Ka Makaainana, Volume VII, Number 12, 22 March 1897 — Page 5

5 HONOLULU OAHU, POAKAHI, MA RAKI 22, 1897.

KA MAKAAINANA,
HE NUPEPA OILI PULE.

F. J. TESTA (Hoke),
Ona, Luna Nui a Lunahooponopono.
Wahi Noho, ma Honolulu.

                KEENA: Helu 327. Alanui Moi, ma Waialeale, kokoke i Alanui Konia.

POAKAHI, MARAKI 22, 1897.

                HOOKAHI no helu i koe a pau ae nei hapaha makahiki. Pehea mai ka lehulehu? Ina he mau makamaka makemake nupepa kahi, e pono no ke kauoha pololei mai ia makou me kahi ola pu mai, a e loaa koke aku no me ka eleu. He makehewa ke kauoha mai me ka hooili ukali pu ole mai, a he ano kauoha hoomaopopo ole ia aku hoi ia ma ko makou nei aoao.

                MAI no a hoopoina i ka makou i hoike ai ma kekahi helu mamua iki aku nei no ke "Kumukuai o ke Kuikahi," oia hoi, aia ke ola o ke kuikahi i ka hoihoi hou ae i ke Alii, ke ole ia, aole loa e ola. O ia la, i lohe mai oukou, o ke kumukuai maopopo loa ia o ke Kuikahi Panailike e ola mau loa aku ai. Ke hoolohe mai lakou nei ma ae, pono; aka, ke hookuli, poino.

                LOHE ole no hoi kahi poe la, i ka hoom au i ka hoouna palapala mai ia makou me ka hoike ole mai i ka inoa pololei. Aole i makemakeia ia inoa no ka hoolaha, aia no nae ia i ka manao o ka mea kakau mai, aka, i mea e hiki ai ke hilinaiia. O ka hopena o na palapala huna inoa oiaio, he kapae a he hoomaopopo ole ia. A o kekahi wahi mea iki hoi a makou e noi aku ai i ka oluolu o na makamaka kakau mai, mai no a kakau ma na aoao elua o ka pepa, oiai, he hana hoowahawaha loa ia na na keiki hoonoho hua kepau, no ka maa no ia makou. He mau wahi rula keia i kupono loa e hoomaopopo a e hoomanaoia mai.

                WAHI ka a kekahi poe i olelo ae ai no makou, he kue loa ka makou i ka Banako Hunahuna Hale Leta. Aohe kela i pololei; eia nae hoi, ma ke ano o ke Aupuni e ku nei a me ka hoihoi ole ia aku hoi e ka hapanui o ka lahui, aia malaila ko makou kue. Heaha ka waiwai no kekahi mea e kaena ana i kona aloha aina ke hoahu aku ma ia banako? E kala kahiko loa no makou i hoaiai ai no ia mea, oia hoi, o ka hoahu ana aku ma ia banako, he kokua ana aku ia i ke Aupuni a kakou i hoihoi ole loa ai. A oiai hoi, aohe kanawai e hookikina ana ia kakou e hoahu aku, nolaila, ua koe mai no ia kuleana i ka manao o kela a me keia mea e makemake ana e hoahu. Ma ia i like ole ai ia hana me na hana e ae i kauoha maopopo ia e ke kanawai.

NA NOHO HOOHANOHANO.

