anei hoi i ulu mai iloko ou ke ano kamahao o ko lakou hele ana ae ma kahi pupupu hale—loaa ko lakou mau hoa i make—maopopo na mea na laua ia hana hoopai i hookau aku—a hoea mai la hoi i o kaua la, iloko o ka manawa pokole loa? A o kekahi mea e ae no hoi, ua uwai aku kaua i na kino ma kekahi wahi mamao iki mai ka pupupu hale aku, a ua hooia mai o Alecasina ia'u e hoohiki no oia aole oia i ike nawai la laua i pepehi. Aohe o'u manaoio iki ua emoole loa ko kahi elemakule hoopoina ana a uhaki koke no i kana olelo."
                "Alaila, pehea la ka hoi kau hoomaopopo ana no nei mea?"
                "Aole anei e hiki ia oe ke noonoo ae no kekahi loina e ae o ka hoohanaia ana?"
                "Aole me ka awiwi a emoole loa."
                "Aole anei hoi i kaakaa pono ou mau maka ia kakou i pii ma nei ma ka muliwai?"
                "Ae."
                "A aole anei hoi oe i ike aku i kekahi mea e hoala mai ai i ka hoohuoi iloko ou?"
                "Aole."
                "A, e kuu haku, ia oe e haliu ana i kou mau maka iluna o na paia laumania o ko Baala Tama hale, e nana ana au ma kekahi wahi okoa ae. Ua ike aku au he waapa e lana mai ana ma kahi kokoke ma ko kakou ala; a iloko hoi o ia waapa ua ike aku au i kekahi kanaka a'u i maopopo loa ai oia ke Kiaaina o Kazala; a ua ike aku no hoi au ua kukaiia ae he hoailona!"
                "Pehea?" i hooho ae ai o Leone. "Eia paha ke holo pupule nei kou manao koho wale."
                "Aole, aole, e kuu haku," i pane aku ai o Gaberiela, me ke kupaa a me ka hooia loa aku; "ua maopopo ia'u ka'u mea i ike aku ai. Eia nae, aia no hoi maloko mai o na palena o ka hoomaopopo aku ua kuhihewaia paha au, aka, aohe o'u hilinai iki pela. Ua paa nae hoi ko'u manao eia o Abu Zama ma ka hope mai o keia hana."
                Ua lilo keia manao ana i mea hoohikilele loa ia de Boane; eia nae, iaia hoi e haawi ana i kona noonoo nui ana maluna o nei mea, ua oi aku ka ulu ae o ka manao e hilinai aku no ia manao ana. O ka haawina hanohano hoi a kekahi naita oiaio e haawi ai i kahi aku me ka makaukau mau, o ka mea ia nana i kono aku iaia e ae i keia manao ana me ke ano ku ole i ka hoihoi no nei hopena weliweli.
                "Ae, ae," wahi ae ana, mahope iho o kona noonoo loihi ana iloko o ka mumule, "pela io no paha hoi; no ka hanohano nae hoi o ka oihana naita ua manaolana au aole loa pela. Eia nae hoi, na ke au aku no o ka manawa e hoike mai ia kaua i ka oiaio"
                "A eia hou," wahi aku a Gaberiela, me ka leo haahaa iho, "e make auanei hoi kaua me ka loaa hou ole mai o kau wahi malamalama. Aole anei pela ke ano i ulu ae ia oe?"
                "Ua hiki ole loa ia'u ke manao iho pela," i panai aku ai ka naita me ka leo ano hamumu. "Eia nae," wahi no ana i pakui aku ai, "pela io no paha hoi. Ina pela io, ia'u no au e ahewa iho ai, ua alako mai au ia oe iloko o keia popilikia."
                "A ia oe hoi au e ahewa aku ai," i panai awiwi aku ai o Gaberiela me ke kuio loa, "ina oe e hoopuka hou ae i kahi ano olelo o ia ano. E halawai pu aku hoi me kou hopena, me ka nana ole ae i ke ano o ia haawina, o ia ko'u ake loa. Nolaila, e hookuu ae ia manao e kaalo. Ina ua nawaliwali ko kaua manaolana, e ikaika nae paha hoi ka kaua mau uwalo ana; a e pule hoi kaua no na mea oi ae o ka maikai."
                Ma ia hope iho, ua haule hiamoe pauhia loa aku la ke kauwa, oiai, ua uuku loa kahi hiamoe hooluolu i loaa aku iaia iloko o na hora he kanaha-kumamawalu, a haalele hookahi ia iho la o de Boane me kona mau noonoo ana. Ua lawe ae oia i ke ano o Abu Zama, e like me ka hiki iaia mamuli o ka ike i loaa a mai ka lohe no hoi, a ua palahalaha iho la imua ona ma kona noonoo ana. Ma kona mau aoao a pau, ua hoomaopopo pono loa iho la oia, a pela no hoi ma kona mau mahele a pau loa; a ma ka hopena loa, ua namunamu iho no oia iaia iho, iaia i hoomaopopo a hoakoakoa mai ai i na mea a pau loa:
                "Ke manao nei au nana no nei i hana! Ae—ua ahuwale loa ka lima o ka Haku o Cazala iloko o nei mea!"
Aole i pau.

