Ka Makaainana, Volume VII, Number 24, 14 June 1897 — Page 6

Ka Makaainana.

IOSEPINE

KA

EMEPERESE PUUWAI OLU O FARANI.

MOKUNA X.

KA PONI ANA.

Mai ka Helu 28

            Ma o ka maluhia i loaa ai ma o ke kuikahi la o Amiena iloko o ka makahiki 1802, ua weheia ka puka e komo aku ai i Europa o na poe makaikai e hele ana mai Enelani mai.  He mau tausani iloko o ia aina e mahale ana ia Napoliona.  Ua piha na Tuileri, Sina Kalauda a me Maiamaisona i na poe kaahele mai na mokupuni mai, he aina hoi i noho hakoko me Farani no kekahi manawa loihi.

            Ma ka la 18 o Mei, 1804, ma ke kauoha a ke Senate, na kuahauaia o Napoliona i Emeperoa no Farani.  Ua hoounaia kela kauoha i na keena a pau no ka waiho ana aku imua o ka lahui no ka hoike ana mai i ko lakou manao.  Ma ke koho ana o na makaainana ua ikeia he 3,572,329 o lakou i koho ma ka ae, a he 2,569 wale no ma ka hoole, he hoike ana mai hoi ia i ka lokahi o kekahi lahui i ike mua ele ia.

            I ka la mahope iho o keia hookiekiea ana o Napoliona ma ka nohoalii emeperoa, ua haawi ae la oia i kekahi anaina ike alii maloko o na Tuileri, malaila hoi o Iosepine me na manao kaniuhu e hoopoluluhi ana i kona noonoo iloko o kela hora o ke kiekie, i puka ae ai no ka manawa mua loa ma ke ano he Emeperese no Farani.

            Iloko o kela kauoha e kaahaua ana ia Napoliona i Emeperoa no Farani, ua kukala pu ia maloko o laila e ili aku kela ihiihi maluna o kona ohana ma ke ano he waiwai hooili a kauoha paha i ke mamo.

            He hana nui na ka Emeperese ka hoao ana e kaomi iho i kona mau manao hopohopo, a ua nele hoi kona naau i ka hauoli ma keia kau ana ae o na i ka oioina kiekie loa o ka hanohano.  Ua hoomaopopo pu iho la no hoi oia i ka nohoalii o kana kane, he nani a he hoomakua ma ka nana ana, ua kukuluia nae maluna o ke kahua nawaliwali.

            Ma keia anaina i ikeia ai kekahi heluna kanaka nui i ike mua ole ia ma na anaina o ia ano like ma Parisa.  Ua piha ke ao holookoa i ke kaulana o Napoliona, a ua lehulehu na kanaka kiekie o na aina e i hele mai e ike iaia.

            Ua pii pu ae la no hoi me ko Iosepine kulana a i ka iliwai like me ko na moiwahine kiekie o Europa.  Ua oi pakela ae hoi ka mana a me ka ikaika o kana kane mamua o na moi e ae a pau e hoopuni ana iaia, a ua loaa iaia na hoomaikai a me na mahalo ana i loaa ole i na moiwahine e ae.

            Ua kukalaia ae o ka la elua o Dekemaba, 1804, o ia ka la e pomia ai o na alii hou o Farani, a maloko hoi o ka luakini Nota Dame e malamaia ai ka oihana poni.  Ua hele mai ka Pope mai Roma mai e kau iho i ke kalaunu maluna o keia poo i kiekie mai ke kulana haahaa ae.  No umi keneturia i hala aole loa i loaa i kekahi moi ka hanohano e like me keia.

            He la malie a kalie ua la poni la, he puanuanu nae.  Aole hoi i ike mua na paia elemakule o Nota Dame i kekahi anaina nani a kinohinohi e like me ia a la kou e ike la ma keia la.

            Mawaho o ka luakini a ma na alanu hoi e hiki aku ai ilaila, e ikeia ana na kaa i kinohinohi ia me ke gula, e hukiia ana e na lio i hoaahuia me ua lole nani; maloko o na kaa e noho ana na luna aupuni a me na alii kiekie o Farani, a me na aupuni e ae o Europa iloko o ke lakou mau aahu piha.  A i ka nana ana aku hoi i ke anaina iloko o o ka luakini me he, moana o koa la no ka nenoe papa mai o ka hulu okalike maluna o na papale o na wahine. 

            Ua ikeia aku la ka Emeperese i aahuia me ka pahoehoe keokeo oi hoonaniia me na lau gula i humuia, a i kinohinohiia hoi me na pohaku daimana.  Maluma o kona poohiwi e kowelo ana he koloka veleveta kai-ina me ke kaekae pahoehoe ula, a e uhi paapu ia ana hoi me na nalemeli gula.