                Ua lilo i mea kamailio nui loa ia e na nupepa Amerika ka hana hoomaikai a kekahi mau luna oihana kiekie loa o Amerika Huipuia, oia hoi, na Kuhina Nui Demokarata a me Repubalika, ma ka hookaawale ana i mau noho no ke Aliiaimoku iloko o kahi o na luna oihana o ko na aina e ma na hana o ka la hoohiki o Peresidena Makinile. No ka pomaikai hoi o ko makou poe helehelu, ua unuhi ae makou i ka palapala mahope iho:
Aha Senate o Amerika Huipuia, Komite o ko na Aina E,
Feberuari 8, 1897.
Mea Hanohano RICHARD OLNEY, Kuhina Nui.
                Mahalo:— Ua makemake o Moi Liliuokalani i paa e ike i ka hoohikiia ana o ka Peresidena a me ka Hope-Peresidena i kohoia ma ka la 4 o Maraki, a ua noi mai oia ma o kona mau hoa'loha la no elua noho—hookahi nona ponoi iho a hookahi no kona hoa hele pu.
                He mea hiki ole loa no ke Komite Hooponopono ke hoolako aku i keia mau wahi, koe wale no ma kahi o na luna aupuni o ko na aina e; oiai nae hoi, e hoounaia aku ana na palapala ae no ia wahi ia oe no ka haawi ana aku, aohe nae i manao ke komite ua kuleana e haawiia aku na noho ma ia wahi i kahi mea e ae.
                Eia nae hoi, ma ka manao o ke Komite Hooponopono e hoolako aku oe i mau noho no ka Moi i pau mai loko ae o ke kanaono e hoounaia aku ana ia oe no na lala o na luna o ko na aina e.
                Me ka mahalo loa,
JOHN SHERMAN,
                Lunahoomalu o ke Komite Hooponopono.
                Mai na nupepa kuwaho mai no i loaa ai keia palapala. Ua ko ole ka iini o na poe ake e hoino i ke Alii, a aia hoi ke koikoi maluna o na loea kalaiaina alakai o Amerika Huipuia, e hoike mai ana hoi ia kakou, ua like ole ka moowini o ko laua manao me ko kakou poe o nei a me na poe hoino o laila. He mau keonimana laua a ka lahui e hiki ai ke haawi aku i na mahalo a hoomaikai kupono ana, a e hoohoka loa ai hoi ia lakou nei ma ae.

MEA MAIKAI KE MIHI.

                O ka mihi ana o kahi nona iho, he mea maikai loa ia no ka uhane. Ae, pela io no. O ka makou nae hoi ia e lawe mai nei i ka manaopepa alakai o ke Kuokoa namu o ka auwina la Poaono nei e pili ana no ka "Maikai o ka Mihi no ka Uhane." Eia iho ua manao la:
                "Wahi a ka Adavataisa no ka hana powa limaikaika o Ianuari, 1893: 'Ina i hoikeia ae he ano pihoihoi emi iki mai a me ka noonoo ma ke ala kipi ana o 1893, ina la aole o Kapena Wili se e noiia aku e hoolele mai i kona poe kanaka, alaila, ua lehulehu no hoi na popilikia i hiki ke aloia ae.' Ua lilo i mea hoohoihoi loa na manaopepa hoopono a kamailio moakaka e hoopukaia nei e ka nupepa oili kakahiaka hookahi i nei wa koke iho nei. He mea maopopo loa nae hoi, ina aole o Kapena Wilise i hoopae mai i kona poe kanaka, aole ke Aupuni Moi e hoohioloia a aole hoi e loaa ia kakou he eha makahiki o ka noho ana iloko o ka ehaeha a me ka huikau; aole loa hoi e makau i nei wa e hoopai mai auanei ka Emeperoa o Iapana i na poe eena (Hotspurs) o keia repubalika uuku hoomakeaka' no ke kueia o na pono kuikahi; aole loa hoi e noho iki me ka hopohopo loa o hoopau mai o Amerika Huipuia i kona kuikahi panailike me Hawaii nei; aole hoi, e like me ia i nei wa, he lahui mokuahana iaia iho.
                "Ke kamailio nei makou ma ka moolelo i paa ia makou e olelo ae ai, ina aole i hooleleia mai na pualikoa mai ka Bosetona, aole loa ke Aupuni Moi e hookahulihiaia, no ka mea, ua moakaka loa ma na olelo hoike i hoohikiia a Mesasa Damona, Walakahauki, a me kahi poe e ae, ma ke kumu aia ka ke kalele ana o ke ala kipi i manaoia maluna o ka hoopaeia mai o na koa o Amerika Huipuia. Pela io no ka, wahi a Mekia-Generala Sopa i hai ai, ma ka hooia a ka olelo hoike, aole loa oia e lawe i ka hoomalu ana o na pualikoa o ke Aupuni Kuikawa aia a loaa aku iaia na hooia ana mai ia Kuhina Amerika Kiwini e kokua aku no na kanaka o ka Bosetona i na pualikoa o ke Aupuni Kuikawa. Ina aole na pualikoa o Amerika Huipuia i hoopaeia mai, aole loa o Misita Kole a me kona mau hoa'loha e komo ma kekahi kulana hoohaahaa i nei wa."

I WAIHONA HOOKUONOONO.