Haule ka Paku i ka Hopena.

                O ka hopena loa i loaa i ka hihia oki mare kaulana o Kaimana kue ia Kaimana, ua hoea mai ia i ka auwina la Poalua, la 9 nei, mamuli o ka haalele ana mai o Misasa Kele Kaimana ia nei maluna o ka mokumahu Peru no Kapalakiko. No kahi mau la mamua ae ka hooponoponoia ana mawaena o na loio o na aoao a elua, a loaa ai hoi ka hopena i upu nui ia. E hoomanaoia ua loaa i ke kane, ia Wile Kaimana, ke oki kaawale loa mai ka wahine, a ua lilo pu no hoi iaia ka malama ana i ka laua kaikamahine hookahi.
                Mamuli hoi o ka pilikia nele a hune i loaa i ka wahine, oiai na la pokole maanei, ua komohia no ke aloha wahine iloko o ke kane e kokua iaia iloko o kona pilikia, a peneia iho na mea i hooholoia: E haalele mai ka wahine i keia aina ma ka mokumahu Peru a e hoopau hoi i kana hoohalahala i ka Aha Kiekie, e hookuu aku hoi oia i kona kuleana i kekahi palapala hoopaa ola o ke kane i hanaia no kona pomaikai no $25,000, a ke hana oia ia mau mea, e ukuia aku oia e ke kane i $1,000.
                Penei iho e hooliloia ai ia mau dala: uku moku, $100; palapala kikoo i Kapalakiko, $450, e haawiia aku mamua iki iho o ka wa o ka moku e holo ai; dala maoli, $50, na ke kupakako o ka moku e haawi aku iaia oiai e holo ana ma ka moana, i pae nele ole oia i o; a he $400 e ukuia i kona loio maanei he 24 hora mahope iho o ka hala ana aku o ka moku no kekahi mau aie liilii ona i koe iho mahope nei.
                A pela iho la hoi i loaa ai ka hopena loa i keia hihia kaulana, a ua hooko pono ia na mea a pau e like me ia maluna ae. Nolaila, aole no hoi ka wahine e nele loa ana ke hoea aku i o a hiki i kona wa e puka ae ai maluna o ke kahua hana keaka malaila.

Mau Hihia Oki Mare.