            Aole i pau.

 

            E ele o Lutanela Makai Kekai, pakele ai he wahi keiki Kepani uuku mai piholo i kahawai aenei, malalo aku o ka piko o alanui Hotele.  Nana i kikoo aku a unuhi mai—i kakahiaka Poakahi, Mei 31.

            Ahiahi Poakahi, Mei 31, i helo io aku ai no ka mokumahu Kopetica no Kapalakiko, a i ka Poakalu mai no hoi ka mokumahu Auseteralia.  O na hiona mau no ka i ikeia me ko ka pueli puhiohe kaiehu aku.

            He 538 ohua Pake a ka mokumahu Kopetica i lawe mai ai i ka Poakahi Mei 31, he 300 o

l@ e poe paahana malalo o @na@ e.  Ua hookuu koke ia @aanei@ ua helu ekahi, oiai, ua @na e m@ a hoike o ka moku @kakou i @ hora a me 45 minute @mau@ olo, ka oi loa hoi i @ hoi @palua nei i pau nui ai i @ panikuuia na limahana a ua @kai, no na mahiko like ole.

 

Make ia Wahine Haole Kupa.

            Mamuli o ko G. Wese haawi pio ana iaia iho no ka loohia i ma’i hookaawale, ua lilo kela i mea na kana wahine e noonoo nui ai a waiho-a-mai oia, a pela oia i waiho ai no kekahi mau la a make okoa i ke awakea Poaha, Mei 27, ma ko laua wahi noho no ma ke kihi komohana o na alanui Beritania me Puowaina.  Oiai oia e waiho ana me ka popilikia, ua nui ka hopohopoia nona a ku okoa io naila no ka make i kana.

            Ua hanauia oia ma ka Mokuaina o Maine, Amerika Huipuia, i Aperila 1 he 61 makahiki i hala ae, a he 25 o ia mau makahiki i hoohalaia e ia ma o kakou nei.  I kahi auwina la mai i hoolewaia aku ai kona kino, malalo o na lawelawe haipule ana a ka Rev. D. P. Bine, oiai, he hoahanau oia no ka Ekalesia Kalawina o Kaukeano, a nalo ma kekahi o na pa ilina o uka o Maemae.  He kane a he moo puna ke u aku nei nona.

            Mahope iho o ko ka wahine make ana, ua hoolilo aku o G. Wese i kona waiwai paa a pau loa ma Hawaii nei ma kekahi palapala hoolilo i ka moopuna a kana wahine, a laua no hoi i hauai ai e nui, oia ke kaikamahine a M. T. Donele me ke kai kamahine a ua o Misasa Wese i lilo ai i ke kuulala ulaia ma o kakou nei a i kamaaina loa ia no hoi i na wa i aui aku.

 

Hoku vs. Regimana Ekahi.

            Mahope iho o ka hao ana o hookahi Poaono i paani kini popo ole ai, ua ulele ae na hui maluna ae i ka auwina la Poaono, la 5 nei.  Aohe no i nui loa na poe makaikai e like me ko na lo mua aku o ke kau.  He keu keia a kekahi o ua paani ulolohi loa ana, ua piha he 2 hora me 20 minute a eo no hoi i i ka inoa hope me 15 kue ia 14 ai-puni, eia nae, ua nui ka maikai o ka paani ana, o ka oi i keia kau.  Penei iho ka hoike o na puni i loaa ma na komo ana, he 9 o ka mua a he 8 hoi o ka hope

 

1 2 3 4 5 6 7 8 9

Hoku   0 1 0 2 4 0 1 6 0—14

Reg 1   3 1 0 1 2 3 3 2 *—15

 

He Kepani palaka a hoohema hema ka i kaa malalo ae o na lio o ko ke Komisina Beritania kaa i ka auwina la Poaono, Mei 29, ma alanui Hotele aenei, a ua hina aku ilalo.  Ua lele koke iho ke Komisina ilalo a hookau i ka mea i eha ma kona kaa a laweia no kekahi hale kauka, ua ikeia mai aohe poino i loaa, he makau wale no.

 

S. K. PUA.

He Agena no na Waiwai Paa

He Mea huli i na Kuleana Aina i mea e maopopo ai;

He Mea Ohi i na Aie i hiki ole ke Ohiia e na Poe no lakou na Aie, a

He Mea Hana i na Ano Palapala Pili Kanawai a pau.

KEENA HANA:—Ma ke keena o R. W. Wilikoki, Alanui Konia                aug. 31—1mk.

 

Hoolaha Manao Hooko a Kuai a ka Mea Paa Moraki.

