Ka Nonanona, Volume II, Number 3, 5 July 1842 — Page 9

KA NONANONA.
"E ka mea hiamoe, e hele oe i ka nonanona, e nana i kona aoao a e hoonaauao iho." Solomona.
Buke 2. HONOLULU, OAHU, IULAI 5, 1842. Pepa 3.

NO KA MOE KOLOHE. Helu 4.

                I ike kakou i ka inoino o ka moe kolohe ana, e nana kakou i kekahi poe kahiko i oleloia ua hihia lakou ma ia hewa. E nana mua i ko Sodoma poe. E heluhelu oukou i ko lakou mooolelo, Kinohi 19. Aole anei he mea weliweli loa ko lakou hopena? Owai ka mea makemake i ko lakou make ana? Pau loa kolaila poe, na kane, na wahine, a me na kamalii, a me na mea a pau e pili ana ia lakou, i ke ahi. Pau ko lakou aina, a me na mea e pili ana, i ka poho ilalo, a malaila, aia he loko pilau i keia wa e noho nei kakou. Aole nae i pau ko lakou pilikia malaila. O ke ahi a me ka luaipele i iho mai, ma ka lani mai; a hoopau mai i ko lakou aina, he mea liilii ia; ua like ia me ka malie loa, ke hoohalikeia me na mea i hiki mai ia lakou i kela ao mahope. Eia ka Iuda, pauku 7. "E like me ko Sodoma poe a me ko Gomora hoi, a me ko na kulanakauhale e kokoke mai ana, ua lilo like lakou i poe moe kolohe, me ka hahai aku mamuli o na kino e, ua hooliloia mai no lakou i mea hoike e ehaeha ana i ka hoohewa io ia ma ke ahi aa loa." Pehea, pono anei e hahai mamuli o ia poe? Aole anei i hahai ka poino i ka poe hewa?
                E nana hoi kakou i ka poe mamo a Iseraela, i ko lakou noho ana ma Sikima, ma ka aina o Moaba. Ua haule nui ko lakou kupapau malaila. Pehea? Heaha ka mea e make ai? O ka pahi kaua anei o ko Moaba poe koa? O ka pule anaana paha a Balaama? Aole loa. E heluhelu kakou ma ka palapala. Nahelu, mokuna 25, alaila, ua akaka lea ia, o ka moe kolohe me na kaikamahine a Moaba, oia ka mea e eli ai ko lakou luakupapau, oia ka mea e make nui ai ua poe nei. I aku la o Paulo, Korineto mua 10: 8. "mai moe kolohe kakou e like me ko lakou moe kolohe ana, a make iho la i ka la hookahi, he iwakaluakumamakolu tausani." Aloha ino! Aole anei i hahai ka poino i ka poe hewa?
                O ka moe kolohe, oia ke kumu o ka hewa, a me ka poino he nui loa no. E nana kakou ia Hamora ke alii o ko Hiwi poe, aia ka mooolelo nona ma ka palapala Kinohi, mokuna 34. Ua olelo ia, ua pepehi ia oia a me kana keiki, a me na kane a pau o kona kulanakauhale; ua laweia'ku na wahine a me ka waiwai a pau! Owai ke Alii nui a me na koa ona i hele ku e mai, a pepehi i ua poe nei? Aole. O ka moe kolohe ana a Sekema, ke keiki a Hamora, me Dina, ke kaikamahine a Iakobo, oia ke kumu o ia luku ana. Ua ike koke ua poe la, i ka oiaio o ka ke Akua olelo, "Ua hahai ka poino i ka poe hewa."
                E nana kakou i ka poe mamo a Iseraela, aia e noho la iloko o ka hale o ke Akua, e hookiekie ana i ko lakou leo, a e uwe nui ana. No ke aha lakou e uwe ai? E hoolohe i ko lakou leo; "E Iehova, e ke Akua o Iseraela e, no ke aha la i hiki mai kekahi ohana maloko o ka Iseraela keia iloko o ka Iseraela, i nalowale i keia la"? Heaha ka mea i nalo-