                Eia iho kekahi mau hihia oki mare o ke kau kiure o Feberuari i pau, i hoopuka mua ole ia aku hoi e makou:
                Poaono, la 6, Lala K. Mahelona mai ia Mose Mahelona, no ka hanaino; Mele D. Hefanana mai ia C. Heffernan, no ka hanaino a me ka ona mau, a ua kauohaia ka mea hoopiiia e uku i $50 no ka loio o ka mea hoopii; Manuela Nitora mai ia Maraea Luisa, no ka haalele a oi mamua o ekolu makahiki; Kiha mai ia A. Welewele, no ka haalele no.
                I kahi Poaono mai, la 13, ua aeia ke noi a Kau kue ia Hanaualani, no ka lilo me hai. Holo ke kane i ka aina e, nele ka wahine a ike i ka pololi, haawi a hoolilo iaia iho i mea e pono ai keia noho ana. He hihia Pukiki kekahi a ua aeia no.
                A i kahi Poaono mai no hoi, ua hooloheia ke noi a Mi sasa Mine Sumana kue ia E. G. Sumana, a ua aeia. Ma ke noi a ka mea hoopiiia, ua hookomoia iloko o ka olelo hooholo e uku oia i ka mea hoopii he $500 no kona ola a he $250 no ka laua keiki hookahi, he $50 uku loio no ka wahine a he $50 no ka malama no ke ola o ka laua keiki a hiki i ka wa a ka Aha e kauoha hou ai, i ka wahine no nae hoi ka malama ana o ke keiki a ke nui kupono, e hoounaia i ke kula. Aia ka mea hoopiiia ma Guatemala e noho nei a ua waiwai oia malaila ma ka oihana hoolimalima lio me kaa. Ia Paulo Numana aku nei ilaila, ua kauoha mai oia iaia e hana e like me ia maluna ae. O ke kumu o ke noi oki, no ka haalele.

                He $1,276 ka huina nui o na lilo o ka Aha Kaapuni, Apana Ekahi, no ke kau kiure o Feberuari i pau, i maheleheleia penei: Na poe kiure Hawaii, $530; na poe kiure haole, $646; poe kakau-pokole me maheleolelo, $100.
                Ua hoikeia mai ia makou ua ulu ae ka he hakaka i ke awakea Poakolu, la 10, mawaena o ka luna nui o ka Home Luina a me ke kuke Pake, he pahi nui ka ka Pake a he au pulumi hoi ka ka haku haole, aole nae hoi i kiheahea ke koko. Aohe mea o laua i poina.

Hoolaha Manao Hooko a Kuai a ka Mea Paa Moraki.

                Ke hoolahaia aku nei ma keia mamuli o kekahi mana e hoolilo aku i hoakakaia maloko o kekahi Moraki i hanaia ma ka la 15 o Okatoba, 1889, e MANOEL GOUVEIA o Kona Akau, Hawaii, ia John Magoon o Honolulu, i kopeia ma ke Keena Kakau Kope, Oahu, iloko o ka Buke 117, ma na aoao 463 a me 464, ke manao nei o John Magoon i oleloia, ka mea paa moraki, e hooko aku i ua Moraki la i oleloia no kekahi uhakiia o na kumu maloko o ka Moraki i oleloia, oia hoi: ka uku ole ia o ke kumupaa a me ka ukupanee i ka wa i kauohaia ai no ka hookaa ana.
                E hoolahaia aku nei no hoi ma keia e hooliloia aku no ka waiwai a me na pono a pau i hoike a i hoakakaia maloko o ka Moraki i oleloia ma ke kuai kudala akea ma ke keena kudala o James F. Morgan, ma Alanui Moiwahine, ma Honolulu i oleloia, ma ka Poakolu, la 24 o Maraki, 1897, ma ka hora 12 awakea o ia la.
                Penei iho ka hoakaka o ka waiwai ma ka Moraki i oleloia:
                Eono Mahele iloko o ka Hui o Holualoa, o Kona Akau, i hooliloia ia Manoel Gouveia e Sam Ikaika, M. S. Simeona a me, a me Aio a me F. Laioha a me Sera Kia, ma o na Palapala Hoolilo i kope pakahi ia iloko o ka Buke 118, aoao 133, Buke 117, aoao 422, Buke 118, aoao 422, a me ka Apana 1 o ka Palapala Sila Nui 4442, Kuleana 10770, i hoopukaia ma ka inoa o Puuone, a hooliloia ia Gouveia i oleloia ma o ka Palapala Kuai a Keoni S. Kauhaihao a me Kahaka, i kopeia iloko o ka Buke 116, aoao 465.
JOHN MAGOON. Mea Paa Moraki.
                Kuike ke kumu, ma ke dala gula o Amerika Huipuia.
                I ka mea kuai mai na lilo palapala. No na mea hou aku i koe, e ninau ia J. ALFRED MAGOON Loio no ka Mea Paa Moraki. Hanaia Honolulu, Feberuari 28, 1897. mar. 1—4ts.