            Mamuli o ka mana kuai i hoikeia ma kekahi Moraki i hanaia e H. KAUAIHILO a me POIPE, kana wahine, o Kapaka, Koolauloa, Mokupuni o Oahu, ia Isaac Testa, ma ka la 20 o Augate, M. H. 1889, i kopeia ma ke Keana o ka Luna Kakau Kope ma Honolulu, Oahu, iloko o ka Buke 119, ma na aoao 76, 77 a me 78.

            Ke hoolahaia aku nei ma keia ua manao ka Mea Paa Moraki e paniku aku i ka Moraki i oleloia no ka uhakiia o ke kumu aelike, oia hoi, ka uku ole ia o ke kumupaa a me ka ukupanee i ka wa e kupono ai no ka hookaa ana, a mamuli hoi o ia hooko ana e kuai aku ai ma ke kuai kudala akea ma na Keena Kudala o W. S. Luce, Luna Kudala, ma ka

POAKAHI, LA 17 o MEI, 1897,

MA KA HORA 12 AWAKEA.

            O na wahi i hoakakaia ma ka Moraki i oleloia, ua hoikeia malalo iho.

            ISAAC TESTA,

            Mea Paa Moraki,

Kumu:  Kuike, ma ke dala gula o Amerika Huipuia.

I ka mea kuai mai na lilo palapala.

            No na mea e ae i koe, o ninau ia A. Rosa, Loio, Alanui Kaahumau, Honolulu.

            Honolulu, Aperila 10, 1897.

 

            Eia iho na wahi a hooliloia aku ana:

            Akahi—O kela mau apana aina a pau loa e waiho la ma Punaluu, Koolauloa, Mokupuni o Oahu i oleloia, a i hoakakaia maloko o ka Palapala Sila Nui 1294, Kuleana 4364, no Kekaumiumi—Ili 1.50 Eka.

            Alua—O ke kuleana a pau loa i mahele ole ia o ka Mea Hana Moraki i oleloia iloko o ke Ahupuaa o Puheemiki, ma Koolauloa i oleloia i hoakakaia maloko o ka Palapala Sila Nui (Aina Aupuni) 3053 no Kaaimanu a me kahi poe e ae—Ili 45 38-100 Eka.  O kahi i oleloia, o ia no hoi kahi i hooliloia i ka Mea Hana Moraki e J. N. Kaouli ma o ka Palpala Kuai i hanaia ma keia la like me ka Palapala Moraki a kopeia ma ke Keena Kakau Kope ma Honolulu i oleloia, iloko o ka Buke—, ma na aoao—.

            Akolu—O ka aina a pau loa i hoakakaia maloko o ka Palapala Sila Nui 3012, Kuleana 4331, no Kamano nona hoi ka ili o 1.40 Eka, e waiho la ma Kapaka i oleloia, o ia no hoi kahi i hooliloia mai e S. Waiwaiole i ka Mea Hana Moraki.

            Aha—O na aina a pau i hoakakaia iloko o ka Apana 2 o ka Palapala Sila Nui 2909, Kuleana 4055, no Kaukaliu, a hooliloia i ka Mea Hana Moraki e Keaka, kaikaina a hooilina hookahi ma ke kanawai e ola ana o Kaukaliu i oleloia, e waiho la ma Kapaka i oleloia.    apr. 12-5ts

 

            Ua hoopaneeia ke kuai maluna ae a ke awakea o ka Poakahi, Mei 17, 1897.

            Ua hoopanee hou ia ke kuai maluna ae a ke awakea o ka Poakahi, Mei 24, 1897.

            Ua hoopanee hou ia ke kuai maluna ae a ke awakea o ka Poakahi, Iune 21, 1897.

 

Kauka Amana

(CHOW KOCK SUN, M. D.)

Helu 109, - - Alanui Maunakea,

(Quong Sing Tong.)

            Oia no kekahi o na kauka o ka Halemai Pake ma Keoneula, Kapalama i hookohu pono ia no kona makaukau ma na hana lapaau ma’i o kona aina.

            Ua makaukau loa oia e lawelawe i na ano ma’i a pau o ke kino, e laa ke koko ina, ka hano, ke kaokao, na ano eha a pau, na ma’i lele, na ma’i kunu, na ha’i na palapu, a pela aku, me ka eleu a me ka ike i lo a iaia no ka hoopalekana ana.  O na ano ma’i no a pau, aohe mea koe, i nele iaia.  E hewa ole no hoi ke ui ae i kona ike, malia o loaa no he wahi ponoi.  Oluolu loa ma ke kuka ana a emi no hoi ma ka auhau ana.

            MANAWA HANA:  Mai ka hora 9 a. m. a ka hora 2 p. m., a mai ka hora 3:30 p. m. a po a ao.

            E hoomanao nona a mai no na poe a pau e heluhelu e a i keia hoolaha a hoopoina iki nona.  He kokua a he pale oiaio oia no ka manawa popilikia.

apr. 26—6m.