                O ke kumuhana Waihona Hookuonoono a Pe residena Kaulia o ka Ahahui Aloha Aina, he kumuhana ia na makou e kokua ikaika loa ai, koe wale no nae hoi e like me na hoakaka ana ma ka helu i hala, oia hoi, ma ke ano nui, aole loa i kupono no kekahi ahahui kalaiaina ke hoala i waihona hoahu a piepiele dala. A e like no hoi me na hoaiai ana ma ka helu i hala, pela mai no hoi ia i nei, aole loa e hiki ke hoololiia ae ka makou i manao ai; he mea hiki a kupono ole loa ke hoohui a ke awiliwiliia na hana kalaiaina me na hana hoahu, hookuonoono a piepiele. Ua paa loa keia manao iloko o makou, eia nae, aole ia he kue aku i ke kumuhana hookuonoono.
                Ina he ake io ko Pe residena Kaulia a me Kakauolelo Enoka e loaa ona waihona hana no ka ahahui, e pono e auhau aku i na lala a pau e uku malama mau, a i ole ia, ma ka makahiki. He mea makehewa a ku loa i ka hoohilahila no ke ku ana o kekahi ahahui me ka manao e ao a e alakai aku i ka lahui e kupaa mau no ke "aloha aina, aloha lahui a aloha Alii" ke nele me ka mea e hiki ai ke hoohana aku, a i ka wa hoi e ulu a e ku ae ai o kekahi hana, alaila, o ka makilo hele aku la no ia iwaena o na hoa'loha a me na enemi, a o ka hoohilahila oi loa aku o ko makou hoehaehaia, o ia ka hele aku iwaena o na enemi. Aohe olelo ana no na hoa'loha, o kakou no hoi ia, eia nae, he mea hoihoi ole ka noke mau. Pela no a me ka Ahahui Kalaiaina. O keia mau hana makilo ka makou i makemake loa ai e ike i ka hookiia.
                Ke pau hoi ka makilo hele ana, a ku ae ka hana lulu mau, ua manaolana makou e pani loa ia aku ana na nuku o na poe waha-nunui m a ka haanou—he aloha aina makou, a i ole ia, he aloha aina au, he aloha aina o mea, a me mea, a pela wale aku. E hoike ae i ke aloha aina ma ka hana, aole hoi ma ka walaau a haanou me ka haanui wale iho no. Aohe waiwai o ia ano hana haanui ke ole e lulu ae no ka waihona o ko kakou ahahui, (auwe, no oukou no ka hoi, aole no makou, no ka mea, aole o makou ka wahaolelo). O ka makou nae hoi ia e paipai aku nei i na lala a pau, e lulu ae i waihona hoohana, a aole hoi i waihona hookuonoono. E hookaawale loa aku ia mau mahele a elua.
                Ua hoomaopopoia mai nae hoi ia makou, o ka manao nui ka ma nei kumuhana, o ia ka nana a hoomaopopo ana no mua aku nei o ko kakou noho ana pili lahui. Ina pela io ka manao, aole loa ma nei hoohuikau ana i na hana kalaiaina me hookuonoono ka mea e hiki ai. O ka hana pono maoli no i mea e hookoia ai o nei iini hookuonoono, o ia ka hooikaika ae a kokua aku i kekahi mau ahahui hookuonoono i ku mua iwaena o na wahine a me na kane aloha aina. Eia no hoi ia mau ahahui ke ku nei me kekahi waihona o na hoahu ana i hiki ke heluia ma kahi o na tausani dala. O ka ahahui o na kane, aia ia malalo o ka malama a hooponopono ana a ko makou hoa'loha Aberahama (Abraham Fernandez), a ua unuhi aku hoi kahi poe i ka lakou mau hoahu ana. A ina he manao oiaio maoli loa nei manao hookuonoono o Peresidena Kaulia, hooikaika ae ke kokua ana i ka ahahui a ia makamaka a hoa'loha oiaio o kakou. Ua kue no makou mamua i ka wa i hoeueuia ae ai o kela ahahui hookuonoono maloko o ka nupepa Hawaii Holomua, no ke kumu aole i hoea mai ka wa kupono no kakou e hana ai, a ua mau no ia manao o makou a hiki mai no i nei wa. Eia nae hoi, ua ahona ilaila ka-