Ka Nonanona, Volume II, Number 10, 11 October 1842 — Page 48
48 KA NONANONA. [OKATOBA,
E lele no mai o a o,
Ke ala o ua pua hou,
A honi kanaka,
E lilo keia momi hou,
I hoku lilelile mau,
Maluna o ke ao.
Honolulu Oka. 5, 1842.
HE NANE.
No ka bipi a me ka manu a me ka lio.
Hele aku kekahi bipi i ke kula, a loaa ia ia kekahi mauu maikai, e ulu nui ana; ono loa ia i kela ai, a o ka ai nui iho la no ia me ka noonoo ole a me ka hopohopo ole. No ka piha loa o kona opu i ka ai, loaa ia ia ka mai a make koke iho.
Hele ae la kekahi lio noeau a ike i ka make o ua bipi nei, i aku la, "nani ka poino o ka pakelaai! Kainoa o ka ai pakiko ka pono; aole ai a piha loa. Ina pela oe, ina ua ola oe a liuliu hou aku; eia ka! ua pakela ai oe, a o ka make no ia. Nolaila, oia ko'u noonoo ia'u iho, aole au e ai nui loa i ka ai hookahi ana. Ina he nui ka ai, a he ai ono no hoi, e ai pakiko no au, i loihi kuu ola ana." Pela ka lio.
Heaha ka mea i aoia mai ma keia nane.
Inu waina.
Ua lohe au i kekahi manu liilii maluna o kekahi moku e holo ana ma ka moana; he manu laka loa, o kanere kona inoa. Maikai kona kani ana. E ai ana ke kapena o ua moku nei i kekahi la me kona mau hoalauna, lele mai la keia wahi manu a kau ma kona poo, me kona kani maikai. A inu ke kapena i ka waina, haawi i kau wahi waina i keia manu, inu iho la ka manu, a o ka ona no ia;--ona nui loa a me ka mai. A liuliu iki iho ola, a haawi hou kela kapena i waina nana, aole inu iki, aole loa no. Lele loa aku me ka makau nui i ka waina.
Pehea keia manu? aole anei oi aku kona naauao imua o kekahi poe kanaka? Inu ke kanaka a make i ka ona, hele a inu hou no!
Aloha oe, e ka Nonanona.
Eia ko'u wahi manao hou, e hoolaha ae ma keia pae aina. No ka aoao o ka Pope.
I ko'u manao ea, he okoa kela aoao, a he okoa ko Iesu Kristo aoao. Eia na mea e akaka ai ia'u.
I ko lakou komo ana i keia aupuni, aole me ka ae aku o na li, a me ka makemake o na kanaka oonei. Aole ae na'lii i kinohi; aka, ua hookuke aku la ia lakou, me ka makemake ole o na 'lii, a me na kanaka. A i ke komo ana mahope iho nei, aole me ka ae pono aku o na 'lii. Ua hooweliweliia na 'lii, i ka manuwa Farani, a me ka olelo huhu loa o lakou; a nolaila, ae aku, no ka makau; aole he ae oluolu kela.
Pela anei ka ka Haku kauoha i kana mau haumana? aole kakou i heluhelu pela ma kana olelo. He manao kanaka wale no kela, aole na ka Haku. "E noho malie hoi, e like me na manu nunu." Mataio, 10: 16. Pela ka Iesu kauoha.
Eia hoi kekahi mea e akaka ai, he ekalesia okoa ko ka Pope, he okoa ka ka Haku. I ka lakou hana ana, he kapu i na kahuna pule ke mare. He kapu hoi kekahi mau mea ai ia lakou; aole pono ke ai i ka io i kekahi mau la. Aka, menei ka palapala hemolele. "Ke olelo paka mai nei ka Uhane, a i ka manawa mahope, e haalele kekahi poe i ka manaoio, e malama ana i na uhane hoopunipuni, a me ke ao ana a na daimonio; e wahahee ana me ka hookamani, a e hoaaia ko lakou naau, [me ka hao wale;] E PAPA ANA I KA MARE, A ME KEKAHI MAU MEA AI, a ke Akua i hana'i, e aiia'i me ke aloha, e ka poe manaoio me ka ike i ka olelo aiaio." I Timoteo 4: 1, 2, 3. Ua pili pono keia olelo i na kahuna pope, a i ka lakou hana, i keia wa. Na'u na ALOHA.
NA LIMAIKAIKA e hoopuka'ku.